1-3. (a) Mitte ama qaaqqose biifissannohu mayiraati? (b) Yihowa mannisi qullaawa ikkara hasiꞌrannohu mayiraati?

 MITTE ama qaaqqose rosu minira haꞌrara qixxeessitanni no. Ise biso hayishshiꞌranno gede assite xurtinokki uddano uddisiissannosi. Hatto assase qaaqqu fayyimmara kaaꞌlitanno; qoleno qaaqqu annisinna amasi seekke towaatannoha ikkinota mannu afanno gede assitanno.

² Anninke Yihowano qullaawootanna xuru noonkekkire ikkinammora hasiꞌranno. (Leewaawoota 11:44, 45) Isi qullaawoota ikkanke ninkenkura kaaꞌlitannota afino. Qoleno qullaawoota ikkanke isi ayirranno gede assitanno.—Hiziqeeli 36:22; 1 Pheexiroosi 2:12 nabbawi.

³ Ikkina qullaawa ikkate yaa mayyaate? Qullaawa ikkanke kaaꞌlitannonkehu hiittoonniiti? Kuri xaꞌmuwa xiinxallanke, heeshshonke giddo biddi assiꞌra hasiissannonkere huwante biddi assiꞌneemmo gede kaaꞌlitannonke.

4, 5. (a) Qullaawa ikka hasiissannonkehu mayiraati? (b) Kalaqamu Yihowa qullaambe ma garinni laꞌꞌannoro rosiisannonkehu hiittoonniiti?

⁴ Yihowa qullaawa Magano ikkino daafira, ninkeno isi lawishsha harunsa hasiissannonke. (Leewaawoota 19:2) Konni daafira, qullaawa ikka hasiissannonkehu qaru korkaati, ‘Magano lawa’ hasiꞌneemmo daafiraati.—Efesooni Sokka 5:1.

⁵ Yihowa kalaqino coyinni, isi qullaambe ma garinni laꞌꞌannoro rosa dandiineemmo. Yihowa uulla mannu oosora keeraancho base ikkitanno gede asse kalaqino. Lawishshaho, xeena gani gedensaanni arrishsho fulte wayi fooraranno gede assitanno; foorarino wayi iimira haꞌre gomicho ikki gedensaanni xaano xeena ikke dirreenna waa afiꞌneemmo. Tini doyicho konni garinni heedhanno ikkinnina diuurritanno. Qoleno Yihowa, uullate aana illete leeltannokkita shiimmaadda lubbuwa kalaqino. Tini lubbuwa gawajjanno ishine kaaꞌlanno coyira qolte soorra dandiitanno. Tini dhagge ikkitanno dandooti. Isinni sayinsete egennaammi, ayyarete daafama gargarate kuri lubbuwa horoonsidhanno.—Ermiyaasi 10:12; Roomu Sokka 1:20.

6, 7. Muse Seeri, Yihowa magansidhannori qullaawa ikka hasiissannonsata leellishannohu hiittoonniiti?

⁶ Yihowa Muse widoonni Israeelete uyino Seerino, qullaawa ikka lowo geeshsha hasiissannota leellishanno. Lawishshaho, Israeele Yihowa magansiꞌransa adhara hasidhuro, bisinsa keeraanchimma agadha hasiissannonsa. Kakkalaasinete roorrichi Qullaawu Holgira eanno  barra, biso lame hige hayishshiꞌranno. (Leewaawoota 16:4, 23, 24) Wole kakkalaasineno kakkalo shiqishshara albaanni anganna lekka hayishshiꞌra hasiissannonsa. (Fulo 30:17-21; 2 Duduwo 4:6) Keeraanchimmate daafira uyinoonni Seera diiganno mancho shinanni woyiti nafa no.—Leewaawoota 15:31; Kiiro 19:17-20.

