Бу аан дойдуну туох күүтэрий?

Атын ханнык да көлүөнэ маннык элбэх үйэ бүтүүтүн туһунан кэпсэтиини истибэтэҕэ. Үгүстэр аан дойду ядернай катастрофаҕа эстиэ диэн куттаналлар. Атыттар санааларынан, аан дойду айылҕа киртийиититтэн суох буолар кутталлаах. Үһүстэр экономическай бэрээдэк бутуллааһына олус элбэх дьону бэйэ-бэйэлэрин утары туруоруоҕа диэн сэрэнэ саныыллар.

Бу аан дойду кырдьыктыы бүтэр уһугар тиийиэ дуо? Өскөтүн оннук буоллаҕына, ол биһиэхэ туох сыһыаннааҕый? Урут хаһан эмэ аан дойду бүтэр уһукка тиийэ сылдьыбыта дуо?

Биир аан дойду бүтэр уһугар кэлэр — атын кинини солбуйари

Кырдьык, биир аан дойду бүтэр уһукка кэлэ сылдьыбыта. Манна, Ной саҕана олус куһаҕан санаалаах буолбут аан дойду туһунан кэпсэнэр. Библияҕа этиллэр: «Оччотооҕу аан дойду ууга тимирдиллэн өлбүтэ». Ону кытта Библияҕа кэпсэнэр: «[Таҥара] бастакы аан дойдуну аһымматаҕа, ол эрээри куһаҕан санаалаах дьон эйгэтин тимирдэригэр, аҕыс дууһаттан турар кырдьыгы тарҕатааччы Ной дьиэ кэргэнин тыыннаах хаалларбыта» (2 Петр 2:5; 3:6).

Толкуйдаан көрүҥ, ол аан дойду бүтүүтэ туох суолталааҕын туһунан. Кини киһи-аймах бүтэр уһукка кэлбитин көрдөрбөтөҕө. Ной уонна кини дьиэ кэргэнэ Бүтүн аан дойду ууга тимириитин тыыннаах туораабыттара. Ону таһынан кэрэ сулустаах халлаан уонна биһиги Сирбит бүтүн хаалбыта. Куһаҕан олох системата, эбэтэр «куһаҕан санаалаах дьон эйгэтэ» эрэ өлбүтэ.

Кэминэн, Ной оҕолоро элбээбиттэрин кэннэ, атын аан дойду үөскээбитэ. Ол иккис аан дойду, эбэтэр олох системата биһиги күннэрбитигэр диэри баар. Кини историята сэриилэринэн, буруйу оҥорооһунунан уонна күүһүлээһининэн туолан турар. Бу аан дойдуну туох күүтэрий? Кини тыыннаах хаалыа дуо?

Бу аан дойду инники өттө

Ной күннэринээҕи аан дойду эһиллибитин туһунан санатан баран, Библия салгыы этэр: «Онтон билиҥҥи халлаан уонна билиҥҥи сир,  эмиэ ол Тылынан уокка умайарга харыстаналлар» (2 Петр 3:7, СД). Кырдьык, Библия атын миэстэтигэр этиллэрин курдук «бу аан дойду [билигин баар] сүтүөҕэ» (1 Иоанн 2:17).

Манна Библия дьиҥнээх сир уонна сулустаах халлаан суох буоларын эбэтэр сүтэрин туһунан эппэт, үүт-үкчү Ной күннэригэр сүппэтэхтэрин курдук (Псалом 103:5). Ол оннугар, уокка умайар курдук Сатана дьайыытыгар киирэн сылдьар государственнай салайааччылар уонна дьон обществота эстиэхтэрэ. Кинилэр бу аан дойду «халлаана» уонна «сирэ» буолаллар (Иоанн 14:30; 2 Коринфяннарга 4:4). Бу аан дойду эбэтэр кини системата саарбаҕа суох эстиэ, Улахан уу иннинээҕи аан дойду суох буолбутун курдук. «Ной күннэрин» туһунан оннооҕор Иисус Христос эппитэ, бу аан дойду суох буолуон иннинэ туох буолуохтааҕын быһаарарыгар (Матфей 24:37—39).

