Пушэн кодэла, ко адинон

Андэ Библия нисо на ԥэнэнпэ пала абычаё тэ ԥэнэн пала стакано. Но васо лэ Иеговастирэ свидетеля на терэн када?

Кай бут мануша исин абычаё тэ ԥэнэн пала стакано лэ виноса (или авэр алкаӷольни напиткоря), и андэ разни страны кадэлэстэ моӷут тэ авэн пэстирэ особени маменторя. Дэкала и мануша англа кода, кай тэ ԥэнэн пала стакано, спэрва чокаются лэ стаканонэнца. Кодэва, ко ԥэнэн пала стакано, обычно жылает лэ мирости бах, зор, тэ жувэн бут бэрша и бут, со авэр. И всаворэ ԥэнэн: «Тэ дэл о Дэл». Кадя вонэ сыкавэн, кай подритярэн кадэла алава, ваздэн о стакано и пэн о вино. Бут мануша на диқэн андэ кадэва абычаё нисо вэрыто, и вонэ када терэн, кай просто тэ авэл шукарнэс и драго англа миро. Но исин важни причины, васо лэ Иеговастирэ свидетеля на ԥэнэн пала стакано.

Канешно, и дила най андэ кода, кай и христианоря на камэн тэ ԥэнэн аврэнди пожылании пала бах и зор. Например, о руководящё совето андо пэрво вико, в концэ андэ пэско письмо ла собранияти, пистросардя алав, саво можно тэ пэрэандярас кадя: «Лашо зор тумэнди!», «Тэ авэн тумэ састэ!» или «Тэ авэл тумэнди лашымос!» (Дила 15:29). Дэкала лэ Дэвлэстирэ мануша взвинаспэ каринг и царёря кацавэ алавэнца: «Тэ жувэл мэрно ӷосподино вечно!» или «Тэ жувэл о царё вечно!» (1 Царей 1:31; Неемия 2:3).

Катар вобще жыля тэ ԥэнэн пала стакано? Андэ «Сторожэво башня» пала 1 январё 1968 бэрш (пэ английско шыб) сас пистромэ и алава анда «Британско инцыклапедия», сави вимэклэ андо 1910 бэрш: «Май ӥто всаворэстар о абычаё тэ пэн важ варикаско зор жыля анда дэлмутни время. Тоди, кала терэнас религиозно обрядо, пэнас важ и дэвла или важ и мулэ. Кала и ӷрекоря и римляноря бэшэнас пала столо, вонэ анэнас андэ жэртва лэ дэвлэнди вино, и кала стонас ритуальни мисяйли, пэнас важ пэстирэ дэвла, ай кадяжэ важ и мулэ». Инке андэ инцыклапедия ԥэнэнпэ: «О абычаё тэ пэн важ лэ жундэ манушэнго зор сԥангло лэ обрядонэнца, кай анэнас жэртвы лэ дэвлэнди» (томо 13, страница 121).

Ай со пистромэ андэ книжки, савэ вимэкэн андэ амарэ деса? Уӷанам, со ԥэнэнпэ андэ ек справочнико пала алкаӷольни напиткоря кай и разни народоря, саво вижыля андо 1995 бэрш. О абычаё тэ ԥэнэн пала стакано «май ӥто всаворэстар жыля анда дэлмутнэ обрядоря. И мануша анэнас андэ жэртва лэ дэвлэнди свынти подаркоря — о рат или о вино, — кай вонэ тэ исполнят лэндирэ жылании, или молитвы, савэ вонэ ԥэнэнас кацавэ алавэнца: «„Тэ жувэн бут бэрша!“ или „Тэ авэл лашо зор!“» (International Handbook on Alcohol and Culture).

Канешно, если варисавэ предметы, рисункоря или абычаи ужан анда дэлмутнэ язычески веры, када най вся и время сыкавэл, кай важ и чачунэ христианоря вонэ на поджал. Например, ӷранаты или, сар пистромэ андэ Библия, ӷранатови ԥаба. Андэ ек ашунгли библейско инцыклапедия пистромэ кадя: «Дицол, и ӷранаты сас свынти символоря и кай и язычникоря». Но о Дэл всаек приԥэндя тэ стерэн ӷранатови ԥаба анда ҭава тэлэ пэ платья кай о ӷлавно рашай, ай кадяжэ, кай тэ авэн ӷранаты пэ харкумунэ колоны андэ лэ Соломоноско храмо (Исход 28:33; 2 Царей 25:17). Кадяжэ раньшэ и абручальни янгрусня ԥиравэнас, важ кода кай кадэлэстэ сас религиозно значения. Но адес бут мануша на ӷанэн пала када, и важ лэндэ абручально янгрусни просто сыкавэл, кай о мануш андо брако.

