1-3. (a) Batinyu mannira loosanno loosira mayi lao noonsa? (b) Tenne fooliishshora hiittenne xaꞌmuwa xiinxallineemmo?

 ALAMETE doyichora mannu uminsaranna maatensara hasiisannore wonshiꞌrate diinaggaawe loosanno. Batinyu manni loosanno looso dibaxanno; mitootu isinni barru baala loosoho ceeꞌmitanni hadhanno. Atino loosatto looso baxattokkiha ikkiro, loosikkinni hagiirre afiꞌra dandaattohu hiittoonniiti? Loosokki baxatto gede mayi kaaꞌlahera dandaanno?

² Yihowa togo yiinonke: “Mannu baalu itanninna aganni daafurisinni hagiidhanno. Tinino Maganuwiinni afiꞌrino eltooti.” (Rosiisaancho 3:13) Yihowa looso loosa banxeemmo gede asse kalaqinonke. Isi loosonke banxammora hasiꞌranno.—Rosiisaancho 2:24 nna 5:18 nabbawi.

³ Ikkina loosonke baxate mayi kaaꞌlannonke? Kiristaanu loosa hasiissannonsakki loosi hiittooho? Uminke loosono loonsanni Yihowara soqqama dandiineemmohu hiittoonniiti? Baalunkunni roore loosa hasiissannonke loosi hiikkonneeti?

4, 5. Yihowara loosoho noosi lao hiittoote?

⁴ Yihowa looso loosa baxanno. Kalaqama 1:1, “Maganu umo asse gordonna baatto kalaqino” yitanno.  Maganu uullanna aanase noore baalankare kalaqi gedensaanni, kalaqinori “lowo geeshsha dancha ikkinota” coyiꞌrino. (Kalaqama 1:31) Kalaqaanchinke loosino loosinni hagiidhino.—1 Ximootewoosi 1:11.

⁵ Yihowa loosa diaguranno. Yesuusi “Anniꞌya techo geeshsha loosanni no” yiino. (Yohaannisi 5:17) Yihowa loosanni keeshshinoha dhagge ikkanno looso gudinse anfoommokkiha ikkirono, isi loosanno loosi giddo mito anfoommo. Isi Mangistesira Beettisi Yesuusi Kiristoosi ledo mookkannore dooranni keeshshino. (2 Qorontoosi 5:17) Qoleno Yihowa mannu ooso massaganninna towaatanni no. Alamete doyichora loonsannihu sabbakate loosi, lowo miliyoone ikkanno manni Yihowa afannonna albillitte gannate ikkitanno uullara hegerera heeꞌrate hexxo afiꞌranno gede assanni no.—Yohaannisi 6:44; Roomu Sokka 6:23.

6, 7. Yesuusi hiittoo loosaasinchooti?

⁶ Yesuusino Annisi gede looso baxanno. Isi uullara daara albaanni Maganu iimanna uulla kalaqi woyite ledosi loosino. (Lawishsha 8:22-31; Qolasiyaasi Sokka 1:15-17) Yesuusi uullate aana noo yannarano, diinaggaawe loosa diagurino. Isi wedellichu heeꞌre worba hanaatsicha ikkino; isi mini uduunne seekkanna mine mina rosinoha ikkara dandaanno. Yesuusi konni loosira worba ikkino daafira mannu iso hanaatsichaho yiino.—Maarqoosi 6:3.

⁷ Ikkollana Yesuusi uullate aana noo waro loosinohu qaru loosi, dancha duduwo duduwatenna mannaho Yihowa daafira rosiisate. Isi soodinni kayise hashshi geeshsha diinaggaawe loosanni, soqqanshosi sasu dirinna daratunni gumulino. (Luqaasi 21:37, 38; Yohaannisi 3:2) Yesuusi dancha duduwo dandaamisi deerrinni batinyu  mannira duduwate buko batidhinota seeda doogo lekkatenni haꞌrino.—Luqaasi 8:1.

8, 9. Yesuusi loosanno looso baxannota leellishinohu hiittoonniiti?

