1. Hagiidhineemmo gede assannonkeri maati?

 YIHOWA manni kiiro lexxitanni noota macciishsha lowo geeshsha hagiirsiissanno! Niro 10,000,000 saꞌꞌanno manna Qullaawa Maxaafa xiinxallinsoommo. Tini, Maganu soqqamaasine xawaabbansa xawissanni noota leellishshanno! Hattono lowo miliyoone ikkannohu hasatto noonsa manni Qaagooshshu Ayyaana dayino. Insa Maganu baxillunni qixxeessinote wodote kakkalo daafira rossino.—1 Yoh. 4:9.

2, 3. (a) Xawaabbinke xawannota hoola dandaannokkiri maati? (b) Konni birxichira maa ronseemmo?

² Alamete doyichora noohu Yihowa manni babbaxxino afoo coyiꞌranno. Ikkollana kuni Annanke Yihowa mittimmatenni guwisiꞌneemmokki gede diassino. (Aju. 7:9) Coyiꞌneemmo afii woy heeꞌnoommo bayichi ikkihano ikkiro, ‘gobba baalate aana beeddahimma xawa’ dandiineemmo.—Fil. 2:15.

³ Soqqanshonke, mittimmankenna baqqi yine agadhate sharramanke Yihowa ayirranno gede assitanno. Konni birxichira tenne daafira xiinxallineemmo.—Maatewoosi 5:14-16 nabbawi.

4, 5. (a) Xawaabbanke xawisate sabbakano agurranna wolere maa assa dandiineemmo? (b) Danchu akatinke mayi guma abbanno? (Hanafote noo misile lai.)

⁴ Ella 1, 1925te Agarooshshu Shaera “Tunsichoho Xawino Xawaabba” yaanno birxichira togo yitanno hedo no: “Konni goofimarchu barri giddo mittu manchi xawaabba xawisa hoogiro Mootichaho ammaname heeꞌra didandaanno. Uullate aana heeꞌranno mannira dancha duduwo kullenna loonseemmo loosi ledo sumuu yaanno garinni heeꞌne xawaabbanke xawisa dandiineemmo.” Ee, xawaabbanke xawisa dandiineemmo doogga giddo mitte dancha duduwo duduwatenna manna rosaano assate. (Mat. 28:19, 20) Qoleno dancha akattanke Yihowa ayirranno gede assitanno. Dancha duduwo kulleemmonsa mannino ikko wolootu akattanke laꞌanno. Manna hasaawinseemmo woyite faasinqe keere haaꞌneemmoha ikkiro farciꞌneemmonsa manni ninkerano ikko magansiꞌneemmo Maganinkera dancha lao heedhannonsa.

⁵ Yesuusi rosaanosi “Manni minira eꞌinanni woyite, ‘Keeru ledoꞌne heeꞌro’ yiiyye” yiino. (Mat. 10:12) Yesuusinna soqqamaasinesi sabbakkino qooxeessira mannu mininsara marino manna afa hoogirono minira eꞌe yaa rosamino coyeeti. Yannankere kayinni duucha basera togoo budi baino. Ikkirono, marroommohu mayiraatiro baxillunninna danchu garinni kulummonsaro hanqinsa qiidara dandaanno. Togoo yannara faasiinqe hasaawisa lowo geeshsha danchate. Gudumaaleho borro worranni gaare horoonsiꞌre farciꞌranno roduuwino hatto assanno. Manna faasinqe keere haaꞌneemmoha ikkiro, mannu gaarenniwa daye borronke adhara dandaanno. Hattono danchumma leellishanke hasaawa hanafanno gede assitara dandiitanno.

6. Mittu geedhino minaanninna minaama albinni roore soqqamate maa assino?

⁶ Ingilaandete heeꞌrannori geedhino minaanninna minaama dhiwannonsa daafira minunni mine haꞌre soqqama didandaanno. Ikkollana insa nafaransa ofolle sabbakanni xawaabbansa xawisate murciꞌrino. Insa heeꞌranno qooxeessira rosu mini noo daafira, annuwunna amuuwu oosonsa adhara daanno woyite mite Qullaawu Maxaafi aana xintantino borro kursete aana wore agaranno. Duuchu manni borro laꞌꞌanno woyite lede afa hasiꞌranno daafira Wedellu Xaꞌmanno Xaꞌmonna Mala Ikkitanno Dawaro Xiraaze 1 nna 2 hattono birosherubba adhanno. Shiima yanna gedensaanni songonsa giddonni mitte suwisaancho rodoo insa ledo soqqama hanaffino. Mittu manchi tini rodoo leellishshannoha danchu akata hattono minaanninna minaama manna kaaꞌlate sharramanno gara lae Qullaawa Maxaafa xiinxalla hanafino.

