Aita ti e ti koli na ti wali:

Na popo ti ngu 700 na 600 K.N.E, prophète Ézéchiel abâ mbeni vision so adö bê mingi. Lo bâ mbeni kota char ti yayu so Seigneur ti dunia kue la ayeke fa lege na ni. Ye so apika bê mingi ayeke fason so char ni ayeke tambela na ni. Char ni akpe loro ngangu tongana lumière; na ngoi so lo ye ti changé lege, lo yeke ngbâ gï na yâ ti loro nga lo yeke tourné même ape.​—Ézéch. 1:4, 9, 12, 14, 16-27.

Vision so adabe ti e so mbage ti bungbi ti Jéhovah so ayeke na yayu ayeke tambela lakue. Ka mbage ni so ayeke na sese so? Ngu ti kusala so ahon afa polele so Jéhovah asara nga si bungbi ti azo ti lo so ayeke na sese akpe loro na mbeni vitesse so adö bê mingi.

Ge na États Unis, amembre ti sewa ti Béthel alondo na Brooklyn ague na fini kota ndokua ti e na Warwick, New York, ambeni ague ti ala na yâ ti ambeni da nde nga ambeni ague na territoire. A-Béthelite ti ambeni filiale na yâ ti dunia kue asara nga gbâ ti akua, na tapande ti leke ada, ti leke pekoni, ti leke aye so abuba dä wala ti gue na yâ ti afini da. Ka mo? Même si mo hon pëpe na mbeni ndo, kite ayeke dä ape so mo sara ni na yâ ti ambeni ye.

So aita ti Bebungbi abâ so azo ti Jéhovah na yâ ti dunia kue ayeke sara aye mingi ti ngbâ ti tambela legeoko na bungbi ti Jéhovah andu bê ti ala mingi nga amû ngangu na ala. Aita mingi ague na ando so bezoin ayeke dä mingi. Ambeni afa tënë na ambeni lege nde, na tapande ala fa tënë na mbeni territoire so azo ni ayeke tene mbeni yanga ti kodro nde. Aita mingi atara mbeni kode ti fango tënë so ayeke fini ye na ala nga so ala habitué na ni ape. Ambeni mingi akono yâ ti kusala ti ala na ambeni lege nde. Aita kue so ayeke be-ta-zo, même ambakoro nga na ala so mbeni ye ti terê ti ala abuba, angbâ lakue ti kpe loro ti fini: ala ngbâ ti sara kua ti Jéhovah nga ala mû maboko ti sigi na nda ti Satan so ayeke zo ti mvene.​—1 aCor. 9:24.

Zia ala hinga so Jéhovah abâ bibe so ala fa ni so (aHéb. 6:10). Bibe ti ala ti dutingo nduru ti sara ye apusu e ti pensé na Abraham nga na Sara. Na ngoi so Abraham ayeke lani na ngu 70 na ndö ni, lo na azo ti sewa ti lo azia gbata ti Ur ti azo ti Chaldée ala gue kâ na Canaan, ndo so lo sara kodro dä na gbe ti atente teti ngu ngbangbo oko na yâ ti tanga ti fini ti lo kue. So pendere bibe si lo na wali so lo ye lo mingi afa!​—Gen. 11:31; Kus. 7:2, 3.

Mo yeke fa mara ti bibe ni so? Ala kue so ayeke be-ta-zo si ayeke gbu ngangu na yâ ti angoi ti ngangu so, ala yeke sara ye so Jésus ahunda na e ti sara. Lo tene: “Tongaso ala gue, ala sara si azo na popo ti amara kue aga adisciple. Ala batize ala na iri ti Babâ, ti Molenge na ti yingo vulu.”​—Mat. 28:19.

 Même tënë so Jésus atene “ala gue” afa so a lingbi e tambela, e sara mbeni ye. A nzere mingi ti bâ kota kua so adisciple ti Jésus so ayapu na kua asara na ngu ti kusala so ahon. E bâ polele so ngangu maboko ti Jéhovah ayeke na ndö ti kua ti fango nzoni tënë ti Royaume na amara kue.​—Marc 13:10.

Azo mingi ayeda na tënë so e fa. Na ngu so ahon, wungo ti awafango tënë kue asi 8 340 847 nga ti a-étude so a sara ni nze na nze asi 10 115 264. Biani, chart ti yayu ayeke tambela, même ala nga kue! Zia ala ngbâ ti sara pendere kusala so na yâ ti kete ngoi so angbâ so kozoni si Jéhovah akanga yanga-da so ague na salut.

Versê ti ngu 2017 ayeke tâ na lege ni, a tene: “Zia bê ti mo na ndö ti Jéhovah na sara ye ti nzoni.” (Ps. 37:3). Tongana ala sara ye alingbi na atënë so, ala sara ye so ayeke nzoni na sarango kusala na Jéhovah, andâ ala yeke fa so ala zia bê ti ala na ndö ti lo. Zia ala hinga so ala yeke gï ala oko ape. Atënë ti Jésus so ayeke ga tâ tënë. Lo tene: “Bâ, mbi yeke na terê ti ala lango oko oko kue juska na lâ ni so aye ti ngoi so ayeke gue ti hunzi.”—Mat. 28:20.

Zia ala hinga so Jéhovah ayeke ngbâ ti iri tënë nzoni na ndö ti kua ti lo so ala yeke sara ni lakue. Atâa aye so ala sara ayeke kete wala kota, ye so ayeke kota na lê ti Jéhovah ayeke tongana ala sara ni na ngangu ti ala kue nga na nzoni bibe. Amatabisi tongaso andu bê ti Jéhovah mingi nga ayeke sara si lo bâ ala na nzoni lê (2 aCor. 9:6, 7). Tongaso, ala ngbâ lakue ti ga nduru mingi na Babâ ti ala so ayeke sara ye na ndoye na lege ti sambela, mandango Bible, guengo na abungbi nga na fango tënë.

Juska ti tene kete “ngoi” so a mû na Zabolo sioni zo ti kengo yanga so ahunzi, lo yeke sara kue ti sara kua na aye kue so lo yeke na ni ti pusu e ti zia aye so e yeke sara ti ngbâ ti duti be-ta-zo na Jéhovah (Apoc. 12:12). Ala ngbâ nduru na Jéhovah, na aye kue so Zabolo ayeke sara ayeke tï na ngu (Ps. 16:8). Zia ala hinga so e ye ala mingi nga e bâ na nene ni aye so ala yeke sara ti bâ lege ti aye ti Royaume ti Seigneur ti e na lâ ti nda ni so.

Aita ti ala,

Bebungbi ti aTémoin ti Jéhovah