1. Gambooshshe daannohu hasatto noonsahu lowo manni dhagge assiꞌranno coyi maati? (Misileno lai.)

 HANNI mittu minaanninna minaama mite yee Yihowa Farciꞌraasine gambooshshe dayino yine hendo. Insa roduuwu anga fante haadhinonsa garanna mereeronsa noo baxille lae dhagge assiꞌrino. Insa gambooshshuwiinni minira higanna minaama minaannisera togo yitu: ‘Yihowa Farciꞌraasine wolu manniwiinni baxxitinoreeti; lowo geeshsha hagiidhoomma.’

2. Mitootu Yihowara soqqama agurtinohu mayiraati?

² Yihowa manni mereero noo baxilli lowo geeshsha baxxinoho. Hige Yihowa Farciꞌraasineno guuntete xeꞌne noonsareeti. (1 Yoh. 1:8) Hakko daafira songote giddo noo roduuwinke ledo roore egennammummo kiiro laanfensano roore anfammora dandiineemmo. (Rom. 3:23) Mitootu wolootu soꞌro laꞌe Yihowara soqqama aguransa dadillissannote.

3. Yesuusita addu harunsaano bande anfanni gede assannori maati? (Yohaannisi 13:34, 35)

³ Hanni konni birxichiha cuꞌmote qummeeshsha lende laꞌno. (Yohaannisi 13:34, 35 nabbawi.) Kiristoosita addu harunsaano bande anfanni gede assannori maati? Baxilleho ikkinnina guunte diꞌꞌikkitino. Yesuusino, ‘Ane rosaano ikkitinoonnita tennenni affinanni’ yiinokkita wodanchi; isi ‘Ane rosaano ikkitinoonnita mannu baalu tennenni egennannoꞌne’ yiino. Konni garinni Yesuusi, harunsaanosi calla ikkitukkinni Kiristaanu songo wido ikkinokki mannino insa mimmitoho leellishshannoha addu baxille lae isita addu harunsaano bade afannota kulino.

4. Mitu manni addu Kiristaani daafira maa afa hasiꞌrannoha ikkara dandaanno?

⁴ Yihowa Farciꞌraasine ikkinokkihu mitu manni togo yee  hedara dandaanno: ‘Baxillu Yesuusita addu harunsaano bande anfanni gede assannohu hiittoonniiti? Yesuusi soqqamaasinesira baxille leellishinohu hiittoonniiti? Xaa yannara Yesuusi lawishsha harunsa dandiinannihu ma garinniiti?’ Yihowa Farciꞌraasine ikkino mannino kuri xaꞌmuwa heda hasiissannonsa. Togo assa roorenkanni ammanate roduuwinke soꞌro loossanno woyite mimmitoho addu baxille leellinsheemmo gede kaaꞌlitankera dandiitanno.—Efe. 5:2.

5. Yesuusi Yohaannisi 15:12, 13 coyiꞌrinore xawisi.

⁵ Yesuusi harunsaanosi baxxino garinni mimmito baxxannota xawisino. (Yohaannisi 15:12, 13 nabbawi.) Yesuusi insa “ani baxummoꞌnente gede, kiꞌne kiꞌneneewano [baxamme]” yee hajajinonsata wodanchi. Hatto yaa mayyaate? Yesuusi xawisinonte gede, kuni meessi hoꞌro agurre leellinshanni baxilleeti; togoo baxilli hasiisannoha ikkiro Kiristaanu ammanate roduuwinsara heeshshonsa nafa sayise aanno gede kakkayisannonsa. b

6. Maganu Qaali baxillu lowo geeshsha hasiisannoha ikkinota luphi asse kulannohu hiittoonniiti?

⁶ Maganu Qaali baxillu lowo geeshsha hasiisannoha ikkinota rosiisannonke. Batinyu manni lowo geeshsha baxanno qummeeshshuwa giddo gama aante noote: “Maganu baxilleho.” (1 Yoh. 4:8) “Olliichokki umikki gede assite baxi.” (Mat. 22:39) “Baxillu, batinye cubbo diwanno.” (1 Phe. 4:8) “Baxillu geedonniho.” (1 Qor. 13:8) Kurinna wole batinye qummeeshshuwa, baxille leellisha lowo geeshsha hasiissannota ikkitinota xawisse kultanno.

7. Sheexaanu mannu mimmito baxannonna mitto ikkanno gede assa dandaannokkihu mayiraati?

 ⁷ Batinyu manni togo yee xaꞌmanno: ‘Addu ammaꞌno bande afa dandiinannihu hiittoonniiti? Baalanti ammaꞌno halaale rosiinseemmo yitanno; kayinni Maganu daafira rosiissannohu mitu coyi babbaxxinoho.’ Batinye kaphu ammaꞌno dirijjitta heedhanno gede asse manna gurcheessinohu Sheexaaneho. Ikkirono isi mimmito baxannohu alamete doyichohu roduuwi maamari heeꞌranno gede assa didandaanno. Tenne assa dandaannohu Yihowa callaati. Baxillu Yihowaha ikkino daafira tenne anfoommo; mimmitoho addu baxille leellisha dandiitannori Yihowa ayyaananna atoote afidhinore callaho. (1 Yoh. 4:7) Yesuusi mimmitoho addu baxille leellishshannori harunsaanosi calla ikkitinota coyiꞌrinohu iseraati.

8-9. Yihowa Farciꞌraasine mereero noo baxille laꞌꞌansa lowo manna kaaꞌlitinohu hiittoonniiti?

⁸ Yesuusi balaxe masaalinonte gede batinyu manni, mimmitoho leellishshannoha addu baxille lae Yesuusita addu harunsaano afino. Lawishshaho Iyaani yinanni rodii minisi qooxeessira noote mitte ispoortete istaadeemera assinoonniha qoqqowu gambooshshe mite yee haꞌri warita qaaganno. Iyaani boodu agani albaanni ispoorte laꞌꞌate hatte istaadeeme haꞌrino. Isi togo yiino: “Qoqqowu gambooshshe dayino manni ispoortete heewo laꞌꞌara dayino manniwiinni horo baxxinoho. Yihowa Farciꞌraasine shaqqaddahonna dancha gede uddidhinoreeti; qaaqquullinsano danchu amanyooti nooreeti.” Isi lede togo yiino: “Baalunkunni roore kuni manni harshammonna hagiirre afiꞌrinoha lawanno; ani halcheemmotino togoo heeshshooti. Hakko barra shiqqino lallawo qaageemmokkiha ikkirono, roduuwu leellishshino amanyoote kayinni techo geeshsha qaageemmo.” c Hige togoo amanyooti heeꞌrinohu mimmitoho addu baxille leellinsheemmo daafiraati. Ammanate roduuwanke banxeemmonsa daafira insara shaqqille leellinsheemmonsa hattono ayirrinseemmonsa.

⁹ Jooni yinanni rodiino Yihowa Farciꞌraasine gambooshshe mite yee haꞌri yannara dhagge assiꞌrinota coyiꞌrino; isi togo yiino: “Hakko noo manni baalu faasiiqaho; . . . insa guuta manna labbanno, tenne lae dhagge assiꞌroommo. Insahu addu baxilli addu ammaꞌno afiꞌroommo yee hedeemmo gede assinoe.” d Kurinna wole batinye woꞌnaalshuwa Yihowa manni addu Kiristaana ikkinota leellishshanno.

10. Roorenkanni addu baxille leellisha dandiineemmo faro afiꞌneemmohu mamooteeti? (Lekkaalliidi qaagiishshano lai.)

¹⁰ Aleenni laꞌnummonte gede ammanate roduuwinke baalu guuntete xeꞌne noonsareeti. Insa mito woyite koffi assannonkere coyidhara woy assitara dandiitanno. e (Yai. 3:2) Roorenkanni togoo woyite, coyiꞌneemmorinninna assineemmorinni insara addu baxille leellinsheemmo faro afiꞌneemmo. Togoo woyite Yesuusi lawishshinni maa rosa dandiineemmo?—Yoh. 13:15.

11. Yaiqoobinna Yohaannisi leellishshinohu gara ikkinokki akati hiikkonneeti? (Misileno lai.)

¹¹ Yesuusi harunsaanosi guuta ikka hasiissannonsa yee dihedino. Hatteentenni isi gara ikkinokki akatansa biddi assidhe Yihowa hagiirsiisa dandiitanno gede shaqqillunni kaaꞌlinonsa. Mitte yannara lamu soqqamaasine yaano Yaiqoobinna Yohaannisi, Yesuusi gashshootisira ayirrado bayicho aannonsa gede xaꞌmitara amansara kultino. (Mat. 20:20, 21)  Konni garinni Yaiqoobinna Yohaannisi naaxxitannotanna wolootuwiinni roortinore ikka hasidhannota leellishshino.—Law. 16:18.

