Evanjil Wafunday Marko 1:1-45
-
Yohan Mubatish ukat kulejan (1-8)
-
Kumubatish Yesu (9-11)
-
Satan ukat kumupak Yesu (12, 13)
-
Yesu wasambish kal kulejan mu Galaliya (14, 15)
-
Yesu wayitazuk kal in kwilej a kusambish (16-20)
-
Yesu wadosh kal chilembil (21-28)
-
Yesu ukat kwok antu avud mu Kapernaum (29-34)
-
Yesu ukat kulembil kwi ndond ya amwinend (35-39)
-
Kumwok mwin musong wa mak (40-45)
1 Nsambishil ya rusangu ruwamp piur pa Yesu Kristu, Mwan a Nzamb:
2 Mud mwafunday muprofet Isay anch: “(Tal! Nitumin muruu wam kurutu kwey,* ndiy ukurijeka njil yey.)
3 Muntu umwing ukat kutoy mwi mpay anch: ‘Rijekany njil ya Yehova!* Onishany salal jinjil jend.’”
4 Yohan Mubatish wading mwi mpay ukat kulejan dibatish dimekeshina kukarumuk mulong wa kulikishin kwa yitil.
5 Ni antu awonsu a mu Yudeya ni a mu Yerusalem ezang kud ndiy, ni ndiy wayibatishang* mu Wit wa Yordan, kusutin kulejan yitil yau patok.
6 Yohan wading udjit masun makweta mavuj ma kamel ni wading udjit nshipu ya chikit mwi mbund, ni wadangang atubol ni woch.
7 Ni wading ukat kulejan anch: “Kud muntu wezina kwinyim kwamam ukweta usu nakash kwinsutamu am, ni am kiniwanyidinap kuzengam mulong wa kusuburil moj wa yisapat yend.
8 Am nikubatishinany nich mem, pakwez ndiy ukukubatishany nich spiritu utumbila.”
9 Mu machuku minama, Yesu wadokala ku Nazaret mwi ngand ya Galaliya ni amubatisha kud Yohan mu Yordan.
10 Ni kapamp kamwing pading patuntukinay mu mem, wamana diur dazurik, ni spiritu wamushirikina mud iyemb.
11 Ni dizu dadokala mwiur dalond anch: “Ey ud Mwanam mukatish; ukwet dilau dam.”*
12 Pawiy kamu pinapa, spiritu wamubachika kuya mwi mpay.
13 Chawiy wasala mwi mpay machuku 40, ni Satan wading ukat kumupak. Wading ni annam a mu masuku, pakwez angel ading akat kumusadin.
14 Chad kupwa kwa kumukwat Yohan, Yesu waya ku Galaliya kulejan rusangu ruwamp ra Nzamb
15 ni walondang anch: “Chisu chatenchikau chawanyin kal, ni Want wa Nzamb wasej kal piswimp. Karumukany ni itiyijany rusangu ruwamp.”
16 Pading pendinay ku chikum cha karung wa Galaliya, ndiy wamumana Simon ni mwanamakwend Andre, ading akat kudjubul mand mau mu mem, mulong ading in kuta ansh.
17 Chad Yesu wayela anch: “Nlondulany, ni am nikukwikadishany ayibind a antu.”
18 Ni pawiy kamu pinapa, awiy asha mand mau ni amulondul.
19 Kupwa wendaku pakemp mwamu, wamuman Yakobu mwan ikundj wa Zebede ni mwanamakwend Yohan, ading mu waat akat kurijek mand mau,
20 ni Yesu wayitazuka pakad kulab. Chawiy amusha tatukwau Zebede mu waat pamwing ni antu end a mudimu ni amulondul Yesu.
21 Ni aya ku Kapernaum.
Pashika dichuku da Sabat, Yesu wandama mu Sinagog ni wasambish kufundish.
22 Ni antu ashimwokang piur pa mutapu wend wa kufundish mulong wayifundishang mud muntu ukweta ulabu, kadap mud alej a yijil.
