1-2. (a) Soqqamaasinchu Phaawuloosi, ‘rooru baxilleho’ yiinohu mayiraati? (b) Hiikkuri xaꞌmuwa xiinxallineemmo?

 SOQQAMAASINCHU Phaawuloosi, ammanate, hexxotenna baxillu daafira coyiꞌri woyite “Kuri sasunku giddo rooru baxilleho” yiino. (1 Qor. 13:13) Isi hatto yiinohu mayiraati? Albillitte Maganu haaro alame abbannota kulino qaali woꞌmanno daafira, hakkuyi gedensaanni kuni qaali woꞌmannota ammana woy hexxa dihasiissannonke. Kayinni woꞌmanka woyite Yihowanna manna baxa hasiissannonke. Isinni, Yihowaranna mannaho noonke baxilli hegerera lexxanni haꞌranno.

² Baxillu woꞌmanka woyite hasiisannoha ikkino daafira, aante noota sase xaꞌmo hasaambeemmo. Umihunni, mimmito baxa hasiissannonkehu mayiraati? Layinkihunni, mimmito banxeemmota leellisha dandiineemmohu hiittoonniiti? Sayikkihunni, mimmitoho noonke baxilli kaajje heeꞌranno gede assiꞌra dandiineemmohu hiittoonniiti?

3. Mimmito banxeemmo gede assannonkeri maati?

³ Mimmito baxa hasiissannota ikkitinohu mayiraati? Mittu korkaati, ammanate roduuwa baxanke addu Kiristaana ikkinoommota bande anfanni gede assitanno. Yesuusi rosaanosira togo yee kulinonsa: “Kiꞌne kiꞌneneewa baxantiniro, ane rosaano ikkitinoonnita mannu baalu tennenni egennannoꞌne.” (Yoh. 13:35) Qoleno mimmito baxanke mittooꞌmineemmo gede assitanno. Phaawuloosi baxillu “woꞌma mittimma aannoha” ikkinota kulino. (Qol. 3:14) Ikkirono, mimmito banxeemmo gede assannonkehu wolu korkaatino no. Soqqamaasinchu Yohaannisi  ammanate roduuwisira, “Magano baxannohu rodoosi [baxa]” hasiissannosi yee borreessino. (1 Yoh. 4:21) Mimmito banxeemmoha ikkiro, Magano banxeemmota leellinshanni heeꞌnoommo.

4-5. Maganoho noonke baxilli mannaho noonke baxilli ledo xaadooshshe afiꞌrino gara leellishanno lawishsha kuli.

⁴ Maganoho noonke baxillinna ammanate roduuwinkera noonke baxilli mereero noo xaadooshshi maati? Hanni lawishshaho wodaninkenna wole bisinke kifilla mereero noo xaadooshshe laꞌno. Akimichu angankera massaara wore wodaninke garunni gananni nooronna teꞌee lae wodaninke keeraanchimma daafira mitore afa dandaanno. Konni lawishshinni maa ronseemmo?

⁵ Akimichu angankera massaara wore lae wodaninke keeraanchimma daafira mitore afa dandaannonte gede, ninkeno wolootaho noonke baxilli mageeshshihoro layiꞌne Maganoho noonke baxilli kaajjadohoronna teꞌee afa dandiineemmo. Ammanate roduuwinkera noonke baxilli mito geeshsha qiidanni nooha ikkiro, tini Maganoho noonke baxillino qiidanni noota leellishshannota ikkitara dandiitanno. Kayinni woꞌmanka woyite ammanate roduuwanke banxeemmota leellinsheemmoha ikkiro, tini Maganoho noonke baxillino kaajjado ikkinota leellishshannote.

6. Ammanate roduuwinkera noonke baxilli qiidanni nooha ikkiro, tini lowo qarri noota leellishshannote yineemmohu mayiraati? (1 Yohaannisi 4:7-9, 11)

⁶ Ammanate roduuwinkera noonke baxilli qiidanni nooha ikkiro, tini lowo qarri noota leellishshannote. Mayira? Korkaatuno hatto ikkiro, Yihowa ledo noonke jaaloomino qiidanni no yaate. Soqqamaasinchu Yohaannisi tenne hedo xawise kulanni togo yiino: “Laꞌꞌanni nooha rodoosi baxinokkihu illetenni afinokkiha Magano hiitto asse baxa dandaanno?” (1 Yoh. 4:20) Ninke tennenni maa ronseemmo? Yihowa hagiidhannohu ‘mimmitonke banxeemmoha’ ikkiro callaati.—1 Yohaannisi 4:7-9, 11 nabbawi.