12. Gara ikkinokki akata leellishshinori Yaiqoobinna Yohaannisi callaatini? Xawisi.

¹² Hatte yannara gara ikkinokki akata leellishshinori Yaiqoobinna Yohaannisi calla diꞌꞌikkitino. Hanni wolootu soqqamaasineno ma assitinoro laꞌno: “Gattinori tonnunku konne coye macciishshite lamunku roduuwira hanqitu.” (Mat. 20:24) Yaiqoobi, Yohaannisinna wole soqqamaasine mereero lowo heewo kaꞌinota heda dandiineemmo. Wolootu soqqamaasine insa togo yitinoha ikkara dandaanno: ‘Maganu Gashshootira ayirrado bayicho uyinanniꞌne gede xaꞌmidhinannihu kiꞌne maa ikkitinoonni daafiraati? Yesuusi ledo diinaggaabbine loossinoonniri kiꞌne calla diꞌꞌikkitinoonni. Ninkerano kiꞌnente gede ayirrado bayicho afiꞌrate qoosso noonke!’ Insa yekkeerantino gari ikkihano ikkiro, tini, soqqamaasine yannate geeshsha mimmitoho roduuwu baxille leellishshannokki gede assitinonsa.

13. Soqqamaasinesi gara ikkinokki akata leellishshu yannara Yesuusi ma assino? (Maatewoosi 20:25-28)

¹³ Yesuusi ma assiyya? Isi tennera dihanqino. Isi roore umonsa heeshshi assitannorenna woꞌmanka woyite mimmitoho baxille leellishshannore wole soqqamaasine hasiꞌrate dikaino. Hatteentenni isi insa gara ikkinore assa hasidhannota afino daafira cince kaaꞌlinonsa. (Maatewoosi 20:25-28 nabbawi.)  Soqqamaasine hakkuyira albaannino ikko hakkuyi gedensaanni insa giddo roorannohu ayetiro afate heewisantinoha ikkirono, Yesuusi insara baxille leellisha diagurino.—Maq. 9:34; Luq. 22:24.

14. Yesuusi soqqamaasine lophitinohu hiittoo dagoomi giddooti?

¹⁴ Yesuusi soqqamaasinesi hiittoo dagoomi giddo lophitinoro hedinoti dihuluullissannote. (Yoh. 2:24, 25) Insa lophitino dagoomi giddo ammaꞌnote massagaano maccaha ikkanna silxaane afiꞌra lowori gede assite laꞌanno. (Mat. 23:6; Dotteessa 1, 2010 Agarooshshu Shaera (Amaaru Afoo) qool. 16-18 fulinohu “Xaadu Mine—Yesuusinna Rosaanosi Sabbakkino Bayichuwa” yaanno birxichi ledo heewisiisi.) Ayihudenniri ammaꞌnote massagaanono insaneeto keeraanote gede assite laꞌannoreeti. f (Luq. 18:9-12) Yesuusi soqqamaasinesi togoo dagoomi giddo lophansa uminsarano ikko wolootaho gara ikkitinokki lao heedhannonsa gede assitinota wodanchino. (Law. 19:11) Isi harunsaanosi horo soꞌro loosa dihasiissannonsa yee dihedino; hattono soꞌro loossu yannara cince kaaꞌlinonsa. Yesuusi insa gara ikkinore assa hasidhannota afino; hakko daafira wolootunni roortinore ikkate woꞌnaala agurte umonsa heeshshi assitannorenna mimmito baxxannore ikkitanno gede cincatenni rosiisinonsa.

15. Yaiqoobi, Yohaannisinna wole soqqamaasine mereero kalaqamino coyinni maa ronseemmo?

¹⁵ Yaiqoobi, Yohaannisinna wole soqqamaasine mereero kalaqamino coyinni lowore ronseemmo. Insa Yesuusi Gashshootisira ayirrado bayicho aansara xaꞌmiꞌransa soꞌrote. Wole soqqamaasineno mereeronsa noo mittimma baꞌanno gede assansa soꞌrote. Ikkirono Yesuusi 12 soqqamaasinesira baxillenna shaqqille leellisha diagurino. Ninke tennenni maa ronseemmo? Qaru coyi wolootu loossanno soꞌro calla ikkikkinni insa soꞌro loossanno woyite ninke assineemmo coyeeti. Tennera mayi kaaꞌlankera dandaanno? Mittu ammanate rodiinke koffi assinkero ninkeneeto togo yine xaꞌma dandiineemmo: ‘Isi assinori togo koffi assinoehu mayiraati? Tini biddi assiꞌra hasiissannoe laanfe nooeta leellishshannote ikka? Koffi assinoe manchira iillinosi qarri no ikka? Koffi yeemmo gede assannoehu ikkadu korkaati heeꞌriro nafa isira baxille leellishe soꞌrosi agure saꞌꞌa dandeemmo?’ Wolootaho baxille leellinshummo kiiro Yesuusire addu harunsaano ikkinoommota leellinshanni heeꞌnoommo.

