‘Xikwembu Nkulukumba wa tilo a ta pfuxa mfumu lowu nga tiki honeka ni siku ni dzrin’we.’—Daniel 2:44, AḆIḆLIA KUMBE AḆUKU ḌA KU ŠWENGA.

‘Hi nyikiwile n’wana wa wa ndzrisanyana; a vufumi [kumbe wuhosi] byi bekiwile a katleni dzrakwe.’—Ezaya 9:6.

U ta swi vona leswaku Mfumu lowu

• i wuhosi bya ku lulama, lebyi nga ku pfunaka nambi o va swoswi. —Ezaya 48:17, 18.

• wu ta hi susela mavabyi hinkwawu ni lifu, wu hi tisela ku nyonxa misaveni leyimpswha leyi taka.—Apfuletelo 21:3, 4.

Ina, hi kola ka swivangelo swibidzri, handle ka swin’wana:

• Yesu a swi kombisile leswi Mfumu wa Xikwembu Nkulukumba wu taka swi yentxa. Yesu a dondzrise valandzreli vakwe akuva va khongota leswaku Mfumu wa Xikwembu Nkulukumba wu ta ni leswaku ku yentxeka ku zrandzra kwakwe la misaveni. (Matewu 6:9, 10) Yesu a kombise ndlela leyi xikhongoto xolexo xi taka hlamuliwa ha yone.

  Na a ha li la misaveni, Yesu a phamele lava nga ni ndlala, a hanyisa timbabyi a tlhela a pfuxa lava fiki! (Matewu 15:29-38; Yohan 11:38-44) Swanga Mufumi lweyi a ha taka wa Mfumu wa Xikwembu Nkulukumba, Yesu a nyikele xikombiso xa ku xonga xa leswi Mfumu wu taka swi yentxela vhanu lava taka fumiwa ha wone.—Apfuletelo 11:15.

• Mintxhumu leyi humelelaka la misaveni namunhla yi komba leswaku Mfumu wa Xikwembu Nkulukumba wu kusuhi ni ku tlhasa. Yesu a profete leswaku loko Mfumu wu li kusuhi swinene ni ku tisa ku zrula la misaveni, a ku ta va ni tiyimpi, ndlala ni ku tsrekatsreka ka misava.—Matewu 24:3, 7.

  Ha yi vona mintxhumu yoleyo namunhla. Kutani ke, hi nga dumba leswaku Mfumu wa Xikwembu Nkulukumba ku nga li khale wu ta helisa swikazratu leswo hinkwaswu.