⁸ Maganu looso loosa Yesuusira sagalete gedeeti. Kuni loosi wolqanna jawaante uyinosi. Isinni Yesuusira loosu batiꞌrinosi daafira sagale nafa itinokki woyiti no. (Yohaannisi 4:31-38) Isi afiꞌri faro baalantenni mannu Annisi daafira rosanno gede kaaꞌlino. Konni daafira isi Yihowara, “Ati oottoe looso guute baattote aana ayirrisoommohe” yiino.—Yohaannisi 17:4.

⁹ Kageeshsha laꞌnummonte gede, Yihowanna Yesuusi diinaggaabbe loossannoreeti; qoleno loosinsanni hagiidhitanno. Ninkeno Maganu lawishsha harunsanna ‘Kiristoosi faale haꞌra’ hasiꞌneemmo. (Efesooni Sokka 5:1; 1 Pheexiroosi 2:21) Loosonke diinaggaambenna chaachaarre loonseemmohu iseraati.

10, 11. Loosinkera dancha lao heedhannonke gede kaaꞌlannonkeri maati?

¹⁰ Yihowa soqqamaasine ikkinoommo daafira, uminkeranna maatenkera hasiisannore wonshate diinaggaambe loonseemmo. Konni daafira loosonke baxa hasiꞌneemmo; ikkirono tini shota ikka hooggankera dandiitanno. Ikkina loonseemmo loosi baxisannonkekkiha ikkiro, maa assa dandiineemmo?

¹¹ Loosoho dancha lao heedhohe. Loonseemmo loosonna loosu deerra soorra hoongammora dandiineemmo; ikkollana laonke biddi assiꞌra dandiineemmo. Yihowa ma assinammora hasiꞌrannoro afanke tennera kaaꞌlitannonke. Lawishshaho, Yihowa maatete umi maatesira hasiisannore wonshate dandaamisire baala assara hasiꞌranno. Qullaawu Maxaafi, maatesira hasiisannore  wonshannokki manchi “ammaninokki manninni roore busha” ikkinota kulanno. (1 Ximootewoosi 5:8) Maatete umo ikkittoro, maatekkira hasiisannore shiqishate ceeꞌmittokki loosi. Loosatto loosi baxisiherono baxisa hoogiherono, maatekkira hasiisannore shiqishattoha ikkiro, Yihowa hagiirsiissanni noottota afootto.

12. Diinaggaawe loosanna ammanama kaaꞌlitannonkehu hiittoonniiti?

¹² Diinaggaabbe loosi; hattono ammanamoottoha ikki. Tini loosokki baxatto gede kaaꞌlitahera dandiitanno. (Lawishsha 12:24; 22:29) Korkaatuno, diinaggaabbe loosattohanna ammanamoottoha ikkittoro, loosiisannohe manchi ammanannohe. Ammanantino loosaasine woxe, jajjanna, yanna moortannokki daafira, loosiissannori baxxannonsa. (Efesooni Sokka 4:28) Baalunkunni roore, Yihowa diinaggaabbe loosattotanna ammanamoottoha ikkoottota afanno. Qoleno baxatto Magano hagiirsiissanni noottota afootto daafira, keeraanchu tiiꞌꞌi heeꞌrannohe.—Ibiraawoota 13:18; Qolasiyaasi Sokka 3:22-24.

13. Loosu bayicho ammanammoommore ikkanke abbitannohu wolu gumi maati?

¹³ Amanyootikki Maganu ayirranno gede assannota huwati. Tenne afankeno loonseemmo looso banxeemmo gede kaaꞌlitannonke. (Tiito 2:9, 10) Danchu amanyootikki, ledokki loossannori giddo mitootu Qullaawa Maxaafa xiinxalla hasidhanno gede nafa assara dandaanno.—Lawishsha 27:11 nna 1 Pheexiroosi 2:12 nabbawi.

14-16. Looso doodhineemmo woyite maa heda hasiissannonke?

