1. Ti gue oko na aColossien 2:4, 8, tongana nyen la Satan agi ti mû bibe ti e na ngbâa?

SATAN aye ti pusu e ti ke Jéhovah. Ti si na ye so lo zia na gbele lo so, lo gi ti changé fason so e yeke pensé na ni, mo bâ mo tene lo mû bibe ti e na ngbâa nga lo sara si e pensé tongana ti so lo ye. Lo gi ti pusu e wala ti handa e ti mû peko ti lo na lege so lo sara kua na anzara ti bê ti e.—Diko aColossien 2:4, 8.

2-3. (a) Ngbanga ti nyen la a lingbi e mä wango so ayeke na aColossien 2:8? (b) Nyen la e yeke bâ na yâ ti article so?

² Eskê Satan alingbi biani ti handa e? En, lo lingbi ti handa e. Girisa ape so Paul amû lani pëpe wango so ayeke na aColossien 2:8 na azo so amä na bê ape. Lo mû ni lani na aChrétien so a soro ala na lege ti yingo vulu ti gue na yayu (aCol. 1:2, 5). A-Chrétien ti ngoi ni so ayeke lani na yâ ti kpale, na laso e yeke na yâ ti kpale so ayeke même kota ahon ti so ala wara lani (1 aCor. 10:12). Ngbanga ti nyen? A bi Satan na sese, na lo yeke gi ti sara kue ti handa awakua be-ta-zo ti Nzapa (Apoc. 12:9, 12, 17). Na ndö ni, e yeke na mbeni ngoi so azo ti sioni na azo ti handango azo ayeke ngbâ gï ti “sara sioni ahon ti kozo ti gue na ni”.—2 Tim. 3:1, 13.

³ Na yâ ti article so, e yeke bâ tongana nyen la Satan ayeke sara kua na “senge senge tënë ti handa” ti gi ti sara ngangu na ndö ti apensé ti e. E yeke hinga “amayele” ota so lo yeke sara na kua (aÉph. 6:11). Na yâ ti article ti peko, e  yeke bâ tongana nyen la e lingbi ti changé asioni pensé so peut-être e wara ndali ti so lo handa e. Me kozoni, zia e bâ tongana nyen la Satan ahanda lani azo ti Israël na peko ti so ala lï na Sese ti zendo nga na ye so e lingbi ti manda dä.

4-6. Ti gue oko na Deutéronome 11:10-15, afini kode wa ti fango yaka azo ti Israël adoit lani ti manda ni na ngoi so ala sara kodro na Sese ti zendo?

⁴ Ti pusu azo ti Israël ti voro ayanda, Satan asara kua na kode. Lo sara ni tongana nyen? Lo hinga lani so ala bezoin kobe, tongaso lo gi ti sara si ala sara ye so lo ye. Na ngoi so azo ti Israël alï na Sese ti zendo, ala doit lani ti changé kode ti ala ti fango yaka. Na ngoi so azo ti Israël ayeke lani na Égypte, ala yeke zi lani acanal ti tene Ngu ti Nil asua aga na yâ ti yaka ti ala si ala tuku ni na ndö ti akobe so ala lu. Ye oko, na Sese ti zendo, mbeni kota ngu ayeke lani dä ape ti tene azo atuku na ndö ti akobe ti yaka ti ala. Ni la, ti tene kobe ti ala amaï, ala bezoin ngu-nzapa nga na ngu ti pere. (Diko Deutéronome 11:10-15; És. 18:4, 5.) Tongaso, azo ti Israël adoit lani ti manda fini kode ti fango yaka. A yeke duti kete ye ape ndali ti so mingi ti azo so ahinga lani kode ti fango yaka akui na yâ ti benyama awe.

⁵ Jéhovah afa na awakua ti lo so dutingo ti ala achangé awe. Na pekoni lo mû na ala wango so, so na bango ni pan, andu pëpe kua ti fango yaka, lo tene: “Ala sara hange si bê ti ala apusu ala pëpe ti zia [mbi] ti gue ti voro ambeni nzapa nde nga ti kuku na gbe ti ala.” (Deut. 11:16, 17). Ngbanga ti nyen la Jéhovah amû wango na ndö ti vorongo anzapa ti wataka na ngoi so lo yeke sara tënë na ndö ti mandango afini kode ti fango yaka?