7. Wole gobbanni dayino manna kaaꞌlate maa assa dandaatto?

⁷ Muli diri kawa, duucha gobbara heeꞌranno manni gobbansanni darame wole gobba haꞌranno. Togoo manni Yihowanna fajjosi afanno gede kaaꞌlate maa assa dandiineemmo? Togo assate, insa afiinni keere haaꞌnanni gara rosate mayira diwoꞌnaalatto? Hattono JW Laanguweeji yinanni appilikeeshiine lowo geeshsha kaaꞌlitanno. Qoleno hasattonsa lexxitanno gede assannore coyiꞌnanni garano rosa dandaatto. Insa afiinni jw.org webisayitenke nooha ikkiro viidiyubbanna borro afidhanno gara leellisha dandaatto.—Mar. 10:19.

8, 9. (a) Kiristaanu Heeshshonna Soqqansho Gambooshshinni mayi qajeelsha afiꞌneemmo? (b) Annuwunna amuuwu oosonsa gambooshshunniwa dawaro qoltanno gara rosiisa dandiitannohu hiittoonniiti?

⁸ Yihowa soqqanshonkenni dancha guma afiꞌneemmo gede Kiristaanu Heeshshonna Soqqansho Gambooshshe qixxeessinonke. Konni gambooshshinni afiꞌneemmo qajeelshi waajjinummokkinni manna galagalle marre  hasaawinseemmo gedenna Qullaawa Maxaafa xiinxallinseemmo gede kaaꞌlinonke.

⁹ Haarote gambooshshe daanno manni shiimmaaddu qaaqquulli dawaro qoltanna laꞌꞌanno woyite dhaggeessiꞌranno. Annuwanna amuuwa, oosoꞌne dawaro uminsa yaattonni qoltanno gede rosiisse, hatto assitiniro insano xawaabba xawissanno gede kaaꞌla dandiitinanni. Mitu manni qaaqquullu danchu garinni dawaro qoltanna macciishshe halaalunniwa dayino.—1 Qor. 14:25.

10. Maatete magansiꞌra mittimma kaajjitanno gede assitannohu hiittoonniiti?

¹⁰ Maatenkenna songote giddo noo mittimma kaajjitanno gede assiꞌratennino xawaabbanke xawisa dandiineemmo. Togo assate annuwunna amuuwu ganyite Maatete Magansiꞌra pirogiraame heedhannonsa gede assiꞌra hasiissannonsa. Duucha maate, maatete magansiꞌra assidhanno woyite JW Birodikaaste laꞌanno. Tenne viidiyo laꞌinihu gedensaanni hakko kulloonni hedo loosunni leellisha dandiitinanni gara mayira dihasaabbinanni? Annuwunna amuuwu maatete magansiꞌra assidhanno woyite, mittu shiimu qaaqqira hasiisannosi biddishshinna wedellichaho hasiisannosi biddishshi babbaxxinoha ikkinota wodancha hasiissannonsa. Konni daafira maatete xiinxallonni duuchunku maatete miili horo afiꞌranno gede kaaꞌlitanno hedo hasaabbe.—Far. 148:12, 13.

11-13. Songote giddo noo mittimma kaajjitanno gedenna wolootu xawaabba xawissanno gede kaaꞌla dandiineemmohu hiittoonniiti?

