1-2. Yihowa Farciꞌraasinera lowo geeshsha hasiissanno hajo hiitteeti?

 XAA yannara roore hasiissanno hajo, Yihowa aliidimmanna suꞌmisi qullaambe xabbe leellate. Yihowa Farciꞌraasine ikkinoommo daafira, tenne hajore hasaawa hagiirsiissannonke. Ikkina, Maganu aliidimmanna suꞌmisi qullaambe xaadooshshe diafiꞌrinoreeti yaateni? Deeꞌni.

² Ninke baalunku Maganu suꞌmi qullaawa hasiissannosita huwantoommo. Qoleno Yihowa aliidimma woy isi gashshanno gari baalunkunni roore ikkinoti xabbe leella hasiissannoseta anfoommo. Konnira lamenti lowo geeshsha hasiissanno hajooti.

3. Yihowa yinanni suꞌmi maa xaphi asse amadino?

³ Yihowa yinannihu Maganu suꞌmi gashshanno garano ikko isi daafira wole baalanka coye xaphi asse amadinoho. Konnira, Maganu suꞌmi qullaawasi lowo geeshsha hasiissannote yineemmo woyite, isi gashshanno gari baalunkunni roore ikkinoti xabbe leella hasiissanno yinanni heeꞌnoommo. Yihowa suꞌmi, isi kalqe alame gashshanno gari woy Aliidimmasi ledo fiixooma afiꞌrinoho.—“ Maganu Suꞌmi Qullaambe Ledo Xaadooshshe Afiꞌrinore” yitanno saaxine lai.

4. Faarso 135:13 Yihowa suꞌmi daafira mayitanno? Konni birxichira hiikkuri xaꞌmuwara dawaro afiꞌneemmo?

⁴ Yihowa yinanni suꞌmi lowo geeshsha baxxinoho. (Faarso 135:13, NW nabbawi. b) Maganu suꞌma baxxinoha assannori maati? Umo konne suꞌma hunnoonnihu hiittoonniiti? Maganu suꞌmisi qullaawanno gede assannohu ma garinniiti? Ninke suꞌmisira halama dandiineemmohu hiittoonniiti? Konni birxichira kuri xaꞌmuwara dawaro afiꞌneemmo.

5. Mitootu Maganu suꞌmi qullaawa hasiissannosi yinanni woyite mayite heddara dandiitanno?

⁵ “Suꞌmikki qullaawa ikko.” (Mat. 6:9) Yesuusi huuccatto assiꞌneemmo woyite tenne hajo balaxisiisa hasiissannonketa coyiꞌrino. Ikkina hatto yaa mayyaate? Mitto coye qullaawa assate yaa, keereensate, xalashshate, woy xuru nookkiha assate. Ikkollana mitu manni ‘Wonanni Maganu suꞌmi keeraancho, xalala woy xuru nookkiha diꞌꞌikkino?’ yee hedara dandaanno. Tenne xaꞌmora dawaro afiꞌrate suꞌmu afiꞌrino tiro huwata hasiissannonke.

6. Suꞌmu lowore afiꞌrino yineemmohu mayiraati?

⁶ Suꞌmu woraqataho borreessinanni woy woshshinanni qaale calla diꞌꞌikkino. Qullaawu Maxaafi “Lowo jironni danchu suꞌmi woyyanno” yaannota qaango. (Law. 22:1; Ros. 7:1) Suꞌmu lowore afiꞌrino yineemmohu mayiraati? Korkaatuno suꞌmu, mannu hakko manchi daafira mayyee hedannorono xawisanno. Konnira mittu manchi suꞌma borreessinanni woy hakko suꞌma woshshinanni gari hakkeeshsha didhiwanno; roore hasiissannoti wolootu hakko manchi suꞌma macciishshitanno woyite heddannoreeti.

7. Mannu Maganu suꞌma hunanni noohu hiittoonniiti?

⁷ Mannu Yihowa daafira kapho coyiꞌranno woyite, iso bushiishanni no. Tini qolte suꞌmasi hunate. Umo Magano bushiinshe suꞌmasi hunnoonnihu Edeni Gannateteeti. Hanni tennenni maa ronseemmoro laꞌno.

8. Addaaminna Heewani maa afino? Mayine hendeemmoha ikkara dandaanno?

⁸ Addaaminna Heewani Maganu suꞌmi Yihowa ikkinotanna isi ayimma daafira lowore afino. Qoleno Isi Kalaqaancho ikkinota, hattono heeshsho, Gannate ikkitino uullanna guuta galte uyinonsahu iso ikkinota afino. (Kal. 1:26-28; 2:18) Ikkina insa guuta surrensa, Yihowa assinonsare baala hiincitanni heeꞌrate horoonsidhinoni? Woy insa Yihowara noonsa baxillinna galati baikkinni heeꞌranno gede assiꞌrate sharrantinoni? Maganu diini fonqolinsa yannara tini xabbe leeltino.

