Esehemu ntanzi y’e Tafsiri ya Ulimwengu Mupya a yajiragwa omu mwaka gwa 1950. Na kurhangira ago mango, abantu bashibirira Ebibliya barhondera babona oku eyo mpindulo eri y’okuli bulya mandiko maguma gahindwirwe kurhenga omu zindi mpindulo z’Ebibliya. Ebi bintu biri ah’idako biyerekine ecirhumire c’olo lubero.

•   Emyanzi erimwo erhenzire ahantu hashinganine. Etafsiri ya Ulimwengu Mupya yarhenzire ahantu hashinganine, kw’okuderha omu mandishi ga mîra gashinganine. Omu kulonza okushushanya ebintu, e Bibliya ya King James Version (Bible du roi Jacques) y’omu mwaka gwa 1611, yahindulagwa kurhenga omu mandishi garhaliyenezize emyanzi n’obo lyo bahindula e Tafsiri ya Ulimwengu Mupya, bakolesize amandishi ga mîra ganashinganine.

•   Nyishwekerezi. E Tafsiri ya Ulimwengu Mupya, enacihangane okuhâna emyanzi n’obwishwekerezi boshi na nk’oku yanalongozibagwa n’iroho lya Nnâmahanga. (2 Timoteyo 3:16) Mpindulo nyinji z’Ebibliya zabuzire bwaba nyishwekerezi oku myanzi ya Nnâmahanga na ntyo zakulikira enkomêdu za bene bantu. Kwa lwiganyo, mpindulo nguma za zazize izino lya Nnâmahanga Yehova n’okulikâba n’amazino g’obukulu nka Nyakasane erhi Nnâmahanga.

•   Emisemwa. Lubero n’empindulo za binwa oku binwa, e Tafsiri ya Ulimwengu Mupya yohe enahâne emisemwa eyenire enanahugûsirwe bwinja kuhika entanya z’amandishi ga mîra zibonekane bwinja. Abahinduzi bahindulaga Ebibliya omu kuderha emisemwa yone, banahikira aha bayushûla entanya za bene bantu erhi kuleka entanya z’obulagirire.

 Ebitabu byalesirwe. Akanisa Katoliki n’akanisa k’eci Ortodoxi bayushwire omu Bibliya zabo ebitabu bantu baguma baguma bahamagala les Apocryphes. N’obo, ebyo bitabu birhayemerirwi omu canon k’Abayahudi. Ebibliya eyerekine n’obwalagale oku Abayahudi bo “Nnâmahanga arhanzir’ibisa ebinwa byage.” (Abaroma 3:1, 2) E Tafsiri ya Ulimwengu Mupya n’ezindi mpindulo z’Ebibliya za mwakano kasanzi za zazize ebitabu bihamagalwa livres apocryphes.

 Emilongo yalesirwe. Mpindulo nyinji zayushwire emilongo erhali omu mandishi ga mîra g’Ebibliya gahaba. Okubiyerekire e Tafsiri ya Ulimwengu Mupya, yohe, erhagwasagya ezo nyushûlo. Mpindulo nyinji za Bibliya za mwagano mango nazo zirhazihiraga erhi ciru bakazigwasa banayandike oku ezo nyushûlo zirhamanyikini n’amandishi ga mîra gw’okuli. b

 Okucishoga ebinwa biri lubero. Empindulo za binwa oku binwa, hali amango zirhayumvikana erhi ciru zirhebana. Kwa lwiganyo, enderho za Yezu ziri omu Mateyo 5:3 zahindwirwe ntya: “Iragi lyabo abakenyi omu murhima.” (Verbum Bible, Bible annotée, Nouvelle Bible Segond, Bible d’Ostervald; Bible à la Colombe.) Bantu banji babwine oku omusemwa “abakenyi omu murhima” guli musemwa gwa cinwa oku cinwa n’abandi banayerekane oku muli ogo mulongo, Yezu alonzagya asegeze obulagirire bw’obwirhohye erhi bw’obukenyi. Muli ogo mulongo, Yezu alonzagya ayerekane oku lyo rhuba n’omwishingo, rhushinganine rhuyemere obulongozi bwa Nnâmahanga. E Tafsiri ya Ulimwengu Mupya, eyerekine entanya za Yezu zali zihi omu kuderha oku “abw’omwishingo bo balya bayemire oku bakenyirwe n’ebintu by’ekiroho.”​—Mateyo 5:3. c

•   Omu maruba gw’omu nsiku 8/12/1950, Edgar J. Goodspeed muntu oshibirira eby’Ebibliya bwenene na muhinduzi omanyikine bwenene ayandika ntya okubiyerekire Amandiko g’Ecigiriki g’Ecikristu g’e Tafsiri ya Ulimwengu Mupya: “Bwenene nshagalukira omukolo gwinyu gw’obumisionere gujirwa omw’igulu lyoshi, n’eyi mpindulo y’okuli n’eyenire yansimisize bwenene kulusha. Nanaderha n’obwalagale oku omu njira nyinji, ogu mukolo gwajijirwe n’obumanye bunji na buzira kugokeza.”