⁷ Yannankerana? Yihowa Israeelete uyino Seerinni keeraanchimmate daafira lowore ronseemmo. (Milkiyaasi 3:6) Kuni Seeri Yihowa magansiꞌranno manni qullaawa ikka hasiissannonsata leellishanno. Yihowa fushshino biddishshi disoorramino. Isi yannankerano mannisi qullaawanna keeraano ikkara hasiꞌranno.—Yaiqoobi 1:27.

8. Qullaawa ikka hasiissannonkehu hiittee doogganniiti?

⁸ Yihowa albaanni qullaawa ikkate yaa, bisonna uduunne hayishshiꞌra, woy mine dancha gede asse amaxxa calla diꞌꞌikkitino. Heeshshonke woꞌmantenni qullaawa ikka hasiissannonke. Magansiꞌranke, amanyootinkenna hedonkeno qullaawa ikka hasiissannose. Yihowa qullaawootu gede asse kiirannonkehu, heeshshonke woꞌmatenni qullaawootanna xuru noonkekkire ikkinummorooti.

9, 10. Magansiꞌranke qullaawa ikkitanno gede assiꞌrate yaa mayyaate?

⁹ Qullaawa magansiꞌra. Kaphu ammaꞌno ledo hili xaadooshshino heeꞌrannonkekki gede qorophineemmo. Israeelete daga qafadante Baabiloonete noo yannara, qooxeessinsara heedhanno daga kaphu maganna magansidhanno; qoleno magansidhanno woyite maaeela coye assitanno. Isayaasi, Israeele gobbansa higge halaalu magansiꞌra wirro xintitannota masaalino. Yihowa togo yiinonsa: “Baabilooninni baxxitine fulle! Batte ikkinore kisidhinoonte! Giddonsanni fultine keeraaꞌme!” Insa Maganoho shiqishidhanno  magansiꞌra Baabiloonete ammaꞌno rosinna budi ledo karsiisa dihasiissannonsa.—Isayaasi 52:11.

¹⁰ Yannankera noo Kiristaanino kaphu ammaꞌnowiinni xeertiꞌranno. (1 Qorontoosi 10:21 nabbawi.) Alame woꞌmate egennaminohu batinyu budinna rosichi kaphu ammaꞌno ledo xaadooshshe afiꞌrinoho. Lawishshaho, batinyu manni reyinummo gedensaanni giddonkenni fule wolewa haꞌre heeꞌrannorichi no yee ammananno; mitu manni reyitinorira xorshiꞌrannohu hatto yee ammananno daafiraati. (Rosiisaancho 9:5, 6, 10) Kiristaanu kayinni togoo budiwiinni xeertiꞌra hasiissannonsa. Maatenke miilla togoore assineemmo gede xixxiibbankera dandiitanno. Ikkollana Yihowa albaanni qullaawa ikka hasiꞌneemmo daafira, togoore diassineemmo.—Soqqamaasinete Looso 5:29.

11. Amanyootunni qullaawa ikkate yaa mayyaate?

¹¹ Qullaawa amanyoote. Yihowa albaanni qullaawa ikkate, duuchunku gari foorrewiinni xeertiꞌra hasiissannonke. (Efesooni Sokka 5:5 nabbawi.) Qullaawu Maxaafi giddo Yihowa, “Foorretewiinni xooqqe!” yiinonke. Isi foortannori maaro ea hoogguro ‘Maganu Gashshoote ragidhannokkita’ xawise kulino.—1 Qorontoosi 6:9, 10, 18; Jeefote Hedo 22 lai.

12, 13. Hedonke qullaawa ikkitanno gede assiꞌra hasiissannonkehu mayiraati?

