23 WERURWE 2022 | YAHUJWE N’IGIHE KU ITARIKI YA 11 UKWAKIRA 2024
U BURUSIYA

AMAKURU MASHYA—UBUJURIRE BWAHINDUYE IBIHANO BYARI BYATANZWE | Yehova akomeje gufasha abavandimwe na bashiki bacu batandatu b’indahemuka

FUNGURA

Ku itariki ya 10 Ukwakira 2024, Urukiko rw’Agace ka Khabarovsk rwatangaje umwanzuro ku bujurire bwa mushiki wacu Maya Karpushkina, Svetlana Sedova, umuvandimwe Stanislav Kim, Nikolay Polevodov, Vitaliy Zhuk n’umugore we Tatyana. Maya, Svetlana na Tatyana bakuriweho umwaka umwe ku gifungo gisubitse bari bakatiwe. Umuvandimwe Stanislav yakatiwe imyaka irindwi n’amezi abiri y’igifungo gisubitse, Vitaliy akatirwa imyaka irindwi n’amezi ane naho Nikolay akatirwa imyaka irindwi n’amezi atandatu, aho kujyanwa muri gereza nk’uko umwanzuro wa mbere w’urukiko wari wabivuze. Bukeye bwaho abo bavandimwe n’abo bashiki bacu bahise bavanwa muri gereza.

Ku itariki ya 20 Kamena 2024, Urukiko rw’Akarere ka Industrialniy ruherereye mu gace ka Khabarovsk rwahamije icyaha mushiki wacu Maya Karpushkina, umuvandimwe Stanislav Kim, Nikolay Polevodov, mushiki wacu Svetlana Sedova, umuvandimwe Vitaliy Zhuk n’umugore we Tatyana. Maya yakatiwe igifungu gisubitse cy’imyaka ine. Svetlana na Tatyana buri wese akatirwa igifungo gisubitse cy’imyaka itanu. Abo bashiki bacu ntibizaba ngombwa ko bajyanwa muri gereza. Stanislav, Vitaliy na Nikolay bakatiwe igifungo cy’imyaka umunani n’amezi abiri, imyaka umunani n’amezi ane, imyaka umunani n’amezi atandatu. Ibi ni byo bihano bikomeye by’igifungo bibayeho kuva ibikorwa by’umuryango wacu byahagarikwa mu Burusiya mu mwaka wa 2017. Abo bavandimwe bahise bajyanwa muri gereza bakiva mu rukiko.

Uko ibintu byagiye bikurikirana

Ku itariki ya 10 Ugushyingo 2018

Abayobozi baburijemo ubusabane bwari bwahuje abantu bagera kuri 55 bahuriye aho banywera ikawa. Abantu bose bari bahari, harimo n’abana babahase ibibazo, babateresha igikumwe kandi barabafotora
Ku itariki ya 12 Ugushyingo 2018

Stanislav, Nikolay na Vitaliy bafunzwe by’agateganyo. Maya, Svetlana na Tatyana babwiwe ko batemerewe kugira aho bajya
Ku itariki ya 14 Mutarama 2019

Nikolay na Vitaliy bararekuwe maze bafungishwa ijisho
Ku itariki ya 29 Mutarama 2019

Stanislav yararekuwe maze afungishwa ijisho
Ku itariki ya 18 Nyakanga 2019

Ibyo baregwa byoherejwe mu Rukiko rw’Akarere ka Industrialniy ruherereye mu gace ka Khabarovsk
Ku itariki ya 2 Kanama 2019

Nikolay yararekuwe maze afungishwa ijisho
Ku itariki ya 9 Nzeri 2019

Iyindi dosiye y’ibyo Stanislav na Nikolay baregwa yoherejwe mu Rukiko rw’Akarere ka Zheleznodorozhniy muri Khabarovsk
Ku itariki ya 5 Ugushyingo 2019

Nikolay yararekuwe ariko ategekwa kuzaza kwitaba urukiko igihe ruzamuhamagara
Ku itariki ya 18 Mutarama 2020

Stanislav na Vitaliy bari bafungishijwe ijisho bararekuwe
Ku itariki ya 4 Gashyantare 2020

