1. Mitto wedellicha 1935nni assinoonnihu mittu jawu gambooshshiwa shiqqino lallawo hexxosi buuxiꞌranno gede kaaꞌlitinosihu hiittoonniiti?

 MITTU wedellichi 18 dirisinni 1926nni cuuamino. Annisinna amasi Qullaawu Maxaafi Rosaanooti; Yihowa Farciꞌraasine hakka waro hatto yine woshshinanni. Kuri anninna ama sase labballonna lame seenne oosonsa Maganu Yihowara soqqantannonna Yesuusi Kiristoosi lawishsha harunsitanno gede asse lossiꞌrino. Hakka waro baalanti Qullaawu Maxaafi Rosaano assitannonte gede, kuni suwashshu wodani noosi wedellichino diru kiiro Mootichu Hurbaatira shiqanno timanna woyine qamasanno. Ikkirono mitte hambannikkita “Lowo Daga” yitanno cuꞌmo afidhino lallawo macciishshita, hexxosi daafira hedanno gari soorramino. Tenne lallawo 1935nni Ameerikaho Waashingiteni Diisi katamira assinoonnihu mittu jawu gambooshshiwa Roduu Raazerfordi shiqishino. Hakko gambooshshiwa maa xawinsoonni?

2. Roduu Raazerfordi lallawo shiqishi woyite hiikkonne hambannikki halaale xawisino?

² Roduu Raazerfordi lallawo shiqishi woyite, Yohaannisi Ajuuja 7:9te “lowo daga” (Kingi Jeemsi Vershiini) yiniri ayeootiro xawisino. Hakka geeshsha, tini gaamo hakkeeshsha ammanama hooggurono iimira hadheenna layinki deerra uyinanninsareeti yine hendanni. Roduu Raazerfordi Qullaawa Borro horoonsiꞌre lowo daga yiniri iimira haꞌrate doorantinokkita xawisino; ikkirono, tini daga “bayira qarra” gatte saꞌe uullate  aana hegerera heedhannore Kiristoosire wole geꞌreewo b ikkitinota kulino. (Aju. 7:14) Yesuusi togo yee qaale eino: “Tenne hoowe giddo nookkihu wolu geꞌreewino nooe; insano abba hasiissannoe. Insano huuroꞌya macciishshitanno. Mitte hoshsha ikkitanno; allaalaanchuno mitto ikkanno.” (Yoh. 10:16) Wole geꞌreewoho yiniri Gannate ikkitanno uullara hegerera heeꞌrate hexxo noonsare ammanantinote Yihowa Farciꞌraasineeti. (Mat. 25:31-33, 46) Hanni xa haarote buunxoonnihu Qullaawu Maxaafi halaali 18 dirihu heeꞌre cuuamino rodiinna wolu batinyu Yihowa manni hexxonsa buuxiꞌranno gede assinonsa gara laꞌno.—Far. 97:11; Law. 4:18.

3-4. Mittu 1935nni assinoonnihu jawu gambooshshiwa lowo kume ikkanno manni hexxonsa daafira maa huwatino? Mayira?

³ Lallawo shiqishi rodii “Uullate aana hegerera heeꞌrate hexxo nooꞌneri mitte higgine gotti yitina ballo?” yee xaꞌmi woyite dhagge ikkannori ikkino. Hakko gambooshshiwa noohu mittu rodii 20,000 meddi yaanno manni giddo rooru ofollinowiinni kainota coyiꞌrino. Hakkiinni Roduu Raazerfordi, “Laꞌe! Lowo daga!” yiino. Hakkiinni hagiirru bae ikki. Kaꞌe uurritinori iimi heeshshora doorantinokkita wodanchitino. Insa Maganu ayyaaninni buurantinokkita affino. Layinki barra 840 manni cuuame Yihowa Farciꞌraasine ikkino; insa giddo rooru wolu geꞌreewi widooti.

⁴ Hatti lallawo shiqquhu gedensaanni, aleenni qummi assinihu wedellichu rodiinna lowo kume ikkannohu wolu roduuwi Mootichu Hurbaatira shiqanno timanna woyine qamasa agurtino. Mittu rodii togo yee coyiꞌrino: “Mootichu Hurbaatira shiqanno timanna woyine 1935 kawa qamasa aguroommo. Yihowa qullaawu ayyaaninni iimi hexxo nooeta dikulinoe; hatteentenni uullate aana heeꞌratenna baatto gannate assate loosira kaaꞌlamate hexxo nooe.” Rooru roduuwirano hattoo hexxo noonsa. (Rom. 8:16, 17; 2 Qor. 1:21, 22) Hakka warinni kayise lowo daga kiiro lexxitanni no; hattono insa uullate gattinori buurantinori ledo mitteenni loossanni no.

