2 සාමුවෙල් 6:1-23
6 දාවිත් රජ නැවත ඊශ්‍රායෙල් සෙනඟ අතරින් තෝරාගනු ලැබූ පුරුෂයන්+ තිස්දහසක් තමා වෙතට රැස් කරගත්තේය.
2 පසුව ඔහු රැස් කරගත් සෙනඟ සමඟ බායලෙ-යූදා නුවරට+ ගියේය. කෙරුබ්වරුන් පිට හිඳගෙන+ සිටින ස්වර්ගයේ සේනාවල අධිපති වන යෙහෝවා දෙවිගේ+ නාමය+ දරන සැබෑ දෙවිගේ ගිවිසුම් පෙට්ටිය+ එතැනින් රැගෙන ඒමට ඔවුහු අදහස් කළෝය.
3 ඔවුහු සැබෑ දෙවිගේ ගිවිසුම් පෙට්ටිය අලුත් කරත්තයක තබා+ අබිනාදාබ්ගේ+ නිවසේ සිට ගෙනාවෝය. අබිනාදාබ්ගේ නිවස පිහිටා තිබුණේ කන්දක් මතය. අබිනාදාබ්ගේ පුත්‍රයන් දෙදෙනා වන උස්සාහ් හා අහියෝ+ කරත්තය දක්කාගෙන ගියෝය.
4 ඔවුහු අබිනාදාබ්ගේ නිවසේ සිට සැබෑ දෙවිගේ ගිවිසුම් පෙට්ටිය ගෙන ගියෝය. ගිවිසුම් පෙට්ටියට ඉදිරියෙන් අහියෝ ගමන් කළේය.
5 දාවිත් රජ හා මුළු ඊශ්‍රායෙල් සෙනඟ ජුනිපර් ලීයෙන් සාදන ලද සංගීත භාණ්ඩද වීණාද+ කුඩා වීණාද+ රබන්ද+ අත්තාළම්ද+ වෙනත් සංගීත භාණ්ඩද වාදනය කරමින් යෙහෝවා දෙවිගේ නමස්කාරයේ කොටසක් වූ එම අවස්ථාවට සතුටින් සහභාගි වූහ.
6 ඔවුන් නාකොන්* නම් කමත ළඟට පැමිණි විට හරකුන් කුලප්පු වූ නිසා කරත්තය පෙරළෙන්න ගියේය. එවිට සැබෑ දෙවිගේ ගිවිසුම් පෙට්ටිය වැටෙන්න නොදී උස්සාහ්+ එය අල්ලාගත්තේය.+
7 ඒ මොහොතේ යෙහෝවා දෙවි උස්සාහ් සමඟ මහත් සේ උදහස් විය.+ ඔහු කළ ඒ අගෞරවනීය ක්‍රියාව නිසා සැබෑ දෙවි ඔහුට පහර දුන්නේය.+ සැබෑ දෙවිගේ ගිවිසුම් පෙට්ටිය අසල ඔහු මැරී වැටුණේය.+
8 යෙහෝවා දෙවි උදහස් වී උස්සාහ්ට ඒ මොහොතේදීම පහර දුන් නිසා දාවිත් රජුගේ සිතේ කෝපයක් ඇති විය. ඒ සිද්ධිය නිසා එම ස්ථානයට පෙරෙෂ්-උස්සාහ්* යන නම තබන ලදි. අද දක්වාම එම ස්ථානය හඳුන්වන්නේ ඒ නමින්ය.+
9 එදින දාවිත් රජට යෙහෝවා දෙවි ගැන මහත් බියක් ඇති වී,+ “යෙහෝවා දෙවිගේ ගිවිසුම් පෙට්ටිය මා ළඟට ගෙනෙන්නේ කොහොමද”+ කියා කීවේය.
10 ඉන්පසු යෙහෝවා දෙවිගේ ගිවිසුම් පෙට්ටිය තම නුවරට*+ ගෙන යෑමට අකමැතිව, එය ගාත්හි* වැසියෙකු වූ+ ඕබෙද්-ඒදොම්ගේ+ නිවසට ගෙන යෑමට ඔහු අණ කළේය.
