1-2. Haaro alame agadhine heeꞌnoommote tenne yannara maa assa hasiissannonke?

 YIHOWA tenne busha alame hune keeraanchimma woꞌmitinota haaro alame abbannota kule qaale einonke daafira galaxxineemmosi. (2 Phe. 3:13) Haaro alame daggannohu mamooteetiro anfoommokkiha ikkirono, agadhinanni lowo yanna keeshshineemmokkita leellishshanno taje laꞌnanni heeꞌnoommo.—Mat. 24:32-34, 36; Soq. 1:7.

² Hakka geeshsha kayinni halaalu mine keeshshinoommo diri ikki geeshshihano ikkiro, ninke baalunku tenne hexxora noonke ammana kaajjishiꞌra hasiissannonke. Mayira? Korkaatuno kaajjado ammana nafa shoshshoggitara dandiitanno. Isinni soqqamaasinchu Phaawuloosi ammana hooga, “aananke qaꞌmanno cubbo” yiino. (Ibi. 12:1) Ammananke shoshshoggitannokki gede assiꞌrate, haaro alame daate mule noota leellishshanno taje woꞌmanka woyite seekkine xiinxalla hasiissannonke.—Ibi. 11:1.

3. Konni birxichira maa ronseemmo?

³ Konni birxichira Yihowa haaro alame abbara eino qaalira noonke ammana kaajjishiꞌra dandiineemmota sase doogo laꞌneemmo. Insano: (1) wodote daafira hiincate, (2)Yihowa wolqa daafira seekkine hedate hattono (3) woꞌmanka woyite ayyaanaamittete coye assate. Hakkiinni, Yihowa Imbaaqoomira kulinori xaa yannara ammananke kaajjishannohu hiittoonniitiro laꞌneemmo. Kayinni hanni balanxe, haaro alame daggannota kultanno hexxora noonke ammana kaajjishiꞌranke iillannonkeha mito coye dandiine saꞌneemmo gede kaaꞌlitannonkehu hiittoonniitiro laꞌno.

 KAAJJADO AMMANA HASIISSANNONKE GEDE ASSANNOHA MITO COYE

4. Kaajjado ammana hasiissannonke gede assannohu hiittoo doorshaati?

⁴ Barru baala doodhineemmo doorshira kaajjado ammana hasiissannonke. Lawishshaho, hiittoo jaalla doodhineemmoro, hiittoo boohaarsha boohaarreemmoro, hiittoo roso ronseemmoro galte doodhate daafira, ooso ilate woy ila hoogate daafiranna loonseemmo looso doodhate daafira kaajjado ammana hasiissannonke. Ninkeneeto togo yine xaꞌma hasiissannonke: ‘Doodheemmo doorshi muli yannara tini alame baꞌeenna Maganu abbannoti haaro alame daggannota ammaneemmota leellishannohonso hegerera heeꞌra didandiinanni yee hedanno manni doodhannohu gedeeho?’ (Mat. 6:19, 20; Luq. 12:16-21) Haaro alame gambissinota albinni roore ammannummoro kaajja doorsha doodhineemmo.

5-6. Qarru yannara kaajjado ammana hasiissannonkehu mayiraati? Lawishsha kuli.

⁵ Qoleno kaajjado ammana hasiissannonke gede assanno fonqoli tuncu yaannonke. Lawishshaho dartu iillankera, buuto dhiwankera, woy hexxo mudhineemmo gede assannohu wolu qarri iillankera dandaanno. Umi qara, iillinonke qarra dandiine saꞌneemmo yine hendeemmoha ikkara dandaanno. Ikkollana kuni qarri hendoommo yannanni roore keeshshanno woyite cincine heeꞌratenna Yihowara hagiirrunni soqqammanni heeꞌrate kaajjado ammana hasiissannonke.—Rom. 12:12; 1 Phe. 1:6, 7.