5. Yihowa Qaagooshshu Ayyaanira shiqanno timanna woyine qamasa agurtinore ma garinni laꞌꞌanno?

⁵ Yihowa Mootichu Hurbaatira shiqanno timanna woyine 1935 kawa qamasa agurtinore ma garinni laꞌꞌanno? Xaa yannara mittu suwashshu wodani noosi rodii Mootichu Hurbaatira shiqanno timanna woyine qamasa hanafihu gedensaanni, buuraminokkita afiro Yihowara mayi macciishshamannosi? (1 Qor. 11:28) Mitootu Qaagooshshu Ayyaanira shiqanno timanna woyine qamassinohu iimi hexxo noonsaha laweennansaati. Ikkollana insa soꞌronsa ammanturonna shiqanno timanna woyine qamasa agurturo, hattono Yihowara ammanante soqqanturo isi wolu geꞌreewi wido qole kiirannonsati dihuluullissannote. Insa timanna woyine qamassannokkiha ikkirono, Yihowanna Yesuusi assitinonsare lowo geeshsha naaddanno daafira Qaagooshshu Ayyaana ayirrissanno.

6. Yesuusi sokkaasine maa assitanno gede hajajino?

⁶ Bayiru qarri hanafara shiima yanna gatte noote tenne yannara, Yohaannisi  Ajuuja fooliishsho 7te noota buuramino Kiristaaninna wolu geꞌreewi wido ikkitinote lowo daga daafira kultanno hedo xiinxalla jawaanteemmo gede assitannonke. Yesuusi bao abbitannota shoole bubbe sokkaano amadde hooltanno gede hajajinonsa. Insa buuramino Kiristaani baalunkura sumuda sumunda geeshsha, yaano, jeefote Yihowa ammanantinoreeti yaansa geeshsha bubbe amadde hoolte no. (Aju. 7:1-4) Kiristoosiri buurantino roduuwi ammanantino daafira iima mootoollanna kakkalaasine ikkitanno. (Aju. 20:6) Hattono iimiti Maganu maate baalanti 144,000 buuramino Kiristaani iimi baraarshansa adhitanna laꞌꞌate quqquxantanno.

7. Yohaannisi Ajuuja 7:9, 10 kultanno garinni, Yohaannisi ajuujatenni ayeoo laino? Insa maa assitanni no? (Aaniidi qoolira noo misile lai.)

⁷ Yohaannisi, kuri 144,000 mootoollanna kakkalaano daafira coyiꞌrihu gedensaanni, hagiirsiisanno coye yaano, Armagedooni gatte saꞌinota “lowo daga” laino. Tini layinki gaamo, umi gaamonni kiiro lowo geeshsha roortanno; hattono kiirre dandiinannikkite. (Yohaannisi Ajuuja 7:9, 10 nabbawi.) Insa “waajjo uddano” uddidhino; tini Sheexaanu alame “ishinchiwiinni” umonsa agadhitinotanna Maganohonna Kiristoosira ammanante heedhinota leellishshanno. (Yai. 1:27) Insa Yihowanna Yesuusi gatissinonsa daafira qoonqonsa naggi assite guwissino. Hattono insa saattichu darcho anga amaddino; tini Yihowa Yesuusa Moote asse buurinota hagiirrunni ammante adhitinota leellishshannote.—Yohaannisi 12:12, 13 ledo heewisiisi.

8. Yohaannisi Ajuuja 7:11, 12 Yihowate iimi maate daafira maa kultannonke?

⁸ Yohaannisi Ajuuja 7:11, 12 nabbawi. Iima mayi ikkiyya? Yohaannisi lowo daga gatte saꞌe Magano guwissino daafira iimiti Yihowa maate hagiidhitanna laino. Yihowati iimi maate lowo daga bayira qarra gatte saꞌeenna tini ajuuja woꞌmitanna laꞌanno woyite lowo geeshsha hagiidhitanno.

9. Yohaannisi Ajuuja 7:13-15 kultanno garinni, lowo daga xaa yannara maa assitanni no?

⁹ Yohaannisi Ajuuja 7:13-15 nabbawi. Yohaannisi lowo daga “uddanonsano Geꞌrechu mundeenni hayishshidhe waajjo” assidhinota coyiꞌrino. Tini Yihowa albaanni keeraanchu tiiꞌꞌi noonsatanna minshe noonsakkire ikkitinota leellishshannote. (Isa. 1:18) Insa heeshshonsa Yihowara sayisse uyite cuuantino Kiristaanaatinna Yesuusita wodote kakkalo ammantannoreeti; hattono Yihowa ledo jaalooꞌmitinoreeti. (Yoh. 3:36; 1 Phe. 3:21) Konnira insa Maganu zuufaanera albaanni uurrite, ayyaanaamittennihu qullaawu mini giddo uullayidi hoowera “hashshanna barra” qullaawa soqqansho soqqamate ikkadda ikkitinoreeti. Insa Maganu Mangiste balaxisiissanno daafira, xaa yannara nafa sabbakatenna manna rosaano assate looso diinaggaabbe loossanno.—Mat. 6:33; 24:14; 28:19, 20.