7-8. Mimmito banxeemmota leellisha dandiineemmoti mite doogga hiikkuriiti?

⁷ Maganu Qaali giddo duucha bayicho ‘Kiꞌne kiꞌneneewa baxamme’ yine hajanjoonninke. (Yoh. 15:12, 17; Rom. 13:8; 1 Tes. 4:9; 1 Phe. 1:22; 1 Yoh. 4:11) Ikkirono baxillu wodaninke giddo noo hedooti; wolu manni qole giddonketa afa didandaanno. Ikkina mimmitoho noonke baxilli leellanno gede assa dandiineemmohu hiittoonniiti? Coyiꞌneemmorinninna assineemmorinni tenne leellisha dandiineemmo.

⁸ Ammanate roduuwanke banxeemmota leellinsheemmoti batinye doogga no. Hanni mite doogga laꞌno: “Mimmitiꞌnera halaale coyidhe.” (Zak. 8:16) “Kiꞌne kiꞌneneewa suumuu yitine keere heedhe!” (Maq. 9:50) “Mimmitoꞌne ayirrisate qolchamme.” (Rom. 12:10) “Mimmitoꞌne haadhe.” (Rom. 15:7) “Kiꞌne kiꞌneneewa koffi yitinoonni coye . . . agurre.” (Qol. 3:13) “Kiꞌne kiꞌneneewa kaaꞌlantine, mimmitiꞌne qarra beeqqe!” (Gal. 6:2) “Mimmito sheshifachisha agurtinoonte.” (1 Tes. 4:18, NW) “Mimmitoꞌne . . . dhaabbe.” (1 Tes. 5:11) “Kuꞌu kuꞌunnira huucco.”—Yai. 5:16.

9. Woloota sheshifachisha insa banxeemmota leellinsheemmote kaajja doogooti yineemmohu mayiraati? (Misileno lai.)

⁹ Hanni aleenni kulloonni doogga giddo mitte horoonsiꞌne baxille leellisha dandiineemmo gara laꞌno. Phaawuloosi, “Mimmito sheshifachisha agurtinoonte” yee amaalinonke. Woloota sheshifachisha insa banxeemmota leellishshanno yineemmohu mayiraati? Mitte Qullaawu Maxaafi daafira xawissanno borro  yitanno garinni, Phaawuloosi horoonsiꞌrinohu “sheshifachisha” yaanno qaali ‘mitto buutote qarri amadinosi mancho sheshifachishate mulesi uurra’ yitanno tiro afiꞌrinoho. Ninkeno qarru iillinosiha ammanate rodoonke sheshifachinshe, kae uurranno gedenna heeshshote doogora haꞌra agurannokki gede kaaꞌla dandiineemmo. Ammanate rodoonke woꞌmanka woyite sheshifachinshe iso banxeemmota leellinsheemmo.—2 Qor. 7:6, 7, 13.

10. Mararanna sheshifachisha afidhino xaadooshshi maati?

¹⁰ Mararanna sheshifachisha xaadooshshe afiꞌrino akataati. Ma garinni? Mararanno manchi woloota sheshifachishanno hattono iillinonsa qarrinni beedho afidhanno gede assanno. Hakko daafira umihunni mararreemmo, hakkiinni sheshifachinsheemmo. Hanni Soqqamaasinchu Phaawuloosi, Yihowa manna mararasi sheshifachishannonsa gede assitannosihu hiittoonniitiro xawisino gara laꞌno. Phaawuloosi Yihowa ‘Maarote Annanna, jawaante baalate Magano’ ikkinota xawisino. (2 Qor. 1:3) Kowiicho Phaawuloosi “maaro” yaanno qaale horoonsiꞌrinohu Yihowa mannaho shaqqilli leellishannota kulateeti. Hakko daafira Maganu manna lowo geeshsha mararannohura, iso “Maarote Anna woy Buicho” yaa dandiinanni. Isi konni garinni mararannoha ikkasi ‘qarrinke baalu giddo’ sheshifachishannonke gede assitannosi. (2 Qor. 1:4) Buete giddonni fulannohu xalalu wayi gooꞌrino manna gooꞌro qolannonte gede, Yihowano yaadino manna fooliishshiishannonsa hattono sheshifachishannonsa. Ninke Yihowa lawishsha harunsine woloota mararanna sheshifachisha dandiineemmohu hiittoonniiti? Tenne assa dandiineemmoti mitte doogo woloota sheshifachinsheemmo gede kaaꞌlitannonke akatta heedhannonke gede assiꞌrate. Kuri akatta giddo gama hiikkuriiti?

