Tenne birosherera rossininte gede, Qullaawu Maxaafi kiꞌnerano maateꞌnerano kaaꞌlannoha fakkana xintu seera amadino. Yihowa hagiirraamma ikkitinara hasiꞌranno. Isi magansiꞌra balaxisiissinanniha ikkiro, isi ‘wole coyibba baala uyinanniꞌneta’ coyiꞌrino. (Maatewoosi 6:33) Isi addinta jaallasi ikkitinara hasiꞌranno. Maganu ledo nooꞌne jaaloomi lexxanno gede assiꞌrate afidhinanni faro baala horoonsidhe. Tini mittu manchi afiꞌra dandaanno coyi baalunkunni roortino qoossooti.—Maatewoosi 22:37, 38.

QULLAAWU MAXAAFI MAYYAANNO? “Yihowa togo yaanno: ‘Ani anna ikkeemmoꞌne, kiꞌne kayinni labballonna meyaa oosoꞌya ikkitinanni.’” (2 Qorontoosi 6:18) Maganu muli jaallasi ikkitinara hasiꞌranno. Isi jaalla ikkate kaaꞌlitanno coyibba giddo mitte huuccattote. Yihowa ‘agurtinikki huuccidhinara’ koyisinoꞌne. (1 Teselonqe 5:17) Isi giddoꞌnetanna dhiwinoꞌne coye kultinanna macciishsha hasiꞌranno. (Filiphisiyusi 4:6) Minaanni maatesi riqiwe huuccatto assanno wote maatesi, Maganu isira mageeshshi geeshsha xawe leellinosiro affanno.

Maganoho hasaaphano agurranna isi yaannore macciishshano hasiissannonke. Qaalesinna Qullaawu Maxaafi aana xintantino borro xiinxallitinanni wote isi yaannore macciishshitinanni heedhinoonni yaate. (Faarso 1:1, 2) Rossinoonni coye hiince. (Faarso 77:11, 12) Maganu yaannore macciishshate Kiristaanu gambooshshe haꞌrano hasiissanno.—Faarso 122:1-4.

Mannaho Yihoware kulano, isi ledo albinni roore jaalooꞌmate kaaꞌlitannoꞌne. Togo assitini kiiro roore Yihowawa shiqqinanni hadhinanni.—Maatewoosi 28:19, 20.

MAA ASSA DANDIITINANNI?

• Barru baala Qullaawa Maxaafa nabbawatenna huuccatto assiꞌrate yanna gaaꞌme

• Maatete deerrinni, boohaarshunkunni roore ayyaanaamittete coye balaxisiisse

QULLAAWU MAXAAFI MAYYAANNO? “Maganunniwa shiqqe, isino kiꞌnewa shiqanno.” (Yaaqoobi 4:8) Maatete magansiꞌrara pirogiraame fushshiꞌranna hattee pirogiraame ganyitine harunsa hasiissannoꞌne. (Kalaqo 18:19) Kayinni wolurino hasiisannori no. Barru barrunku assitinanni coyira Maganu ledoꞌne ikkanno gede assiꞌra hasiissannoꞌne. ‘Mineꞌne ofoltinanni wote, doogote hadhinanni wote, goxxinanni wotenna kaꞌinanni wote Maganu daafira coyidhine’ maateꞌne isi ledo albinni roore jaalooꞌmitanno gede assidhe. (Marro 6:6, 7) “Aninna miniꞌya manni Yihowara soqqammeemmo” yiinohu Iyyaasute gedee mixo heedhoꞌne.—Iyyaasu 24:15.

MAA ASSA DANDIITINANNI?

• Maateꞌne miillara hasiisanno garinni ganyitine rosiisidhinanni pirogiraame heedhoꞌne