10. Lowo daga huluullantannokki coyi maati? Insa hiitti hexxo woꞌmitanna laꞌanno?

¹⁰ Bayira qarra gatte saꞌinoti lowo daga “ayirradu barcimira ofollino” Magani “dukkana guggushshannonsa” daafira towaatannonsata dihuluullantanno. Wolu geꞌreewi wido ikkitinori quqquxantanni keeshshitinota togo yitanno hexxo woꞌmitinota wodanchitanno: “[Maganu] hindiiddo baala illensanni feyanno; albi ikkito saꞌino daafira, reyo woy dadillu woy wiꞌla woy shetto kunni kaꞌa diheedhanno.”—Aju. 21:3, 4.

11-12. (a) Yohaannisi Ajuuja 7:16, 17 kultanno garinni, albillitte lowo daga mayi atoote afidhanno? (b) Qaagooshshu Ayyaanira wolu geꞌreewi maa assa dandaanno? Mayira?

¹¹ Yohaannisi Ajuuja 7:16, 17 nabbawi.  Xaa yannara mite Yihowa soqqamaano woxu qarrinni woy dagate gaancenninna olunni kainohunni hudidhanno. Woloota ammanansanni kainohunni usurroonninsa. Ikkirono, tini lowo daga busha alame baꞌanno woyite gatte saꞌannotanna albillitte woꞌmanka woyite falakkinota maalaamittetenna ayyaanaamittete sagale afidhannota affino daafira hagiidhitanno. Yihowa Sheexaanu alame hunanno woyite lowo daga ‘iibbillunni’ lawinsoonnihu Maganu hanqinni gattanno. Bayiru qarri gumulamihu gedensaanni Yesuusi gatte saꞌinore “heeshshote buichowa haaꞌre massannonsa.” Lowo dagara noonsata dhagge ikkitanno hexxo hanni hedi. Lowo biliyoone ikkanno manni hegerera heeꞌranno.—Yoh. 11:26.

¹² Wolu geꞌreewi wido ikkitinori dhagge ikkitanno hexxo noonsa daafira, Yihowanna Yesuusa galaxxitanno. Insa iimira haꞌrate doorantinokkiha ikkirono, Yihowara muxxete. Lamenti gaamo Maganonna Kiristoosa guwisiꞌra dandiitanno. Insa hatto assitanno doogga giddo mitte Mootichu Hurbaati Ayyaana ayirrisate.

13-14. Baalunku manni Kiristoosi reyo Qaagooshshi Ayyaana ayirrisa hasiissannonsahu mayiraati?

¹³ Muli diri kawa, Qaagooshshu Ayyaana daannohu 1,000 manni giddo timanna woyine qamasannohu mittoho yaa dandiinanni. Roore songuwara Qaagooshshu Ayyaanira shiqanno timanna woyine qamasannohu dino. Qaagooshshu Ayyaana ayirrisate gamba yaanno manni giddo rooru uullate aana heeꞌrate hexxo noonsareeti. Ikkina insa Mootichu Hurbaate ayirrisate gamba yitannohu mayiraati? Hanni tenne huwatate mittu manchi jaalisi sarge haꞌrannohu mayiraatiro laꞌno. Isi jaalisi sarge haꞌrannohu iso baxannotanna kaaꞌla hasiꞌrannota leellishateeti. Hatteente gede, wolu geꞌreewi wido ikkitinorino Qaagooshshu Ayyaana ayirrisate gamba yitannohu Kiristoosanna buurantinore baxxannotanna kaaꞌla hasidhannota leellishateeti. Qoleno insa konne ayyaana ayirrissannohu Yesuusiti wodote kakkalo uullate aana hegerera heeꞌrate faro fantinonsahura galattannota leellishateeti.

 ¹⁴ Wolu geꞌreewi wido ikkitinori Qaagooshshu Ayyaana ayirrissannohu wolu korkaati Yesuusi hajajo agadhitannohuraati. Yesuusi ammanantino soqqamaasinesi ledo konne ayyaana xinti woyite, “Kunninni ane qaagge” yiinonsa. (1 Qor. 11:23-26) Konnira wolu geꞌreewi wido ikkitinori, buuramino Kiristaani uullate noo geeshsha Mootichu Hurbaate ayirrisa diagurtanno. Qoleno insa wolu manni Qaagooshshu Ayyaana ledonsa ayirrisanno gede koyissanno.