Stanislav na Nikolay bahamijwe icyaha mu rundi rubanza. Buri wese yakatiwe igifungo gisubitse cy’imyaka ibiri n’igice kandi akajya yitaba ku Rukiko rw’Akarere ka Zheleznodorozhniy mu gace ka Khabarovsk
Ku itariki ya 3 Kanama 2020

Ibirego byari mu Rukiko rw’Akarere ka Industrialniy byasubijwe mu biro by’ubushinjacyaha. Ibyo byatumye umushinjacyaha ajuririra uwo mwanzuro
Ku itariki ya 29 Nzeri 2020

Urukiko rw’Intara ya Khabarovsk rwasuzumye ubujurire bw’umushinjacyaha. Stanislav na Nikolay bemerewe kuvugana n’umucamanza. Bamubwiye ko leta y’u Burusiya kimwe n’ibindi bihugu yasinye ku masezerano mpuzamahanga yo kubahiriza uburenganzira umuturage afite bwo gusenga mu bwisanzure no kujya mu idini ashaka kandi ko butazayarengaho
Ku itariki ya 12 Ukwakira 2020

Urukiko rw’Intara ya Khabarovsk rwashimangiye umwanzuro wari wafashwe n’Urukiko rw’Akarere ka Industrialniy maze rusubiza icyo kirego mu bushinjacyaha
Ku itariki ya 15 Ukuboza 2021

Ikirego cyashubijwe mu Rukiko rw’Akarere ka Industrialniy

Icyo twabavugaho

Stanislav Kim

Igihe yavukiye: 1968 (Khabarovsk, mu gace ka Khabarovsk)

Ibimuranga: Akiri umwana yakundaga kuririmba no gukina umukino wa dame na esheki. Yari umunyamategeko muri minisiteri

Yahuye n’Abahamya ba Yehova yuma yo gukora impanuka ikomeye. Kwiga Bibiliya byamufashije guhangana n’indwara yo kwiheba. Yabatijwe mu mwaka wa 2004. Yashakanye na Olesya mu mwaka wa 2008. Bafite abana babiri

Ibyo yavuze

Ni ikihe kintu cyihariye wakoze kugira ngo ukomeze ubucuti ufitanye na Yehova?

Igihe nari mfunzwe, sinabashaga kubona Bibiliya. Ubwo rero nageragezaga kwibuka imirongo icumi narangiza nkayitekerezaho. Nanone nishyiriragaho intego ku birebana n’uko nsenga. Buri munsi nageragezaga gushaka ibintu icumi nashimira Imana, n’ibindi icumi nayisaba. Nabwiraga Yehova ibindi ku mutima byose.

Nikolay Polevodov

Igihe yavukiye: 1970 (Khabarovsk, mu ntara ya Khabarovsk)

Ibimuranga: Yakuriye mu muryango utagira idini. Akora mu bijyanye n’amashanyarazi

Ntiyemeraga ko Imana iriho kugeza ubwo yaboneye ibimenyetso bimwemeza ko iriho kandi ko ibyo Bibiliya ivuga ari ukuri. Yabatijwe mu mwaka 1995. Nyuma yaho yashakanye na Tatyana. Bafite umwana umwe w’umuhungu

Ibyo yavuze

Igihe wari ufunzwe, ni ibiki byari biguhangayikishije kandi ni nde wabibwiraga?

Nari mpangayikishijwe n’ukuntu natera inkunga umuhungu wanjye wari ufite imyaka icumi icyo gihe . . . Njye n’umugore wanjye twashyizeho gahunda y’iby’umwuka mu muryango buri cyumweru. Rimwe na rimwe natekerezaga gukoresha umukino wo guhuza amagambo, gushushanya cyangwa gukora imbonerahamwe. Ikindi gihe bwo, nateguraga ingingo turi buganireho cyangwa tugashaka ibibazo bitandukanye twaganiraho. Buri cyumweru nabyoherezaga mu rugo.

Ni iki cyakwemeje ko Yehova agushyigikiye muri ibi bigeragezo?

Ndibuka igihe kimwe ari mu gitondo, umwe mubaturindaga yaje gusaka maze aranyegera, yari afite igitabo mu ntoki arambwira ati: “Wemera Imana, si byo? Ngaho soma iki gitabo.” Amaze kukimpa, yarahindukiye arigendera. Igihe narebaga icyo ari cyo, nasanze ari Bibiliya y’Ubuhinduzi bw’isi nshya. . . . Igihe cyose namaze muri gereza, nisomeraga Ijambo ry’Imana rihinduye neza.