⁶ Qarru giddo heeꞌnoommo yannara Yihowa abbannoti haaro alame horo didagganno yine hendeemmoha ikkara dandaanno. Hatto ikkiro ammananke shoshshogitino yaateni? Hatto yaa diꞌꞌikkino. Hanni mitto lawishsha laꞌno. Hawado qiidu lowo geeshsha qarrise noo yannara arru horo difulanno yine hendeemmoha ikkara dandaanno. Kayinni arru fulasi digattanno. Hatteente gede lowo geeshsha hexxo mudhineemmo woyite haaro alame horonta didagganno yine hendeemmoha ikkara dandaanno. Ammananke kaajjado ikkituro kayinni, Maganu eino qaale wonshannota dihuluullammeemmo. (Far. 94:3, 14, 15; Ibi. 6:17-19) Tini heeshshonke giddo woꞌmanka woyite Yihowa magansiꞌra balaxisiinseemmo gede assitannonke.

7. Mayine hendeemmokki gede qoropha hasiissannonke?

⁷ Sabbakate looso loosateno kaajjado ammana hasiissannonke. Sabbankeemmo woyite xaandeemmohu batinyu manni Maganu abbannote haaro alame daafira kulannohu “danchu duduwi” kapho ikkinohu gede asse hedanno. (Mat. 24:14; Hiz. 33:32) Ninkeno insa gede huluullammeemmore ikkineemmokki gede qoropha hasiissannonke. Togoo coyi iillannonkekki gede woꞌmanka woyite ammananke kaajjishiꞌra hasiissannonke. Hanni tenne assa dandiineemmota sase doogga laꞌno.

WODOTE DAAFIRA HIINCE

8-9. Wodote daafira hiinca ammananke kaajjishshannohu hiittoonniiti?

⁸ Ammananke kaajjishiꞌneemmoti umi doogo wodote daafira hiincate. Wodo Yihowa eino qaale wonshannota buuxissanno tajeeti. Wodo qixxeessinoonnihu mayiraatironna Yihowa wodo qixxeessate maa assinoro seekkine hendummoro, Maganu haaro alamera gawalo nookki heeshsho aankera eino qaale wonshannota albinni roore ammanneemmo. Hatto yineemmohu mayiraati?

⁹ Yihowa wodo qixxeessate maa assino? Yihowa baxannoha mitto Beettosinna muli jaalasi iiminni uullara soye guuta mancho ikke ilamanno gede assino. Yesuusi uullate aana noo yannara baalanka qarra dandee saino. Hakkiinni isi buuto qarrame reyino. Addanko Yihowa lowo waaga baatino! Baxillaanchu  Maganinke shiima yanna calla dancha heeshsho heeꞌnammora yee Beettisi qarramannonna reyanno gede horo diassanno. (Yoh. 3:16; 1 Phe. 1:18, 19) Yihowa muxxe Beettosi uyinonke daafira haaro alamera hegerera heeꞌneemmo gede assannonketa dihuluullammeemmo.

YIHOWA WOLQA DAAFIRA SEEKKITINE HEDDE

10. Efesooni Sokka 3:20 kultanno garinni Yihowa maa assa dandaanno?

¹⁰ Ammananke kaajjishiꞌneemmoti layinki doogo Yihowa wolqa daafira seekkine hedate. Yihowara eino qaale baala wonshate wolqa noosi. Hige, haaro alamera gawalo nookki heeshsho heeꞌneemmota kultanno hexxo batinyu mannira ikkannokkire labbansara dandiitanno. Ikkirono Yihowa duucha woyite qaale eannohu mannu ooso horo assa dandiitannokkire assateeti. Isi tenne assannohu Woꞌmanka Dandaanno Magano ikkino daafiraati. (Iyo. 42:2; Maq. 10:27) Hakko daafira isi ikkannokkiha lawanno coye assiro tenne dhagge assiꞌra dihasiissannonke.—Efesooni Sokka 3:20 nabbawi.

11. Maganu einote dhagge ikkitanno hexxo giddonni mitte kuli. (“ Woꞌmitinota Mite Dhagge Ikkitanno Hexxo” yitanno saaxine lai.)