Иисус Ной күннэрин туһунан эппитэ болҕомтобутун тардар, апостоллар маннык ыйытыыларыгар: «Эн кэлэргин итиэннэ бу дойду бүтэр уһуга кэлбитин биһиги туох бэлиэни көрөн билэбит?» (Матфей 24:3). Иисус батыһааччылара бу аан дойду бүтэр уһукка кэлиэхтээҕин билэллэрэ. Оннук буолуохтааҕыттан кинилэр куттаналлар этэ дуо?

Бу аан дойду бүтүөн иннинэ буолуохтаах түбэлтэлэри ойуулаан көрдөрөрүгэр, Иисус кинилэри төттөрүтүн үөрэллэригэр ыҥырбыта, «тоҕо диэтэххэ кинилэр быыһанар кэмнэрэ чугаһаан турара» (Лука 21:28). Кырдьык ити көрдөрөр этэ, кинилэр Сатанаттан уонна кини куһаҕан санаалаах олоҕун систематыттан быыһаналларын уонна эйэлээх саҥа аан дойду кэлиэхтээҕин! (2 Петр 3:13).

Ол гынан баран, бу аан дойду бүтүүтүгэр хаһан тиийиэҕэй? Иисус бэйэтэ «кэлиэхтээҕин уонна үйэ бүтүүтүн» туһунан ханнык «бэлиэни» биэрбитэй?

«Бэлиэ»

Манна «кэлээһин» курдук тылбаастаммыт, паруси́я диэн греческэй тыл, дьиҥнээх суолтата «аттыбытыгар баар» диэн буолар, ол аата  чугас баарын көрдөрөр. Ол иһин «бэлиэ» баар буолбута Христос сотору кэлиэхтээҕин буолбакка, кини хайыы-үйэ төннүбүтүн уонна аттыбытыгар баарын көрдөрүөхтээх этэ. Ити, кини көстүбэккэ халлааннааҕы ыраахтааҕы буолан салайан саҕалаабытын уонна сотору өстөөхтөрүн суох оҥоруохтааҕын бэлиэтиирэ (Арыллыы 12:7—12; Псалом 109:1, 2).

Иисус «бэлиэ» быһыытынан биир эрэ түбэлтэни эппэтэҕэ. Кини аан дойду уопсай туругун ойуулаан көрдөрөрүгэр, элбэх түбэлтэлэри ыйан эппитэ. Ол барыта, Библия «бүтэһик күннэр» диэн ааттыыр бириэмэтигэр буолуохтаах этэ (2 Тимофейга 3:1—5; 2 Петр 3:3, 4). Көрүөххэйиҥ эрэ, Иисус өтө көрөн эппитинэн, «бүтэһик күннэри» туох ойуулаан көрдөрүөхтээҕин.

«Норуот норуоту, саарыстыба саарыстыбаны утары туруоҕа» (Матфей 24:7). Биһиги кэммитигэр буолбут сэриилэр урукку ханнык да атын кэмнэрдээҕэр улахан масштабтаах этилэр. Биир историк бэлиэтээн эппитэ: «Бастакы аан дойду сэриитэ [1914 сыллаахха саҕаламмыт] бастакы «тотальнай» сэрии этэ». Ол эрээри Иккис аан дойду сэриитэ өссө улахан урусхаллааһыннаах буолбута. Сэриилэр сири кураанахтааһыннара күн бүгүнүгэр диэри салҕана турар. Кырдьык, Иисус эппит тыллара иэдээннээхтик туола тураллар!

«Аһылык тиийбэтэ буолуоҕа» (Матфей 24:7 СД). Бастакы аан дойду сэриитин кэнниттэн, дьон историятыгар арааһа саамай улахан аччыктааһын саҕаламмыта. Алдьархайдаах аччыктааһын Иккис аан дойду сэриитин кэнниттэн эмиэ тоҕо анньан кэлбитэ. Бүгүн ситэ аһаабаттан сир нэһилиэнньэтин бэһис чааһа эрэйдэнэр, ол түмүгэр сыл ахсын 14 мөлүйүөн кэриҥэ оҕо өлөр. Кырдьык, «аччыктааһын» — бу бүгүн баар чахчы!

«Күүстээх сир хамсааһыннара буолуохтара» (Лука 21:11). Сыл ахсын 1914 сылтан саҕалаан, сир хамсааһыныгар ааспыт үйэлэрдээҕэр ортотунан уон төгүл элбэх киһи өлөр. Улахан  сир хамсааһыннарыттан сорохторугар эрэ болҕойуҥ: 1920 сыллаахха Кытайга 200 000 киһи өлбүтэ, 1923 сыллаахха Японияҕа — 140 000 (сураҕа суох сүппүттэри киллэрдэххэ), 1939 сыллаахха Турцияҕа — 32 700, 1970 сыллаахха Перууга — 66 800 уонна кэмниэ кэнэҕэс, 1976 сыллаахха Кытайга 240 000 киһи өлбүтэ, онтон сорох көрдөрүүлэринэн 800 000 киһи. Дьэ чахчы «улахан сир хамсааһыннара»!

«Бииртэн биир сиргэ сыстыганнаах ыарыылар туруулара» (Лука 21:11, СД). Бастакы аан дойдутааҕы сэрии бүтээтин кытта испанкаттан 21 мөлүйүөн кэриҥэ киһи өлбүтэ. «Сайенс дайжест» сурунаалга биллэриллибитэ: «Дьон историятыгар маннааҕар харыстала суох уонна дьулусханнаах өлүү кимэн киириитэ буола илигэ». Онтон ыла сүрэх ыарыыта, рак, СПИД уонна да атын элбэх ыарыылар сүүһүнэн мөлүйүөн киһи олоҕун илдьэ бардылар.

«Суута-сокуона суох быһыыланыы элбээһинэ» (Матфей 24:12). 1914 сыллаахтан биһиги аан дойдубут буруйу оҥорооһун уонна күүһүлээһин сирэ буолла. Элбэх сирдэргэ оннооҕор күнүскү бириэмэҕэ уулуссаҕа сылдьаҥҥын куттана саныыгын. Түүн дьоннор уулуссаҕа тахсыахтарын куттаналлар, ол оннугар тимир ааннаах дьиэлэрин иһигэр олороллор.

Бүтэһик күннэр устатыгар, өссө да атын элбэх өтө көрүүлэр туолуохтаах этилэр, ол барыта эмиэ буола турар. Ити аата, бу аан дойду бүтэр уһугар чугаһаабытын көрдөрөр. Ол эрээри, дьолго, бүтэр уһугу тыыннаах туорааччылар баар буолуохтара. «Бу дойду... сүтүөҕэ»  диэн тыллар кэнниттэн Библия эрэннэрэр: «оттон Таҥара көҥүлүн толорор киһи үйэлэр тухары олоруоҕа» (1 Иоанн 2:17).

Ол иһин биһиги Таҥара көҥүлүн билиэхпитин уонна ону толоруохпутун наада. Оччоҕо биһиги бу аан дойду бүтэр уһугун тыыннаах туоруохпутун син. Ол кэннэ Таҥара саҥа аан дойдутун быйаҥ бэлэҕинэн үйэлэр тухары үөрүөхпүтүн сөп. Библия эрэннэрэр, бу кэмҥэ «Таҥара кинилэртэн [дьоннортон] харахтарын уутун хас биирдии таммаҕын сотуоҕа, өлүү-сүтүү диэн аны суох буолуоҕа; энэлгэн, ытабыл-соҥобул, ыарыы эмиэ сүтүөҕэ» (Арыллыы 21:3, 4).

Библейскэй цитаталар «Синодальнай тылбаастааһынтан», «Саҥа аан дойду тылбаастааһыныттан» (СД), Митрополит Инокентий (Вениаминов) тылбаастааһыныттан, Библияны тылбаастыыр институт тылбаастааһыныттан ылылыннылар.

[Сведения об иллюстрации, страница 6]

Фотографии предоставили: самолет: USAF photo; ребенок: WHO photo by W. Cutting; землетрясение: Y. Ishiyama, Hokkaido University, Japan.