⁶ Jéhovah ahinga lani so azo ti Israël ayeke ye ti manda ambeni kode ti fango yaka ti ndo  ni so na terê ti azo so angoro ala so ayeke apaïen. Biani, avoizin ti ala ahinga ye mingi na ndö ti kua ti fango yaka na ndo so, na awakua ti Nzapa alingbi ti manda ambeni nzoni kode na terê ti ala, me ye so alingbi lani ti ga na mbeni kpale na ala. Azo ti fango yaka ti Canaan ayeke voro lani Baal, na aye so ala mä na bê na ni la ayeke sara lani ngangu na ndö ti ala. Ala bâ lani Baal tongana wa ti lê ti nduzu nga ala tene lo la lo sara si ngu-nzapa apika. Jéhovah aye lani pëpe ti tene atënë ti mvene so ahanda awakua ti lo. Ye oko, fani mingi azo ti Israël asoro ti voro Baal (Nom. 25:3, 5; aJu. 2:13; 1 aGbia 18:18). Fadeso, bâ tongana nyen la Satan awara lege ti gbu azo ti Israël na kûkû.

7. Nyen la atara lani mabe ti azo ti Israël na ngoi so ala lï na Sese ti zendo?

⁷ Kozo kode so Satan asara kua na ni ayeke nzara so ayeke na lege ni so azo ti Israël ayeke na ni ti bâ ngu-nzapa apika na yâ ti kodro ni. Ngu-nzapa ayeke pika lani tâ gï kete kete na Sese ti zendo ti londo na hunzingo ti avril ti si na hunzingo ti septembre na yâ ti ngu oko oko. Ti tene azo ti Israël angbâ na fini nga akobe ti ala adü gbani, ala zia lani bê ti ala na ndö ti ngu-nzapa so mingi ni ayeke komanse ti pika na octobre. Satan ahanda azo ti Israël ti pensé so, ti tene aye ti ala amaï, a lingbi ala sara ye tongana avoizin ti ala so ayeke apaïen. Avoizin ti ala so apensé lani so azo adoit ti sara ambeni ye ti voro anzapa ti ala si anzapa ni asara si ngu-nzapa so azo abezoin ni apika. Azo so ayeke na mabe na Jéhovah ape apensé so ye so ayeke gï oko ye ti sara ti tene buru ahunzi hio, tongaso ala sara ambeni ye ti apaïen ti voro na Baal, nzapa ti wataka.

8. Use kode so Satan asara kua na ni ayeke so wa? Fa tongana nyen la lo sara kua na ni.

⁸ Satan asara kua na mbeni use kode ti handa azo ti Israël. Lo pusu ala ti sara ye alingbi na asioni nzara ti bê ti ala. Azo ti amara so ayeke apaïen ayeke sara lani aye so ayeke sioni mingi ti voro na anzapa ti ala. Na popo ti asioni ye so ala yeke sara, awali na akoli ayeke sara lani ndumba na temple. Apaïen so ayeke kanga lê lani na ndö ti bungbingo koli na koli wala wali na wali nga na ambeni fason ti sarango lango-sioni nde, na ala bâ ni tongana ye so ayeke sioni ape (Deut. 23:17, 18; 1 aGbia 14:24). Apaïen so apensé lani so sarango aye so ayeke pusu anzapa ti ala ti sara si kobe asigi gbani. Lango-sioni so apaïen so asara ti voro na anzapa ti ala anzere lani na azo mingi ti Israël, ye so asara si ala soro ti voro anzapa ti wataka. Ti tâ tënë ni, Satan agbu ala na kûkû.

9. Ti gue oko na Osée 2:16, 17, tongana nyen la Satan asara si azo ti Israël ayeke na nzoni bango ndo na ndö ti Jéhovah encore ape?

⁹ Satan asara kua na mbeni ota kode ti handa azo ti Israël. Lo sara si ala yeke na nzoni bango ndo na ndö ti Jéhovah encore ape. Na ngoi ti prophète Jérémie, Jéhovah atene lani so aprophète ti wataka asara lani si awakua ti lo agirisa iri ti Lo “ngbanga ti Baal.” (Jér. 23:27). Na bango ni, awakua ti Jéhovah azia ti di iri ti lo na ala zia iri ti Baal na place ni, so ndani aye ti tene “Wa ti ye” wala “Maître”. Ye so asara si a yeke ngangu na azo ti Israël ti hinga kangbi so ayeke na popo ti Jéhovah na Baal nga asara si ala bungbi aye so a sara ti voro na Baal na vorongo Jéhovah.—Diko Osée 2:16, 17 nga na kete tënë na gbe ni.

