1. Magano waajjate yaa mayyaate? Magano baxxannori iso waajja hasiissannonsahu mayiraati?

 KIRISTAANU Magano baxanno, hattono iso waajjanno. Mitu manni Magano waajjinanni heeꞌne iso baxa hiitto ikkine dandiinanni yee hedara dandaanno. Ikkollana konni birxichira hasaambeemmo waajja, waanke waajjinannita diꞌꞌikkitino. Hatteentenni baxxitino waajjare ronseemmo. Magano baxillunni waajjanno manni iso lubbora ayirrisanno. Insa Maganu ledo noonsa jaaloomi baꞌꞌara hasidhannokki daafira, iso dadillissannokki gede qorophitanno.—Far. 111:10; Law. 8:13.

2. Moote Daawiti Faarso 86:11 coyiꞌrino garinni, hiikkonne lame coye xiinxallineemmo?

² Faarso 86:11 (NW) nabbawi. b Konni qummeeshshira Moote Daawiti coyiꞌrinore hendeemmo woyite, isi Magano waajja lowo geeshsha hasiissannota ikkitinota huwatinota wodanchineemmo. Hanni Daawiti qullaawu ayyaaninni coyiꞌrinore loosu aana hosiisa dandiineemmo gara laꞌno. Umihunni, Maganu suꞌma lubbora ayirrinseemmo gede assannonkeri maatiro ronseemmo. Layinkihunni, barru baala Maganu suꞌma ayirrinseemmota leellisha dandiineemmo gara xiinxallineemmo.

3. Muse Maganu suꞌma lubbora ayirrisanno gede hiitti ikkito kaaꞌlitinosiha ikkara dandaanno?

³ Hanni Muse Korebi Ilaalira heeꞌreenna Yihowa ayirrinyi albasiinni saꞌꞌanna lai woyite hiitto ikkinoro hendo. Qullaawa  Borro Seekke Huwata yaanno maxaafi tenne daafira kulanni, “Tini Yesuusi Kiristoosi uullara daara albaanni mannu ooso laꞌino coyi baalunkunni roore maalaꞌlissannota ikkitukkinni digattino” yaanno. Hakkiinni Muse togo yitanno huuro macciishshino: “Ani Kaaliiqi [“Yihowa,” NW] maareemmohonna hanqoho muddameemmokkiho; mararaancho Maganooti; ammanamaꞌyanna bagamannokkihu baxilliꞌya batiꞌraho. Bagamannokkihu baxilliꞌya kumunni kiirranni ilamara iillanno; sao, sarxonna cubbo agureemmo.” Hattee yannara Muse hasaawisinohu sokkaasincho ikkikki digatino. (Ful. 33:17-23; 34:5-7) Muse Yihowa suꞌma gananno woyite hatti qulli yitannosiha ikkara dandaanno. Gedensoonni Muse Maganu manna Israeele, “dhaggennihanna waajjishannoha Maganiꞌne Kaaliiqi suꞌma [ayirrisse]” yee qorowisiisasi garankolla.—Mar. 28:58.

4. Albinni roore Yihowa ayirrisate hiikkuri akattasi hiinca kaaꞌlitankera dandiitanno?

⁴ Yihowa suꞌma ganneemmo woyite isi hiittoo Maganootirono heda hasiissannonke. Qoleno, akattasi lawishshaho wolqasi, hayyosi, taashshosinna baxillesi qaagate sharrammeemmo. Kurinna wole akattasi hiincanke iso lubbora ayirrinseemmo gede assitankera dandiitanno.—Far. 77:11-15.

5-6. (a) Maganu suꞌmi mayi tiro afiꞌrino? (b) Fulo 3:13, 14​nna Isayaasi 64:8 kultanno garinni, Yihowa hedinori woꞌmanno gede assannohu hiittoonniiti?

⁵ Maganu suꞌmi mayi tiro afiꞌrino? Lowo egennaammi Yihowa suꞌmi “Ikkanno Gede Assanno” yitanno tiro afiꞌrinoha ikkikki digatino yite ammantanno. Tini Yihowa assate hedinore wonshannota hoolannosiri nookkita qaangeemmo gede assitannonke. Hatto yineemmohu mayiraati?