¹¹ Wedellu songote giddo mittimma kaajjitanno gedenna wolootu xawaabbansa xawissanno gede kaaꞌla dandiitannohu hiittoonniiti? Ati wedellicha Kiristaanchootiro geedhino roduuwa kaaꞌlate mayira mixo difushshiꞌratto? Halaalu mine keeshshitino yanna giddo afidhino woꞌnaalsha ayirrinyunni xaꞌma dandaatto. Togo assa jawaachishshannohe, hattono atino geedhino roduuwino halaalu xawaabba xawisate bashshonni roore murcidhinanni gede assitanno. Qoleno ninke baalunku Gambooshshu Addaraashe daanno manna baala faasiinqe keere haaꞌrate sharrama dandiineemmo. Togo assa mittimmanke kaajjitanno gedenna haarote dayino manni halaalu xawaabba ledonke xawisate jawaante afiꞌranno gede assitara dandiitanno. Haarote daanno manna faasinqe keere haaꞌra, hattono ofoltanno base leellisha dandiineemmo. Qoleno haarote daanno manni roduuwu ledo egennamanno gede assa boorrasannokki gede assitanno.

¹² Qanchu soqqansho gambooshshe massagatto gede worrihero geerra kaaꞌlate lowore assa dandaatto. Geerraho injaannohu soqqanshote qoqqowi hiikkonneetiro buuxi.  Mito woyite, fayyimmate woy wolu qarri noonsa roduuwa wedellu roduuwi ledo soqqantanno gede assa dandaatto. Hattono togoo roduuwira hedattota leellisha hasiissannohe. Ee, wodanchattohanna mannaho hedattoha ikkakki wedelluno, geerruno, halaalu mine keeshshitinorino, hattono mule halaalu minira dagginori dancha duduwo diinaggaabbe dudubbanno gede kaaꞌlitannonsa.—Lew. 19:32.

¹³ Faarsaasinchu “Maganu manni rodiimmate baxillinni sumuu yee mitteenni heeꞌriro lowo geeshsha danchahonna hagiirsiisannoho” yee faarsino. (Faarso 133:1, 2 nabbawi.) Isiraeelete manni Yihowa magansiꞌrate mitteenni gamba yaansa woloota lowo geeshsha jawaachishshino. Tini mittimma danchanna jawaachishshanno zayite gedeete. Kiꞌneno dancha akata leellishatenni roduuwinke mereero noo mittimma kaajjitanno gede assa dandiitinanni. Togo assate sharrantinanni heedhinoonni daafira galanteemmoꞌne. ‘Wodanaꞌne halashshitine’ togoo akata bashshonni roore leellisha dandiitinanniha lawannoꞌne?—2 Qor. 6:11-13.

14. Heeꞌratto qachira halaalu xawaabba xawisate maa assa dandaatto?

¹⁴ Heeꞌratto qachira Qullaawu Maxaafi halaale albinni roore xawisa dandaattohu hiittoonniiti? Coyiꞌratto garinna assootikki qooxeessikkira heeꞌranno manni halaale adhanno gede assara dandaanno. Ateneeto togo yite xaꞌmi: ‘Qooxeessinkera noo manni ane daafira mayyaanno? Qachiꞌyara heeꞌranno manni qaeꞌya laꞌꞌanno woyite biiffinote? Woloota kaaꞌlate hasatto nooe?’ Ayyaanaamittete roduuwikki ledo hasaawatto woyite, mannaho heddannore ikkansanna danchu akatinsa fiixansa, qachinsa manna, ledonsa loossannore woy ledonsa rossannore kaaꞌlino gara wodanchate mayira diwoꞌnaalatto? Togo assittoro dancha woꞌnaalsha macciishsha dandaatto.—Efe. 5:9.

15. Baqqi yine agadha hasiissannonkehu mayiraati?

¹⁵ Heeꞌnoommohu goofimarchu barri giddo ikkinota afanke, xawaabbanke bashshonni roore xawisate sharrammeemmo gede assitannonke. Yesuusi rosaanosi “feeffattine agadhe” yee marro marro hige kulinonsa. (Mat. 24:42; 25:13; 26:41) Bayiru qarri keeshshannohanna ninke yannara hanafannokkihu gede assine hendeemmoha ikkiro jawaante sabbakate hedonke baꞌara dandiitanno. (Mat. 24:21) Togoo hedo noonkeha ikkiro caabbichinke ajanni haꞌraranna horontanni baꞌꞌara dandaanno.

16, 17. Baqqi yine heeꞌrate maa assa dandiineemmo?

