Qarru Baalunku Muli Yanna Giddo Uurranno!

 Heeshshokki giddo mitte yannara, ‘Manchu beetti qarri togoonta mayiira batiri?’ yite xaꞌmittokki digatootto. Manchu beetti kumunni kiirranni dirira, olunni, buximate, mannu ooso iillishshanno danonni ikko kalaqamu danonni, jaddote, halaalaancho yoo hoonginni, xissotenna reyote buuto gawajjamanni heeꞌrino. Saihu xibbu diri kayinni isinni baasaho. Ikkollana, kuni baalunku qarri heeꞌrannokki yanna dagga ikka?

Ee, isinni tini qarru heeꞌrannokki yanna lowo geeshsha mule ikkase afa lowo geeshsha hagiirsiissanno! Qullaawu Maxaafi, “Bushuullu diteessanno . . . shooshaqoota ikkitinori kayinni uulla ragidhanno, lowo keeꞌrinnino tashshi yaannonsa” yaanno. Shooshaqootu uulla ragidhannohu mageeshshi yannaraati? Maganu Qaali, “Keeraano uulla ragidhanno; ise iimano hegerera heedhanno” yitanno dawaro aanno.—Faarso 37:10, 11, 29.

Maganu bunshenna qarra huni gedensaanni uulla gannate ikkitanno. Hakkono mannu ooso coꞌo yiinoha billiitete keere afidhe hagiirrunni hegerera heedhanno. Qullaawu Maxaafi masaalo togo yitanno: ‘Maganu Hindiiddo duuchcha illensa aaninni feyaanno; reyo woy dadillu woy wiꞌla woy dhibbu konni kaꞌira diheeꞌranno.’—Ajuuja 21:4.

Tenne dagganno haaro alame giddo, reyitinori nafa kaꞌe konni atooti beeqqaano ikkitanno. Maganu Qaali, ‘cubbaataammunna keeraano reyotenni kaꞌanno’ yaanno. (Soqqamaanote Looso 24:15) Assino bunshenni gaabbe isinni ammananno gede coyirino jaddaasinchira Yesuusi kiristoosi, “Ane ledo Gannatete heeꞌratto” yiinosihu konniraati.—Luqaasi 23:43, Haaro Alame Tiro.

 Qarru Kaimi Maati?

Maganu mannu ooso togoo hagiirsiisanno garinni heedhano gede hedo heedhusina, qarru hanafamanno gede mayira fajji? Kageeshsha seeda yanna mannu ooso qarrantanna sammi yee lainohu mayiraatiyya?

Maganu Addaaminna Heewani kalaqinohu mannimmansanni ikko surrensanni coꞌiimoota asseeti. Lowo geeshsha biiffino gannate giddo worinonsanna hagiirsiisanno looso uyinonsa. Qullaawu Maxaafi, “Maganuno loosinore baala lai! lowo geeshshano danchaho” yaanno. (Kalaqo 1:31) Maganoho hajajantoommero coꞌiimoota ooso ila dandiitannonna woꞌmanti uulla, mannu keerunninna hagiirrunni heeꞌranno gannate ikkitannonka.

Maganu Addaaminna Heewani kalaqinonsahu huwata woy heda dandiitannokki mannu milli assanno maashine woy roobootete gede asse diꞌꞌikkino. Hatteentenni doodha dandaate kaayyo uyiinonsa. Ikkollana hagiirraamma ikkite suffannohu tenne doodhate kaayyo garunni horoonsidhe Maganu seerira hajajanturooti. Maganu, “Ani, Yihowa Maganikki, qinaannoheri maatiro rosiiseemmohehonna hara hasiissannohe doogora massageemmoheho” yee coyirino. (Isayyaasi 48:17) Mannu ooso Maganu biddishshi gobbaanni umonsa qiniino garinni massaga dandiitanno garinni kalaqantinokkihura doodhate kaayyonsa doogimale horoonsira buutote qarra abbitanno. Qullaawu Maxaafi, “Manchu beetti doogosi umisinni qiniissira dandaannokkitanna harinshosino umisinni suwisirannokita” xawisanno.—Ermiyaasi 10:23.

Mararsannohu kayinni, umi anninkenna amanke Maganu biddishshi gobbaanni qiniino garinni umonsa gashsha dandiitannoha lawinonsa. Ikkollana isi biddishshira hajajantukki irkosi afiˈranna coꞌiimoota ikkite sufa didandiitanno. Konni daafiˈra geedhitannorenna reyitannore ikkitu.  Ninkeno oosonsa ikkinoommohura insawiinni cubbonna reyo ragiꞌnoommo.—Roomu 5:12.