¹² Qullaawa hedo. Roore woyite, mittu manchi assannori balaxe hedinoreeti. (Maatewoosi 5:28; 15:18, 19) Qullaawa hedo qullaawa coye assineemmo gede kakkayissannonke. Guuntete xeꞌne noonkere ikkinoommo daafira, mito woyite wodaninke giddo busha hedo kalaqantara dandiitanno. Hakkawoyite, busha hedo ranke fushshine hooꞌla hasiissannonke. Hatto assa hoongummoro, wodaninke battaawara dandaanno. Hakkiinni, hendanni keeshshinoommo coye assate yorto giddonke kalaqantanno. Togoori iillannonkekki gede, surrenke giddo qullaawa hedo  woꞌmitanno gede assiꞌra hasiissannonke. (Filiphisiyusi Sokka 4:8 nabbawi.) Konni daafira, maaeellenna finqille noo boohaarshiwiinni xeertiꞌneemmo. Nabbambeemmore, laꞌneemmorenna coyiꞌneemmore qorophine doodhineemmo.—Faarso 19:8, 9.

¹³ Maganu baxilli giddo heeꞌrate, magansiꞌranke, amanyootinkenna hedonke qullaawa ikkitanno gede assiꞌra hasiissannonke. Ikkollana Yihowa bisu keeraanchimmankeno agadhinammora hasiꞌranno.

14. Bisu keeraanchimma agadha hasiissannonkehu mayiraati?

¹⁴ Bisinkenna qooxeessinke xuru nookkiha ikkanno gede assiꞌranke, ninkeneetono ikko qooxeessinkera heeꞌranno manna kaaꞌlitanno. Ninkeneetira ayirrinyu heeꞌrannonke gedenna mannu ninkewa aana baxanno gede assitanno. Ikkollana bisu keeraanchimma agadhineemmo gede assannonkehu wolu qaru korkaati no. Xuru noonkekkire ikkanke Yihowa ayirranno gede assitanno. Mittu qaaqqi ayewoteno xurenna suudiweele nooha afittoro, ‘Annisinna amasi ma ikkinoreeti?’ yite hedakki digattanno. Hatteente gede, ninkeno keeraanchimmanke agadhineemmokkiha ikkiro mannu Yihowa ayirrisa hoogara dandaanno. Phaawuloosi togo yiino: “Soqqanshonke mishantannokki gede ayerano guficho diꞌꞌikkineemmo. . . . Baalunku raginni Maganu soqqamaano ikkanke leellinsheemmo.”—2 Qorontoosi 6:3, 4.

15, 16. Bisu keeraanchimmanke agadhate maa assa dandiineemmo?

¹⁵ Bisonna uddanonke. Bisu keeraanchimmanke agadha barru baala assa hasiissannonkereeti. Lawishshaho, biso mule mule woy dandaamannoha ikkiro barru baala hayishshiꞌneemmo. Roorenkanni sagale qinshammoranna  intammora albaanni anga saamununni hayishshiꞌra hasiissannonke; hakko iso shumate minira haꞌne hingummoro woy xurinore kinsummoro anga saamununni hayishshiꞌra hasiissannonketi egennantinote. Anga hayishshiꞌra shiimare labbara dandiitanno; ikkollana baakteeriyunna dhibbu taraawannokki gede kaaꞌlitanno. Anga hayishshiꞌra lubbo nafa gatissara dandiitanno. Shumate mini woy ishine hunnanni tuubbo hooggunkero nafa, ishine wolu garinni huna dandiineemmo. Hundi Israeelera ishine huntanno tuubbo dinonsa; konni daafira insa shumate mini mulinninna wayi qooxeessinni faffe ofolte bale unte waantanno.—Marro 23:12, 13.

¹⁶ Lowo woxinni hirranniha faashinete uduunne uddiꞌra hasiissannonke yaa diꞌꞌikkino. Ikkollana doofartinokkinna xurtinokki uddano uddiꞌra hasiissannonke. (1 Ximootewoosi 2:9, 10 nabbawi.) Woꞌmante yannara uddiꞌneemmo  garinna suudinke Yihowa ayirranno gede assannoha ikkara hasiꞌneemmo.—Tiito 2:10.

