ROSO 22
Mannaho Dancha Duduwo Kula Dandaattohu Hiittoonniiti?
Qullaawu Maxaafi halaale affanni haꞌratto woyite, ‘Tenne mannu baalunku afiro danchaho!’ yite hedattora dandaatto. Addanko mannu baalunku afara halchinanni halaaleeti! Ikkirono, rosootto halaale wolu mannira kula waajjattora dandaatto. Hanni waajjakki qeeꞌlanna Qullaawu Maxaafi kulannoha dancha duduwo hagiirrunni mannaho kula dandaatto gara laꞌno.
1. Rosootto halaale egennootto mannira kula dandaattohu hiittoonniiti?
Yesuusi rosaano, “Ninke anfoommorenna macciishshinoommore kula diagurreemmo” yitino. (Soqqamaasinete Looso 4:20) Insa rossino halaale lowo geeshsha baxxino daafira, manna baalaho kula hasidhino. Aterano hatto macciishshamannohe? Hatto ikkiro, rosoottore miniꞌne manniranna jaallakkira ayirrinyunni kula dandaatto faro hasiꞌri.—Qolasiyaasi Sokka 4:6 nabbawi.
Hasaawa hanafa dandiinannita mite doogga
-
Miniꞌne manni ledo woy fiixikki ledo hasaawatto woyite, togo yite Qullaawu Maxaafi hasaawa hanafa dandaatto: “Tenne lamalara dhagge ikkanno roso rosoommo.”
-
Xiwamino woy yaaddo amaddino jaalikkira mitto jawaachishanno qummeeshsha nabbawisi.
-
Ledokki loossannori ‘Heeshsho hiittooti?’ yite keere haadhannohe woyite, Qullaawu Maxaafi xiinxallokkiwa woy songote gambooshshiwa rosoottore kulinsa.
-
Jaallakkira jw.org yinanni webisayitenke leellishinsa.
-
Qullaawu Maxaafi xiinxallokki yannara wolu manni ledokki ofolle macciishshanno gede koyisi; woy insa uminsa xiinxallinsanninsa gede jw.org widoonni kuꞌla dandiitanno gara leellishinsa.
2. Songote ledo mitteenni soqqamate mixo fushshiꞌra dancha ikkitinohu mayiraati?
Yesuusi rosaano dancha duduwo egentino mannira calla kulte diagurtino. Yesuusi insa sabbakkara “katammanna darga baala alba ikkite hadhanno gede lame lame asse [soyino].” (Luqaasi 10:1) Togo qinaawino garinni sabbakansa, lowo manni dancha duduwo macciishshanno faro afiꞌranno gede assitino. Qoleno rosaano mitteenni sabbakansa lowo geeshsha hagiidhitanno gede assitinonsa. (Luqaasi 10:17) Atino songote ledo mitteenni soqqamate mixo fushshiꞌra dandaatto?
LEDDE XIINXALLI
Waajja qeeꞌlite dancha duduwo duduwanna tennenni hagiirre afiꞌra dandaattohu hiittoonniitiro rosi.
3. Yihowa ledokki ikkanno
Mitootu sabbaka hasidhe heedhenni mayyeemmokka woy mannu mayyaaekka yite waajjitanno.
-
Rosootto halaale mannaho kula waajjootto? Mayira?
VIIDIYO laꞌe; hakkiinni aante noo xaꞌmo hasaabbe.
-
Kuri wedellootu Yihowa Farciꞌraasine waajja qeeꞌlitinohu hiittoonniiti?
Isayaasi 41:10 nabbabbe; hakkiinni aante noo xaꞌmo hasaabbe:
-
Sabbaka waajjatto woyite, huuccatto kaaꞌlitannohehu hiittoonniiti?
Ati tenne afootto?
Batinyu Yihowa Farciꞌraasine alba sabbaka horo didandiineemmo yite heddannoreeti. Lawishshaho, Serge alba isonooto woffi assannohonna coyiꞌre fushshiꞌra dandaannokkiho. Ikkollana, isi Qullaawa Maxaafa xiinxalla hanafi. Isi togo yiino: “Waajjoommoha ikkirono, rosanni noommore mannaho kula hanafummo. Qullaawu Maxaafire mannaho kulaꞌya roore jawaata ikkeemmo gede assitinoe gara laummoti dhagge assiꞌroommo. Qoleno tini ammanaꞌya kaajjishshinoe.”