9. Kalaqama 2:16, 17 nna 3:1-5 kultanno garinni Yihowa Addaaminna Heewani mayino? Sheexaanu halaaleho bushsha ganinohu hiittoonniiti?

 ⁹ Kalaqama 2:16, 17; 3:1-5 nabbawi. Sheexaanu hamashsho horoonsiꞌre Heewani togo yee xaꞌmino: “Halaalintanni Maganu Edeni Gennetete noo haqqe baalante laalo ittinannikki gede hoolinoꞌneni?” Tini giddo kaphonna xagarro afidhino xaꞌmo, maanxe worroonni marze gedeete. Maganu mitte haqqicho laalo agurranna baalante haqqe laalo ita dandiitannota kulinonsa. Addaaminna Heewanira uyinoonninsa laalo kiirre digundannite. (Kal. 2:9) Yihowa shaqqado Maganooti! Ikkollana Maganu Addaaminna Heewani ittinoonte yiinoti mitte haqqicho no. Konnira Sheexaanu xaꞌmo halaaleho bushsha gantannote. Sheexaanu coyiꞌrinori, Maganu gaggaadaamoho yine hendanni gede assannoreeti. Heewani ‘Maganu hoꞌlinonkehu danchu coyi noo ikka?’ yite heddinoha ikkara dandaanno.

10. Sheexaanu Maganu suꞌma huninohu hiittoonniiti? Tini maa abbitino?

¹⁰ Hatte yannara Heewani Yihowara hajajama diagurtino. Ise Sheexaaneho Maganu yiinota kultino. Heewani ‘Ita agurina kisa nafa kissinoonte’ yiinonke yitino. Ise Maganoho hajajama gibburo reyitannota affino. Sheexaanu kayinni “Reyo nafa direyitinanni” yee qolino. (Kal. 3:2-4) Xa Sheexaanu balbaꞌla agure xawise coyiꞌrino. Isi Heewanira, ‘Yihowa kaphaanchoho’ yiinohu gedeeti; konni garinni Sheexaanu Maganu suꞌma hunino. Sheexaanu hatto assasinni, Daawuloosi woy suꞌma hunannoha ikkino. Heewani dogante Sheexaanu yiinore ammantino. (1 Xim. 2:14) Ise Yihowanni roore Sheexaane ammantino. Konnira Heewani geedo gedenso hunannore assitino. Ise Yihowara hajajama gibbino. Heewani Yihowa hoolino haqqicho laalo ittu. Hakkiinni Addaamirano uyitu.—Kal. 3:6.

11. Umi anninkenna amanke maa assa dandiitannohu baino? Insa kayinni maa assitino?

¹¹ Hanni Heewani Sheexaaneho mayitannohu bainoro hendo. Ise togo yite qoltoommero mayi bai: “Ate mama afoommahe? Annaꞌya Yihowa kayi afoomma; iso baxeemma, hattono addaxxeemma. Addaamiranna anera baalanka coye uyinonkehu isooti. Iso bushiisha saaliweelu kuni! Kai kawii!” Yihowa beettosi hatto yitanna macciishshoommero lowo geeshsha hagiidhannoti baꞌino! (Law. 27:11) Ikkollana, Heewani Yihowara bagamannokki baxille dileellishshino; Addaamino ise gedeenkolla! Addaaminna Heewani Anninsara bagamannokki baxilli noonsakki daafira, suꞌmisi baꞌꞌanna sammi yite laꞌino.

12. Sheexaanu Heewani wodanira huluullo wixinohu hiittoonniiti? Addaaminna Heewani maa diassitino?

¹² Aleenni laꞌnummonte gede, Sheexaanu Heewani wodanira huluullo wixino. Ise Maganu shaqqado Anna ikkinota huluullantanno gede asse Yihowa suꞌma hunino. Addaaminna Heewani Sheexaanu Maganu daafira kapho kulinsata Yihowa suꞌmira dihalantino. Insa Sheexaanu  amaale macciishshite Anninsara finqiltino. Yannankerano Sheexaanu hakko garinni xagaranno. Isi Yihowa daafira kapho coyiꞌre suꞌmasi hunanno. Sheexaanu kapho ammananno manni Yihowa gashshootira dihajajamanno.

13. Hiziqeeli 36:23 Qullaawu Maxaafita qara sokka luphi assite xawissannohu hiittoonniiti?

¹³ Yihowa suꞌmasi hunnanna sammi yee laꞌꞌannoni? Dilaꞌꞌanno! Qullaawu Maxaafi Yihowa Edeni Gannatete baino woy mishamino suꞌmisi qullaawanno gede maa assinoro kulanno. (Kal. 3:15) Isinni Qullaawu Maxaafiti qara sokka, