1. Mittu qaaqqi kaote hexxo seekke ammanannota leellishinohu hiittoonniiti?

 MITTO Maatiwu yinanni qaaqqo buutote dhibbi amadinositanna duucha hinge darre xagisa hasiissannota kulli. Isi lamalu dirihu heeꞌreenna mitte yannara isinna maatesi JW Biroodikaaste laꞌanni no. Insa pirogiraamete jeefora, reyotenni kaino manna anga fanne haaꞌnanna leellishshannota muuziiqu viidiyo laꞌu. b Pirogiraame gooffuhu gedensaanni Maatiwu annisinna amasi anga amade togo yii: “Anna, awu laꞌini? Anino reyummoro nafa kaeemmo. Reyotenni kaꞌꞌammo geeshsha agartinannie.” Hanni kuni anninna ama qaaqqinsara kaote hexxo xabbe leeltinosita afiti mageeshshi geeshsha hagiidhinoro hedde!

2-3. Kaote hexxo daafira hiinca hasiissannonkehu mayiraati?

² Ninke baalunku Qullaawu Maxaafi kulannote kaote hexxo daafira yannate kiiro hiinca hasiissannonke. (Yoh. 5:28, 29) Mayira? Korkaatuno, hedeweelcho buutote dhibbi amadankera woy banxeemmo manna shiiꞌnammora dandiineemmo. (Ros. 9:11; Yai. 4:13, 14) Kaote hexxo togoo qarra dandiine saꞌneemmo gede kaaꞌlitannonke. (1 Tes. 4:13) Qullaawa Borro iimi Anninke seekke egenninonketanna lowo geeshsha baxannonketa buuxissannonke. (Luq. 12:7) Hanni Yihowa reyinummoro galagalle heeshshotenni heeꞌneemmo gede assate ayimmankenna ninke daafira baalankare mageeshsha afinoro hedi. Yihowa lowo geeshsha baxannonke daafira hegerera heeꞌneemmo faro faninonke; isi reyinummoro nafa reyotenni kayisannonke!

³ Konni birxichira umo, kaote hexxo ammanneemmohu mayiraatiro hasaambeemmo. Hakkiinni cuꞌmote qummeeshshira noota “Rodiikki reyotenni kaꞌꞌanno” yitannota ammana kaajjishshannota  Qullaawu Maxaafi giddo kulloonni xagge xiinxallineemmo. (Yoh. 11:23) Jeefote, kaote hexxo roore xabbe leeltannonke gede assiꞌra dandiineemmohu hiittoonniitiro ronseemmo.

4. Uyinoonninke hexxo ammanate maa buuxa hasiissannonke? Lawishsha kuli.

⁴ Kaote hexxo ammanate, hexxo uyinonke Maganira tenne hexxo wonshate hasattonna wolqa woy dandoo noosita ammana hasiissannonke. Hanni lawishshaho wolqaataame bubbe minekki lowo geeshsha gawajjitino yine hendo. Hakkiinni jaalikki daye ‘Minekki galagalte gatamadhatto gede kaaꞌleemmohe’ yiihe. Isi coyiꞌrinohu godowinta ikkiro ate kaaꞌla hasiꞌrannota addaxxatto. Isira mine minate dandoonna mine minnanni uduunnichi noosita afittoro qolte kaaꞌlahera dandaannota buuxatto. Hakko daafira isi einohe qaale ammanatto. Maganu uyinonketi kaote hexxona? Isira tenne hexxo wonshate addinta hasattonna wolqa noosi?

5-6. Yihowara reyitinore kayisate hasatto noosita huluullammeemmokkihu mayiraati?

⁵ Yihowara reyitinore kayisate hasatto noosi? Ee noosi. Isi batinye Qullaawu Maxaafi borreessaano albillittete kao daafira borreessitanno gede assino. (Isa. 26:19; Hos. 13:14; Aju. 20:11-13) Qoleno Yihowa qaale eiro woꞌmanka woyite eino qaale wonshanno. (Iya. 23:14) Isinni Yihowa reyitinore kayisate quqquxamanno. Hatto yineemmohu mayiraati?

⁶ Hanni Iyyoobi coyiꞌrinore laꞌno. Isi reyiro nafa Yihowa iso reyotenni kayisate quqquxamannota ammanino. (Iyo. 14:14, 15) Yihowa iso magansidhannore baala reyotenni kayisate quqquxamanno. Isi insa reyotenni kaꞌe ordu fayyimmanna hagiirre afidhe heedhanno gede assate quqquxamanno. Yihowa daafira rosate faro afiꞌrikkinni reyinohu lowo biliyoone ikkanno manni hiikkannoyya? Baxillaanchu Maganinke insano reyotenni kayisa hasiꞌranno. (Soq. 24:15) Yihowa insa isi jaala ikkatenna uullate aana hegerera heeꞌrate faro afidhanno gede assa hasiꞌranno. (Yoh. 3:16) Addanko Yihowara reyitinore kayisate hasatto noosi.

