1-2. Yihowa huuccattonkera dawaro qolinokkiha lawannonkehu mayira ikkara dandaanno?

 “KAALIIQINNI tashshi yoohe; isino wodanikki halcho wonshannohe.” (Far. 37:4) Yihowa einonkehu kuni qaali dhagge ikkannoho! Kayinni Yihowa huucciꞌnoommo coye baalanka bayichonkonni aannonke yine heda hasiissannonke? Tini xaꞌmo hasiissannota ikkitinohu mayiraati? Hanni aane noo lawishsha laꞌno. Mitte mine assidhinokki rodoo Maganu Mangiste Sawaakooti Rosi Minira koyinsannise gede Yihowa huuccidhino. Ikkollana ise koyinsikkinni lowo diri saino. Mittu wedellichu rodii songote giddo albinni roore soqqama dandaanno gede amadinosihu buutote dhibbinni beedho afiꞌranno gede kaaꞌlasira Yihowa huucciꞌrino. Ikkirono isi woyyimma diafiꞌrino. Kiristaana ikkino anninna ama qaaqqinsa halaalu mine heeꞌranno gede Yihowa huucciꞌrino. Kayinni qaaqqinsa Yihowara soqqama agurino.

² Atino Yihowa mito coye huuccidhe hakkonne coye afiꞌroottokkiha ikkara dandaanno. Hakko daafira, ‘Yihowa mitu manni huuccatto macciishshanni aneta giwino’ yite hedoottoha ikkara dandaanno. Woy ani hunoommori no yite hedoottoha ikkara dandaanno. Jaanise b yinanni rodoo hatto yite heddino. Isenna minaannise Beeteele eꞌꞌe soqqama hasiꞌrino daafira Yihowa huucciꞌrino. Ise, “Mulenni Beeteele woshshinanninke yee hedoomma” yitino. Ikkirono lowo diri gedensaanni nafa insa dikoyinsoonninsa. Jaanise togo yitino: “Lowo geeshsha dadilloomma hattono gurchaawoomma. Yihowa dadillisannore ma assoomma ikka yee yaadoomma. Beeteele eate daafira bade kule huucciꞌroomma. Isi huuccattoꞌyara dawaro qolinokkihu mayiraati?”

3. Konni birxichira maa ronseemmo?

 ³ Mito woyite, Yihowa huuccattonke macciishshannota huluullammeemmoha ikkara dandaanno. Hundi waro heedhinori mitu ammanantino labballi nafa huluullantino woyiti no. (Iyo. 30:20; Far. 22:2; Imb. 1:2) Yihowa huuccattokkira dawaro qolannota huluullamattokki gede kaaꞌlannoheri maati? (Far. 65:2) Tenne xaꞌmora dawaro afiꞌrate, aante noo xaꞌmuwa xiinxallineemmo: (1) Yihowa ma assankera hasiꞌneemmo? (2) Yihowa ninke ma assinammora hasiꞌranno? (3) Mite huuccattonke biddi assiꞌra hasiissannonkehu mayira ikkara dandaanno?

4. Ermiyaasi 29:12 yitanno garinni Yihowa maa assate qaale eino?

⁴ Yihowa huuccattonke macciishshannota kule qaale eino. (Ermiyaasi 29:12 nabbawi.) Maganinke ammanantino soqqamaanosi baxanno daafira huuccattonsa horonta lashshi diassanno. (Far. 10:17; 37:28) Hatto yaa kayinni isi huucciꞌneemmo huuccatto baalate dawaro qolanno yaa diꞌꞌikkino. Mite huuccattonkera dawaro afiꞌrate haaro alame dagga geeshsha agadha hasiissannonkeha ikkara dandaanno.