10. Akode wa la Satan ayeke sara kua na ni laso?

¹⁰ Satan ayeke sara kua na a-oko kode laso. Lo yeke gbu azo na kûkû na lege so lo sara kua  na anzara ti bê ti ala so ayeke na lege ni, lo pusu azo ti sara lango-sioni nga lo sara si azo ayeke na nzoni bango ndo na ndö ti Jéhovah encore ape. Zia e bâ ndangba kode ni so kozo.

11. Tongana nyen la Satan asara si azo ayeke na nzoni bango ndo na ndö ti Jéhovah encore ape?

¹¹ Satan asara si azo ayeke na nzoni bango ndo na ndö ti Jéhovah encore ape. Na peko ti kuâ ti abazengele ti Jésus, ambeni zo so atene ala yeke aChrétien akomanse ti sara si afango ye ti wataka amû ndo (Kus. 20:29, 30; 2 aThes. 2:3). Azo so, so ayeke a-apostat, akomanse ti sara si azo ayeke na nzoni bango ndo na ndö ti oko tâ Nzapa encore ape. Na tapande, ala zi iri ti Nzapa na yâ ti abible so ala kiri peko ni na ala zia na place ni atitre tongana “Seigneur.” So ala zi iri ti Nzapa na ala zia na place ni “Seigneur,” ala sara si a yeke ngangu na azo so ayeke diko Bible ti bâ tongana nyen la Jéhovah ayeke nde na ambeni “seigneur” so a sara tënë ti ala na yâ ti Bible (1 aCor. 8:5). Ala sara kua na oko tënë, “Seigneur,” ti sara tënë ti Jéhovah na Jésus, a sara si a yeke ngangu ti hinga so Jéhovah na Molenge ti lo ayeke azo use so ayeke nde nde (Jean 17:3). So azo ahinga pëpe kangbi so ayeke na popo ti Jéhovah na Jésus, li ti ala aga kirikiri, ye so asara si fango ye ti trinité, so ayeke na yâ ti Bible ape, amaï. Ndani la azo mingi abâ so zo alingbi ti hinga Nzapa ape. So kota mvene la!—Kus. 17:27.

12. Nyen la abungbi ti vorongo nzapa ti wataka ayeke maï ni? Tongana ti so a fa na aRomain 1:28-31, ye ti peko ni ayeke nyen?

¹² Satan ayeke pusu azo ti sara ye alingbi na asioni nzara ti bê ti ala. Na Israël ti giriri, Satan asara kua na abungbi ti vorongo nzapa ti wataka ti maï sarango asioni ye. Lo yeke sara nga oko ye so laso. Abungbi ti vorongo nzapa ti wataka ayeke kanga lê na ndö ti asioni sarango ye nga ala yeke sara même si azo abâ ni tongana ye so ayeke na lege ni. A sara si azo mingi so atene ala yeke sara na Nzapa azia lege ti sarango ye alingbi na andia ti Nzapa na ndö ti nzoni sarango ye so ayeke polele. Bazengele Paul afa aye ti peko ni na yâ ti lettre so lo tokua na aRomain. (Diko aRomain 1:28-31.) Na popo ti “aye so akpa oko pëpe”, a yeke wara alege nde nde ti sarango lango-sioni so andu nga bungbingo koli na koli wala wali na wali (aRom. 1:24-27, 32; Apoc. 2:20). A yeke kota ye mingi ti tene e sara ye alingbi na aye so Bible afa so ayeke polele.

13. Mbeni kode so Satan ayeke sara na kua ayeke so wa?

 ¹³ Satan ayeke sara kua na anzara ti bê so ayeke na lege ni. E ye ti manda akode so alingbi ti mû maboko na e ti wara aye so e na azo ti sewa ti e e bezoin ni (1 Tim. 5:8). Fani mingi, e lingbi ti manda akode so tongana e gue na ekole nga e manda mbeti nzoni. Me a lingbi e sara hange. Na yâ ti akodro mingi, azo so ayeke gue na ekole ayeke manda anzoni kode ti kua, me a yeke fa nga na ala ndara ti azo ti dunia so. A wa azo so ague na ekole ti duti na kite so Nzapa ayeke dä nga ti bâ Bible na nene ni ape. A fa na ala so azo kue so ahinga ndo mingi amä na bê so fini akomanse na lege ti évolution (aRom. 1:21-23). Mara ti afango ye so ague nde na “ndara ti Nzapa”.—1 aCor. 1:19-21; 3:18-20.