¹¹ Hanni Yihowa hunda mannisira qaale einoha mito ikkannokkiha lawanno coye laꞌno. Isi Abirihaamiranna Saarara geedhimmansa yannara qaaqqo iltannota kulinonsa. (Kal. 17:15-17) Qoleno Abirihaamira sirchisi Kanaꞌꞌaani gobba ragiꞌrannota kulinosi. Hakkawaro lowo diri gedensaanni, Abirihaami sircho ikkitinori Israeele Gibitsete borojjoota ikkite noo yannara tini hexxo woꞌmitannota horo dilabbanno. Kayinni woꞌmitino. Gedensoonni Yihowa geedhitinoti Elsaabeexi qaaqqo iltannota kulino. Qoleno seemo Maariyaami isi Beetto iltannota kulino; tini lowo diri albaanni Yihowa Edeni gannatete einohu wolu qaalino woꞌmanno gede assitanno!—Kal. 3:15.

12. Iyyaasu 23:14 nna Isayaasi 55:10, 11 Yihowa wolqa daafira maa buuxissannonke?

¹² Yihowa konni albaanni eino qaalenna konne qaale wonshino gara hiincanke, isi haaro alame abbate eino qaaleno wonshate wolqa noosita albinni roore ammanneemmo gede assitannonke. (Iyyaasu 23:14; Isayaasi 55:10, 11 nabbawi.) Tini Yihowa abbeemmo yee qaale einoti haaro alame haaqeete halcho ikkitinokkita wolootaho kulate albinni roore qixxaambeemmo gede kaaꞌlitannonke. Yihowa umisi haaru gordinna haaro baatto daafira coyiꞌranni, “Kuni qaali hawaqiꞌnannihonna halaaleho” yiino.—Aju. 21:1, 5.

WOꞌMANKA WOYITE AYYAANAAMITTETE COYE ASSE

13. Songote gambooshshi ammananke kaajjishannohu hiittoonniiti? Xawisi.

¹³ Ammananke kaajjishiꞌra dandiineemmoti sayikki doogo ayyaanaamittete coye assate yanna gaaꞌmate. Lawishshaho hanni songote gambooshshi kaaꞌlannonke gara hedi. Lowo diro addi addita woꞌma yanna soqqansho soqqantinoti Ana yinanni rodoo togo yitino: “Gambooshshu ammanaꞌya kaajjado ikkite heedhanno gede kaaꞌlinoe. Kifile shiqishanno rodiira gariti rosiisate dandoo hooggusirono woy haarore kula hoogirono, duucha woyite Qullaawu Maxaafi halaale albinni roore huwateemma gede assannoere macciishsheemma; tini qolte ammanaꞌya kaajjishiꞌrate kaaꞌlitinoe.” b Gambooshshunniwa roduuwinke qoltanno dawarono ammananke kaajjishshannoti dihuluullissannote.—Rom. 1:11, 12; 10:17.

14. Soqqansho ammananke kaajjishshannohu ma garinniiti?

 ¹⁴ Soqqansho fulano ammananke kaajjishshanno. (Ibi. 10:23) Yihowara soqqantanna 70 diro sainoseti Barbara yinanni rodoo togo yitino: “Sabbakate loosi woꞌmanka woyite ammana kaajjishannota huwatoomma. Yihowa uyinonketa dhagge ikkitanno hexxo mannaho kulumma kiiro ammanaꞌyano albinni roore kaajjitanno.”

15. Hojju xiinxallo ammananke kaajjishshannohu hiittoonniiti? (Misileno lai.)

¹⁵ Ammananke kaajjishannohu wolu coyi hojju xiinxallooti. Suusaani yinanni rodoo xiinxallate pirogiraame fushshiꞌra kaaꞌlitannota huwattino. Ise togo yitino: “Sambatu barra aantannota Agarooshshu Shae qixxaaweemma. Sanyonna Maakisanyo Kiristaanu Heeshshonna Soqqansho Gambooshshira qixxaaweemma. Gatino barra kayinni hojju xiinxallo assiꞌrate horoonsiꞌreemma.” Suusaani ganyite pirogiraamese garinni xiinxallitanno daafira ammanase kaajjitino. Lowo diro qara biirora soqqantinoti Ireene yinanni rodoo Qullaawu Maxaafi masaalo xiinxalla ammana kaajjishshannota huwattino. Ise togo yitino: “Yihowa coyiꞌrinoti mitte mittenti masaalo woꞌmitino gari dhagge ikkannoho.” c

“KUNI BARRI DAYIKKINNI DIGATANNO”

16. Yihowa Imbaaqoomira coyiꞌrinori xaa yannara ninke kaaꞌlannonke yineemmohu mayiraati? (Ibiraawoota 10:36, 37)

¹⁶ Mite Yihowa soqqamaano tini busha alame baꞌanno yanna lowo diro agadhitanni keeshshitino. Mannu hedora, Maganu eino qaali woꞌmikki keeshshinoha lawara dandaanno. Yihowa soqqamaanosirano hatto macciishshamansara dandaannota afino daafira masaalaanchu Imbaaqoomira togo yiinosi: “Himanu woꞌmanno yanna diꞌꞌiillitino. Ikkirono himanu woꞌmanno yanna rakke dagganno; kuni coyino  kapho ikke digatanno. Keeshshannoha ikkiro nafa keeshshino gedeenni digatanno. Halaalintanni kuni barri dayikkinni digatannona cincite agari.” (Imb. 2:3) Maganu tenne coyiꞌrinohu Imbaaqoomira calla buuxisateentinso tini xaa yannara ninkeno kaaꞌlitannonke? Soqqamaasinchu Phaawuloosi qullaawu ayyaani massageennasi haaro alame dagganno yanna agadhe noo Kiristaanirano tenne hedo kulino. (Ibiraawoota 10:36, 37 nabbawi.) Addanko gatonke gambissinokkiha lawinkero nafa, ‘kuni barri dayikkinni keeshshino gedeenni digatanno.’

17. Mitte rodoo Yihowa Imbaaqoomira uyino amaale harunsitinohu hiittoonniiti?

¹⁷ Batinye Yihowa soqqamaano Yihowa “cincite agari” yiino garinni, agadhite keeshshitino. Lawishshaho Luwisi yinanni rodoo Yihowara soqqama hanaffinohu 1939nniiti. Ise togo yitino: “Hatte yannara Armagedooni layinki dirimi roso gudummakkinni daannoha lawinoe. Kayinni didayino. Lowo diro nabbawoommati Yihowa eino qaale wonsha geeshsha cince agadhino manni daafira kultannoti Qullaawu Maxaafi xagge anino cince agadheemma gede kaaꞌlitinoe; lawishshaho Nohi, Abirihaami, Yooseefinna wolu ammanamino manni xagge nabbawoomma. Anino ikko wolootu Yihowa eino qaale wonsha geeshsha cincine agadhanke haaro alame gambissinota ammanneemmo gede assitinonke.” Yihowara lowo diro soqqaminohu wolu batinyu mannino tenne hedora sumuu yaanno!

18. Kalaqama laꞌꞌa haaro alame daggannota albinni roore ammanneemmo gede assitannonkehu hiittoonniiti?

¹⁸ Hige haaro alame xaano didaggino. Ikkirono hanni xa nooha mito coye lawishshaho, beeddahe, haqqe, saadanna manna hendo. Kuri coyibba nookki yanna nooha ikkirono, xa kayinni noota huluullamanno manchi dino. Kuri coyibba heedhinohu Yihowa kalaqino daafira callaati. (Kal. 1:1, 26, 27) Maganinke haaro alame abbateno qaale eino. Isi konne qaale wonshanno. Haaro alamera mannu ooso hegerera guuta ordu fayyimma afidhe hagiidhitanno. Xa kalqete alame noota huluullammeemmokkinte gede Maganu hirqino yannara haaro alame abbannotano dihuluullammeemmo.—Isa. 65:17; Aju. 21:3, 4.

19. Ammanakki kaajjishiꞌra dandaattohu hiittoonniiti?

¹⁹ Hakka geeshsha ammananke kaajjishiꞌrate afiꞌnummo faro baala horoonsiꞌno. Woꞌmanka woyite wodote kakkalora galatu nooꞌneta leellishshe. Yihowa wolqa daafira seekkitine hedde. Woꞌmanka woyite ayyaanaamittete coye asse. Hatto assitiniro kiꞌneno, “ammaꞌnatenninna cincatenni kaajjite Maganu hedinonsa coye [ragidhannori]” wido ikka dandiitinanni.—Ibi. 6:11, 12; Rom. 5:5.