⁶ Yihowa hedinore wonshate ikka hasiissannosire baala ikkanno. (Fulo 3:13, 14 nabbawi.) Borronkera duucha hinge tenne dhagge ikkitannota Maganu ayimma hiincineemmo gede jawaachinshoonninke. Yihowa guuntete xeꞌne noonsa soqqamaanosino isira soqqamatenna hedinore wonshate ikka hasiissannonsare ikkitanno gede assannonsa. (Isayaasi 64:8  nabbawi.) Konni garinni Yihowa fajjosi woꞌmitanno gede assanno. Isi mitturino hoolisikkinni hedinori woꞌmanno gede assa dandaanno.—Isa. 46:10, 11.

7. Iimi Annanke albinni roore ayirrisate mayi kaaꞌlankera dandaanno?

⁷ Iimi Anninke assinorenna ninkeno assineemmo gede kaaꞌlinonkere hiincineemmoha ikkiro, isira noonke ayirrinyi lexxanno. Lawishshaho, dhagge ikkannoha Yihowa kalaqo hiincineemmo woyite, isi assinorinna kalaqinori lowo geeshsha maalale ikkannonke. (Far. 8:3, 4) Qoleno Maganu fajjosi wonshineemmo gede kaaꞌlinonke gara hendeemmo woyite, iso albinni roore ayirrinseemmo. Addanko, Yihowa suꞌmi maalalete! Kuni suꞌmi, Anninke ayimma, isi konni albaanni assino coyenna konni kaꞌa assannore baala xaphi asse amadinoho.—Far. 89:7, 8.

8. Marro 32:2, 3 kultanno garinni, Yihowa soqqamaasinesi suꞌmasi maa assitara hasiꞌranno?

⁸ Israeele Hexxote Gobba eꞌara kaꞌe heedheenna, Yihowa Musera faarso rosiisinosi. (Mar. 31:19) Museno tenne faarso dagate rosiisino. Marro 32:2, 3 noo hedo hiincineemmo woyite, mitu manni yaannohu gede, Yihowa suꞌmisi qullaawaho yine ballinshara hasiꞌrannokkita huwanteemmo. (Qummeeshsha nabbawi.) Isi, hedate dandoo noonsa kalaqami baalu suꞌmasi afara hasiꞌranno. Muse Yihowarenna ayirradu suꞌmisire rosiisanna macciishsha Israeelete dagara lowo ayirrinyeeti! Muꞌro latisanno shori gede, Muse rosiisinonsari wolqanna jawaante ikkinonsa. Ninkeno rosiinseemmo woyite Muse lawishsha harunsa dandiineemmohu hiittoonniiti?

9. Yihowa suꞌmi qullaawanno gede kaaꞌla dandiineemmohu hiittoonniiti?

⁹ Minunni mine haꞌne woy gudumaaleho sabbankeemmo woyite, mannaho Yihowa suꞌma kulate Qullaawa Maxaafa horoonsiꞌra dandiineemmo. Qoleno Yihowa ayirranno gede assitanno borro, viidiyo woy webisayitenkera fulinore horoonsiꞌra dandiineemmo. Loonseemmowa, rosu mine woy doogo haꞌneemmo woyite, baxillaanchu Maganinkere mannaho kulleemmo faro hasiꞌneemmo. Yihowa mannahonna uullate assannoha dhagge ikkanno coye kulleemmonsa woyite, insa mite yite Yihowa mannu ooso mageeshshi geeshsha baxannoro huwattara dandiitanno. Wolootaho baxillaanchu Anninke daafira halaale rosiinseemmo woyite, Maganu suꞌmi qullaawanno gede kaaꞌlinanni heeꞌnoommo. Qoleno Yihowa daafira rossinoha kaphu roso agurtanno gede kaaꞌlinammonsara dandiineemmo. Mannaho Qullaawu Maxaafinni rosiinseemmori, baalunkunni roore kiannonsareeti.—Isa. 65:13, 14.

10. Qullaawa Maxaafa xiinxallinseemmo woyite, Maganu seeranna biddishsha calla rosiinse agura hasiissannonkekkihu mayiraati?

¹⁰ Qullaawa Maxaafa xiinxallinseemmo woyite, rosaanonke Yihowa suꞌma affannonna horoonsidhanno gede kaaꞌla hasiꞌneemmo. Qoleno iso seekkite affanno gede kaaꞌlineemmonsa. Ikkina Maganu seeranna biddishsha calla rosiinse iso seekkite affanno gede assine anfeemmo? Worbu rosaanchi Maganu seera afara, wole agurina ayirrisara nafa dandaanno. Ikkollana isi hatto assino daafira calla Yihowa xawe leelleennasi isira baxillunni hajajamanno? Heewani Maganu seera affinoha ikkirono, konne seera uyino Magano godowinta dibaxxanno; Addaamino ise gedeenkolla. (Kal. 3:1-6) Konnira wolootaho Maganunniha keeraancho seeranna biddishsha rosiinse calla agura dihasiissannonke.