7-8. Yihowara reyitinore kayisate wolqa noosita huluullammeemmokkihu mayiraati?

⁷ Yihowara reyitinore kayisate wolqano noosi? Ee! Isi ‘Woꞌmanka Dandaannoho.’ (Aju. 1:8) Hakko daafira isira baalanka diina wole agurina reyo nafa qeelate wolqa noosi. (1 Qor. 15:26) Tenne afanke jawaantenna shesho afiꞌneemmo gede assitannonke. Hanni Eema Arnoldi yinanni rodoo woꞌnaalsha laꞌno. Layinkihu Alamete Oli yannara iseranna maatesera ammanansa fonqolannohu buutote qarri iillinonsa. Naazite usuranyu kaampera shiidhe dadillitino beettose sheshifachishate Eema togo yitino: “Reyino manni horonta reyotenni kaꞌꞌannokkiha ikkiro, diininke reyo Maganunni roore wolqaataamete yaate; kuni qole ikkannokki coyeeti.” Yihowate geeshshi wolqa afiꞌrinori horonta dino! Heeshsho kalaqinohu woꞌmanka dandaanno Magani reyitinori galagalte heeshshotenni heedhanno gede assa dandaannoti dihuluullissannote.

⁸ Maganu reyitinore kayisa dandaanno yineemmo gede assannonkehu wolu korkaati, isi baalankare qaaga dandaannoha ikkasiiti. Isi mitte mittenta beeddahe suꞌminsanni woshshanno. (Isa. 40:26) Qoleno reyitinore qaaganno. (Iyo. 14:13; Luq. 20:37, 38) Yihowa reyotenni kayisanno manniha mitto mittonka coye qaaganno; lawishshaho danansanna akatansa, heedhino heeshsho hiittootero hattono qaagganno coye dihawanno.

9. Yihowa albillitte reyitinore kayisate eino qaale ammanattohu mayiraati?

 ⁹ Yihowara hasattonna wolqa noosita anfoommo daafira isi albillitte reyitinore kayisate eino qaale wonshannota ammanneemmo. Hanni kaote hexxo ammanneemmo gede assannonkeha wole korkaatano laꞌno: Yihowa konni albaanni reyitinore kayisino. Isi hundi waro boodu manninna Yesuusi reyitinore kayissanno gede wolqa uyinonsa. Hanni xa Yohaannisi Fooliishsho 11 kulloonnita Yesuusi reyotenni kayisinohunnita mittu manchi xagge laꞌno.

10. Yesuusi Biitaaniyunni kae Yordaanoosi tayise sae sabbakanni noo yannara mayi ikkino? Isi maa assiyya? (Yohaannisi 11:1-3)

¹⁰ Yohaannisi 11:1-3 nabbawi. Hanni 32 M.D. jeefora Biitaaniyaho ikkinore hedi. Hakko qachira Yesuusira muli jaalla ikkitinori Alaazaarinna lame roduuwisi yaano Maariyaaminna Maarta heeꞌranno. (Luq. 10:38-42) Kayinni Alaazaari baasa dhiwamino; hakko daafira roduuwisi lowo geeshsha yaadino. Insa Biitaaniyunni kaꞌne Yordaanoosi tayinse lekkatenni lame barra haꞌne iillinanniwa noohu Yesuusira sokka soyi. (Yoh. 10:40) Sonkoonni sokkaanchi Yesuusiwa iilli balla kayinni Alaazaari reyino. Yesuusi jaalisi reyinota afinoha ikkirono hakkiicho lame barra keeshshino; isi hakkiinni kae Biitaaniya haꞌri. Hakko daafira Yesuusi hakkira iilli yannara Alaazaari reyinkunni shoole barra ikkino. Yesuusi jaallasi kaaꞌlannorenna Maganoho ayirrinye abbannore assa hasiꞌrino.—Yoh. 11:4, 6, 11, 17.

11. Tenne xaggenni jaaloomu daafira maa ronseemmo?

¹¹ Tenne xaggenni jaaloomu daafira ronseemmori no. Hanni tenne hedi: Maariyaaminna Maarta Yesuusira sokka sokku woyite isi Biitaaniya daanno gede dikultino. Insa muli jaalisi dhiwaminotalla kultino. (Yoh. 11:3) Alaazaari reyita Yesuusi hasiꞌroommero noowa heeꞌrenni iso reyotenni kayisa dandaanno. Ikkirono isi jaallasiwa Maariyaamiwanna Maartawa haꞌra doodhino. Atera kaaꞌlannohe gede kuꞌlittokkinni kaaꞌlanno jaali noohe? Nooheha ikkiro togoo jaali “qarru barra” iillannoheta addaxxa dandaatto. (Law. 17:17) Ninkeno Yesuusi gede wolootaho togoo jaalla ikka dandiineemmo. Hanni galagalle xaggenniwa hinge hakkiinni aane mayi ikkinoro laꞌno.