11. Qolasiyaasi Sokka 3:12 nna 1 Pheexiroosi 3:8 kultanno garinni, woloota sheshifachinsheemmo gede assanno baxilli heeꞌrannonke gede kaaꞌlitannonketi wole akatta hiikkuriiti?

¹¹ Mimmito baxanna ‘sheshifachisha agurreemmokki’ gede kaaꞌlannonkeri maati? Wolu manni qarra uminkehu gede assine heda, rodiimmate baxillinni baxamanna shaqqadda ikka hasiissannonke. (Qolasiyaasi Sokka 3:12; 1 Pheexiroosi 3:8 nabbawi.) Kuri akatta kaaꞌlitannonkehu hiittoonniiti? Woloota mararreemmohanna insa daafira addinta hendeemmoha ikkiro, qarru amadannonsa woyite insa sheshifachishate quqquxammeemmo. Yesuusi “Mannu wodanisira woꞌme gatinoha coyiꞌranno. Danchu manchi danchu miinjisi giddonni dancha coye fushshanno” yiino. (Mat. 12:34, 35) Qarru amadannonsa woyite ammanate roduuwanke sheshifachisha insa banxeemmota leellinsheemmote kaajja doogooti.

12. (a) Baqqi yine heeꞌra hasiisannonkehu mayiraati? (b) Xa hiittenne xaꞌmo hasaambeemmo?

¹² Ninke baalunku, woꞌmanka woyite ‘mimmitinke ledo baxama’ hasiꞌneemmo. (1 Yoh. 4:7) Ikkirono Yesuusi, “lowo manni baxilli qiidanno” yee kulino qorowishshano qaaga hasiisannonke. (Mat. 24:12) Isi hatto yiinohu rosaanosi giddonni rooru manni mimmito baxa agurannota kulate diꞌꞌikkino. Ikkirono tenne alamera noohu baxillu noonsakki manni hunannonkekki gede baqqi yine heeꞌra hasiissannonke. Hanni tenne hedo wodanaho wodhine aante noo xaꞌmo hasaambo: Ammanate roduuwinkera noonke baxilli kaajje nooronna teꞌee anfeemmo gede kaaꞌlannonkeri maati?

13. Baxillinke kaajjadohoronna teꞌee anfanni gede assannori maati?

¹³ Heeshshonke giddo mittu coyi tuncu yiinkero  assineemmori, ammanate roduuwinkera noonke baxilli kaajje nooronna teꞌee afate kaaꞌlannonke. (2 Qor. 8:8) Soqqamaasinchu Pheexiroosi tuncu yaankera dandaannoha mitto coye xawisino. Isi, “Baxillu, batinye cubbo diwanno daafira, woꞌmunkuri aleenni mimmitiꞌne ledo seekkitine baxamme” yiino. (1 Phe. 4:8) Hakko daafira wolootu laanfenna guuntete xeꞌnensa baxillinke kaajjadohoronna teꞌee anfanni gede assitara dandiitanno.

14. Umi Pheexiroosi 4:8 kultanno garinni hiittoo baxilli hasiisannonke? Lawishsha kuli.

¹⁴ Hanni Pheexiroosi coyiꞌrino hedo seekkine laꞌno. Kiiro 8 nooti jeefote hedo, ‘seekkine baxama’ hasiisannonketa kultanno. Pheexiroosi horoonsiꞌrinohu “seekkitine” yaanno qaali noo gedeenni tirriro “bedeeda” yitanno tiro afirono. Kiiro 8 nooti umi hedo qolte seekkine baxama afidhino horo kultanno. Seekkine baxama roduuwinke cubbo dibbanno. Tenne lawishshunni xawisa dandiinanni: Baxillu lamente angankenni bedeende amandoommohu fididdi yaanno hocci gedeeti; baxillu mitto woy lame cubbo calla ikkikkinni ‘batinye cubbo diwa’ geeshsha bedeende amandeemmo yaate. Diwa roduuwinke cubbo agura leellishshannote. Hoccu xure diwannonte gede, baxilluno wolootu laanfenna guuntete xeꞌnensa diwanno.