¹⁶ Tenne qarrissanno yannara baalunku baqqi yine agadha hasiissannonke. Yihowa murino yannara fajjosi wonshannota horo dihuluullammeemmo. (Mat. 24:42-44) Hakka geeshsha, cincine baqqi yine agadhineemmo. Maganu Qaale barru baala nabbawa, hattono jawaante huucciꞌra hasiissannonke. (1 Phe. 4:7) Duuchanka woyite baqqi yite agadhitinori hattono agurtukkinni xawaabbansa xawisse hagiirre afidhino roduuwiwiinni rosa dandiineemmo. Togoo roduuwi woꞌnaalshi giddo mitto afate, Dotteessa 2012nnite Agarooshshu Shaera qoola 18-21 (Amaaru Afoo) nooha “Lamalawo Diro Woꞌma Yihudichu Uddano Cuꞌmire Heeꞌroommo” yaanno birxicho nabbawa dandaatto.

¹⁷ Yihowa loosi batiꞌrinoꞌnere ikke, wolootaho danchare asse, hattono ayyaanaamittete roduuwiꞌne ledo dancha aante heedhoꞌne. Togo assa hagiidhitinanni gedenna yanna affinikkinni gooffanno gede assitanno. (Efe. 5:16) Yihowa soqqamaano saihu xibbu diri giddo diinaggaabbe lowo looso loossino. Yannankerano Maganunnihu qullaawu ayyaaninni bashshonni roore lowo looso loonsanni heeꞌnoommo. Xawaabbinke dhaggeessiꞌnanni garinni xawanni no.

18, 19. Songote cimeeyye Yihowara diinaggaambe soqqammeemmo gede kaaꞌlitannonkehu hiittoonniiti? Lawishsha kuli.

 ¹⁸ Guuntete xeꞌne noonkere ikkanke Yihowa hagiirsiisanno garinni soqqammeemmokki gede diassitanno; tenne afanke ammananke kaajjishshanno. Yihowa muxxe ikkitinore songote cimeeyye “elto” asse uyinonke daafira galaxxineemmosi. (Efesooni Sokka 4:8, 11, 12 nabbawi.) Konni daafira songote cimeeyye towaattannoꞌne woyite hayyotenni amaaltannoꞌne amaalenni rosate woꞌnaale.

¹⁹ Mittu Ingilaandete heeꞌranno minaanninna minaama galtensa mereero qarru kalaqamino daafira lame cimeeyye amaaꞌlino. Minaamara minaannise ayyaanaamittetenni maate massaganni nookkiha lawinose. Minaanni kayinni dancha gede rosiisa dandeemmokki daafira, maatete magansiꞌra ganyine assiꞌra didandiinoommo yiino. Cimeeyye kuri minaanninna minaama Yesuusi lawishsha seekkite heddanno gede kultinonsa. Yesuusi rosaanosi towaatinonsa hattono hasiisannonsare wonshinonsa. Cimeeyye togo assatenni Yesuusi lawishsha harunsanno gede minaanna jawaachishshinosi. Minaama kayinni Yesuusi gede cincitanno gede amaaltinose. Qoleno cimeeyye minaanninna minaama lame oosonsa ledo maatete magansiꞌra assiꞌrate kaaꞌlitannonsa hedo kultinonsa. (Efe. 5:21-29) Yannate gedensaanni minaanni maatesi kaaꞌlate sharramino daafira cimeeyye galattinosi. Hattono tenne assa agurannokki gedenna maatesi danchu garinni massaganno gede qullaawu ayyaani kaaꞌlannosita addaxxanno gede jawaachishshinosi. Cimeeyye baxillunni kaaꞌlitinonsa kaaꞌlo tini maate xawaabba xawisa agurtannokki gede assitinonsa.

20. Xawaabbinke xawanno gede assiꞌra mayi guma abbitanno?

²⁰ Faarsaasinchu “Kaaliiqa ayirrissannorinna hajajosi agadhitannori baꞌraadhinoreeti” yee faarsino. (Far. 128:1) Wolootu Yihowara soqqantanno gede koyinseemmoha, mittimmanke kaajjitanno gede assate sharrammeemmohanna baqqi yine agadhineemmoha ikkiro, xawaabbanke xawinsanni hagiirrinke baikkinni heeꞌra dandiineemmo. Qoleno wolootu dancha loosonke laꞌe iimi Annanke guwissara dandiitanno.—Mat. 5:16.