11. Qullaawa Maxaafa xiinxallinseemmo woyite rosaanonke Maganu seera calla ikkikkinni isono baxxanno gede kaaꞌla dandiineemmohu hiittoonniiti?

¹¹ Yihowa biddishshinna seeri baxisannohonna kaaꞌlannonkeho. (Far. 119:97, 111, 112)  Qullaawu Maxaafi rosaanonke, Yihowa konne seera uyinonkehu baxannonkehura ikkinota huwata hoogguro, tini leella hooggansara dandiitanno. Konnira rosaanonke togo yine xaꞌma hasiissannonke: “Maganu soqqamaanosi konne asse konne assitinoonte yaannohu mayira lawannohe? Tini isi daafira maa huwanteemmo gede kaaꞌlitannonke?” Qullaawu Maxaafi rosaanonke Yihoware hiincitannonna ayirrado suꞌmasi baxxanno gede kaaꞌlineemmonsaha ikkiro, isi xawe leellannonsa. Hatto assineemmoha ikkiro, insa Maganu seera calla ikkikkinni isono baxxanno. (Far. 119:68) Tini ammanansa kaajjitanno gedenna buutote qarri iillannonsa woyite dandiite saꞌanno gede kaaꞌlitannonsa.—1 Qor. 3:12-15.

12. Mitte yannara Daawiti wodani beehaminohu hiittoonniiti? Tini mayi qarra abbitino?

¹² Faarso 86:11te, “wodanaꞌya mitto assie” yitannoti kaajja yaatto no. Tenne yaatto qullaawu ayyaaninni borreessinohu Moote Daawitiiti. Isi qoropha hoongiro wodanu shiimurinni beehamara dandaannota iillinosirinni huwatino. Mitto barra Daawiti sagannatete heeꞌre wolu manchi galte biso hayishshidhanna laino. Hakka woyite Daawiti wodani beehaminonso dibeehamino? Isi ‘Wolu manchi galte yortooti’ yaannoha Yihowa seera afino. (Ful. 20:17) Daawiti hatte mancho lae agura giwinoha ikkara dandaanno. Isi Bersaabehi ledo foore yortosi wonshiꞌratenna Yihowa hagiirsiisate giddo mitte doodha hasiissinosi. Daawiti lowo diro Yihowa baxanninna waajjanni heeꞌrinoha ikkirono, busha yortonni qeelamino. Konninni kainohunni isi lowo bunshe assino. Daawiti Yihowa suꞌma mishiishino. Qoleno isi beebbaataamu mannira wole agurina maatesira nafa buutote qarra abbino.—2 Sam. 11:1-5, 14-17; 12:7-12.

13. Daawiti wodani wirro mitto ikkinota mayinni anfeemmo?

¹³ Yihowa Daawiti qorichishino; Daawitino Yihowa ledo noosi jaalooma haaroonsiꞌrino. (2 Sam. 12:13; Far. 51:2-4, 17) Daawiti wodanisi beehamara wodhe agurasi abbitinoha buutote qarranna shetto qaagino. Isi Faarso 86:11te borreessinore, “Beehaminokki wodana uyie” yineno tira dandiinanni. Yihowa Daawiti wodanasi mitto assiꞌranno gede kaaꞌlinosi? Ee kaaꞌlinosi. Korkaatuno gedensoonni Maganu Qaali giddo Daawiti Yihowara “coꞌo yiino wodaninni” soqqaminota kulloonni.—1 Mot. 11:4; 15:3.

14. Ninkeneeto mayine xaꞌma hasiissannonke? Mayira?

¹⁴ Daawiti lawishshi jawaantenna seejjo ikkannonke. Daawiti shota ikkinokki cubbo loosasi, xaa yannara noote Maganu  soqqamaanora qorowishshaho. Yihowara soqqammoommo diri ikki geeshshihano ikkiro, ‘Sheexaanu wodanaꞌya beehannokki gede gargadhanni noommo?’ yine umonke xaꞌma hasiissannonke.

15. Gara ikkitinokki misile tuncu yitannonke woyite Magano waajja agarooshshe ikkitannonkehu hiittoonniiti?

¹⁵ Lawishshaho, televizhiinete woy interneetete aana gariweelo misile dagguro maa assatto? Tini teeda baꞌino misile woy mancaꞌꞌare leellishshanno filme diꞌꞌikkitino yite hedattoha ikkara dandaanno. Kayinni kuni Sheexaanu wodanakki beehate horoonsiꞌranni noorella ikka? (2 Qor. 2:11) Tini misile mittu manchi xarra dadhate horoonsiꞌrannohu shiimu bili gedeeti. Isi balaxe bila afooho woranno. Hakkiinni meenchunni gananno woyite bilu giddo hige eꞌꞌe daranno. Televizhiinete woy interneetete leellinshanniti gariweelo misile, hakkonni shiimu bili gede ikkitara dandiitanno. Umi qara hakkeeshsha gawajjannoha lawannokkiri, gedensoonni Yihowa baddallanni gede assara dandaanno. Konnira bushu coyi wodanikki giddora eannokki gede feexidhe giwi! Yihowa suꞌma waajjate woꞌmanka woyite wodanakki mitto assiꞌri!

16. Fonqolu tuncu yaannonke woyite ninkeneeto hiikkuri xaꞌmuwa xaꞌma hasiissannonke?

¹⁶ Sheexaanu ninke busha coye assineemmo gede fonqolate gara ikkitinokki misilla calla ikkikkinni wole batinyere horoonsiꞌranno. Ikkina togoo woyite maa assineemmo? Hakkeeshsha bushare diꞌꞌikkinoreeti yine hendeemmoha ikkara dandaanno. Lawishshaho, ‘Kuni songotenni bohameemmo gede assannore ikkinokki daafira, lowo cubbo diꞌꞌikkino’ yine hedeemmoha ikkara dandaanno. Hatto yee heda, lowo soꞌrooti. Umonke togo yine xaꞌma hasiisannonke: ‘Sheexaanu konne fonqolo horoonsiꞌre wodanaꞌya beehate woꞌnaalanni noo ikka? Busha yortora qeelamummoro Yihowa suꞌma dimishiisheemmo? Kuni assooti  Maganiꞌyawa shiqeemmo gede assannoenso isiwiinni xeertiꞌreemmo gede assannoeho?’ Kuri xaꞌmuwa hiinci. Kuri xaꞌmuwara ateneeto dogittokki dawaro qola dandaatto gede hayyo afiꞌrate huucciꞌri. (Yai. 1:5) Hatto assakki agarooshshe afiꞌratto gede kaaꞌlitannohe. Qoleno Yesuusi gede iillannonke fonqolo qeele saꞌꞌate kaaꞌlitannonke; isi ‘Sheexaane anewiinni fafi!’ yiino.—Mat. 4:10.

17. Beehamino wodani dancha diꞌꞌikkino yineemmohu mayiraati? Lawishsha kuli.

¹⁷ Beehamino wodani dancha diꞌꞌikkino. Hanni mimmitu ledo sumuu yitannokkita mitte kaasete gaamo hendo. Mitootu uminsara calla maccare ikka hasidhannoreeti; mitu kayinni seeru garinni godoꞌla dihasidhannoreeti; wolootu qajeelsannonsaha diayirrissannoreeti. Togoo gaamo duucha woyite qeela hooggara dandiitanno. Mittimma noonsa gaamo kayinni duucha woyite qeeltara dandiitanno. Wodanikki qeeltanno gaamo gede mitto ikkara dandaannohu hedokki, halchokkinna hasattokki mitte assidhe Yihowara soqqamattoha ikkirooti. Sheexaanu wodanikki beehamiro hagiidhannota deꞌooti. Isi hedokki, yortokkinna hasattokki Maganu seeri ledo sumuu yitannokkita ikkitara hasiꞌranno. Ati kayinni Yihowara soqqamate wodanakki mitto assiꞌra hasiissannohe. (Mat. 22:36-38) Sheexaanu wodanakki beehara horo wodhitooti!

18. Mikiyaasi 4:5 kultanno garinni maa assate murciꞌrootto?

¹⁸ Atino Daawiti gede “suꞌmakki waajjeemmo gede wodanaꞌya mitto assie” yite Yihowa huucciꞌri. Huuccattokki ledo sumuu yaannore assate sharrami. Barru baala assattorinni shiimurinnino ikko loworinni Yihowaha qullaawa suꞌma ayirrisattota leellishate murciꞌri. Yihowa Farciꞌraasincho ikkootto daafira hatto assittoro Yihowa suꞌma ayirrisattota leellishatto. (Law. 27:11) Ninke baalunku Mikiyaasi gede “hegere geeshsha Kaaliiqa Maganonke magansiꞌneemmo” yineemmo.—Mik. 4:5.