Ай со можно тэ ԥэнас пала кода, сар использовали о вино андэ религиозни обрядоря? Например, и мануша, савэ жувэнас андо Сихемо и тэлёнас лэ Ваалости, «жылэ андэ пэстирэ дэвлэско цэр. Котэ вонэ ханас, пэнас и дэнас амрая лэ Авимелехос», лэ Гедеоностирэ шавэс (Судей 9:22—28). Тоди исин вопросо: линоп варико анда верни лэ Иеговастирэ служытеля тэ бэшэл пала столо котэ, кай и мануша мангэнас лэ дэвлэн тэ стерэн о найлашымос лэ Авимелехости? Кала о Амо́со пистрояс пала время, кала бут мануша андо Израилё жанас против о Дэл, во пистросардя: «Вонэ пашлён пэ ӥда, сави линэ андо залоӷо, и андэ пэстирэ дэвлэнго цэр пэн о вино, саво залинэ кодэлэндар, кас дошалярдэ» (Амос 2:8). Линоп лэ чачунэ Дэвлэстирэ служытеля тэ бэшэн пала столо кодэлэнца, ко анэнас вино андэ жэртва лэ дэвлэнди или пэнас важ лэндэ? (Иеремия 7:18). Или линоп лэ чачунэ Дэвлэско служытелё тэ ваздэл стакано и тэ мангэл варисаво небесно зор тэ повлияет пэ варикастири жызня или тэ блаӷословий варикас?

Лэ Дэвлэстирэ служытеля дэкала тожэ ваздэнас упрэ и вас и мангэнас пала помощь. Но вонэ ваздэнас вас каринг о чачуно Дэл. Например, амэ адиносарас андэ Библия: «О Соломоно терделя паша лэ Иеговаско жэртвеннико... и кала вазгля и вас каринг о нэбо, ԥэндя: «Иегова, лэ Израилёско Дэл, нинай кацавэ Дэвлэс, сар ту... Ашун па нэбо, кай ту жувэс, ашун и простисар (1 Царей 8:22, 23, 30). Ай акэ инке ек примеро: «о Е́здра хвалисардя лэ Иеговас... Всаворэ вазглэ и вас и ԥэндэ: «Аминь! Аминь! Вонэ пэлинэ пэ чанга и тэлелэ лэ Иеговасти жы каринг и ԥув» (Неемия 8:6; 1 Тимофею 2:8). Амэ полас, кай кадэла верни лэ Дэвлэстирэ служытеля ваздэнас вас каринг о нэбо най важ кода, кай тэ мангэн пала помощь варисавэ дэвлэс, пэ саво ԥэнэн удача (Исаия 65:11).

Бут мануша адес, кала ԥэнэн пала стакано, возможно, на гиндон, кай кадя вонэ мангэн варисавэ дэвлэс пала помощь. Но всаек вонэ нащи объяснин, васо вонэ ваздэн упрэ стаканоря виноса. Если вонэ на загиндонпэ, со када значит, када на сыкавэл, кай и чачунэ христианоря тожэ трэбуй кадяжэ тэ терэн.

Лэ Иеговастирэ свидетеля на ритярэн и авэр традицыи, савэ исин кай бут мануша. Например, кала и мануша отдэн и слава лэ гербости или лэ флагости, савэ исин андо ӷосударство, вонэ на гиндон, кай кадэлэстэ исин религиозно значения, кай вонэ кабута тэлён кадэлэ симвалонэнди. Хоть и чачунэ христианоря на тердярэн аврэн, кала вонэ када терэн, екжэнэ вонэ нэ участвуют андэ када. Лэ Иеговастирэ свидетеля старыинпэ андэ кадэя время тэ андярэн пэс годявэрнэс, кай тэ на холярэн аврэн. Но со бы тэ на авэл, вонэ на лэна тэ участвуют андэ политически цэремонии, важ кода кай кадя вонэ жылоп против лэ Дэвлэстирэ законоря анда Библия (Исход 20:4, 5; 1 Иоанна 5:21). Адес бут мануша на гиндон, кай тэ ԥэнэн пала стакано — када религиозно обрядо. Но всаек исин важни причины, васо и христианоря на терэн када. Кадэва абычаё жыля анда дэлмутнэ веры и дажэ андэ амарэ деса шолпэ, кабута и мануша обратинпэ каринг о нэбо пала помощь или мангэнпэ каринг варисаво небесно зор (Исход 23:2).