2 සාමුවෙල් 11:1-27
11 අලුත් අවුරුද්දක ආරම්භයත් සමඟම+ දාවිත් රජ, යෝවාබ්වද තම සේවකයන්වද මුළු ඊශ්‍රායෙල් හමුදාවද යුද්ධයට පිටත් කර යැව්වේය. ඔවුන්ගේ අරමුණ වූයේ අම්මොන්වරුන්ට පහර දී+ රබ්බා නුවර වටලාගැනීමයි.+ නමුත් දාවිත් යෙරුසලමෙහි රැඳී සිටියේය. (සාමාන්‍යයෙන් රජවරුන් යුද්ධවලට ගියේ අවුරුද්දේ මුල් කාලයේදීය.)+
2 සැන්දෑ වරුවක දාවිත් තම යහනෙන් නැඟිට නිවසේ සැඳැල්ලට*+ ගොස් එහි සක්මන් කරමින් සිටියේය. ඒ අවස්ථාවේදී දිය නාමින් සිටි කාන්තාවක ඔහුගේ නෙත ගැටුණේය.+ ඇය ඉතා රූමත් කාන්තාවක් වූවාය.+
3 දාවිත් ඇය ගැන විමසා+ බැලූ විට එක්තරා පුද්ගලයෙක් ඔහුට මෙසේ කීවේය. “ඇය එලියාම්ගේ* දුව+ බැත්-ෂෙබා.+ ඇගේ පුරුෂයාගේ නම උරියා.+ ඔහු හිත්තී ජාතිකයෙක්.”+
4 ඒ කාලයේදී බැත්-ෂෙබා පවිත්‍ර වීමේ පිළිවෙත්+ අනුගමනය කරමින් සිටියාය. දාවිත් මිනිසුන් යවා ඇයව තම නිවසට ගෙන්වාගත්තේය.+ ඉන්පසු ඔහු ඇය සමඟ සයනය කළේය.+ පසුව ඇය තම නිවසට ගියාය.
5 බැත්-ෂෙබා තමන් ගැබ්ගෙන සිටි බව දැනගත් විට, “මට දරුවෙක් ලැබෙන්න ඉන්නවා” කියා දාවිත්ට දැන්වූවාය.
6 එය දැනගත් විට දාවිත් රජ, යෝවාබ් වෙත පණිවිඩකරුවන් යවා මෙසේ දැන්වූවේය. “හිත්තී ජාතික උරියාව මා ළඟට එවන්න.” යෝවාබ්ද එසේ කළේය.
7 උරියා ඔහු වෙත පැමිණි විට දාවිත් රජ ඔහුගෙන් යෝවාබ්ගේ හා ඊශ්‍රායෙල් සෙබළුන්ගේ සැප දුක් ගැනද යුද්ධයේ තොරතුරු ගැනද විමසුවේය.
8 පසුව දාවිත් රජ, “ඔබ දැන් ගෙදර ගිහින් ඇඟපත සෝදාගන්න”+ කියා උරියාට කීවේය. ඉන්පසු උරියා රජු වෙතින් ගියේය. රජද තම සේවකයන් අතේ උරියාට තෑග්ගක්* යැව්වේය.
9 එහෙත් උරියා තම නිවසට ගියේ නැත. ඔහු තම ස්වාමියාගේ අනික් සේවකයන් සමඟ රජුගේ නිවසේ දොරකඩ අසල නිදාගත්තේය.
10 “උරියා නිවසට ගියේ නැහැ” කියා රජුට දන්වන ලදි. එය දැනගත් විට දාවිත් රජ, “ඔබ දුර ගමනක් ගිහින් නේද ආවේ? ඉතින් ඇයි ඔබ ගෙදර යන්නේ නැත්තේ” කියා උරියාගෙන් ඇසුවේය.
11 එවිට උරියා දාවිත් රජුට මෙසේ කීවේය. “ගිවිසුම් පෙට්ටිය+ තියෙන්නේ කූඩාරමකයි. ඊශ්‍රායෙල්වරුන් හා යූදාවරුන් ඉන්නෙත් කූඩාරම්වලයි. මගේ ස්වාමියා වන යෝවාබ් හා ඔහුගේ සේවකයන්+ එළිමහනේ කඳවුරු බැඳගෙන ඉන්නවා. මේ වගේ අවස්ථාවක මම කොහොමද ගෙදර ගිහින් කාලා බීලා මගේ භාර්යාව එක්ක සතුටු වෙන්නේ?+ මම ඔබ ඉදිරියේ දිවුරා කියන්නම්,+ මට කවදාවත් එහෙම දෙයක් නම් කරන්න බැහැ!”
12 එවිට දාවිත් රජ, “එහෙමනම් අදත් ඔබ මෙහෙ ඉන්න. හෙට මම ඔබව ආපසු පිටත් කර අරින්නම්” කියා උරියාට කීවේය. එබැවින් උරියා එදිනද පසුවදාද යෙරුසලමෙහි නැවතී සිටියේය.
13 දාවිත් රජ තමා සමඟ කෑම කන්න එන්න කියා උරියාට ආරාධනා කළේය. ඒ අවස්ථාවේදී දාවිත් රජ මත් වන තරමටම උරියාට බොන්න දුන්නේය.+ එහෙත් රාත්‍රියේදී උරියා තම නිවසට නොගියේය. ඔහු තම ස්වාමියාගේ සේවකයන් නිදාගත් ස්ථානයේම නිදාගත්තේය.