5. Yihowa huuccattonke macciishshanno woyite hedanno coyi maati? Xawisi.

⁵ Yihowa huucciꞌneemmo huuccatto isi hedo ledo xaaddanno gara hedanno. (Isa. 55:8, 9) Yihowa hedinori giddo mittu, iso gashshaanchonsa assiꞌre isira hagiirrunni hajajamanno manni baalu uulla woꞌmanno gede assate. Kayinni Sheexaanu mannu ooso uminsa umonsa gashshituro woyyannohu gede asse coyiꞌrino. (Kal. 3:1-5) Yihowa Daawuloosi kapho xawo fushshate mannu ooso uminsa umonsa gashshitara fajjino. Ikkirono mannu gashshooti xaa yannara duuchu qarri iillannonke gede assino. (Ros. 8:9) Yihowa konne qarra baala xaa yannara hunannokkita anfoommo. Isi hatto assoommero, mitu manni mannu gashshooti qarranke tiranno yee hedara dandaanno.

6. Yihowa huuccattonkera dawaro woꞌmanka woyite baxillunninna taashshotenni qolannota addaxxa hasiissannonkehu mayiraati?

⁶ Yihowa mittu gari huuccattora dawaro addi addi garinni qolara dandaanno. Lawishshaho Moote Hiziqiyaasi lowo geeshsha dhiwami yannara Yihowa hursannosi gede eeggifate huucciꞌrino. Yihowano huuccattosi macciishshe hursinosi. (2 Mot. 20:1-6) Kayinni Yihowa soqqamaasinchu Phaawuloosi ‘utu gede qasannosi qarra’ hoolannosi gede eeggifate huucciꞌrino huuccattora dawaro diqolino; kuni qarri dhibba ikkara dandaanno. (2 Qor. 12:7-9) Hanni soqqamaasinchu Yaiqoobinna Pheexiroosi lawishshano laꞌno. Insa lamenka Moote Heeroodisi shaara hasiꞌrino. Songo Pheexiroosira huuccitino; Yaiqoobirano huuccitinoha ikkara dandaanno. Ikkirono Yaiqoobi shinoonni; Pheexiroosi kayinni maalale ikkanno garinni reyotenni gatino. (Soq. 12:1-11) ‘Yihowa Pheexiroosi gatise Yaiqoobi gatisinokkihu mayiraati?’ yine hendeemmoha ikkara dandaanno. Tenne daafira Qullaawu Maxaafi kulannori dino. c Kayinni Yihowa ‘doogo suwashsho’ ikkitinota dihuluullammeemmo. (Mar. 32:4) Qoleno Yihowa Pheexiroosino Yaiqoobino baxannonsata anfoommo. (Aju. 21:14) Mito woyite Yihowa huuccattonkera dawaro ninke hendoommo garinni qola hoogankera dandaanno. Kayinni isi woꞌmanka woyite huuccattonkera dawaro qolannohu baxillunna taashshotenni ikkinota addaxxineemmo daafira huuccattonkera dawaro qolanno gara dihuluullammeemmo.—Iyo. 33:13.

7. Maa qoropha hasiissannonke? Mayira?

⁷ Ninkera iillinonke qarra wolootaho iillinonsa qarri ledo heewisiinseemmokki gede qoropha hasiissannonke. Lawishshaho Yihowa  kaaꞌlannonke gede mitto coye bande kulle huucciꞌne huuccattonkera dawaro afiꞌnoommokkiha ikkara dandaanno. Gedensoonni wolootu ninkehu gedee qarri iilleennansa huuccidhino huuccattora Yihowa dawaro qolinonsata huwanteemmoha ikkara dandaanno. Aana yinanni rodoora togoori tuncu yiinose. Ise minaannise Maatiwu amadinosihu kaanserete dhibbinni huranno gede huuccidhino. Hatte yannara lame geedhino roduuwano kaanserete dhibbi waadannonsa. Aana minaannise Maatiwunna kuri roduuwi daafira eeggifatte huuccidhino. Kuri lamenti roduuwi hurino minaannise Maatiwu kayinni fooliishshiꞌrino. Aana umi qara togo yite heddino: “Yihowa kaaꞌlinonsa daafira kuri lamenti roduuwi hurino. Yihowa minaanniꞌya huranno gede huucciꞌroomma huuccatto macciishshinokkihu mayiraatiyya?” Hige ninke kuri lamenti roduuwi hurinohu hiittoonniitiro dianfoommo. Ikkirono Yihowa iillannonke qarra baala hegerera hunannotanna reyitino jaallasi reyotenni kayisate quqquxamannota anfoommo.—Iyo. 14:15.