14. Nyen la ndara ti azo ayeke maï ni?

¹⁴ Ndara ti azo apusu ala ti sara sanka ti aye so Jéhovah ahunda na e ti sara wala ague nde na ni. A yeke pusu azo pëpe ti duti na lengo ti yingo ti Nzapa, me apusu azo ti sara “akusala ti mitele”. (aGal. 5:19-23). A wa azo ti duti azo ti fandara, ye so asara si azo aga “azo so andoye gï terê ti ala wani”. (2 Tim. 3:2-4). Asarango ye so ague nde na bibe ti sarango terê kete so Nzapa aye ti tene awakua ti lo aduti na ni (2 Sam. 22:28). Ambeni Chrétien so amanda mbeti ayo akomanse ti pensé tongana azo ti dunia so me pëpe tongana Nzapa. Zia e bâ gï tapande ti mbeni ye oko so alingbi ti si tongana e sara sanka ti kpale so.

15-16. Ye so asi na mbeni ita-wali afa na mo nyen?

¹⁵ Mbeni ita-wali so asara kua ti ngoi kue ahon ngu 15, atene: “Ndali ti so mbi yeke lani Témoin so awara batême awe, mbi diko nga  mbi mä awango so a mû na ndö ti akpale so mandango mbeti ayo alingbi ti ga na ni, me mbi sara sanka ni. Mbi pensé lani so awango so abâ mbi ape.” Akpale wa la ita-wali so awara? Lo tene: “Mandango mbeti amû lani ngoi nga na ngangu ti mbi mingi asara si mbi yeke na ngoi ape ti sambela Jéhovah mingi tongana ti so mbi yeke sara kozo. So mbi fatigué mingi asara si a yeke ngangu na mbi ti sara nzoni lisoro na azo na ndö ti Bible nga ti leke abungbi nzoni. Merci so mbi ga ti bâ so, so mbi mû ngoi mingi ti manda mbeti ayo, a yeke gue lani ti buba songo ti mbi na Jéhovah. Mbi hinga lani so mbi doit ti zia lege ni. Na mbi sara ni.”

¹⁶ Mandango mbeti ayo asara nyen na ndö ti apensé ti ita-wali so? Lo tene: “Kamene asara mbi ti tene so mandango mbeti so mbi soro afa na mbi ti luti na ndö ti afaute ti azo, mbilimbili ti aita ti bungbi, ti ku ti tene ala sara ye so ala lingbi pëpe ti sara nga ti duti nde na ala. A mû ngoi mingi ti tene mbi zia ti pensé tongaso. Ye so asi so afa na mbi so a yeke sioni mingi ti sara sanka ti awango so Babâ ti e ti yayu amû na e na lege ti bungbi ti lo. Jéhovah ahinga lani mbi nzoni mingi ahon mbi wani. Mbi regretté so mbi mä lo lani ape.”

17. (a) Nyen la a lingbi e leke na bê ti e ti ngbâ ti sara? (b) Nyen la e yeke bâ na yâ ti article ti peko?

¹⁷ Leke na bê ti mo ti zia lâ oko pëpe si dunia ti Satan agbu mo “na lege ti senda-ndara na senge senge tënë ti handa”. Zia lâ oko ape si Satan ahanda mo (1 aCor. 3:18; 2 aCor. 2:11). Zia lâ oko ape si Satan asara si mo duti na nzoni bango ndo encore ape na ndö ti Jéhovah. Sara ye alingbi na andia ti Jéhovah na ndö ti nzoni sarango ye so ayeke na nduzu mingi. Nga, zia pëpe si Satan ahanda mo si mo sara sanka ti awango ti Jéhovah. Me ka tongana mo bâ so mo komanse ti pensé tongana azo ti dunia so? Article ti peko ayeke fa tongana nyen la Bible alingbi ti mû maboko na e ti kinda même apensé nga na asarango ye so “gere ni aluti ngangu.”—2 aCor. 10:4, 5.