4. Ayirrinyunni hasaawisi
Mannaho dancha duduwo kulatto woyite, coyiꞌrattore calla ikkikkinni coyiꞌratto garano hedi. Layinki Ximootewoosi 2:24 nna 1 Pheexiroosi 3:15, 16 nabbabbe; hakkiinni aante noo xaꞌmuwa hasaabbe:
-
Qullaawu Maxaafire mannaho kulatto woyite, kuri qummeeshshuwa yitannore assa dandaattohu hiittoonniiti?
-
Mitu fiixikki woy jaallakki kulattonsare macciishsha gibbara dandiitanno. Hatto ikkiro, maa assa dandaatto? Assa hasiissannohekkiri maati?
-
Mannu ammananno gede giddeessantenni, hayyotenni xaꞌmo xaꞌma roore dancha ikkitara dandiitannohu mayiraati?
5. Dancha duduwo duduwa hagiirsiissanno
Yihowa Yesuusira dancha duduwo duduwate looso uyinosi. Yesuusi hakkoye looso ma garinni laino? Yohaannisi 4:34 nabbabbe; hakkiinni aante noo xaꞌmuwa hasaabbe:
-
Dancha sagale ita heeshshote heeꞌneemmo gedenna hagiidhineemmo gede assitannonke. Yesuusi Maganu fajjo wonsha lawishshaho dancha duduwo duduwa sagale itate ledo heewisiisinohu mayiraati?
-
Dancha duduwo duduwittoro hiittoo hagiirre afiꞌrattoha lawannohe?
Kaaꞌlitanno amaale
-
Lamalate mereeri gambooshshiwa, hasaawa hanafate kaaꞌlannohere rosate woꞌnaali.
-
Lamalate mereeri gambooshshiwa rosaanote kifile shiqisha hanafa dandaatto gara Qullaawu Maxaafi rosiisaanchikki ledo hasaawi. Rosaanote kifile shiqishakki, rossanni noottore wolu mannira kulate roore qixxaawoottoha ikkatto gede kaaꞌlitannohe.
-
Duuchu manni xaꞌmanno xaꞌmora woy yaannorira dawaro qolate, konni maxaafira nooha “Mitu Manni Togo Yaanno” woy “Mitu Manni Togo Yee Xaꞌmara Dandaanno” yaanno gafa horoonsidhe rosiisiꞌri.
MITU MANNI TOGO YEE XAꞌMARA DANDAANNO: “Ati tenneenku maa afidhella baitto?”
-
Tenne faro horoonsidhe konni manchira Qullaawu Maxaafi xiinxallokkinni rosoottore kula dandaattohu hiittoonniiti?
XAPHISHSHA
Mannaho dancha duduwo kula hagiidhineemmo gede assitannonke; Qullaawu Maxaafi hasaawa hanafano ati heditto geeshsha qarrisa hooggara dandiitanno.
Kageeshsha Rosoottore
-
Dancha duduwo wolu mannira kulleemmohu mayiraati?
-
Dancha duduwo mannaho ayirrinyunni kula dandaattohu hiittoonniiti?
-
Sabbaka waajjattoha ikkiro tenne qeeꞌla dandaattohu hiittoonniiti?
EGENNO LEXXI
JW.ORG kaarde horoonsidhe mannaho dancha duduwo kula dandaattota shoole shota doogo wodanchi.
JW.ORG Kaardenni Farciꞌra Dandiinanni Gara Leellishannoha Hasaawu Bitima (1:43)
Dancha duduwo duduwate kaaꞌlannoheha shoole akata rosi.
“Manna Woshshaaddinannire Ikkate Qixxaabbinoonni?” (Agarooshshu Shae, Wocawaaro 2020)
Wedella ikkinummoro nafa, dancha duduwo waajjinummokkinni duduwa dandiineemmo gede kaaꞌlannokeha Qullaawu Maxaafi lawishsha huwati.
Yihowa daafira afinokkihu miniꞌne manni ledo Qullaawu Maxaafire hasaawa dandaattohu hiittoonniiti?
“Yihowa Farciꞌraasine Ikkinokki Fiixinke Wodana Kakkayisa” (Agarooshshu Shaera fulino birxicho)
Kurino Lai
DUUCHU MANNI XAꞌMANNO XAꞌMO
Yihowa Farciꞌraasine Qullaawa Maxaafa Xiinxallissannohu Hiittoonniiti?
Yihowa Farciꞌraasine ledo Qullaawa Maxaafa woxe baaxxittokkinni xiinxallatto woyite, baxoottota Qullaawu Maxaafi tiro horoonsiꞌra dandaatto. Xiinxallokkira maatekki gudisse woy jaallakki koyisa dandaatto.