12. Yesuusi Maartara mayyee qaale einose? Ise konne qaale ammana dandiitannohu mayiraati? (Yohaannisi 11:23-26)

¹² Yohaannisi 11:23-26 nabbawi. Maarta Yesuusi Biitaaniyu qooxeessa dayinota affu. Ise rakke fulte Yesuusinni xaadde togo yitu: “Mootichaꞌya, ati kawiicho heeꞌroottoha ikkoommero rodiiꞌya direyanno.” (Yoh. 11:21) Addanko isi Alaazaari hursa dandaanno. Ikkollana Yesuusi hakkiinni sainoha mitto dhagge ikkanno coye assara hedino. Isi “Rodiikki reyotenni kaꞌꞌanno” yee qaale eino. Qoleno isi Maarta konne qaale ammantanno gede assannoseha wole korkaata kulanni “Kaonna heeshsho aneeti” yiino. Addanko Yihowa Yesuusira reyitinore kayisate wolqa uyinosi. Yesuusi  hakkuyira albaanni reyite shiima saate keeshshitino beetto kayisino; qoleno mitto wedellichano reyotenni kayisino; iso kayisinohuno reyi barranni ikkara dandaanno. (Luq. 7:11-15; 8:49-55) Kayinni isi reye shoole barra keeshshinohanna bisisi shola hanafino mancho reyotenni kayisa dandaanno?

13. Yohaannisi 11:32-35 kultannonte gede Yesuusi Maariyaaminna wolu manni wiꞌlanna lae hiitto ikkino? (Misileno lai.)

¹³ Yohaannisi 11:32-35 nabbawi. Hanni hakkiinni aane ikkinore hedi. Alaazaariti wole rodoo Maariyaami Yesuusinni xaadate fultu. Iseno “Mootichaꞌya, ati kawiicho heeꞌroottoha ikkoommero rodiiꞌya direyanno” yitu. Isenna ledose noo manni lowo geeshsha xissiisiꞌrino. Insa wiꞌlitanna laitinna macciishshiti Yesuusi lowo geeshsha dadillino. Jaallasi lowo geeshsha mararino daafira isino wiꞌlino. Isi banxanni manna shiiꞌra mageeshsha xissiissannoro huwatino. Yesuusi insa wiꞌlitanno gede assannore hoolate quqquxaminoti dihuluullissannote!

14. Yesuusi Maariyaami wiꞌlitanna lae ikkinoti Yihowa daafira maa rosiissannonke?

¹⁴ Yesuusi Maariyaami wiꞌlitanna lae ikkinoti Yihowa lowo geeshsha shaqqado Magano ikkinota anfeemmo gede assitannonke. Hatto yineemmohu mayiraati? Sai birxichira ronsummonte gede Yesuusi annisi akata guutu garinni leellishino. (Yoh. 12:45) Hakko daafira Yesuusi xissiisidhino jaallasi lae marare wiꞌlinota kultanno xagge nabbambeemmo woyite, Yihowano xissiisiꞌne wiꞌlineemmo woyite lowo geeshsha mararannonketa huwata dandiineemmo. (Far. 56:8) Tini shaqqadu Maganinkewa shiqatto gede diassitannohe?

15. Yohaannisi 11:41-44 kultanno garinni Alaazaari waammawa ikkinori maati? (Misileno lai.)

¹⁵ Yohaannisi 11:41-44 nabbawi. Yesuusi Alaazaari madaarroonniwa mare waammate afiira tuꞌnoonni kincho hoollanni gede kuli. Maarta reeshshu ‘xa bowannowe’ yite kultu. Hakkiinni Yesuusi, “Ammanittaha ikkiro Maganu ayirrinye laꞌꞌatta diyoommohe?” yii. (Yoh. 11:39, 40) Yesuusi hakkiinni iima hige laꞌꞌanni mannu albaanni huucciꞌri. Isi hakkiinni aane ikkannorira baalaho ayirrinye  Maganoho uyinara hasiꞌrino. Hakkiinni isi “Alaazaari amo fuli!” yee woshshi. Alaazaarino waammate giddonni fule dayi! Yesuusi mitu manni ikkara didandaannoreeti yee hedino coye assino.

16. Yohaannisi fooliishsho 11te noo xagge kaote hexxora noonke ammana kaajjishshannohu hiittoonniiti?

¹⁶ Yohaannisi fooliishsho 11te noo xagge kaote hexxora noonke ammana kaajjishshanno. Hiittoonni? Yesuusi Maartara “Rodiikki reyotenni kaꞌꞌanno” yiinota qaagi. (Yoh. 11:23) Annisinte gede Yesuusira konne qaale wonshate hasattonna wolqa noosi. Isi wiꞌlasi reyonna reyo abbitanno xisso addinta hoolate quqquxamannota leellishshanno. Alaazaari waammate giddonni fuli yannarano Yesuusi xaano reyitinore kayisate wolqa noosita leellishino. Qoleno Yesuusi Maartara mayyee qaagiissinosero hedi; Isi “Ammanittaha ikkiro Maganu ayirrinye laꞌꞌatta diyoommohe” yiinose. (Yoh. 11:40) Maganu reyitinore kayisannota kule eino qaali woꞌmanno yine ammanneemmo gede assannonkehu ikkadu korkaati noonke. Ikkina tini hexxo roore xabbe leeltannonke gede assiꞌrate maa assa dandiineemmo?

17. Qullaawu Maxaafi giddo kulloonnita kaote xagge nabbambeemmo woyite maa heda hasiissannonke?

¹⁷ Alba reyotenni kaino manni daafira kultanno xagge nabbawi hattono hiinci. Qullaawu Maxaafi reyotenni kae galagale uullate aana heeꞌrinohu settu manni xagge kulanno. c Mitte mittenta xagge seekkite xiinxalli. Tenne xagge xiinxallatto woyite kuni reyotenni kaino labballi, meentinna qaaqquulli addinta heeꞌrino manna ikkinota qaagi. Tenne xaggenni rosatto roso wodanchi. Mitte mittenti xagge Maganoho reyitinore kayisate hasattonna wolqa noosita leellishshanno gara hedi. Baalunkunni roore lowo geeshsha hasiissannota Yesuusi kao hiinci. Yesuusi reyotenni kainota lowo  xibbe ikkanno manni lainotanna tini ammanankera kaajja xinta ikkitinota qaagi.—1 Qor. 15:3-6, 20-22.

18. Kaote hexxo daafira kultanno faarsuwa dancha gede horoonsiꞌra dandiineemmohu hiittoonniiti? (Lekkaalliidi qaagiishshano lai.)

¹⁸ Kaote hexxo daafira kultanno faarso dancha gede horoonsiꞌri. d (Efe. 5:19) Kuri faarsuwa kaote hexxo roore xabbe leeltannonke gedenna tenne hexxora noonke ammana kaajjitanno gede assitanno. Kuri faarso macciishshe, rosiisidhe hattono maatete magansiꞌraꞌne yannara faarsote kiiro woy giximi tiro hasaabbe. Faarsote giximi surreꞌneranna wodaniꞌnera qaꞌmiꞌranno gede assidhe. Hakkiinni reyineemmo yitine waajjitinanni gede assannoꞌneri iillannoꞌne woyite woy shiidhinanni woyite Yihowa ayyaani kuri faarsuwa qaagginanni gede kaaꞌlannoꞌne; hattono tini faarso jawaantenna shesho afidhinanni gede assitannoꞌne.

19. Kaote daafira maa heda dandiineemmo? (“ Insa Mayite Xaꞌmatto?” yitanno saaxine lai.)

¹⁹ Hedate dandooꞌne horoonsidhe. Yihowa hedate dandoo oye kalaqinonke daafira, haaro alamera heeꞌnoommohu gede assine heda dandiineemmo. Mitte rodoo togo yitino: “Haaro alamera daraaro daraartanna suꞌniissanni noommahu gede asse hedanni lowo yanna keeshsheemma.” Xaadattoha hundi waro heeꞌrinoha ammanamino meentonna labballo hedi. Ayeoonni xaadate quqquxamatto? Insa hiikkuri xaꞌmuwa xaꞌmatto? Qoleno xaadattoha shiiꞌrootto manna hedi. Insanni umo xaadatto woyite coyiꞌrattore, hanqaffe rimmi assatto garanna hagiirrunni wiꞌlatto gara hedi.

20. Maa assate murciꞌra hasiissannonke?

²⁰ Kaote hexxo uyinonke daafira Yihowa lowo geeshsha galanteemmosi! Yihowara eino qaale wonshate hasattonna wolqa noosi daafira eino qaale wonshannota addaxxa dandiineemmo. Tenne muxxe hexxora noonke ammana woꞌmanka woyite kaajjitanno gede assiꞌrate murciꞌno. Hatto assineemmoha ikkiro, shiiꞌnoommo manni kaꞌꞌannota kule hexxo uyinonke Maganiwa albinni roore shiqa dandiineemmo.