23 Pa chisu chinacha mu sinagog wau mwading muntu ukweta chilembil, ni watoyang anch:
24 “Mulong ik tukweta niyeyey, Yesu wa ku Nazaret? Ov, wezin mulong wa kutushesh? Nij kamu nawamp anch ud Utumbila wa Nzamb!”
25 Pakwez Yesu wamubarokina anch: “Ninet, ni mudokala!”
26 Ni muntu winou wikwanya nakash mulong wa chilembil, ni kupwa kwa chilembil winou kukarik nich dizu dikash, wamudokala.
27 Antu awonsu ashimwoka nakash, chad asambish kwipulijan anch: “Chom ik chinech? Minam mad kamu mafundish masu! Ndiy ukat kupan mbil kud ayilembil nich ulabu, ni akat kumuziyin.”
28 Chawiy rusangu piur pa Yesu rapalangana swa mwi ngand yawonsu ya Galaliya.
29 Chad abudika mu Sinagog ni aya ku chikumbu cha Simon ni Andre, aya pamwing ni Yakobu ni Yohan.
30 Chad mawenend a Simon wading ulel ni uyedin ukat kuzal mashik, ni kapamp kamwing amwijikishamu Yesu piur pend.
31 Yesu wamusejina, wamukwat ku chikas ni wamutumbwish. Chawiy wayerika ni wasambish kuyisadin.
32 Chikwazweka urel, piwandama muten, antu asambisha kumuletin antu awonsu ading ayedina ni ading akweta ayilembil;
33 ni antu awonsu a mu musumb akumangena ku chis cha chikumbu.
34 Chawiy wayoka antu avud ading akweta mayej ma mitapu kushalijan, ni wopata ayilembil avud, pakwez wayikangesha ayilembil kulond dizu, mulong awiy ading ij anch ndiy Kristu.*
35 Chad pamanch nakash, kwading kuchijadinaku, walanka wabudik pol ni waya kwi ndond ya amwinend, wasambish kulembil kwinakwa.
36 Pakwez Simon ni antu akwau adingay nend aya kumukimb
37 ni pamutanau, amwela anch: “Antu awonsu akat kukukimb.”
38 Pakwez wayileja anch: “Tuyany kwi ndond yikwau, mu misumb ya piswimp, chakwel nikalejan kand kwinakwa, mulong yawiy nezina.”
39 Ni waya kulejan mu ma sinagog mau mwi ngand yawonsu ya Galaliya ni wading ukat kudosh ayilembil.
40 Muyej umwing wa musong wa mak weza kud Yesu wamwasin manungun, ni wamwilembin anch: “Anch chikukatishin, ukutwish kwingok.”
41 Chad Yesu wova riy, wazambul chikas chend, wamukwat ni wamwel anch: “Nikatin, katat yerik.”
42 Pawiy kamu pinapa musong wa mak wapwa, ni wayerika.
43 Yesu wamuleja kuya kupwa kwa kumwinkish mbil jikash,
44 ni wamulej anch: “Tesh nawamp, kangal wamulejamu muntu, pakwez yang kud mwin kupesh chakwel akutala ni pan yakupesh mud mwalejanay Moses mulong wa kuyerik kwey, chakwel wikala uman kud awiy.”
45 Pakwez payay, muntu winou wasambisha kupalangesh rusangu rend kud antu awonsu, chom chinech chamukangesha Yesu kwandam mu musumb pakad kumuman kud antu, chawiy washakamang pol pa musumb ku jindond kwakad kwikal antu, pakwez antu adandamena kudokal ku mitambu yawonsu mulong wa kwez kud ndiy.
Footnotes ## heading for footer
^ Mu Grek, “kurutu kwa mpal yey.”
^ Tal Yom Yiwejinaku A5.
^ Ap “wayandjikang jimu mu mem.”
^ Ap “nikwitiyijin.”
^ Ap pamwing ap, “awiy ading amwij.”