8. (a) Isayaasi 43:2 yitanno garinni Yihowa kaaꞌlannonkehu hiittoonniiti? (b) Buutote qarri iillannonke woyite huuccatto kaaꞌlitannonkehu ma garinniiti? (Huuccatto Qarra Cincineemmo Gede Kaaꞌlitannonke yitanno viidiyo lai.)

⁸ Yihowa woꞌmanka woyite kaaꞌlannonke. Isi baxillaancho iimi Annanke ikkino daafira ninke xissiisiꞌnanna laꞌꞌa dihasiꞌranno. (Isa. 63:9) Ikkirono isi wayinni woy giiratenni lawinsoonni qarri baalu iillannonkekki gede diassanno. (Isayaasi 43:2 nabbawi.) Ikkollana togoo qarri ‘giddoonni hinge saꞌneemmo’ gede kaaꞌlannonketa kule qaale eino. Qoleno Yihowa iillannonke qarri hegerera gawajjankera wore dilaꞌꞌanno. Hattono iillannonke qarra dandiine saꞌneemmo gede kaaꞌlannonkeha wolqaataamo qullaawa ayyaanasi aannonke. (Luq. 11:13; Fil. 4:13) Hakko daafira Yihowa woꞌmanka woyite iillannonke qarra dandiine saꞌneemmo gedenna isira ammanamme heeꞌneemmo gede kaaꞌlannonkeha hasiise noonke coye aannonketa addaxxa dandiineemmo. d

9. Yaiqoobi 1:6, 7 kultanno garinni Yihowa kaaꞌlannonketa addaxxa hasiissannonkehu mayiraati?

⁹ Yihowa iso addaxxinammora hasiꞌranno. (Ibi. 11:6) Mito woyite iillannonke qarri wolqankera aleenni ikkinoha lawankera dandaanno. Yihowa kaaꞌlannonketa huluullama nafa hananfammora dandiineemmo. Kayinni Qullaawu Maxaafi, ‘Maganu wolqanni qiisho tayinse saꞌꞌa’ dandiineemmota kulannonke. (Far. 18:29) Hakko daafira huluullama agurre Yihowa huuccattonkera dawaro qolannota addaxxine ammanantenni huucciꞌra hasiissannonke.—Yaiqoobi 1:6, 7 nabbawi.

10. Huuccattonke ledo sumuu yaannore assa dandiineemmo gara leellishanno lawishsha kuli.

¹⁰ Yihowa huuccattonke ledo sumuu yaannore assinammora hasiꞌranno. Lawishshaho mittu rodii qoqqowu gambooshshe haꞌrate loosiisaanchisi fajjannosi gede kaaꞌlasira Yihowa huucciꞌrara dandaanno. Yihowa tenne huuccattora dawaro qolannohu hiittoonniiti? Kuni rodii mare loosiisaanchosi fajjo xaꞌmiꞌrate worba ikkanno gede kaaꞌlasira dandaanno. Ikkirono kuni rodii mare loosiisaanchosi fajjo xaꞌmiꞌre huuccattosi ledo sumuu yaannore assa hasiissannosi. Isi fajjannosi gede duucha hige xaꞌmiꞌra hasiissannosiha ikkara dandaanno. Isi loosanno barra wolu ledosi loosannohu ledo soorriꞌrara nafa dandaanno. Hattono hasiisannoha ikkiro, baantannisi damoozi gateenna fooliishsho fulanno gede fajjasira xaꞌmiꞌrara dandaanno.