11 යෙහෝවා දෙවිගේ ගිවිසුම් පෙට්ටිය ගාත්හි වැසියෙකු වූ ඕබෙද්-ඒදොම්ගේ නිවසේ මාස තුනක් පුරා තිබිණ. යෙහෝවා දෙවි ඕබෙද්-ඒදොම්ටත් ඔහුගේ ගෙයි වැසියන්ටත්+ ආශීර්වාද කළේය.+
12 කලක් ගෙවුණු පසු දාවිත් රජුට මෙසේ ආරංචි විය. “සැබෑ දෙවිගේ ගිවිසුම් පෙට්ටිය ඕබෙද්-ඒදොම්ගේ නිවසේ තියෙන නිසා ඔහුටත් ඔහුට අයිති සියල්ලටත් යෙහෝවා දෙවි ආශීර්වාද කරලා.” එය ඇසූ පසු ඔහු සැබෑ දෙවිගේ ගිවිසුම් පෙට්ටිය ඕබෙද්-ඒදොම්ගේ නිවසේ සිට ප්‍රීති ඝෝෂා මැද දාවිත්ගේ නුවරට ගෙනාවේය.+
13 යෙහෝවා දෙවිගේ ගිවිසුම් පෙට්ටිය උසුලාගෙන ගිය අය+ පියවර හයක් ගමන් කළ පසු දාවිත් රජ ගවයෙකුව හා තර වස්සෙකුව පූජා කළේය.+
14 ඉන්පසු දාවිත් රජ යෙහෝවා දෙවි ඉදිරියේ මහත් උද්‍යෝගයෙන් නැටුවේය. ඒ අවස්ථාවේදී ඔහු ඇඳ සිටියේ ලිනන් රෙදිවලින් මසා තිබූ ඒෆොද් හැට්ටයක්ය.+
15 දාවිත් රජ ඊශ්‍රායෙල් සෙනඟ සමඟ ප්‍රීති ඝෝෂා නඟමින්+ හොරණෑ හඬ+ මැද යෙහෝවා දෙවිගේ ගිවිසුම් පෙට්ටිය+ රැගෙන ආවේය.
16 යෙහෝවා දෙවිගේ ගිවිසුම් පෙට්ටිය දාවිත්ගේ නුවරට ගෙනෙන විට සාවුල්ගේ දියණිය වූ මීකල්+ ජනේලයෙන් ඒ දෙස බලා සිටියාය. දාවිත් රජු යෙහෝවා දෙවි ඉදිරියේ උඩ පැනපැන නටන ආකාරය දැක ඇය තම සිතින්+ ඔහුව හෙළාදකින්න පටන්ගත්තාය.+
17 ඔවුහු යෙහෝවා දෙවිගේ ගිවිසුම් පෙට්ටිය නුවරට ගෙනැවිත් දාවිත් රජු ඒ සඳහා සූදානම් කළ කූඩාරමට එය ගෙන ගියෝය.+ එහි නියමිත ස්ථානයේ එය තැබුවෝය. ඉන්පසු දාවිත් රජ යෙහෝවා දෙවිට දවන පූජා+ හා හවුල් පූජා+ ඔප්පු කළේය.
18 දාවිත් රජ පූජා ඔප්පු කර අවසන් වූ පසු ස්වර්ගයේ සේනාවල අධිපති වන යෙහෝවා දෙවිගේ නාමයෙන්+ සෙනඟට ආශීර්වාද කළේය.+
19 ඔහු මුළු ඊශ්‍රායෙල් සෙනඟට එනම්, එහි සිටි සෑම ස්ත්‍රියකටම හා සෑම පුරුෂයෙකුටම මුද්දක හැඩැති රොටිය බැගින්ද රටඉඳි කුට්ටියක්* බැගින්ද වියළි මිදි කුට්ටියක් බැගින්ද+ දුන්නේය.+ ඉන්පසු සියලුදෙනා තම තමාගේ නිවසට හැරී ගියෝය.
20 දාවිත් රජ තම ගෙයි වැසියන්ට ආශීර්වාද කරන+ පිණිස තම නිවසට ආවේය. එවිට සාවුල්ගේ දියණිය වූ මීකල්+ ඔහු ඉදිරියට පැමිණ මෙසේ කීවාය. “අද ඊශ්‍රායෙල්හි රජ හැසුරුණු විදිහ හරි අපූරුයි!+ ඔබේ සේවකයන්ගේ දාසියන් ඉදිරියේ ඇඳුම් ගලවලා විළි ලැජ්ජාවක් නැති මෝඩයෙක් වගෙයි ඔබ හැසිරුණේ.”+
21 එවිට දාවිත් රජ මීකල්ට මෙසේ කීවේය. “මම අද ප්‍රීති වුණේ යෙහෝවා දෙවි ඉදිරියේයි. යෙහෝවා දෙවි ඔබේ පියා සහ ඔහුගේ පවුලේ අය වෙනුවට තමන්ගේ සෙනඟ වන ඊශ්‍රායෙල්වරුන්ව පාලනය කරන්න තෝරාගත්තේ මාවයි.+ ඒ නිසා මම දිගටම යෙහෝවා දෙවි ඉදිරියේ ප්‍රීති වෙනවා.+
22 මම මාවම පහත් කරගෙන මීටත් වඩා නින්දා අපහාස විඳින්න වුණත් සූදානම්.+ නමුත් ඔබ දැන් කියූ ඒ දාසීන් මාව ඉමහත් ගෞරවයෙන් සලකයි කියලා මට විශ්වාසයි.”+
23 ඒ සිද්ධිය නිසා සාවුල්ගේ දියණිය වූ මීකල්ට+ මිය යන තෙක් දරුවෝ ලැබුණේ නැත.
පාදසටහන්
^ තේරුම, “උස්සාහ්ට පහර දීම.”
^ මූ.අ., “දාවිත්ගේ නුවර.”
^ ගාත්-රිම්මොන් නම් නුවරට යොමු දැක්වුවා විය හැක.
^ පලතුරු වර්ගයක් වේළා, එකට තද කර සාදාගන්නා ලදි.