15. Qaagooshshu Ayyaanira Maganonna Kiristoosa guwisiꞌra dandiineemmohu hiittoonniiti?

¹⁵ Qaagooshshu Ayyaani yannara Maganonna Kiristoosa faarsotenna huuccattotenni guwisiꞌrate faro afiꞌneemmo. Konni dirira shiqqanno lallawo “Maganunna Kiristoosi Assitinoꞌnerira Galatu Nooꞌneta Leellishshe!” yitannote. Tini lallawo Yihowaranna Kiristoosira noonke galati lexxanno gede assitanno. Timanna woyine albankeenni sayinsanni woyite, kuni timinna woyine Yesuusi maalanna mundee riqibbannota qaangeemmo. Yihowa ninke heeshsho afiꞌneemmo gede Beettisi ninkera yee reyara fajjinota qaangeemmo. (Mat. 20:28) Iimi Annankenna Beettosi baxannohu baalunku Qaagooshshu Ayyaana ayirrisa hasiꞌranno.

16. Buurantinorenna wole geꞌreewo mitto assannonsari maati?

¹⁶ Buuramino Kiristaananna wole geꞌreewo mitto assannonsari no. Yihowa lamenta gaamo taashshe baxanno. Lamenti gaamo isira muxxete. Korkaatuno isi buurantinoreno ikko wole geꞌreewo woxxinohu muxxe ikkitinote Beettisi heeshshonniiti. Lamente gaamo mereero noo badooshshi hexxonsa addi addita ikkaseeti. Lamenti gaamo Maganohonna Kiristoosira ammanante heeꞌra hasiissannonsa. (Far. 31:23) Maganu baalunkura ayyaanasi taashshe aannonketa dea dihasiissannonke. Hatto yaa Yihowa mittu mittunkura hasiisanno deerrinni ayyaanasi ee kaaꞌlannonke yaate.

17. Uullate aana gate noohu buuramino Kiristaani maa quqquxame agadhanno?

¹⁷ Buuramino Kiristaani iimira haꞌrate hexxo adhe ilaminota diꞌꞌikkitino. Tenne hexxo wodaninsara worannohu Maganoho. Insa hexxonsa daafira heddanno, huuccidhanno, hattono iimi baꞌlattonsa adhate quqquxantanno. Insa ayyaanaamu bisinsa hiittooha ikkannoro diaffino. (Fil. 3:20, 21; 1 Yoh. 3:2) Ikkirono Yihowa, Yesuusa, sokkaano, hattono wole buuramino Kiristaaninni xaadate quqquxantanno. Iimi Mangistera insa ledo heeꞌrate quqquxantanno.

18. Wolu geꞌreewi wido ikkitinori maa quqquxante agadhitanno?

 ¹⁸ Wolu geꞌreewi wido ikkitinori uullate aana heeꞌrate hexxonsa lowo geeshsha naaddanno. Maganu manna kalaqinohuno uullate aana hegerera heeꞌraraati. (Ros. 3:11) Insa uulla woꞌma gannate assate kaaꞌlantanno yanna quqquxante agadhitanno. Insa mine miꞌnitannota, kaashsho kaasidhannotanna guuta ordu fayyimma noonsa ooso lossidhanno yanna quqquxantanno. (Isa. 65:21-23) Hattono addi addi base lawishshaho, ilaalla, dubbonna baara daaꞌꞌatate qoleno Yihowaha addi addi kalaqama xiinxallate quqquxantanno. Baalunkunni roore, Yihowa ledo noonsa jaaloomi lexxanninna kaajjanni haꞌrannota affino daafira hagiidhitanno.

19. Qaagooshshu Ayyaani mittu mittunkura mayi faro fanannonke? Tayixe konne ayyaana ayirrinsannihu mamooteeti?

¹⁹ Yihowa mittu mittunku ammanantino soqqamaanosira dhagge ikkitanno hexxo uyinonsa. (Erm. 29:11) Kiristoosi reyo Qaagooshshi Ayyaani Maganonna Kiristoosa galanteemmo faro fanannonke; insa gawalo nookki heeshsho afiꞌneemmo gede lowore assitinonke. Qaagooshshu Ayyaani addu Kiristaani diru kiiro assiꞌrannoho baxxino gambooshsheeti. Tayixe konne ayyaana ayirrinsannihu Qidaame, Badheessa 27, 2021nni arrishsho eꞌuhu gedensaanniiti. Loosonke hoolloonnikki gobbuwara tayixe diro batinyu roduuwi konne baxxino ayyaana ayirrisate gamba yitanno. Wolootu dartu iillinsarono konne ayyaana ayirrissanno. Mitootu kayinni usuru mine heedhe ayirrissanno. Ikkihano ikkiro, Yihowa, Yesuusi hattono iimi maate laꞌannota dea dihasiissannonke. Baalante songuwara, gaamora hattono mittu mittunkura dancha Qaagooshshu Ayyaana ikkoꞌne!