1-2. Cuuammummohu gedensaannino agurrummokki assa hasiissannonkeri maati? Xawisi.

 MINEKKI meekki meekkita fiiꞌratto? Hakko mine gala hanafattora albaanni seekkite fiiꞌroottoha ikkara dandaanno. Kayinni hakkunni gedensaanni minekki feyaalla aguritto? Feya agurittoro minikki lowo geeshsha ishinara dandaanno. Minikki ishinannokki gede ganyite feya hasiissannohe.

² Hedonkenna akatanke biddi assiꞌrateno woꞌmanka woyite sharrama hasiissannonke. Hige cuuammammora albaanni “manninatenna ayyaana batteessannori baaluwiinni umonke [keereensate]” biddi assiꞌra hasiissannonkere biddi assiꞌrate sharrammoommoti dihuluullissannote. (2 Qor. 7:1) Ikkirono xaano, soqqamaasinchu Phaawuloosi ‘haarooꞌminanni’ haꞌneemmo gede uyinonke amaale harunsa hasiissannonke. (Efe. 4:23) Tenne assate woꞌmanka woyite sharrama hasiissannonkehu mayiraati? Tenne alame xuri mulenni daafankera dandaanno daafiraati. Togoo coyi iillannonkekki gedenna woꞌmanka woyite Yihowa hagiirsiisate hedonke, akatankenna yortonke ganyine layiꞌra hasiissannonke.

3. ‘Wodaniꞌne haarooꞌmo’ yaa mayyaate? (Roomu Sokka 12:2)

³ Wodananke haaroonsiꞌrate yaano hendeemmo gara biddi assiꞌrate maa assa hasiissannonke? (Roomu Sokka 12:2 nabbawi.)  Wodananke haaroonsiꞌrate yaa shiima dancha coye loosa calla diꞌꞌikkitino. Hatteentenni giddoyidi ayimmanke seekkine layiꞌranna dandiinummo deerrinni Yihowa biddishsha harunsate biddi assiꞌra hasiissannonkere baala biddi assiꞌra hasiissannonke. Mitte hinge calla ikkikkinni agurrummokki togo assa hasiissannonke.

4. Tini alame hedonke daaffannokki gede qoropha dandiineemmohu hiittoonniiti?

⁴ Guuta ikkineemmo woyite assineemmo coyi baalunkunni Yihowa hagiirsiisa dandiineemmo. Hakka geeshsha kayinni, Yihowa hagiirsiisate woꞌmanka woyite sharrama hasiissannonke. Soqqamaasinchu Phaawuloosi Roomu Sokka 12:2 Maganu maa assinammora hasiꞌrannoro afate, wodananke haaroonsiꞌra hasiissannonketa kulinota wodanchi. Tini busha alame huntankera wodha dihasiissannonke; hatteentenni alamete hedo ikkikkinni Yihowa hedo assootenke seekkitara wodhinanni heeꞌnoommoronna teꞌee layiꞌra hasiissannonke.

5. Yihowa barri gambisinohu gede assine hendeemmota leellisha dandiineemmohu hiittoonniiti? (Misile lai.)

⁵ Hanni mitto lawishsha laꞌno. Yihowa ‘Maganu barri rahe daannohu’ gede assine hendammora hasiꞌranno. (2 Phe. 3:12) Ateneeto togo yite xaꞌmi: ‘Heeꞌreemmo heeshsho tini busha alame muli yannara baꞌannota huwatoommota leellishshanno? Rosonna looso lainohunni doodheemmo doorshi Yihowara soqqama balaxisiiseemmota leellishanno? Yihowa anerano ikko maateꞌyara hasiisannonkere aannonketa ammaneemmonso woꞌmanka woyite maalaamittete coyi daafira yaadeemmo?’ Yihowa fajjosi ledo sumuu yaannore assate sharrammanna laꞌꞌanno woyite lowo geeshsha hagiidhanno.—Mat. 6:25-27, 33; Fil. 4:12, 13.

6. Woꞌmanka woyite maa assa hasiissannonke?

 ⁶ Hedonke ganyine layiꞌranna biddi assiꞌra hasiissannonkere baala biddi assiꞌra hasiissannonke. Phaawuloosi Qorontoosi heeꞌranno Kiristaana togo yiino: “Ammaꞌnatenni kaajjitine heeꞌraꞌne buuxate kiꞌnenee qonqolchitine laꞌe; kiꞌnenee fonqoltine laꞌe.” (2 Qor. 13:5) ‘Ammaꞌnatenni kaajjine’ heeꞌrate gambooshshe haꞌratenna soqqansho fulatenni sainore assa hasiissannonke. Qoleno hedonkenna hasattonke biddi assiꞌra hasiissannonke. Hakko daafira Maganu Qaale xiinxalline, Yihowa hedanno garinni hende hattono Yihowa fajjo ledo sumuu yaannore baala assate biddi assiꞌra hasiissannonkere biddi assiꞌne wodananke haaroonsiꞌra hasiissannonke.—1 Qor. 2:14-16.

7. Efesooni Sokka 4:31, 32 kultanno garinni wolere maa assa hasiissannonke? Hatto assa qarra ikkitankera dandiitannohu mayiraati?

⁷ Efesooni Sokka 4:31, 32 nabbawi. Hedonke biddi assiꞌneemmotano agurranna ‘haaro mannimmano uddiꞌra’ hasiissannonke. (Efe. 4:24) Tenne assate sharrama hasiissannonke. Aara, hanqonna gibbo hattono wole busha akatta hooꞌlate sharrama hasiissannonke. Tenne assa qarra ikkitankera dandiitannohu mayiraati? Korkaatuno mite busha akatta giddonke rumuxxitinoha ikkara dandaanno. Lawishshaho Qullaawu Maxaafi mitu manni ‘hanqaaleessanna aaramannoha’ ikkinota kulanno. (Law. 29:22) Aane noo woꞌnaalshi leellishannonte gede, giddonke rumuxxitinota busha akatta hooꞌlate cuuammummohu gedensaanni nafa sharrama hasiissannonke.

8-9. Istiifeni woꞌnaalshi akkala mannimma fushshe hooꞌla hasiissannota ikkitinota leellishannohu hiittoonniiti?

⁸ Istiifeni yinannihu mittu rodiira hanqo qeeꞌla qarra ikkitinosi. Isi togo yiino: “Cuuamummohu gedensaanni nafa hanqo qeeꞌlate sharrama hasiissinoe. Lawishshaho mitte yannara minunni mine haꞌre soqqamanni heeꞌreenna makiiniꞌya giddonni raadoone moorino mancho amadammora shorrummo. Hakku manchi isiwa iillammora rahummota raadoone uulla tuge xooqi. Hakkiinni raadooneꞌya adhoommo gara ledoꞌya noorira kulummota insa giddonni mittu cimeessi ‘Isteefeni konne mooraancho amadoottoro ma assattoraati?’ yee xaꞌminoe. Tini xaꞌmo taxxi yee hendeemmo gedenna keere kalaqeemmoha ikkate sharrameemmo gede assitinoe.” b

⁹ Istiifeni woꞌnaalshi qeeꞌlinoommoha lawinkero nafa mittu bushu akati hedeweelcho waadankera dandaannota leellishanno. Aterano togoori tuncu yiinoheha ikkiro hexxo mudhitooti; hattono ditidhoommoho yite heddooti. Soqqamaasinchu Phaawuloosi nafa noore maaxikki togo yiino: “Dancha coye assate hasiꞌranni heeꞌreenna, busha coye assa doodheemmo gede assannoehu wolu seeri [no].” (Rom. 7:21-23) Mininke feya agurrummoro wirro ishinannonte gede, baalunku Kiristaani guuntete xeꞌne noonsare ikkitino daafira mite busha akatta wirro waaddansara dandiitanno. Xuru noonkekkire ikkine heeꞌrate woꞌmanka woyite sharrama hasiissannonke. Hatto assa dandiineemmohu hiittoonniiti?

10. Busha akatta qeeꞌla dandiineemmohu hiittoonniiti? (1 Yohaannisi 5:14, 15)

¹⁰ Yihowa macciishshannohetanna kaaꞌlannoheta addaxxite qarrisannohe akata kulte iso huucciꞌri. (1 Yohaannisi 5:14, 15 nabbawi.) Yihowa busha akatakki maalaletenni hoolannokkiha ikkirono, konni bushu akatira qeelamattokki gede kaaꞌlannohe. (1 Phe. 5:10)  Bushu akati wirro waadannohe gede assannohe coye qorophite huuccattokki ledo sumuu yaannore assi. Lawishshaho, woyyeessiꞌrate sharrantanni nootto akati qarra afiꞌrinokkihu gede assite leellishshanno filmenna televizhiinete pirogiraame laꞌooti woy togoo maxaaffa nabbabbooti. Hattono gara ikkinokkire heddooti.—Fil. 4:8; Qol. 3:2.