¹⁴ Qullaawu Maxaafi Kiristaanu loosa hasiissannonsahanna loosa hasiissannonsakki looso bade dikulanno.  Ikkollana looso doodhineemmo woyite gara ikkinore doodhate kaaꞌlannonkeha xintu seera kulannonke. (Lawishsha 2:6) Qullaawu Maxaafiha xintu seera horoonsiꞌne, ninkeneeto aante noo xaꞌmuwa xaꞌma dandiineemmo.

¹⁵ Kuni loosi Yihowa giwannore asseemmo gede assannoe? Yihowa giwanno coyibba hiikkuriitiro ronsoommo; kuri giddo mitu moorahonna kaphoho. (Fulo 20:4; Soqqamaasinete Looso 15:29; Efesooni Sokka 4:28;  Yohaannisi Ajuuja 21:8) Konni daafira Yihowa seeri ledo sumuu yaannokki looso loonseemmokki gede qorophineemmo.—1 Yohaannisi 5:3 nabbawi.

¹⁶ Kuni loosi Yihowa giwanno assootira karsameemmo gede assannoe? Lawishshaho, mittu Kiristaanchi beetekiristaane mina hasiissannosi? Mine minate loosi soꞌro diꞌꞌikkino. Ikkollana Maganu beetekiristaannate rosiinsanniha kaphu roso giwannota afootto. Konni daafira, ati kaphu roso rosiissanni noottoha ikka hoogirono, insara beetekiristaane minattoha ikkiro Yihowa lao garinni tini insa cubbira karsama diꞌꞌikkitino?—Yohaannisi Ajuuja 18:4.

17. Magano hagiirsiisanno doorsha doodhate mayi kaaꞌlannonke?

¹⁷ Qullaawu Maxaafiha xintu seera harunsineemmoha ikkiro, Ibiraawoota 5:14te kulloonni manni gede ikka dandiineemmo; kuni manni ‘danchanna busha bade afate rosi noonsare lowiddaanna [woy gikki yiino] mannaati.’ Ateneeto togo yite xaꞌmi: ‘Konne looso loosummoro, tini wolootaho guficho ikkitakka? Kuni loosi galteꞌyanna oosoꞌyawiinni baxxeemmo gede woy wole gobba haꞌreemmo gede assannoe? Tini insa gawajjitannohu hiittoonniiti?’

18. Magansiꞌranke balaxisiisa shota ikkitinokkihu mayiraati?

¹⁸ Tenne ‘qarrissannote goofimarchu yannara’ Yihowa Mangiste balaxisiisa shota ikka hooggankera dandiitanno. (2 Ximootewoosi 3:1) Looso afiꞌranna hakko loosi aana keeshsha qarra ikkitara dandiitanno. Maatenkera hasiisannore shiqisha hasiissannonketa anfoommo; ikkirono balaxxannoti Magano magansiꞌrate. Heeshshonke giddo maalaamittete coyira quwa saꞌneemmokki gede  qoropha hasiissannonke. (1 Ximootewoosi 6:9, 10) Ikkina maatenkera hasiisannoreno wonshinanni roore hasiisanno coye balaxisiisa dandiineemmohu hiittoonniiti?—Filiphisiyusi Sokka 1:10.

19. Yihowa addaxxa loosoho gara ikkitino lao heedhannonke gede kaaꞌlitannonkehu hiittoonniiti?

¹⁹ Woꞌmu wodanikkinni Yihowa addaxxi. (Lawishsha 3:5, 6 nabbawi.) Maganu hasiisannonkere afinotanna ninke daafira lowo geeshsha hedannota anfoommo. (Faarso 37:25; 1 Pheexiroosi 5:7) Qaalisi togo yaanno: “Woxu baxille qorophe; nooꞌnehu ikkoꞌne! Maganu, ‘Horo diagureemmohe; dicallachisheemmohe’ yiino.” (Ibiraawoota 13:5) Yihowa maatenkera hasiisannore shiqishate woꞌmanka woyite yaandammora dihasiꞌranno. Isi mannisira hasiisannore aanno Magano ikkinota duucha hige leellishino. (Maatewoosi 6:25-32) Loosinke ikkihano ikkiro, ganyine Maganu Qaale xiinxallineemmo, dancha duduwo dudumbeemmo, hattono Kiristaanu gambooshshe haꞌneemmo.—Maatewoosi 24:14; Ibiraawoota 10:24, 25.