11. Yaachishinonke coyi daafira agurrummokki huucciꞌra hasiissannonkehu mayiraati?

¹¹ Yihowa yaachishinonke coyi daafira agurrummokki  huucciꞌnammora hasiꞌranno. (1 Tes. 5:17) Yesuusi coyiꞌrinori mite huuccattonkera dawaro bayichonkonni afiꞌra hoongammora dandiineemmota leellishanno. (Luq. 11:9) Hakko daafira hexxo mudhitooti! Agurittokkinni higge higge huucciꞌri. (Luq. 18:1-7) Mittu coyi daafira agurrummokkinni huucciꞌneemmoha ikkiro hakkonne coye lowo geeshsha hasiꞌnoommota leellinshanni heeꞌnoommo. Qoleno Yihowa ninke kaaꞌla dandaannota ammanneemmota leellinshanni heeꞌnoommo.

12. (a) Huucciꞌneemmo huuccatto daafira ninkeneeto xaꞌma hasiissannonketi mitte xaꞌmo hiittenneeti? Mayira? (b) Huuccattonke Yihowa ayirrinseemmota leellishannota ikkitanno gede assiꞌra dandiineemmohu hiittoonniiti? (“ Huuccattoꞌya Yihowa Ayirriseemmota Leellishshanno?” yitanno saaxine lai.)

¹² Huuccattonkera dawaro afiꞌnoommokkiha ikkiro aante noota sase xaꞌmo ninkeneeto xaꞌma dandiineemmo. Umihunni, ‘Huucciꞌranni noommori garaho?’ Duucha woyite ninkera woyyannonkere anfoommohu gede assine hendeemmo. Kayinni huucciꞌnanni heeꞌnoommo coyi kaaꞌlannonkekkiha ikkara dandaanno. Iillinonke qarri daafira huucciꞌnanni heeꞌnoommoha ikkiro, hakkonni huucciꞌnanni heeꞌnoommo qarrira woyyinohu wolu mali heeꞌrara dandaanno. Qoleno huucciꞌneemmohu mitu coyi Yihowa fajjo ledo sumuu yaannokkiha ikkara dandaanno. (1 Yoh. 5:14) Hanni aleenni qummi assini anninna ama lawishsha laꞌno. Insa qaaqqinsa halaalu mine heeꞌranno gede Yihowa huucciꞌrino. Tini hasiissanno huuccatto labbara dandiitanno. Ikkirono Yihowa isira soqqamanno gede aye manchono digiddeessanno. Isi ninke baalunku hattono qaaqquullinkeno iso banxe magansiꞌnammosira hasiꞌranno. (Mar. 10:12, 13; 30:19, 20) Hakko daafira annuwunna amuuwu qaaqqinsa Yihowa baxanno gedenna isi jaala  ikkanno gede assate, rosu wodanisira coanno garinni rosiissanno gede kaaꞌlansara Yihowa huucciꞌra dandiitanno.—Law. 22:6; Efe. 6:4.

13. Ibiraawoota 4:16 kultanno garinni Yihowa kaaꞌlannonkehu hiittoo woyiteeti? Xawisi.

¹³ Layinkihunni, ‘Tini Yihowa huuccattoꞌyara dawaro qolanno yannaati?’ Huuccattonkera dawaro bayichonkonni afiꞌra hasiissannonkeha lawankera dandaanno. Noore coyiꞌniro kayinni, Yihowa ninke kaaꞌlannoti woyyitino yanna hiittenneetiro afino. (Ibiraawoota 4:16 nabbawi.) Huuccattonkera dawaro bayichonkonni afiꞌra hoongummoro Yihowa huuccattonke ‘dimacciishshino’ yine hendammora dandiineemmo. Kayinni isi huuccattonkera dawaro qolanno ‘yanna iillitinokkiha’ ikkara dandaanno. Hanni lawishshaho Yihowa dhibbasi hursanno gede huucciꞌri wedellichi lawishsha galagalle laꞌno. Yihowa dhibbasi maalaletenni hursoommero, Sheexaanu kuni rodii Yihowara soqqama agurinokkihu dhibisinni hurino daafira calla ikkinohu gede asse coyiꞌrara dandaanno. (Iyo. 1:9-11; 2:4) Qoleno Yihowa baalanka dhibba hunanno yanna hirqino. (Isa. 33:24; Aju. 21:3, 4) Hakka geeshsha isi maalaletenni hursannonke yine dihendeemmo. Hakko daafira kuni rodii dhibbasi dandee heeꞌrate kaaꞌlitannosi jawaantenna giddoyidi keere afiꞌrate hattono Yihowara ammaname soqqamanni heeꞌranno gede kaaꞌlasira iso huucciꞌra dandaanno.—Far. 29:11.