17. Mininkenna qooxeessinke ishinannokki gede assiꞌneemmohu mayiraati?

¹⁷ Mininkenna qooxeessinke. Heeꞌneemmo qae ikkitu geeshshita ikkiturono, mininke ishinu nookkiha ikka hasiissannosi. Hakkiinni saeno, dhoqqi-dhoqqe, biskilliitenke woy wole togoo uduunnenke feya woy hayishsha hasiissannonke; qoleno borro wodhineemmo borsa roorenkanni soqqansho fulleemmo woyitenna gambooshshe haꞌneemmo woyite xurinokkita buuxa hasiissannonke. Fulle mannaho sabbankeemmo sokka umise, gannate ikkitinote keeraancho uullara heeꞌneemmota kultannote. (Luqaasi 23:43; Yohaannisi Ajuuja 11:18) Minenkenna qooxeessanke danchu garinni amaxxanke, xuru nookkite haaro alamera heeꞌrate qixxaambanni heeꞌnoommota leellishshanno.

18. Magano magansiꞌneemmo base qullaawa ikkitara hasiꞌneemmohu mayiraati?

¹⁸ Magano magansiꞌneemmo base. Gambooshshu Addaraasheno ikko wole magansiꞌrate gamba yineemmo base feyanna hayishshanke, qullaawa ikkinoommota leellishshanno. Haaru manni Gambooshshu Addaraashenke daanno woyite, Addaraashe biiffino gara lae dhagge assiꞌranno. Tini qolte Yihowa ayirranno gede assitanno. Songote miilla ikkinoommo daafira, baalunku Gambooshshu Addaraashe feyatenna hayishshate, hattono danchu garinni amadate qoosso noonke.—2 Duduwo 34:10.

19. Hiittoo rosichiwiinni xeertiꞌra hasiissannonke?

¹⁹ Qullaawu Maxaafi xeertiꞌra hasiissannonkeha busha rosicho baala tittire kulannokkiha ikkirono, Yihowa togoo rosicho ma garinni laꞌꞌannoro afate kaaꞌlannonkeha  xintu seera amadino. Isi sijaara angannita, ago quwa sayinse angannitanna jingilli assitanno xagga adhinannita giwanno. Maganu jaalla ikka hasiꞌnummoro, togoo coyiwiinni xeertiꞌneemmo. Mayira? Korkaatuno Maganu uyinonke heeshsho ayirrinseemmo. Togoo rosichi uminketano ikko wolu manni fayyimma gawajjanno; hattono barriweelo reyineemmo gede assannonke. Batinyu manni busha rosicho agurate sharramannohu fayyimmansara yeeti. Ninke kayinni Yihowa jaalla ikkinoommo daafira, busha rosicho agurreemmo gede assannonkehu qaru coyi, Maganoho noonke baxilleeti. Mitte beetto togo yitino: “Yihowa kaaꞌlonni busha rosicho baala qeele qullaawa heeshsho heeꞌra hanafoomma. . . . Yihowa kaaꞌla hoogoommeꞌꞌero umiꞌyanni togoo rosicho agura dandeemmaha dilawannoe.” Hanni mittu manchi busha rosicho aguranno gede kaaꞌlannoha onte Qullaawu Maxaafiha xintu seera laꞌno.

20, 21. Yihowa hiittoo rosichiwiinni xeertiꞌnammora hasiꞌranno?

²⁰ “Tini hexxo heedhunke woyite, Magano waajjatenni coꞌonta qullaawoota ikkine manninatenna ayyaana batteessannori baaluwiinni umonke keereensiꞌno.” (2 Qorontoosi 7:1) Yihowa surrenkenna manninatenke gawajjannohu battaawino rosichiwiinni xeertiꞌnammora hasiꞌranno.