20. Bikku heeshsho heeꞌra dandiineemmohu hiittoonniiti?

²⁰ Hixamanyite laꞌanno ille heedhohe. (Maatewoosi 6:22, 23 nabbawi.) Hatto yaa, Yihowara soqqamate aana illachisha dandaatto gede bikku heeshsho heeꞌri yaate. Woxe, qawaaxxo woy yannate dayino uduunne Maganu ledo noonke jaaloominni roorse laꞌꞌa gowwimma ikkitinota anfoommo. Ikkina balaxa hasiissannosi coye balaxisiisate mayi kaaꞌlannonke? Asalu giddora eꞌneemmokki gede qoropha hasiissannonke. Asalu nooheha ikkiro, asalekki gama woy gudisse baaxxate mixo fushshiꞌri. Qoropha hoongummoro, maalaamittete coyi yannankenna wolqanke gudeenna huuccatto assiꞌneemmota, xiinxallineemmotanna sabbankeemmo yanna  hoongammora dandiineemmo. Maalaamittete coyi heeshshonke sakaale amadara wodha agurre, noonkerinni kassi yine, “inteemmorinna uddiꞌneemmori heeꞌrinkero ikkannonke” yaa rosa hasiissannonke. (1 Ximootewoosi 6:8) Heeshshonke gari ikkihano ikkiro, Yihowara albinni roore soqqama dandiineemmo faro afiꞌrate yannate kiiro ninkeneeto layiꞌra danchate.

21. Balaxisiinseemmo coye doodha hasiissannonkehu mayiraati?

²¹ Balaxisiisa hasiissannohe coye balaxisiisi. Yannanke, wolqankenna woxenke hayyotenni horoonsiꞌra  hasiissannonke. Qoropha hoongummoro, gari geeshsha hasiisannokki coyi lawishshaho rosu, woy woxu yannanke gudara dandaanno. Yesuusi, “Balaxxine Maganu Gashshootenna keeraanchimmasi hasidhe” yiino. (Maatewoosi 6:33) Doodhineemmo doorshi, rosichinke, barru baala assineemmorinna fushshiꞌneemmo mixo wodaninke maa balaxisiisannoro leellishshanno.

22, 23. (a) Kiristaanu loosa hasiissannonsahu baalunkunni roorino loosi hiikkonneeti? (b) Loosinkenni hagiirre afiꞌrate kaaꞌlannonkeri maati?

²² Baalunkunni roorino loosi, Yihowara soqqamatenna wolootaho dancha duduwo kulate. (Maatewoosi 24:14; 28:19, 20) Yesuusi gede ninkeno, konne looso loosate dandaaminkere baala assineemmo. Mitootu sabbakkannori roore hasiissannowa hadhe soqqantanni no. Wolootu kayinni wole gobba afoo rosse hakko afoo coyiꞌranno mannira sabbakkanni no. Togo assitino roduuwa hasaawisanna konne assa dandiitinohu hiittoonniitiro xaꞌma dandaatto. Insa, heeshshonsa albinni roore hagiirru noota ikkitinota kultannohe.—Lawishsha 10:22 nabbawi.

²³ Xaa yannara ninke giddo mitootaho maatensara hasiisannore shiqishate seeda saate woy haammata looso loosa hasiissinonsa. Yihowa tenne afino; qoleno isi maatenke towaatate assineemmore baala naadanno. Konni daafira, loonseemmo loosi ikkihano ikkiro diinaggaambe loonse Yihowanna Yesuusi lawishsha harunsino. Qoleno baalunkunni roorino loosi Yihowara soqqamanna Maganu Mangisteha dancha duduwo duduwa ikkinota qaango. Hatto assinummoro addu hagiirre afiꞌneemmo.