Svetlana Sedova

Igihe yavukiye: 1969 (Komsomolsk-on-Amur, mu ntara ya Khabarovsk)

Ibimuranga: Papa we yapfuye igihe Svetlana yari afite imyaka 3, mama we apfa afite imyaka 14. Yakoraga mu ruganda rw’imyenda. Ubu akora amasuku. Akunda guhinga indabo. Umugabo we yapfuye abana be bakiri bato, yamusigiye abahungu babiri n’umukobwa umwe

Akiri umwangavu, yasobanukiwe ko burya hariho Umuremyi ufite ubwenge waremye isi n’isanzure. Yabatijwe mu mwaka wa 1984

Ibyo yavuze

Ni iki wasengaga usaba muri ibyo bihe bikomeye?

Nasengaga Yehova musaba ko yampa imbaraga njye n’abandi bavandimwe na bashiki bacu turi kumwe mu rubanza n’abandi duhuje ibigeragezo n’ibibazo. Iyo Yehova atadufasha, ntitwari kubasha kwihanganira ibitotezo duterwa n’isi ya Satani.

Rwose narushijeho kwemera ko Yehova ampora iruhande. Ijambo rye rigira riti: “Ku muntu w’indahemuka, uzaba indahemuka.”—2 Samweli 22:26.

Tatyana Zhuk

Igihe yavukiye: 1973 (Khabarovsk, mu ntara ya Khabarovsk)

Ibimuranga: Yari umwarimu mu ishuri ry’incuke, ubu akora mu bijyanye n’isuku

Amaze kugira imyaka 19, yashishikajwe cyane n’inyigisho zo muri Bibiliya. Bibiliya yamufashije kubona ibisubizo by’ibibazo yibazaga ku buzima. Yabatijwe mu mwaka wa 1994. Yashakanye na Vitaliy mu mwaka wa 1994

Ibyo yavuze

Ni iki cyagufashije gukomeza gutuza muri ibyo bihe bikomeye?

Abavandimwe ndetse n’umugabo wanjye nkunda, bamfashije kudatekereza ku bibazo duhura na byo muri iki igihe, ahubwo ngatekereza ku kuntu ibintu bizaba bimeze mu isi nshya. . . . Ibyo byaramfashije cyane.

Sinashoboraga kwiyumvisha ko Yehova yatuma ngira umutuzo nk’uwo. . . . Igihe badusakaga, umwe mu bapolisi yarambajije ati: “Kuki utuje cyane? Ese wari utwiteguye?” Ntiyashoboraga kumenya ukuntu icyo kibazo yambajije cyatumye ndushaho kwishima!

Vitaliy Zhuk

Igihe yavukiye: 1972 (Khabarovsk, mu ntara ya Khabarovsk)

Ibimuranga: Akora akazi ko gusudira

Yatangiye kwibaza intego y’ubuzima afite imyaka 20. Gushakisha ukuri byatumye atangira kwigana Bibiliya n’Abahamya ba Yehova maze abona ibisubizo by’ibibazo yibazaga. Yabatijwe mu mwaka wa 1994. Muri uwo mwaka, ni na bwo yashakanye na Tatyana

Ibyo yavuze

Ni iki ibi bigeragezo byakwigishije?

Nize kwishingikiriza kuri Yehova, aho guhora ntekereza ku bintu bibi nshobora kuzahura na byo. Ibyo bintu hari n’igihe bitaba. . . . Nanone nize kurushaho guha agaciro umuryango w’abavandimwe. Hirya no hino ku isi hari abavandimwe na bashiki bacu barenga miliyoni umunani kandi baradukunda cyane kuruta uko tubitekereza. Baba biteguye kudufasha no kudushyigikira binyuze mu masengesho, ku magambo ateye inkunga n’ibikorwa byiza.

Twizera ko Yehova azakomeza gufasha abo bavandimwe na bashiki bacu ndetse n’abandi benshi bagize “igicu kinini cy’Abahamya” muri iki gihe.—Abaheburayo 12:1.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU