Ni kulele a Acul, ku nga xidoropana lexi kumekaka a mpeladambu wa Guatemala. Ndangu wezru wu lumba lixaka dzra va Maixil lava sukelaka ka Vamaya. Ni kule na ni vulavula lidzrimi dzra lixaka dzrezru ni dzra Xipanyola. A wutrsongwanini byanga, a ku ni yimpi ya xin’wana mamana leyi hetiki 36 wa malembe a Guatemala. Hi nkama wolowo ku fe vhanu vanyingi va lixaka dzra va Maixil.

Loko ni ni 4 wa malembe, mukhulhwana wanga lweyi a a ni 7 wa malembe, a bulukeliwe hi xibulukwa lexi a a tlanga ha xone. Khombo dzra kone, yene a file kasi mine ni fe matihlo. A ntsrhaku ka leswo ni ye kulela ka xikole lexi ka xone a ku ni vana lava fiki matihlo ka doropa dzra Guatemala, lani ni dondzriki ku dondzra hi Braille. A ni nga pfumeleliwe ku bula ni vhanu va’nwana, nambi lava a ni dondzra navu a va nga ni zrandzri, xivangelo xa kone a ni nga xi tivi. Leswi a ni titwa na ni li wuswanga a ni ti langusela hi manyawu tihweti tibidzri ka lembe, leti a ni ya ti heta na mamana hikusa a a ni mbuwetela ni ku ni komba ntwela wusiwana. Kambe lexi gamiki xi ni txhela gome a ve loko mamana a game a fa loko ni ve ni 10 wa malembe. Ku feliwa hi mhunu lweyi a ko va yene ntsena a a ni zrandzra, swi ni tsrove mbilu.

Loko ni ve ni 11 wa malembe, ni tlhelele a Doropeni dzrezru ni tsrhama ni mukhulhwana wanga ni ndangu wakwe lweyi ho kova vamakwavu hi papayi. A va ni hlayisa, kambe a a nga li kone lweyi a ni ta dzrilela kwakwe. Minkama yimbeni a ni dzrilela Xikwembu Nkulukumba ni ku: “Ha yini mamana a file? Hi mhaka muni ni fe matihlo?” Vhanu a va ni byela leswaku mindzringo hinkwayu leyi ni langusanaka na yone i ku zrandzra ka Xikwembu. Xileswo ni tibyele leswaku Xikwembu Nkulukumba a nga na ntwela wusiwana. A ni djula ku tisunga kambe leswi a ku nge na mhunu lweyi a a ta ni pfuna swi ni hlulile.

Leswi ni fiki matilho swi ni yentxa ni titwa na ni nga sizrelelekanga. Loko na ha li ntsrongo ni pfinyiwe makhambi ya ku tala. Leswi a ni yanakanya leswaku vhanu a va na mhaka na mine, a ni zanga ni ya mangala. A swi kala kuva vhanu va vulavula na mine, na mine a ni nga vulavuli ni mhunu. A ni kazrateka nakone a ni nga swi zrandzri ku tsrhama ni vhanu hileswi a ni nga ha va dumbi.

Loko na ha li mumpswha ku tlhase Timboni tibidzri ta Yehovha leti a ti li nuna na nsati, loko ni li ku wiseni a xilole. Va kombeliwe hi mun’we wa vaprisori vanga lweyi a a ni twela wusiwana. Va bule na mine hi xidumbiso xa Bibela xa leswaku lava fiki va ta tlhela va hanya ni leswaku lava kalaka va nga voni va ta tlhela va vona. (Ezaya 35:5; Yohan 5:​28, 29) Ni swi zrandzrile leswi va ni dondzrisiki swone, kambe swi ni kazratele ngopfu ku bulisana na vone hikusa a ni nga swi tolovelanga ku bulisana ni vhanu. Nambileswi a ni li mhunu lweyi a ni zrandzra ku titsrhamela wuswanga va ni kombe wunene, va ni lehisela mbilu ni ku tama va ni pfuxela akuva va ni dondzrisa Bibele. Akuva va kota ku tlhasa ka doropa ledzri a ni tsrhama ka dzrone, vatekani lava a va famba mpfhuka lowu tlulaka 10 wa makilometro ni ku tsremakanya mbangu wa kukazri lowu a wu ni nhava.

Mukhulhwana wanga a ni tlhamuxele leswi a va tsrhamise xiswone, a te i vhanu lava a va tolovela ku yambala ha hombe nambileswi a va nga li na mintxhumu yinyingi kambe minkama hinkwayu a va zron’weka ha mine va va va ni tisela swihiwa switsrongonyana. Leswo swi ni yentxe ni vona leswaku i vakriste va ntiyiso ntsena va kombisaka lizrandzru dzra ku fana ni ledzro.

Ni dondzre Bibele hi ku pfuniwa hi mabuku ya Braille. A ni swi twisisa leswi a ni swi dondzra, kambe swin’wana a swi ni kazratela ku swi pfumelela swi nghena mbilwini. Hi xikombiso a swi ni kazratela ku kholwa leswaku Xikwembu Nkulukumba a wa zron’weka ha mine hakunene, ni leswaku vambeni va nga ni zrandzra ku fana na Xikwembu Nkulukumba. A ni swi twisisa leswaku ha yini Yehovha a pfumelela wubihi swa nkamanyana, kambe a swi ni kazratela ku mu vona swanga Tatana lwa nga ni lizrandzru hakunene. *

Hakutsrongokutsrongo, leswi ni swi dondzriki ka matsralwa swi ni pfune ku txintxa mavonela yanga. Hi xikombiso ni dondzre leswaku Xikwembu Nkulukumba a twa ku vavisa loko a vona vhanu va xaniseka. Mayelanu ni vagandzreli vake lava a va xanisiwa Xikwembu Nkulukummba a te: ‘Ndzri vonisise ku xaniseka ka vhanu vanga . . . ndzri tiva mahlomulu yavu.’ (Eksoda 3:7) Loko ni ya ni twisisa matsrhamela ya Yehovha, swi ni susumetele ku nyiketela wutomi byanga ka yene. Hi 1998 ni babatisiwile swanga mun’we wa Timboni ta Yehovha.

A ntsrhaku ka loko ni babatisiwile ni ye ka xikole xa lava fiki matihlo a kusuhi ni doropa dzra Escuintla. Nkulu mumbeni wa bandla dzra kolanu a twe hi swikazratu leswi a ni langutana na swone loko ni ya mintlhanganwini a doropeni ledzri ni tsrhamaka ka dzrone. Phela bandla dzra le kusuhi a dzri li ka muganga luwa wa tinhava lowu vatekani lavaya a va dondzra na mine Bibele a va wu tsremakanya, nakone a swi ni kazratela ku hamba liyendzro ledzro. Kutani nkulu lweyo a ni tlhanganise ni ndangu wun’wana wa Timboni ta Yehovha, lowu ni pfuniki kuva ni kota ku va kone a mintlhanganwini ya wukriste. Ni namunhla va ha ni hlayisa ku fana ni n’wanavu.

Loko no djula ku hlaya hinkwaswu swikombiso swa lizrandzru leswi vamakwezru va ni kombisiki swone dzri nga za dzri pela. Hinkwaswu leswo swi ni yentxa ni swi vona leswaku ni le makazri ka vakriste va ntiyiso.​—Yohan 13:34, 35.

Swoswi a na ha titwi na ni nga pfuni ntxhumu kumbe mhunu lwa nga liki na dumbo. Wutomi byanga byi ni nkongometo. Ni tsrhama ni khomekile hi ku dondzrisa vhanu Bibele, a matsrhan’wini ya ku yanakanya hi leswi ni fiki matihlo. Ni ni ndjombo ya ku tizra swanga nkulu wa bandla ni ku nyikela wukaneli lebyi seketeliwiki Bibeleni ka mabandla ya le kusuhi. Ni tlhele ni va ni tovoko dzra ku nyikela wukaneli ka tinhlengeletanu letikulu ta xifundzra lani a ku tlhangane vhanu va magidigidi.

Hi 2010, ni hete Escola de Treinamento Ministerial (lexi swoswi xi vitaniwaka Xikole xa Vazrezri va Mfumu) lexi viki kone a El Salvador. Xikole lexi xi ni pfune kuva ni kota ku dondzrisa ha hombe a bandleni. Xikole lexi xi ni pfune kuva ni titwa na ni li wa lisima ni lweyi a zrandzriwaka hi Yehovha, hikusa a kota ku dondzrisa mun’wana ni mun’wana ku yentxa ntizro wake.

Yesu a te: ‘A tovoko dzra ku hanana, dzri tlula tovoko dzra ku hananiwa.’ (Amintiṛo 20:35) Namunhla ni nga hlaya leswaku ni nyonxile hakunene nambileswi nkameni lowu khalutiki a ni vona leswaku leswo a swi nge koteki. Na mine kutani na swi kota ku pfuna van’wana.