BETSALEL na Oholiab ayeke lani afini zo ti lekengo ada pëpe. Na ngoi so ala yeke angbâa na Égypte, ala gboto gbâ ti abrique. Ambeni ngoi na pekoni, ala ye ti pensé na ndo ni encore ape. Me ti fadeso ala yeke gboto abrique ape. Ala yeke ga fadeso azo so ahinga mingi ti sara akua ti maboko na ngoi so a zia ala ti mû li ni na kua ti lekengo tabernacle (Ex. 31:1-11). Atâa so kue, gbâ ti azo abâ pëpe apendere kua so ala sara lani. So azo mingi abâ pëpe kua so ala sara so, a sara ala vundu? A yeke lani kota ye ti tene azo abâ kua so ala sara ni? A yeke kota ye ti tene azo abâ kua so mo yeke sara?

Ambeni ye ti yâ ti tabernacle ni ayeke lani pendere mingi. Na tapande, bâ achérub so a sara ni na lor a zia na ndo ti arche ti mbele. Bazengele Paul atene so achérub ni “aza zango”. (aHéb. 9:5). Tara ti bâ na yâ ti li ti mo apendere chérub so a sara ni na lor so a pika tere ni na marteau.—Ex. 37:7-9.

Tongana a wara laso aye so Betsalel na Oholiab aleke lani so, a yeke zia ni na yâ ti musée so ayeke kota ahon atanga ni kue ti tene gbâ ti azo ague abâ ni. Me na ngoi so a leke apendere chérub so lani, azo oke la abâ ni? A zia lani achérub so na Ndo so ayeke nzoni-kue ahon atanga ni; tongaso, gi kota prêtre la ayeke bâ ni na ngoi so lo yeke lï na place ni so gi fani oko na yâ ti ngu oko na lango ti kangango ndo ti asiokpari (aHéb. 9:6, 7). Tongaso, gbâ ti azo abâ ni lani pëpe.

Tongana mo yeke lani na place ti Betsalel wala Oholiab, mo sara ngangu mingi ti sara mara ti kota kua so, mo yeke sara ye tongana nyen tongana mo hinga so gbâ ti azo abâ pëpe ye so mo sara so? Laso, azo mingi abâ so ala sara apendere ye tongana amba ti ala agonda ala nga aye ala. Ti azo ni, tongana a gonda ala a fa so ala sara kua ti ala nzoni. Me ti awakua ti Jéhovah ayeke tongaso ape. Legeoko tongana ti Betsalel na Oholiab, e yeke wara ngia tongana e sara ye so bê ti Jéhovah aye nga lo yeda na e.

Na ngoi ti Jésus, akota zo ti nzapa ayeke sara ka asambela ti pika bê ti azo. Me Jésus afa mbeni ye nde so a lingbi e sara na ngoi so e yeke sambela:  A lingbi e sambela na bê ti e kue nga e sara ni pëpe ti tene azo so abâ e agonda e. Ye ti pekoni ayeke nyen? “Babâ ti mo so abâ ye na ndo so ahonde ayeke futa mo.” (Mat. 6:5, 6). Ye so ayeke kota ye ayeke pëpe ye so azo apensé na ndo ti asambela ti e, me ye so Jéhovah apensé na ndo ni la ayeke kota ye. Legeoko nga, bango ndo so Jéhovah ayeke na ni na ndo ti akua kue so e yeke sara na lo la ayeke kota ye. A yeke pëpe ndali ti so azo mingi agonda e la a fa so e sara kua nzoni, me a yeke ndali ti so kua ti e ni anzere na Jéhovah, lo so “abâ ye na ndo so ahonde”.

Na ngoi so a hunzi ti leke tabernacle, mbinda “akanga ndo ti Tente ti Bungbi, na gloire ti L’Éternel asi singo na yâ Tabernacle.” (Ex. 40:34). Ye so afa biani so kua ni anzere na Jéhovah mingi. Ti mo, bê ti Betsalel na Oholiab ayeke lani tongana nyen na ngoi ni so? Atâa so a sara iri ti ala pëpe na ndo ti aye so ala leke, tere ti ala anzere mingi ndali ti so ala hinga so Nzapa airi tënë nzoni na ndo ti angangu kue so ala sara ti sara na kua ni (aProv. 10:22). Na yâ ti angu so aga na pekoni, ala yeke na ngia mingi ti bâ so a ngbâ ti sara kua na aye so ala leke, na yâ ti kua ti Jéhovah. Na ngoi so a yeke zingo Betsalel na Oholiab na yâ ti fini dunia, tere ti ala ayeke nzere ande mingi ti mä so a voro Jéhovah lani na yâ ti tabernacle so teti angu 500 tongaso.

Na yâ ti bungbi ti Jéhovah laso, a yeke fa pëpe iri ti aita so ayeke sara adessin animé, adessin, afoto, aita so ayeke he bia, atraducteur nga na aita so ayeke sigigi na ambeti ti e. Tongaso, zo oko “abâ” pëpe aye so ala yeke sara. E lingbi nga ti tene tongaso na ndo ti akua so aita ayeke sara na yâ ti acongrégation ahon 110000 na yâ ti dunia kue. Zo wa la ayeke bâ ka aita na ngoi so ala yeke remplir ambeti ti compte na nda ti nze? Zo wa la ayeke bâ ka secrétaire ti congrégation na ngoi so lo yeke leke arapport ti fango tënë? Zo wa la ayeke bâ ka ita so ayeke leke ambeni ye so abuba na tere ti Da ti Royaume na ngoi so lo yeke leke aye ni?

Na ngoi so Betsalel na Oholiab aga nduru ti kui, ala wara pëpe mbeni kangu ti wen, palata wala a sû pëpe iri ti ala na tere ti mbeni ye ti tene ala pika kate ti ala ndali ti apendere ye so ala sara nga na da so ala leke. Me so Jéhovah ayeda na ala, a yeke mbeni ye so ngere ni ayeke ngangu ahon atanga ni. E lingbi ti hinga biani so Jéhovah abâ akua ti ala. Zia e mû tapande ti ala e sara tere ti e kete nga e duti nduru ti sara akua so a mû na e.