‘A yeke zingo ande azo na kuâ.’​—Kusala 24:15, Mbeti ti Nzapa ti fini dunia.

A yeke dë bê ti mo na ngoi so azo ti mo akui.—2 aCorinthien 1:3, 4.

A yeke zi mbeto ti kuâ na yâ ti mo.​—aHébreu 2:15.

A yeke mû na mo tâ beku so mo yeke kiri ande ti bâ azo ti mo so akui awe.​—Jean 5:28, 29.

En, ndali ti ambeni raison ota tongaso:

• Nzapa la amû fini na e. Bible atene so Jéhovah Nzapa “amû na azo kue fini”. (Kusala 17:24, 25; Psaume 36:10). Teti so lo la lo mû fini na acréature kue, lo yeke na ngangu ti kiri ti mû fini na zo so akui awe.

• Nzapa azingo ândö azo na kuâ. Bible asara tënë ti azo miombe so a zingo ala lani na kuâ, atâa amaseka, akangba, akoli wala awali. Ambeni akui, na a ninga ape a zingo ala, me mbeni oko asara lango osio na yâ ti dü ti kuâ!—Jean 11:39-44.

• Nzapa ayeke ku kungo ti kiri ti zingo azo na kuâ. Jéhovah ake tënë ti kuâ, lo bâ kuâ tongana mbeni wato (1 aCorinthien 15:26). Lo yeke ku kungo ti sö benda na ndö ti wato so, ti futi lo biani biani na lege so lo yeke zingo akuâ. Lo yeke na kota nzara ti kiri ti mû fini na azo so lo ngbâ ti dabe ti lo na ala ti tene ala kiri aduti na fini na sese.—Job 14:14, 15.