•   Okubiyerekire Profesere Allen Wikgren w’oku Université y’e Chicago, adesire oku e Tafsiri ya Ulimwengu Mupya luli lwiganyo lwinja lw’empindûlo z’endimi za mwakano kasanzi, ahali eyimangire oku zindi mpindulu ziyorha zihaba yohe ekolesize “ebinwa n’enderho zirhazagihumwako n’abandi zinashinganine.”​—The Interpreter’s Bible, Volume I, bukurasa 99.

•   Omu binwa byaderhagwa okubiyerekire Amandiko g’Ecigiriki g’Ecikristu, Tafsiri ya Ulimwengu Mupya, Alexander Thomson ayandika ntya lugenda Ebibliya y’ecingereza: “Bibonekine bwinja oku eyi mpindulo guli mukolo gw’abantu balonza okuhûgukwa ebiri biyandike banagwerhe buhashe bunji, bacihanganyire okulonza ebi ngasi lwandiko lw’ecigiriki luhugwire omu kukolesa ngasi byoshi bihaba omu lulimi lw’ecingereza.”​—The Differentiator, Mwezi gwa 4, 1952, bukurasa 52.

•   Okubiyerekire e Tafsiri ya Ulimwengu Mupya, Charles Francis Potter adesire ntya: “Abahinduzi barhamanyisagya amazino gabo, bacihanganyire bayandika amandishi bwinja, abe okubiyerekire amandiko g’Ecigiriki erhi ga Cihabraniya, bajira ntyo n’obwenge boshi, n’omu njira elengerire.”​—The Faiths Men Live By, bukurasa bwa 300.

•   Ciru akaba arhanyize oku emyanzi eri omu Tafsiri ya Ulimwengu Mupya eri ya bantu bagwerhe bwenge bunji bwenene, profesere Robert M. McCoy aderha ntya: “Okuhindulwa kw’Endagano Mpyahya ciri cerekane oku ecigusho [Abahamirizi ba Yehova] c’abantu bagwerhe bumanye bunji bakahasha bapata amashuzo oku mazibu manji gahaba gw’okuhindula Ebibliya.”​—Andover Newton Quarterly, Mwezi gwa 1, 1963, bukurasa bwa 31.

•   Ciru akaba arhaliyemire myanzi miguma miguma eri omu Tafsiri ya Ulimwengu Mupya, profesere MacLean Gilmour, ahikira ah’ayemera oku abayihindulaga “baligwerhe obumanye bunji bw’ecigiriki.”​—Andover Newton Quarterly, Mwezi gwa 9, 1966, bukurasa 26.

•   Omu busagasi ajiraga bw’okulonza okushushanya e Tafsiri ya Ulimwengu Mupya n’ecigabi c’Ebibliya ehamagalwa Kingdom Interlinear Translation of the Greek Scriptures, profesere Thomas N. Winter ayandika ntya: “Obuhinduzi bw’eyi komite erhamanyisagya amazino g’abantu bayirimo, yasegize obwenge oku bumanye bwa mwazino nsiku zirhu, ebi bayandisire bishinganine binali by’okuli.”—The Classical Journal, Mwezi gwa 4-5, 1974, bukurasa bwa 376.

•   Profesere Benjamin Kedar-Kopfstein, wasomire ecihabraniya e Israheli ayandika ntya omu mwaka gwa 1989: “Omu busagasi bwani okubiyerekire Ebibliya y’ecihabraniya n’empindulo zajijirwe, nankasegeza empindulo y’ecingereza emanyikine okw’izino ly’empindulo Tafsiri ya Ulimwengu Mupya. Muli oko, nahikira aha nabona bwinja oku abajiraga eyi mpindulo bacihanganyire okuyandika ebintu bipatine n’obwenge na kandi ebyo bintu biri byakucikubagirwa na by’okuli.”

•   Omu kulonza okumanya Ebibliya ekolesibwa bwenene oku bantu baganira ecifaransa kugerera obulenga ahamagire neuf des Bibles, Jason David BeDuhn, mwalimu w’ekonferanse y’amasomo g’idîni, ayandika ntya: “Empindulo ehamagalwa NW [New World Translation] ebonekine oku yo Bibliya y’okuli na kandi y’ekolesibwa kulusha ezindi zoshi.” Ciru akaba bantu banji n’abantu bashibirira eby’Ebibliya bwenene banaderhe oku olubero babwine omu Tafsiri ya Ulimwengu Mupya lurhengine n’okuhalira kwa ngasi muguma idîni ly’abahindulaga Bibliya ndebe, muli oko profesere, BeDuhn aderha ntya: “Olubero lubonekana kuli kubona oku e Tafsiri ya Ulimwengu Mupya eba y’okuli bwenene enaba ekolesize enderho z’amandishi ga mîra g’Endagano Mpyahya omu kujira ntyo omu okuli n’omu bushinganyanya.”​—Truth in Translation, bukurasa bwa 163, 165.