1. Magano hagiirsiisate maa assa hasiissannonke?

 MAGANU dancha illenni laꞌꞌankeranna isi ledo danchu fiixoomi heeꞌrankera hasiꞌnummoro, kaphu ammaꞌno ledo horonta karsama dihasiissannonke. Qoleno halaalaancho ammaꞌno harunsa hasiissannonke. Xaa yannara alamete doyichora batinyu manni hatto assanni no.

2. Yihowa Farciꞌraasine mageeshshi gobbara heedhanno? Loosinsa maati?

² Qullaawu Maxaafi balaxe masaalinonte gede, Magano halaalunni magansiꞌranno manni “daga baalantenni, gaꞌre gaꞌrentenni, gosa gosantenni, hattono afuu afuunkunni” gamba yiinohu “ayino kiire gudannokkihu batinyu manni” widira kiiramanno. (Ajuuja 7:9, NW) Lamala miliyoone aleeggannori Yihowa Farciꞌraasine, 235 gobbara mannu Yihowata baxillu doogonna seerasi afanno gede diinaggaabbe rosiissanni no.

3. Yihowa Farciꞌraasine aye calla magansidhanno? Insa hiittoo magansiꞌrawiinni xeertidhanno?

³ Yihowa Farciꞌraasine, mannu ooso magansiꞌra hasiissannonsahu Yihowa calla ikkinota ammantanno. Insa wole magannara woyi ammaꞌnote misillara disagaddanno. (1 Yohaannisi 5:21) Qolteno reyino mannira ayirrinye diuyitanno, woyi kaphu ammaꞌno assaawenna “Sheexaanu roso” halashshitanno ayyaannara dikarsantanno. (1 Ximootewosi 4:1) Ikkollana insa, reyitinori gannate ikkitino uulla aana reyotenni kaꞌanno yee Maganu uyinonke hexxo kulte shiidhinore sheshifachishshanno.—Yohaannisi 5:28, 29; Soqqamaanote Looso 24:15.

4. Maganu manni diginte ma garinni laꞌꞌanno?

⁴ Yihowa Farciꞌraasine diginte, kiilu woyi bita Daawuloosi looso ikkinota affino daafira togoo coyi ledo hili karso nafa diafidhino. Gawajjotenni agartannonke yite diginte diaddaxxitanno; insa addaxxitannohu Yihowaati.—Lawishsha 18:10.

5. Yihowa Farciꞌraasine ‘tenne alamere ikkitinokkihuˈ ma garinniiti?

⁵ Yesuusi rosaanosi ‘tenne alamere ikkitinokkitaˈ coyiꞌrino. (Yohaannisi 17:16) Yesuusi umisi yannasira noo poletikira horonta dikarsamino. (Yohaannisi 6:15) Yihowa Farciꞌraasineno alamete poletikira, meessi gobba baxate simmeetera, hattono dagoomu giddo silxaane afiˈrate assinanni sharrora anga diwodhitanno. Ikkollana, giwirenna qaraxo kaffaltanno, hattono heedhanno gobba higgera hajajantanno.—Yohaannisi 15:19; Roomu Sokka 13:1, 7.

6. Maganu soqqamaano adhanna adhama, hattono adhama diiga lainohunni mayi biddishsha harunsitanno?

⁶ Yihowa Farciꞌraasine gashshootu biddishshira hajajantanno daafira, adhanna adhamansa higgete mazaggawisiisidhanno. (Titoosi 3:1) Qolteno Maganu biddishshira hajajantanno daafira, mittete aleenni diadhitanno. (1 Ximootewosi 3:2) Hakkiinni saꞌeno, heeshshonsa giddo Qullaawu Maxaafiha xintu seera loosu aana hosiissanno daafira, adhanna adhamansa roore wote didiigantanno.

7. Yihowa Farciꞌraasine mimmitoho baxille leellishshannohu hiittoonniiti?

⁷ Yihowa Farciꞌraasine mimmitonsa baxxanno. Insa babbaxxitino gaꞌrenninna gosanni gamba yitinore ikkiturono, mimmitinsaranna Maganoho noonsa baxilli halaalaancho roduuwu mittimma heedhannonsa gede assinonsa. Kalaqamu dano iillituro woyi wolu korkaatinni kaaꞌlo hasiissuro, insa kuꞌu koꞌonne kaaꞌlate rakke iillitanno. Yihowa Farciꞌraasine heedhanno heeshshonnino baxille leellishshanno.—Yohaannisi 13:35.

8. Maganu manni hiikkuyi bushu assootiwiinni xeertiꞌranno?

⁸ Yihowa gosa ammanantenna sumbetenni heeꞌrate lowo sharro assitanno. Insa moorunni, kaphunni, amanyootu maaeellenni, dimbunni, hattono ammanama xeꞌino daddaliwiinni xeertidhanno. Yihowa Farciꞌraancho ikkino minaanni minaamasi digananno. Mitootu Yihowa Farciꞌraasine ikkitara albaanni,  togoore assitino; xa kayinni Yihowa kaaꞌlonni agurtino. Maganu albaanni ‘hayishshidhe qullaabbino.ˈ—1 Qorontoosi 6:9-11.