16. Yesuusi lawishshinni wolere maa rosa dandiineemmo?

¹⁶ Qoleno Yesuusi lawishshi ammanate roduuwinke noo gara huwatate woꞌnaalleemmo gede kaaꞌlannonke. (Law. 20:5) Hige Yesuusi mannu wodanita afa dandaanno. Ninke kayinni didandiineemmo. Ikkirono ammanate roduuwinke koffi assitannonke woyite cincine saꞌꞌa dandiineemmo. (Efe. 4:1, 2; 1 Phe. 3:8) Insa lophitino gara afate woꞌnaallummoro tenne assa roore shota ikkitannonke. Hanni mitto lawishsha laꞌno.

17. Mitto woradu aliidi laꞌꞌaancho ammanate rodoosi seekke egennasi kaaꞌlitinosihu hiittoonniiti?

¹⁷ Soojjaati Afirikira soqqamannohu mittu woradu aliidi laꞌꞌaanchi, isi towaatanno songora nooha mitto rodoo umi qara, ‘Kuni rodii shaqqado diꞌꞌikkino’ yee hedinota qaaganno. Woradu aliidi laꞌꞌaanchi ma assiyya? Isi togo yiino: “Konni rodiiwa gambo giwantenni iso seekke egennate murciꞌroommo.” Woradu  aliidi laꞌꞌaanchi togo assasi konni rodiira togoo akati heeꞌrannosi gede assinohu lophino gara ikkinota afanno gede kaaꞌlitinosi. Woradu aliidi laꞌꞌaanchi lede togo yiino: “Konni rodiira akatasi biddi assiꞌra mageeshshi geeshsha qarra ikkitinosironna isi biddi assiꞌrinore huwatummoti iso lowo geeshsha naadummosi. Isi ledo dancha jaalla ikkinoommo.” Addanko, roduuwinke noo gara afate woꞌnaallummoro insara duucha woyite baxille leellisha qarra diꞌꞌikkitannonke.

18. Ammanate rodiinke koffi assinonkeha ikkiro ninkeneeto hiikkuri xaꞌmuwa xaꞌma hasiissannonke? (Lawishsha 26:20)

¹⁸ Mito woyite koffi assinonkeha ammanate rodoonke shinqe hasaawisa hasiissannonke yine hendammora dandiineemmo. Ikkirono balanxe aante noo gedee xaꞌmuwa ninkeneeto xaꞌma hasiissannonke: ‘Baalanka coye seekke buuxoommo?’ (Law. 18:13) ‘Koffi assinoehu afanni heeꞌreeti?’ (Ros. 7:20) ‘Ani konni albaanni togoo soꞌro loose diegennoommo?’ (Ros. 7:21, 22) ‘Iso hasaawise coye seekkeemmo yee roore bushanno gedella assammo?’ (Lawishsha 26:20 nabbawi.) Yanna gaaꞌmine kuri xaꞌmuwa seekkine hendummoro, rodiinkera noonke baxilli soꞌrosi agurre saꞌneemmo gede assankera dandaanno.

19. Maa assate murciꞌrootto?

¹⁹ Yihowa Farciꞌraasine gaamote deerrinni Yesuusita addu rosaano ikkansa leellishshanni no. Ammanate roduuwinke guuntete xeꞌne noonsare ikkiturono uminke horo agurre baxille leellinsheemmonsaha ikkiro, Yesuusi harunsaano ikkinoommota annu annu deerrinni leellinshanni heeꞌnoommo. Hatto assinummoro wolootu addu ammaꞌno badde affanno gedenna ninke ledo baxillaancho Magano Yihowa magansidhanno gede kaaꞌlineemmo. Hakko daafira addu Kiristaana bande anfanni gede assanno baxille woꞌmanka woyite leellishate murciꞌno.