Israeele halallaho heedhinohu 40 diri giddo ittinoti qara sagale mennaho. (Ful. 16:35) Qoleno Yihowa lame yannara hanshaqqe uyinonsa. (Ful. 16:12, 13; Kir. 11:31) Ikkirono Israeelete wole boode sagaleno noonsa.

Lawishshaho Yihowa dagasi wayinna sagale noowa “baxxisidhanno base” massaginonsa woyiti no. (Kir. 10:33) Isi massaginonsa bayichi giddo mittu Eeliimi yinanni bayichooti; hakkiicho 12 wayi buꞌanna 70 saattu haqqe no; tini saattu haqqe temire ikkitukki digattino. (Ful. 15:27) Pilaantis Ovi Ze Bayibili yinanni maxaafi togo yiino: “Addi addi bayicho mudhannoti temirete haqqe halallaho sagalete buicho ikkitanno; lowo miliyoone ikkanno manni tenne haqqenni sagale, zayitenna galanno bayicho afiꞌranno.”

Israeele xaa yannara Feeraani yinannihu halallaho noohu biifadu bayichiwa martuti fooliishshidhinoha ikkara dandaanno; kuni halallaho noohu biifadu bayichi Feeraani xeichira nooho. a Diskeveringi Ze Worlidi Ovi Ze Bayibili yinanni maxaafi togo yiino: “Kuni xeichi woy wayi nookki bayichi 130 kiilomeetire seendille afiꞌrinoho; Siinaho noohu kuni bayichi lowo geeshsha seeda, biifadonna lowo manni afinoha ikkikki digatino.” Kuni maxaafi ledo togo yiino: “Konni xeichi giddo hanafotenni kayinse 45 kiilomeetire haꞌnihu gedensaanni halaꞌlinye 4.8 kiilo meetire ikkannohu temirete haqqe woꞌmitinohunnna lowo geeshsha biifinohu Feeraani bayichi no; kuni bayicho noohu baaru gaxira aleenni 610 meetireraati. Konne bayicho Siina nooho Edenete bayichooti yaa dandiinanni. Lowo kume ikkitannoti temirete haqqe noo daafira hundinni kayise batinyu manni hakkiicho heeꞌra hanafino.”

Israeele Gibitsetenni fultu woyite liinsoonni gide, gide liinsanni uduunne, mito gidenna zayite adhite fultino. Kuni adhite fultino coyi mulenni goofinonsati dihuluullissannote. Qoleno haammata geꞌreewo, meꞌꞌenna lalo adhite fultino. (Ful. 12:34-39) Kayinni halallaho nooti ayyarete gade dancha ikkitinokki daafira lowo saadansa reyite gooffinoha ikkara dandaanno. Mite saada qole gorrite ittinohanna kakkalo assite shiqishshinoha ikkara dandaanno. Mitu Israeelete manni mite saada kakkalinohu qole kaphu magannara ikkara dandaanno. b (Soq. 7:39-43) Ikkirono Israeelete mito geeshshi saada noonsa; Yihowa Israeelete  ammana hoogginonsa daafira saada allaaꞌlitanni ‘oosonsa 40 diro’ halallaho keeshshitannota kulino hedo tenne leellishanno. (Kir. 14:33) Hakko daafira insa maalanna ado afidhinoha ikkara dandaanno; ikkirono tini sagale halallaho 40 diro sase miliyoone meddi yaanno mannira ikkitannokkiti dihuluullissannote. c

Saada sagalenna waa afidhannohu mamiinniiti? d Hatte yannara hakko gananno xeeninna muro xaa yannara nootenni roortannota ikkitara dandiitanno. Qullaawa Borro Seekke Huwata Xiraaze 1 (Ingilizete Afoo) yinanni maxaafi togo yiino: “Arawete gobbara 3,500 diri albaanni noo wayi xa noohunni roorannoho. Xaa yannara nooti batinye jajjabba bobboodda bashsho lowo lolahi heeꞌranno gede assanno geeshshi xeena ganannota leellishshannote.” Ikkirono hakku halalli moolahonna waajjishannoho. (Mar. 8:14-16) Yihowa maalaletenni waa aa hoogoommensaro Israeelete daganna saadansa reyite gooffannoti dihuluullissannote.—Ful. 15:22-25; 17:1-6; Kir. 20:2, 11.

Muse Israeelete, “mannu Maganu afiinni fulanno qaali baalunni ikkinnina sagale callatenni heeꞌrannokkita [egensiisansara]” Yihowa menna uyinonsata kulinonsa.—Mar. 8:3.