14 පසුවදා උදෑසන දාවිත් රජ යෝවාබ්ට ලිපියක් ලියා+ එය උරියාගේ අතේ යැව්වේය.
15 ඔහු එම ලිපියේ මෙලෙස ලියා තිබුණේය.+ “ඉතා දරුණු විදිහට සටන් කරන තැනක් බලා උරියාව සතුරන් ඉදිරියටම යවන්න.+ ඊටපසු ඔබ සියලුදෙනාම එතැනින් ඉවත්ව යන්න. සතුරන් අතින් ඔහුට මැරුම් කෑමට ඉඩ දෙන්න.”+
16 ඒ අවස්ථාවේදී යෝවාබ්, රබ්බා නුවර අවට කඳවුරු බැඳගෙන සිටියේය. එවිට ඔහු දක්ෂතම සටන්කරුවන් සිටින තැනක් බලා උරියාව එතැනට යැව්වේය.+
17 ඒ නුවරේ මිනිස්සු පිටතට ඇවිත් යෝවාබ්ට විරුද්ධව සටන් කරන්න පටන්ගත්තෝය. ඒ අවස්ථාවේදී දාවිත්ගේ සේවකයන් කිහිපදෙනෙක්ම මැරුම් කෑවෝය. හිත්තී ජාතික උරියාද මැරුම් කෑවේය.+
18 යෝවාබ්, යුද්ධයේ සියලු තොරතුරු දාවිත් රජුට දැන්වීම සඳහා පණිවිඩකරුවෙකු කැඳවා
19 ඔහුට මෙසේ කීවේය. “යුද්ධයේ හැම තොරතුරක්ම රජුට කියන්න.
20 ඔහු කෝප වී, ‘එතරම් ළඟට ගිහින් සටන් කෙරුවේ ඇයි? ඔවුන් පවුරේ ඉඳන් පහර දෙයි කියලා ඔබ දැනගෙන හිටියේ නැද්ද?
21 යෙරුබ්බෙෂෙත්ගේ+ පුත් අබිමෙලෙක් මැරුණේ කොහොමද කියලා ඔබට මතක නැද්ද?+ ගෑනු කෙනෙක් පවුර උඩ ඉඳං ඔහුගේ හිසට කුරහන් ගලක් අතහැරලා+ තේබේෂ්හිදී+ ඔහුව මරලා දාපු හැටි ඔබට මතක නැද්ද? ඒ ගැන දැන දැනත් ඔබ පවුර කිට්ටුවටම ගියේ ඇයි’ කියා ඇහුවොත් ඔබ රජුට මෙහෙම කියන්න. ‘ඔබේ සේවකයා වූ උරියාත් සටනේදී මැරුණා.’”+
22 පණිවිඩකරු දාවිත් රජු වෙත ගොස් යෝවාබ් කී ලෙස ඔහුට දැන්වූවේය.
23 ඔහු දාවිත් රජුට මෙසේ කීවේය. “ඒ මිනිස්සු අපිට වඩා බලවත්. ඔවුන් නුවරෙන් පිටතට ඇවිත් අපිට විරුද්ධව සටන් කළා. අපිත් නුවර දොරටුව දක්වාම ගොස් ඔවුන්ට විරුද්ධව සටන් කළා.
24 නමුත් පවුර උඩ හිටපු දුනුවායෝ ඔබේ සේවකයන්ට පහර දුන්නා.+ ඒ අවස්ථාවේදී රජුගේ සේවකයන් කිහිපදෙනෙක්ම මැරුණා. ඔබේ සේවකයා වන හිත්තී ජාතික උරියාත් මැරුණා.”+
25 එය ඇසූ විට දාවිත් රජ පණිවිඩකරුවාට මෙසේ කීවේය. “ඔබ යෝවාබ්ට මෙහෙම කියන්න. ‘සිදු වුණු දේ ගැන කනගාටු වෙන්න එපා. යුද්ධයකදී අනිවාර්යයෙන්ම සුළු පිරිසක් හෝ මැරෙනවා.+ ඒ නුවරට ඊට වඩා දරුණු විදිහට පහර දී ඒක යටත් කරගන්න.’+ එහෙම කියලා යෝවාබ්ව දිරිගන්වන්න.”
26 තම ස්වාමිපුරුෂයා මිය ගිය බව උරියාගේ බිරිඳට ආරංචි වූ විට ඇය ඔහු ගැන+ හඬා වැලපුණාය.+
27 වැලපීමේ කාලය+ අවසන් වූ විගස දාවිත් රජ මිනිසුන් යවා ඇයව ඔහුගේ නිවසට ගෙන්වාගත්තේය. පසුව ඔහු ඇයව විවාහ කරගත්තේය.+ කල් යත්ම ඇය පුතෙකු බිහි කළාය. දාවිත් කළ දේ යෙහෝවා දෙවි සැලකුවේ+ ඉතා දුෂ්ට ක්‍රියාවක් ලෙසය.+
පාදසටහන්
^ එනම්, වහලයක් නැතුව සාදා ඇති, සඳ එළිය වැටෙන උඩුමහලට.
