O articolo sicadea că, sea le manușa hai le îngeri sas-le hamisarde ande iech bari problema cai vazdinea-pe: i sfințirea le anaveschi le Iehovasco. Tha, mai vazdine-pe vi aver dui problemea: dacă o raimos le Iehovasco si o mai lașio hai dacă le manușa va daștina te așen lesche loialo.

Sostar phenas că mașcar cadai problema si o anav le Iehovasco hai leschi sfințirea? Te dichas trin buchia.

I dintuni: andi bar le Edenoschi, o Satan camlea te meliarel o anav le Iehovasco, hai o modo sar silo vo dichlo. Prin o pușimos cioricano cai șiutea-les la Evache, o Satan camlea te phenel că o Iehova ci si iech lașio Del hai anda codoia că silo neorta ci mechel pesche slujitoren te cheren so camen. Pala codoia, o Satan doșardea le Devles hai phendea că silo iech hohamno. Vo meliardea o anav le Iehovasco. Cadea, arăslea te avel o „Beng” cai însemnol „hohamno”. (Ioan 8:44) Anda codoia că i Eva pachiaia le hohaimata le Satanosche, ci mai așundea le Devlestar hai cadaia sicadea că voi ci mai camlea ca vo te avel laco conducătoro. (Gen. 3:1-6) O Satan phenel vi aghies hohaimata anda o Del. Daștil-pe că le manușa cai pachian cadal hohaimata ci așunen le Iehovastar. Cadea că, anda le slujitori lui Devlesche, o mai baro neortomos si ca o anav le Iehovasco te avel meliardo. Anda codoia si cadea de but pharimata hai nasulimos pi phuv.

I duito: anda o miștimos sea le jenengo, o Iehova si hotărâme te uijiarel pesco anav caște chosel sea le hohaimata cai sas lesche andine. Cadai buchi si zurales importanto anda o Iehova. Cadea că, vo phenel: „Va avela te sfințosarav mânro baro anav”. (Ezec. 36:23) O Isus phendea claro so trebul te avel po iechto than ande le manglimata pesche slujitorenghe cana phendea: „te avel sfințome chio anav”. (Mat. 6:9) Andi Biblia, sicavel-pe mai butivar chichi de importanto si te anas pachiv le anavesche le Iehovasco. Mai dur, va avela te dichas chichiva exemplea. „Den le Iehovas i pachiv cai si lesche anaves.” (1 Cron. 16:29; Ps. 96:8) „Ghilaban așarimata lesche bare anavesche!” (Ps. 66:2) „Va avela te dav pachiv che anavesche anda sea o timpo.” (Ps. 86:12) Iech data, cana o Isus sas-lo ando templo anda o Ierusalimo, phendea: „Dade, glorifichisar chio anav!”. O Iehova phendea lesche parpale anda o cerii: „Glorifichisardem-les hai va avela te mai glorifichisarav-les!”. (Ioan 12:28) a

I trinto: o scopo le Iehovasco si ca lesco anav te avel așardo anda sea o timpo. Te gândisaras-ame so va avela pala o palutno testo, cana va nachela o Raimos de Iech Mia Bărșa. So va simțona le manușa hai le îngeri ande codo timpo caring o anav le Iehovasco? Caște arachas o răspunso cadale pușimaste, te gândisaras-ame ca  le dui bare problemea cai vazdine-pe: dacă le manușa va daștina te așen lesche loialo hai dacă o raimos le Iehovasco si o mai lașio. Ande codol ghiesa, le manușa ci va mai trebuna te sicaven penghi loialitatea. Von va avena perfecto hai deja nachle zurale părdal o palutno testo. Atunci, von va traina anda sea o timpo. Sa cadea, o Iehova ci va mai trebula te sicavel că o modo ande savo rail vo si o mai lașio. Ande codo timpo, sea le manușa hai le îngeri va avena chidine hai va camena anda sea o ilo ca o Iehova te rail opral lende. Tha so daisaras te phenas anda o anav le Iehovasco?

Ande codo timpo, savore va jianena o ciacimos anda o Iehova hai lesco anav va avela sfințome hai ujiardo cu sea. Tha, vi mai dur o anav le Iehovasco va avela i mai importanto buchi anda lesche slujitori pa i phuv hai anda o cerii. Sostar? Anda codoia, că von va dichena le bare buchia cai o Iehova va avela te cherel-le vi mai dur. O Isus pherdo umilința va dela parpale o raimos le Iehovasche, hai o Del va avela „sea anda savore”. (1 Cor. 15:28) Sea le manușa pa i phuv va avena te bucurin-pe catar „i bari libertatea le șiavenghi le Devlesche”. (Rom. 8:21) Cadea că, o Iehova va pherela pesco scopo cai sea lesche șiave pa i phuv hai anda o cerii te aven iech familia chidini. (Ef. 1:10)

Pala so va pherena-pe cadal buchia, so va avela ando ilo le slujitorengo le Iehovasche pa i phuv hai anda o cerii? Savore va avela te camas zurales te așaras o șucar anav le Iehovasco. O psalmisto David tela i inspirația scriisardea: „Așardo te avel o Iehova Del . . . Așardo te avel lesco baro anav anda sea o timpo”. (Ps. 72:18, 19) Si ciaces, vi amen va avela te arachas sea o timpo but motivea te așaras o anav le Iehovasco.

O anav le Iehovasco sicavel sea so si vo. Cana gândisaras-ame ca o anav le Iehovasco, avel amenghe andi goghi leschi iubirea. (1 Ioan 4:8) Va așela ande amari goghi sea o timpo că o Iehova cărdea-ame anda iubirea, că anda iubirea dea pesche șiaves anda amende hai că sicavel peschi iubirea vi anda o modo orta ande savo rail. Sa cadea, va avela te dichas vi mai dur sar o Iehova sicavel buhlimaia peschi iubirea părdal sea le buchia cai vo cărdea-le. Amen va avela te camas anda sea o timpo te pașioas amare Dadestar cerisco, hai te ghilabas așarimata lesche bare anavesche. (Ps. 73:28)