Qullaawu Maxaafi Yihowa albillitte ikkannore balaxe afa dandaannota xawise kulanno. (Isa. 45:21) Ikkollana Yihowa albillitte ikkannore ma garinni afannoro woy mamoote afannoro wole agurina mageeshshire afannoro tittire dikulanno. Hakko daafira Yihowate albillitte ikkannore afate dandoo daafira gudinse huwata didandiineemmo. Ikkirono hanni tenne daafira anfoommoha mito coye laꞌno.

Yihowa hasiꞌrino coye baalanka assa dandaanno; kayinni mito coye assa hasiꞌrannokki woyiti no. Isira taalle nookki hayyo noosi daafira afa hasiꞌrinoha aye coyeno balaxe afa dandaanno. (Rom. 11:33) Ikkirono isi woꞌmunni woꞌma isonooto qeeꞌla dandaanno daafira, albillitte ikkannore afa hoogano doodha dandaanno.—Isayaasi 42:14 ledo heewisiisi.

Yihowa hedinori woꞌmanno gede assanno. Tini albillitte ikkannore afate dandoosi ledo mayi xaadooshshe afidhino? Isayaasi 46:10 togo yitanno: “Ikkanno coye baala balaxe kuloommo; ikkara nooreno alba asse coyiꞌroommo; ani ikkanno yoommori ikkanno; anino hedoommore asseemmo.”

Hakko daafira Yihowa albillitte ikkannore afa dandaanno yineemmo gede assannonkehu mittu korkaati, isira mittu coyi ikkanno gede assate wolqa noosi daafiraati. Lawishshaho, mitto maxaafa nabbambanni heeꞌne xagge ma garinni gooffinoro afate maxaafunnita jeefote fooliishsho woy jeefote qoola laꞌneemmoha ikkara dandaanno; Yihowa kayinni ninke gede albillitte ikkannore balaxe afate diquqquxamanno. Hatteentenni, isi mittu coyi hirqino yannara ikkanno gede muranna hatti hirqino yanna iillitanno woyite ikkanno gede assa dandaanno.—Ful. 9:5, 6; Mat. 24:36; Soq. 17:31.

Hakko daafira Qullaawu Maxaafi albillitte ikkannoha mito coye lainohunni Yihowa maa assannoro xawisate “hedoommo” yaanno qaale horoonsiꞌrino. (2 Mot. 19:25; Isa. 46:11) Konne qaale tirroonnihu ‘dora ganannoha’ yitanno tiro afiꞌrino qaali ledo xaadooshshe afiꞌrinohu hundi afii qaalinniiti. (Erm. 18:3, 4) Mittu dora gananno manchi dora loowe awawa wodhinanniha biifado uduunnicho seekkannonte gede, Yihowano hedinore wonshate mitto coye isi hedino garinni biddi assa woy qineessa dandaanno.—Efe. 1:11.

Yihowa doodhate qoossonke ayirrisanno. Isi mittu mittunku manchira iillanno coye balaxe dimuranno; qoleno suwashshu wodani noonsa manni baote widira massannonsa coye assanno gede diassanno. Isi baalunku manni uminsa doorsha doodhanno gede fajjino; ikkirono insa dancha doorsha doodhitanno gede jawaachishanno.

Hanni lame lawishsha laꞌno. Umihu Nennewete katamira heeꞌranno manni lawishshaati. Yihowa kuni katami bunshe batidhinoha ikkino daafira baꞌꞌannota kulino. Kayinni hakko heeꞌranno manni maaro eita Yihowa “marare abbara hedino bao [agurino].” (Yon. 3:1-10) Yihowa Nennewete manni doodhate qoossonsa horoonsiꞌre qorowishshu sokka macciishshe maaro eino daafira, abbara hedinore agurino.

Layinki lawishshi Baabiloone horrinohu Qiroosi yinanni manchi daafira kultanno masaalooti; isi Ayihudete manna qafadotenni fushshannohonna Yihowaha qullaawa mine gatamarranni gede hajajannoho. (Isa. 44:26–45:4) Faarsi Moote Qiroosi tini masaalo woꞌmitanno gede assino. (Izi. 1:1-4) Ikkirono Qiroosi halaalaancho Magano Yihowa magansiꞌrannoha diꞌꞌikkino. Yihowa tini masaalo woꞌmitanno gede assate Qiroosi horoonsiꞌrino; kayinni isi aye magansiꞌrannoro umisi doodhanno gede fajjino.—Law. 21:1.

Hige kuni Yihowa albillitte ikkannore balaxe afa woy afa hooga doodhannota leellishanno coyi giddo gamaholla. Yihowa doogo woꞌmunni woꞌma huwata dandaanno manchi nookkiti egennantinote. (Isa. 55:8, 9) Ikkirono Yihowa kulinonke coyi, isi woꞌmanka woyite lawishshaho albillitte ikkannore kulannonke woyiteno gara ikkinore assannota addaxxineemmo gede kaaꞌlannonke.