²¹ Layinki Qorontoosi 6:17, 18, ‘batteessannonkeri baaluwiinni umonke keereensiꞌneemmo’ gede assannonkeha mitto dancha korkaata kultanno. Yihowa “Batte ikkinoricho kissinoonte” yiinonke. Hakkiinni isi togo yee qaale eino: “Anino haaꞌreemmoꞌne. Ani anna ikkeemmoꞌne; kiꞌneno anera meyaanna labbaa ooso ikkitinannie.” Konni daafira, batteessanno coyi baalunkuwiinni xeertiꞌnummoro, annu oososi baxannonte gede Yihowa baxannonke.

22-25. Busha rosicho agurate kaaꞌlannonkehu Qullaawu Maxaafihu xintu seeri hiikkonneeti?

²² “Mooticha Maganokki woꞌmu wodanikkinni,  woꞌma lubbokkinni, woꞌma hedokkinni baxi!” (Maatewoosi 22:37) Tini baalanta roortanno hajajooti. (Maatewoosi 22:38) Yihowa woꞌmu wodaninkenni, surrenkenninna hedonkenni baxa hasiissannonke Maganooti. Barriweelo shaannore woy surrenke gawajjannore assinanni heeꞌne, Magano woꞌmu wodaninkenni banxeemmo yaa dandiineemmoni? Hatteentenni, Maganu uyinonke heeshsho ayirrinseemmota leellishanno garinni heeꞌra hasiissannonke.

²³ “Heeshshonna foole, qoleno wolere manna baalaho aannohu [Yihowaati].” (Soqqamaasinete Looso 17:24, 25) Jaalikki mitto kaajja aamamooshshe uyihero hunte agurattoni? Heeshshono Yihowa uyinonkete muxxe eltooti. Konne aamamooshshe lowo geeshsha naandeemmo. Konni daafira, heeshshonke Yihowara ayirrinye abbanno garinni horoonsiꞌneemmo.—Faarso 36:9.

²⁴ “Olliichokki umikki gede assite baxi!” (Maatewoosi 22:39) Battaawino rosichi heeꞌrinkero, gawajjannohu ninke calla diꞌꞌikkino. Banxeemmo mannino ikko wolu ledonke noo manni gawajjamara dandaanno. Lawishshaho, sijaara agannohu ledo mitto mine heeꞌranno manni insa aga hoogirono sijaaru wiliile eꞌe gawajjitansara dandiitanno. Busha rosicho agurrummoro kayinni ledonke noo manna banxeemmota leellinsheemmo.—1 Yohaannisi 4:20, 21.

²⁵ “Mannu baalu gashshaanotenna roorrootaho owaate hajajamanno gede, dancha looso baala loosate qixxaawanno gede [qaagiissi].” (Tiito 3:1) Batinye gobbara mite jingilli assitanno xagga adha woy mine wodha higge difajjitanno. Yihowa gashshaano ayirrinseemmo gede hajajinonke daafira, insa fushshitanno seera agadhineemmo.—Roomu Sokka 13:1.

26. (a) Yihowa magansiꞌranke adhanno gede maa assa hasiissannonke? (b) Maganu albaanni qullaawa ikke heeꞌra dancha heeshsho heeꞌrate kaaꞌlitanno yineemmohu mayiraati?

 ²⁶ Yihowa jaalla ikkate, heeshshonke giddo mito coye biddi assiꞌra hasiissannonkeha ikkara dandaanno. Hatto ikkiro, ranke biddi assiꞌra hasiissannonke. Busha rosicho qeela shota ikka hooggara dandiitanno; ikkirono qeela dandiineemmo! Yihowa kaaꞌleemmoꞌne yee qaale eino. Isi togo yiino: “Woyyannoꞌnere baala rosiiseemmoꞌnehunna, hadhinanni doogo kuleemmoꞌnehu Maganiꞌne Kaaliiqi aneeti.” (Isayaasi 48:17) Qullaawanna keeraano ikkine heeꞌrate dandiinummore baala assinummoro, Maganinke ayirranno.