9. Mittu maxaafi Afiriku budinni heedhanno beetekiristaannare coyiꞌranni mayino?

⁹ Batinye ammaꞌno halaalu noohu ninkewaati yitanno. Loossinoha mito mito dhagge ikkanno looso tennera taje assite shiqishshanno. Lawishshaho mittu maxaafi, Afiriku budinni heedhanno beetekiristaanna yinannire lainohunni togo yiino: “[Haaro Kiristinnu gaamo,] bashsho diginte loossannori woyi xagga uyitanno mannooti assitannore gudisse adhitino. . . . Insa masaalo coyiꞌneemmo, hattono maalale assineemmo yitanno. Insa giddo masaalaanote yinanniri ajuuja laꞌanno, hattono haaqe tirtanno. Insa xiwantinore hursatenna xibba gargarate xawala, qullaawa zayite, buluulo, shaamanna hixaana horoonsidhanno.”

10, 11. Yannankera maalalete yinanniri mitte ammaꞌno Magano hagiirsiissannota ikkase dileellishanno yineemmohu mayiraati?

¹⁰ Togoo ammaꞌno harunsanno manni loosantanno maalale, ammaꞌnonsa Maganu maassiꞌrinota ikkitinota leellishshanno gede asse hedanno. Ikkollana, mannu duucha wote maalalete yaanno coyi mitte ammaꞌno Yihowa hagiirsiissannota ikkitinota dileellishanno. Kaphu ammaꞌno harunsitannori “maalaꞌlinanni coye” assitanno gede Sheexaanu wolqa aara dandaanno. (2 Teselonqe 2:9) Qoleno, masaalo coyiꞌra, addi addi afiinni coyiꞌra, hattono baxxitino egenno afiˈra labbinoti Maganuwiinni afiˈnanni elto ‘gattannotaˈ Qullaawu Maxaafi balaxe masaalino.—1 Qorontoosi 13:8.

¹¹ Yesuusi togo yee qorowisiisino: “‘Mooticha, Mootichaˈ yaannoehu baalu iimi mangiste eannoha diꞌꞌikkino; iima noo Anniꞌya fajjo assannohu kayinni eanno. Hakko barra batinyu manni togo yaannoe: ‘Mooticha, Mooticha, suꞌmikkinni masaalo dicoyiꞌnoommo? Suꞌmikkinni agaaninte difushshinoommo? Hattono suꞌmikkinni lowo maalale diloonsoommo?ˈ Hakkawote ani, ‘Kiꞌne bashshonni diegennoommoꞌne! Kiꞌne finqilaasine, anewiinni faffe!ˈ yeemmonsa.”—Maatewoosi 7:21-23, NW.

12. Iimi Mangiste eꞌannori ayeooti?

¹² Ikkina iimi Mangiste eꞌannori ayeooti? Yihowa fajjo assitannoreeti.

13. Maganu mannisi hiikkoye looso loosanno gede hajajino? Loossanni noori ayeooti?

¹³ Yannankera Maganu mannisi ma assara hasiꞌranno? Yesuusi togo yiino: “Kuni [Maganu] Mangistehu danchu duduwi daga baalate naqaashe ikkanno gede uulla woꞌmate sabbakamanno.” (Maatewoosi 24:14, NW) Yihowa Farciꞌraasine diinaggaabbe loossanni noo loosi konneeti.

14. Maganu Mangiste maati? Hatte mangistera moohannohu ayeti?

¹⁴ Yihowa Farciꞌraasine, Maganu Mangiste woꞌma uulla xalalletenni gashshannoha iimi gashshoote ikkitinota “uulla woꞌmate” aana dudubbanni no. Insa, Yihowa Kiristoosi Yesuusi Mangistesira Nugusa asse shoominota, hattono isi ledo mookkara 144,000 gashshaano mannu ooso giddonni doorinota rosiissanno.—Daanieeli 7:14, 18; Ajuuja 14:1, 4.

15. Maganu Mangiste maa huntanno?

¹⁵ Insa Qullaawa Maxaafa horoonsidhe, Maganu Mangiste Sheexaanu alame gudisse huntannota mannaho kultanno. Kaphu ammaꞌnonna Magano shollishshe Daawuloosi kaffi kaffi assitanno timirtese baꞌanno! (Ajuuja 18:8) Qoleno, Magano taqawwamannohu mannu gashshooti baalunku hoꞌlanno!—Daanieeli 2:44.

16. Kiristoosi Yesuusi gashshooti hunda galannohu hiittoo mannaati? Insa hiikko heedhanno?

¹⁶ Hakkiinni saꞌeno Yihowa Farciꞌraasine, Kiristoosi Yesuusi Maganu hasiꞌrannore assanno mannira lowo atoote abbannota rosiissanno. Togoo manni uullate aana isi gashshooti hunda galanno. Qullaawu Maxaafi togo yee hexxo aanno: “Isi kaaꞌlo hasiꞌre raaranno buxicho, qohaminoha, hattono kaaꞌlannosihu nookkiha baala gatisanno. Isi mishaminohanna buxicho mararanno; hattono buxanete lubbo gatisanno.”—Faarso 72:12, 13.

17. Maganu Mangistere dudubbanni noori ayeoo callaati?

¹⁷ Maganu Mangisteha dancha duduwo dudubbe Maganu fajjo assitannoti wole gaamo dino. Maganu Mangistere uulla woꞌmate noo manni afanno gede assitanni noori Yihowa Farciꞌraasine callaati.