Roorreenynya Lainohunni Kaꞌino Qara Hajo

Maganu Addaaminna Heewani hune wole meyaatanna labbaaha mayira dikalaqino? Korkaatuno kalaqama baalante aana noosi roorreenynyiranna gashshate noosi qoosso aana hettisamme kaꞌino daafiˈraati. Tenne hettisammenni kaꞌino xaꞌmo, Gashshate qoosso noosihu ayeeti? Suwino gashshooti ayeeho? Wole ragaanni, mannu ooso Maganu gashshooti gobbaanni fulte umonsa gashshituro qinaannonsa? Mannu oosora injaannonsahu Maganu gashshooti hunda heedhurootinso uminsa umonsa gashshiturooti? yitannote. Xaꞌmo tinino dawaro afidhanno gede Maganu ikkado yanna fajjino. Tini yannano mannu ooso Maganu biddishshi gobbaanni ayee dani poletikunna dagoomu gashshoote hattono miinjunna ammꞌnote amanynyoote woꞌnaalte laꞌara fajjino yanna ikkado ikka hasiissannose.

Tini yanna marichcho leellishshuyya? Sai kumunni kiirranni dirira manchu beetti heeshsho xawissannohu, qarru aana qarru lexxanni harinotaati. Saiha xibbe diro manchu beetti ayee yannanni baassino shettonni sayisino. Layinki alamete olira miliyoonete kiirranni manni danote goofino. Hattono 100 miliyoonenni kiirranni manni kayinni babbaxxino olinni reyino. Jaddonna finqille halaꞌlitino. Surrenna billiite jingilli assannore hashiishete gedeere horoonsira, alame baalantera halaꞌlitanni daggino. Siimu xaadooshshinni taraawanno dhibbi halaꞌlanni haꞌrino. Diru dirunku, miliyoonete kiirranni manni hudetenna xissote reyaanno. Ayeewano maate diigantanni no, amanynyootu baꞌneno halaꞌlitanni hadhino. Konne qarra tira dandiinohu mannu gashshooti dino. Geedhimma, dhibbanna reyo hunara dandiinohu mannu gashshooti mittu nafa dino.

 Manchu beetti no gari Qullaawu Maxaafi yannankara ikkannore umo asse coyirino garinniiti. Maganu Qaali tini heeꞌnoommo yanna “goofimarchu barra” ikkitinotanna “heeꞌrate qarrissannota” xawisanno. Ledeno Qullaawu Maxaafi, ‘bushuullu manninna dogaano bunshetenni danna saꞌanni hadhanno’ yaanno.—2 Ximootewosi 3:1-5, 13.

Qarru Heeꞌrannokki Yanna Mule No

Baalanti taje leellishshannohu manchu beetti Maganu biddishshi gobbaanni fule umisi umosi gashshasi abbitanno qarrinni furgannoti yanna iillitinotaati. Mannu ooso Maganu irko nookkiha qinaawino garinni uminsa umonsa gashsha dandiitannokiti xabbe leeltino. Keere, hagiirre, coꞌo yinoha billiitete keere abbaranna hegere heeshsho aara dandaannohu Maganu gashshootetilla. Konni daafiˈra, Yihowa fajjeenna keeshshitino bunshenna qarri uurranno yanna muleeti. Muli yanna giddo Maganu mannu ooso hajora anga wore tenne xeꞌo woꞌmitino alamenna amanynyootese hunanno.

Qullaawu Maxaafi masaalo, “[Mannu ooso gashshitanno yannara] iimi Magani horonta diigammannokki gashshoote xintanno . . . kuni gashshootino [uulla gashshoote] daahannonna coꞌo hunanno; kuni gashshooti kayinni hegerera heeꞌranno” yitanno. (Daanieeli 2:44) Qullaawu Maxaafihu qaru rosi, Yihowa konni gashshootisi ragaanni roorrenynyasinna gashshate noosi qoosso buuxisiisannota xawisate. Yesuusi “goofimarchu barra” ikkannore umo asse, “Mannu duuchchunkura naqaashe ikkanno gede kuni danchu duduwi Maganu gashshootihu daga duuchchate lallawamanno, hakka woyite goofimarchu daanno” yiino.—Maatewoosi 24:14.

 Kuni mannu gashshooti baꞌꞌanno wote, gattannori ayeeooti? Qullaawu Maxaafi, “Keeraanchu manchi kayinni ammaꞌnatenni heeshsho afiˈranno; duumballitte hige gatiro kayinni, lubboꞌya isinni dihagiidhitanno. Ninke kayinni ammaꞌnite gattannori widireeti ikkinnina, duumballitte shishshiqqe baꞌꞌanno manni wido diꞌꞌikkinoommo” yee dawaranno. (Ibirawuyaani 10:38, 39) Keerano Yihowa fajjo rosse loosu aana hosiissannoreeti. Yesuusi Kiristoosi, ‘Hegere heeshshono, ati callichchikki halaalaancho Magano ikkoottoha atenna soottoha Yesuusi Kiristoosi afate’ yiino. (Yohaannisi 17:3) ‘Tini alamenna tenne alame aana noo yorto saꞌanno, Maganu baxannore assannohu kayinni hegerera heeꞌranno.’—1 Yohaannisi 2:17.

Addi xawishsha aa hoongi geeshsha tenne borro giddo noo qummeeshsha haaꞌnoonnihu Ibirayisixete Qullaawa Borro (Akkala Gondooro) Haaro Alame Inigilizete Afii Tiro Xawishshu Ledo nootenniiti. Kiristiyaanu Girikinynyu Qullaawa Borro (Haaro Gondooro) 1993 M.D attammoonni Sidaamu Afii tiroonniiti.