OKULI okubiyerekire bici? Okubiyerekire amadoso g’obulagirire bwenene abantu bakacidoca. Nkaba okola ocidosize amadoso gashushine n’aga:

• Ka kobinali Nnamabanga anarhushibirire?

• K’ivita n’amalibuko byanacihwè?

• Gurhi bibà erhi omuntu afâ?

• Ka hali obulangalire boshi-boshi lugenda abafîre?

• Gurhi nakasalira lyo Nnamahanga ayumvirhiza amasala gani?

• Gurhi nakajira lyomba n’omwishingo omu kalamo?

Ngahi wakalongeza amashuzo g’ago madoso? Erhi wakaja omu nyumpa babikira ebitabu erhi âha babiguliza, wanarhimana omo muli ebihumbi by’ebitaabu abantu bacikubagira mpu byo birimw’amashuzo. Cikone, kanji-kanji ebyo bitabu binakahâna amashuzo gali lubero. Ebindi binakolesibwe kasanzi kaguma ci erhi hagera nsiku nsungunu, obulagirire bwabyo bunahwe, nantyo bashub’ibiyandika kundi-kundi.

Cikone, hali citabu ciguma cirimw’amashuzo gw’okucikubagirwa. Ciri citabu ciderha okuli. Yezu abwîra Nnamahanga omu isala erhi: “Akanwa kawe kwo okuli.” (Yowane 17:17) Rhumanyire oku ako Kanwa, ko kahamagalwa Bibliya Ntagatifu. Emyanzi eri oku bukurasa bukulikire, yakurhabala obone kwa bofofi amashuzo g’okuli gali omu Bibliya lugenda ago madoso gali ahô nyanya.

BULYA GURHI RHWAKACIDOSA ER’IDOSO: Igulu rhulamiremwo, liyunjwire bantu barhagwerhi bonjo n’obushinganyanya. Madîni nanji gayigiriza mpu ago malibuko gali garhugwarha buli bulonza bwa Nnamahanga.

GURHI EBIBLIYA EYIGIRIZIZE: Nnamahanga arhajirirana magalugalu. Olwandiko lwa Ayubu 34:10 ludesire erhi: “Muyegûle kuli na Nyamuzinda amagalugalu; ow’enyanya aba mushinganyanya.” Nyamuzinda agwerhe omuhigo gw’obuzigire kuyerekera abantu. Co carhumâga Yezu arhuyigirîza mpu rhukashenga ntya: “Larha, oli omu mpingu, . . . Obwami bwawe buyishe. Obulonza bwawe bube en’igulu nk’empingu.” (Mateyo 6:9,10) Nnamahanga anarhushibirire bwenene, co carhumâga ajîra ecijiro cinene bwenene lyo ahikiriza omuhigo gwage.​—Yowane 3:16.

Ocib’isoma Omurhondêro 1:26-28; Yakobo 1:13; na 1 Petro 5:6, 7.

BULYA GURHI RHWAKACIDOSA ER’IDOSO: Ivita ligenderire lyaniga amagana garhaganjwà g’abantu. Amalibuko gali garhuhikira rhweshi..

GURHI EBIBLIYA EYIGIRIZIZE: Nnamahanga alaganyize amango alerha omurhula amw’igulu lyoshi. Omu Bwami bwage buderhwa burhegesi bw’empingu, abantu barhakaciyiga “okulwa ivita”. Ahali h’okulwa ivita, “engôrho zabo bazitulemwo enfuka.” (Izaya 2:4, NWT) Nnamahanga ayusa ebijiro byoshi by’obulule bw’obushinganyanya n’amalibuko goshi. Ebibliya elaganyize erhi: “[Nyamuzinda] ahorhôla ngasi mulenge gubali omu masu: ulufû ntalo lwacihalê; emishîbo n’endûlu n’amababale birhakacihabâ bundi; bulya okwali burhanzi kwahwire.”​—Amafulûlo 21:3, 4.

Ocib’isoma Ennanga 37:10, 11; 46:9; na Mikeyo 4:1-4.

BULYA GURHI RHWAKACIDOSA ER’IDOSO: Hofi amadini goshi ganayigirize mpu hali iroho garhafâ liba endalala ly’omuntu lirya ligendekera lyalama enyuma z’okufâ kw’omubiri. Abandi bantu bayemire oku abafîre bagwerhe obushashe bw’okulibuza abazine na kandi mpu Nnamahanga anahane enkol’amaligo omu kuzilibuza n’amango omu muliro.

GURHI EBIBLIYA EYIGIRIZIZE: Erhi omuntu afâ, anafê loshi. Olwandiko l’Omuhanûzi 9:5 ludesire erhi: “Abafîre . . . barhamanyiri cici.” Kulya kuba abafîre barhakamanya cici, barhakarhimanya erhi kuhikirwa na kantu koshi-koshi, barhakalibuza erhi kurhabala ozîne.​—Ennanga 146:3, 4.

Ocib’isoma Omurhondêro 3:19 n’Omuhanûzi 9:6, 10.

BULYA GURHI RHWAKACIDOSA ER’IDOSO: Rhulonzize okulama n’okucishingira akalamo haguma n’abazigirwa birhu. Birhakasomerana okubona rhucifinjire bwenene okushub’ibona bene wirhu bafîre.