14. Jaanise woꞌnaalshinni maa rosootto?

¹⁴ Hanni Beeteele eꞌe soqqamate huuccidhinote Jaanise woꞌnaalsha galagalle laꞌno. Ise Yihowa huuccattosera dawaro qolino gara wodanchitukkinni ontu diri saino. Ise togo yitino: “Yihowa hattenne yanna ane qajeelsatenna rosiisate horoonsiꞌrino. Iso albinni roore addaxxa hasiissinoe. Hojju xiinxallo assiꞌreemma gara woyyeessiꞌra hasiissinoe. Qoleno Yihowara soqqameemmawi ikkiwano ikkiro giddoyidi hagiirre afiꞌra dandeemmata rosoomma.” Gedensoonni Jaanisenna minaannise woradu looso  loosanno gede koyinsoonninsa. Jaanise hakkawarita qaagge togo yitino: “Ani hedoomma garinni ikka hoogirono Yihowa huuccattoꞌyara dawaro qolino. Isi huuccattoꞌyara dawaro dhagge ikkanno garinni qolino gara mulenni dihuwatoomma; kayinni isi leellishinoe baxillinna danchummara lowo geeshsha galaxxeemmasi.”

15. Halashshine huucciꞌra hasiissannonkehu mayiraati? (Misileno lai.)

¹⁵ Sayikkihunni, ‘Mitto coye calla bade kule huucciꞌranni noommo ikka?’ Mitto coye bande kulle huucciꞌra dancha ikkiturono Yihowa ninkera hedinori maatiro wodanchate halashshine huucciꞌra dandiineemmo. Hanni aleenni kullite Maganu Mangiste Sawaakooti Rosi Mine eꞌꞌe rosate huuccatto assidhanni keeshshitu rodoo lawishsha laꞌno. Ise sabbakkannori roore hasiissannowa hadhe soqqamate konni rosi mine eꞌꞌe rosa hasidhino. Hakko daafira ise konni rosi minira koyinsasera huuccidhanni heedhenni soqqanshose halashshiꞌra dandiitannota wole faro wodanchitanno gede kaaꞌlaserano huucciꞌra dandiitanno. (Soq. 16:9, 10) Qoleno ise, qooxeessisera suwisaano roore hasiissanno songo nooronna teꞌee kulannose gede woradu aliidi laꞌꞌaancho xaꞌmite huuccattose ledo sumuu yaannore assa dandiitanno. Woy Maganu Mangiste halashshaano roore hasiissannohu hiikkootiro afate sinu biirora sokka borreessa dandiitanno. e

16. Huluullammeemmokki coyi maati?

¹⁶ Aleenni laꞌnummonte gede, Yihowa huuccattonkera dawaro qolannohu baxillunninna taashshotenni ikkinota addaxxa dandiineemmo. (Far. 4:3; Isa. 30:18) Mito woyite Yihowa huuccattonkera dawaro ninke hendoommo garinni qola hoogankera dandaanno. Ikkirono isi huuccattonke lashshi diassanno. Yihowa lowo geeshsha baxannonke. Hattono horo tuge diagurannonke. (Far. 9:10) Hakko daafira giddoꞌneta gudissine huuccattotenni Yihowara hasaaphitine “woꞌmanka woyite” iso addaxxe.—Far. 62:8.