11. Haaro mannimma uddiꞌre heeꞌrate maa maa assa hasiissannonke?

¹¹ Akkala mannimma fushshitine hooltinoonniha ikkirono, haaro mannimma uddiꞌrano lowo geeshsha hasiissannote. Tenne assa dandiineemmohu hiittoonniiti? Yihowa akatta daafira rosatto woyite isi lawishsha harunsate mixo fushshiꞌri. (Efe. 5:1, 2) Lawishshaho Yihowa maaro daafira kultanno xagge nabbawatto woyite ateneeto togo yite xaꞌmi: ‘Ani woloota maareemmo?’ Yihowa buxane mararino gara nabbawatto woyite, ateneeto, ‘Anino maalaamittete kaaꞌlo hasiissannonsare ammanate roduuwaꞌya marareemmo? Marareemmonsata loosunni leellisheemmo?’ yite xaꞌmi. Haaro mannimma uddidhe woꞌmanka woyite wodanikki haarooꞌmanno gede assiꞌri; qoleno hatto assatto woyite cincattoha ikki.

12. Istiifeni Qullaawu Maxaafi mannu heeshsho biddi assannota umisi heeshshonni lainohu hiittoonniiti?

¹² Aleenni kullihu Istiifeni sunu sununni haaro mannimma uddiꞌra dandiino. Isi togo yiino: “Cuuamummonkunni hanafe hanqo qeeꞌla qarra ikkitannoe gede assanno coyi duucha hige tuncu yiinoe. Hanqeemmo gede assannoe manniwiinni agure haꞌra woy coyi qiidanno gede assate sharrama hasiissannoeta rosoommo. Minaamaꞌyanna wolu batinyu manni togoo coyi tuncu yiie woyite assoommore kulte galattinoe. Ani umiꞌya tenne dhagge assiꞌroommo! Konni biddi assiꞌroommo coyira galatu hasiisannoehu ane diꞌꞌikkoommo. Hatteentenni tini Qullaawu Maxaafi mannu heeshsho biddi assannota leellishshanno taje ikkitinota ammaneemmo.”

13. Gara ikkinore assineemmo gede kaaꞌlannonkeri maati? (Galatiyu Sokka 5:16)

¹³ Galatiyu Sokka 5:16 nabbawi. Yihowa gara ikkinore assate sharrammeemmo woyite ninke kaaꞌlate shaqqillunni qullaawa ayyaanasi aannonke. Maganu Qaale xiinxallineemmo woyite, Maganu ayyaani kaaꞌlannonke gede assiꞌnanni heeꞌnoommo. Gambooshshe haꞌneemmo woyiteno qullaawa ayyaana afiꞌneemmo. Gambooshshunniwa ninkente gede gara ikkinore assate sharrantannori ammanate roduuwinke ledo yanna sayinseemmo; tini qolte jawaachishshannonke. (Ibi. 10:24, 25; 13:7) Mite laanfenke qeeꞌlineemmo gede kaaꞌlankera giddonketa kulle Yihowa eeggifante huucciꞌnummoro, isi sharrama agurreemmokki gede kaaꞌlannonkeha qullaawa ayyaanasi aannonke. Kuri coyibba busha yorto qeeꞌlineemmo gede assa hooggunkero nafa, togoo coye assineemmo gede xixxiiwannonkere gimbeemmo gede kaaꞌlitannonke. Galatiyu Sokka 5:16 kultanno garinni ayyaanu garinni heedhannori ‘maalu yorto horonta diwonshitanno.’

14. Gara ikkitino hasatto heedhannonke gede woꞌmanka woyite sharrama hasiissannonkehu mayiraati?

¹⁴ Ayyaanaamittete coye assate rosichi heeꞌrannonke gede assiꞌnummohu gedensaanni, konne coye woꞌmanka woyite assatenna gara ikkinore assate agurrummokki sharrama hasiissannonke. Mayira yiniro goxikki galanno diini noonke. Kuni diini gara ikkinokkire assineemmo gede xixxiiwannonkereeti. Cuuamummohu gedensaanni  nafa hooꞌla hasiissannonke coyi yorsiisanni waadankera dandaanno; kuri giddo gamu kasaara gaꞌnate, agu araadootinna teeda baꞌino misilla laꞌꞌate. (Efe. 5:3, 4) Mittu wedellichu rodii togo yiino: “Hooꞌlate lowo geya qarra ikkinoe coyi giddo mittu labbaahu ledo foorate hasattooti. Tini yorto galte hosse baꞌinoha lawinoe; ikkirono xaa geeshsha waaddannoe.” Roorenkanni busha yorto qarrissannoheha ikkiro mayi kaaꞌlahera dandaanno?