15. Ammanate roduuwinkera noonke baxilli kaajjado ikkiro maa assa dandiineemmo? (Efesooni Sokka 4:32)

 ¹⁵ Ammanate roduuwinke soꞌro gatona yaa qarra ikkitannonke woyite nafa, gatona yaate insara noonke baxilli kaajjado ikkanno gede assiꞌra hasiisannonke. (Efesooni Sokka 4:32 nabbawi.) Insa gatona yineemmoha ikkiro baxillinke kaajjado ikkinotanna Yihowa hagiirsiisa hasiꞌneemmota leellinsheemmo. Ammanate roduuwinke soꞌro gatona yineemmo gedenna insa assitannorinni caaccaambeemmokki gede kaaꞌlannonkeri woluri maati?

16-17. Wolootu loossinota hakkeya xibbinokki soꞌro lashshi assine saꞌneemmo gede kaaꞌlannonkeri woluri maati? Lawishsha kuli. (Misileno lai.)

¹⁶ Roduuwiꞌneha gara ikkinokkiha ikkikki dancha akatansa illachishshe. Hanni ammanate roduuwikki ledo gamba yite godoꞌlitanni noottohu gede assite hedi. Insa ledo dancha yanna sayisittohu gedensaanni jeefote foto kaꞌini. Isinni umi foto dancha ikka hooggara dandiitanno yite hedootto daafira ledde lame foto kayisitto. Mitteenni sase foto kayisootto yaate. Kayinni mitte foto giddo mittu rodii muushshi yiinokkita laitto. Hatte foto hiissatto? Baalunku roduuwinna hakku rodiino muushshi yee kainoti wole foto noohe daafira hatte foto hunatto.

¹⁷ Hanni kayinse wodhinoommo foto, qaangeemmo coyi ledo heewisiinso. Duucha woyite, ammanate roduuwinke ledo sayinsoommota dancha yanna dihambeemmo. Kayinni mitte yannara mittu ammanate rodiinke woy rodoonke  gara ikkinokkire assinoha woy coyiꞌrinoha ikkara dandaanno. Tenne qaangeemmo woyite ma assa hasiissannonke? Gara ikkitinokki foto hunneemmonte gede togoo coyeno hawate sharrama hasiisannonke. (Law. 19:11; Efe. 4:32) Ammanate rodiinke ledo sayinsoommoti batinye dancha yanna noonketa qaangeemmo daafira, isi assinoha woy coyiꞌrinoha hakkeya xiwinokki coye hawa dandiineemmo. Ammanate rodiinke ledo sayinsoommota dancha yanna kayinni hawa dihasiꞌneemmo.

18. Konni birxichira baxillu daafira xiinxallinoommoti qara hedo maati?

¹⁸ Mimmitoho noonke baxilli kaajjado ikke heeꞌranno gede assiꞌra hasiꞌneemmohu mayiraati? Konni birxichira ronsummonte gede ammanate roduuwanke banxeemmota leellinsheemmo woyite, Yihowa banxeemmota leellinshanni heeꞌnoommo. Ammanate roduuwanke banxeemmota leellisha dandiineemmohu hiittoonniiti? Tenne assa dandiineemmoti mitte doogo insa sheshifachishate. Woloota mararreemmoha ikkiro ‘mimmito agurrummokkinni sheshifachisha’ dandiineemmo. Mimmitoho noonke baxilli kaajjado ikke heeꞌranno gede assiꞌra dandiineemmohu hiittoonniiti? Wolootu soꞌro gatona yaate dandiinummore baala assineeti.

19. Roorenkanni xaa yannara mimmito banxeemmota leellisha hasiisannonkehu mayiraati?

¹⁹ Roorenkanni xaa yannara mimmito banxeemmota leellisha hasiissannonkehu mayiraati? Pheexiroosi mayiraatiro kulanni, ‘Baalunku coyira goofimarchu iillino daafira, seekkitine baxamme’ yiino. (1 Phe. 4:7, 8) Tini busha alame baꞌanno yanna gambisse daggu kiiro huluullammeemmokki coyi maati? Yesuusi harunsaanosi daafira coyiꞌranni, “Suꞌmiꞌya daafira yitineenna mannu baalu giwannoꞌne” yiino. (Mat. 24:9) Mannu giwannonketa dandiine saꞌꞌate mittooꞌmine heeꞌra hasiissannonke. Hatto assineemmoha ikkiro Sheexaanu ninke babbadate assannori diqinaannosi; korkaatuno ninke, ‘woꞌma mittimma aanno baxillinni’ mittooꞌminoommo.—Qol. 3:14; Fil. 2:1, 2.