GURHI EBIBLIYA EYIGIRIZIZE: Bantu banji bafîre bayish’ifûka. Yezu alaganyîze oku ‘abali omu nshinda boshi bash’iyumwa izu lyage banarhengemwo.’ (Yowane 5:28, 29) Lugenda omuhigo gwa Nyamuzinda gw’aha murhondêro, abo bantu bayish’ifûlwa bayish’iba n’obulyo bw’okulama omu igulu paradizo. (Luka 23:43) Hano eco ciragane c’amango gayishire cihikirizibwa, abantu bakenga Nyamuzinda bayish’iba n’amagala nkana n’obuzine bw’ensiku n’amango. Ebibliya edesire erhi: “Abashinganyanya no balya igulu, bo banalibêrakwo ensiku n’amango.”​—Ennanga 37:29.

Ocib’isoma Ayubu 14:14, 15; Luka 7:11-17; n’Ebijiro by’entumwa 24:15.

BULYA GURHI RHWAKACIDOSA ER’IDOSO: Hofi abemezi ba ngasi madini, kusalira basalira. Cikone, banji banabone nka Nyamuzinda arhashuza amasal gabo.

GURHI EBIBLIYA EYIGIRIZIZE: Yezu arhuyigirize mpu rhumanye rhwakagalukira-galukira ebinwa byo na birya omu masala girhu. Adêrha erhi: “Nka mwashenga, murhakazig’igalukira-galukira ebinwa birya byo na birya.” (Mateyo 6:7, NWT) Nka rhulonzize nyamuzinda ayumvirhize amasala girhu, rhukwanine rhushenge oku ayemire. Lyo rhujira ntyo, rhukwanine rhuciyigirize obulonza bwa Nyamauzinda na ntyo rhumushenge omu njira alonzize. Rhusomire ntya omu 1 Yowane 5:14: “Erhi rhwakamushenga akantu nk’oku alonzize, anarhuyumvirhize.”

Ocib’isoma Ennanga 65:2; Yowane 14:6, 14; na 1 Yowane 3:22.

BULYA GURHI RHWAKACIDOSA ER’IDOSO: Bantu banji babà bayemire oku ensarangahangane okulongereza ebyo bintu bwenene, buzinda babone nta mwishingo okulonge, okumanyikana n’iranga byanabalerhera omwishingo. Banacihangane okulongereza ebyo bintu bwenene, buzinda babone nta mwishingo bibalerhire.

GURHI EBIBLIYA EYIGIRIZIZE: Yezu ayerekîne enjira y’okuba n’omwishingo erhi adêrha ntya: Abw’obushagaluke bali balya bamanyirire obukenyi bwabo b’obunyamûka.” (Mateyo 5:3, NWT) Rhwanaba n’omwishingo erhi rhwakashibirira obukenyi bwirhu b’obunyamûka; irala lirhu ly’okumanya okuli lugenda abantu. Ok’okuli kuba omu Bibliya. Okumanya okuli kwanarhurhabala rhumanye eby’obulagirire n’ebirhali bya bulagirire. Erhi rhwanaba n’akalamo kagwerhe omuhigo.​—Luka 11:28.

Ocib’isoma Emigani 3:5, 6, 13-18 na 1 Timoteyo 6:9, 10.

 Ebinwa rhuganirire eyo nyanya buli bofofi lugenda amashuzo g’Ebibliya kuli galya madoso ndarhu. K’olonzize omanye eyindi myanzi minji kulusha eyo? Akaba oli muguma muli abo “bakenyi omu bunyamûka,” kobinali wanalonza okumanya binji kulusha. Nkaba wanacidosa agandi madoso gali nk’aga: ‘Erhi akaba Nnamahanga anarhushibirire, bici byarhumire aleka amalibuko gagendekere kuhik’ene?Gurhi nakajira lyo akalamo kw’omulala gwani kaba kinja kulusha?’ Ebibliya eshuzize kw’’ago madoso n’agandi manji.

Cikone, bantu banji ene barhaba badidu okusoma Ebibliya. Banakayibona nka ciba citabu cinene bwenene na cizibu okuyumwa. K’olonzize oburhabale ly’ohasha okulonza amashuzo omu Bibliya? Abahamiziri ba Yehova banakolese njira ibirhi zakakurhabala.

Enjira ya burhanzi ciri citabu Bici Ebibliya erhuyigiriza? Eco citabu cayandisîrwe mpu lyo cirhabala abantu bagwerhe emikolo minji bwenene babone amashuzo gw’okuli gali omu Bibliya lugenda amadoso gw’obulagirire. Enjira ya kabirhi guli muhigo gw’okuyiga Ebibliya aha kâ buzira kuhâna kantu. Muhamirizi wa Yehova muguma akuyigiriza Ebibliya anakulambagirire aha kâ erhi murhimanane abandi hantu hakwanine na ntyo ngasi mugobe mwanashambâla oku myanzi y’Ebibliya omu kasanzi kasungunu. Emiliyoni y’abantu omw’igulu lyoshi eri yayunguka kugerera kw’ogo muhigo. Bantu banji bamulibwo bahikire ahabacishinga bwenene omu kuderha erhi: “Nabwine okuli!”

Nta kandi kantu ka bulagirire bwenene rhwakabanako kulusha okumanya okuli. Okuli kw’Ebibliya kuli kwarhukûla omu bujà bw’obukurungu, enyigirizo z’okurhusharhisa obwenge n’omu boba. Okuli kunarhule obulangalire, omuhigo omu kalamo n’omwishingo. Yezu adesîre erhi: ‘Mwamanya okuli, n’okuli kwammurhenza omu bujà’.​—Yowane 8:32.