15. Busha yorto baalanka manna waaddannota afanke jawaachishshannonkehu mayiraati? (Misile lai.)

¹⁵ Lowo geeshsha waaddannoheta busha yorto qeeꞌlate sharrantanni noottoha ikkiro, togoo coyi iillanni noohehu ate calla ikkoottokkita qaagi. Qullaawu Maxaafi, “Mannaho iillitinokki jifama diꞌꞌiillitinoꞌne” yaanno. (1 Qor. 10:13a) Tenne hedo borreessinoonnihu Qorontoosi heeꞌranno Kiristaaniraati. Insa giddo mitu alba foortannoreeti, labbaahu labbaahu ledo woy meyati meyate ledo akkimaltannoreeti hattono dimbitannoreeti. (1 Qor. 6:9-11) Kuri Kiristaana cuuamihu gedensaanni busha yorto waaddinonsakkiha lawannohe? Hatto diꞌꞌikkino. Insa baalunku buurantino Kiristaana ikkiturono guuntete xeꞌne noonsareeti. Insa mito woyite busha yorto qeeꞌlate sharrama hasiissinonsati dihuluullissannote. Tini ninke jawaachishshannonke. Mayira? Waaddannoheti busha yorto ikkitutano ikkituro, tini busha yorto wolu manni qeele sainote. Addanko, “gobba baalate noori roduuwiꞌne konne qarra adhitannota affine, ammanatenni . . . kaajjitine” heeꞌra dandiitinanni.—1 Phe. 5:9.

16. Mayine heda qoropha hasiissannonke? Mayira?

¹⁶ Iillanni nooe qarra afa dandaanno manchi dino yite heda qorophi. Togo yite heda hexxo mudhatto gedenna busha yorto qeeꞌle diafeemmo yite hedatto gede assitannohe. Qullaawu Maxaafi kayinni togo yaanno: “Maganu ammanaminoho; wolqaꞌnera aleenni ikkitino  jifama iillitaꞌnera wore dilaꞌꞌanno. Jifantinanni woyite cincitine saꞌꞌa dandiitinanni gede, fultinanni doogo qixxeessannoꞌne.” (1 Qor. 10:13) Hakko daafira busha yorto waaddannonkeha ikkiro nafa qeelle saꞌꞌa dandiineemmo. Yihowa kaaꞌlonni busha coye assa qoropha dandiineemmo.

17. Busha yorto woꞌmunni woꞌma hooꞌla dandiineemmokkiha ikkirono, maa assa dandiineemmo?

¹⁷ Woꞌmanka woyite tenne qaagi: Guuntete xeꞌne noonkere ikkinoommo daafira busha yorto woꞌmunni woꞌma hooꞌla didandiineemmo. Kayinni togoo yorto waaddannonke woyite Yooseefi gede murciꞌne giwa dandiineemmo; isi Phoxifaari minaamawiinni bayichonkonni rahe xooqino. (Kal. 39:12) Busha yorto qarrissunkerono tenne yorto giwa dandiineemmo!

18-19. Wodaninke haarooꞌmanno gede assiꞌrate sharrammeemmo woyite ninkeneeto hiikkuri xaꞌmuwa xaꞌma hasiissannonke?

¹⁸ Wodaninke haarooꞌmanno gede assiꞌrate hedonkenna assootinke Yihowa fajjo ledo sumuu yaanno gede assiꞌrate woꞌmanka woyite sharrama hasiissannonke. Hakko daafira ganyine ninkeneeto layiꞌranna togo yine xaꞌma hasiissannonke: ‘Assootiꞌya heeꞌnoommohu goofimarchu yannara ikkinota huwatoommota leellishanno? Haaro mannimma uddiꞌrate biddi assiꞌra hasiissannoere biddi assiꞌranni noommo? Maalu yorto wonsheemmo gede xixxiiwannoere gargadhate Yihowa ayyaani massagannoe gede assiꞌranni noommo?’

¹⁹ Ateneeto layiꞌratto woyite guuta ikka hasiissannoe yite hedooti. Biddi assiꞌrootto coyinni hagiidhi; biddi assiꞌra hasiissannohe coyi noota afittoro hexxo mudhitooti. Hatteentenni Filiphisiyusi Sokka 3:16 noota aante noo amaale harunsi; qummeeshshu, “Kulloonninke garinni heeꞌnoommowiinni alba hinge qaanfo” yaanno. Hatto assittoro, Yihowa wodanikki haarooꞌmanno gede assiꞌrate assoottore maassiꞌrannota addaxxa dandaatto.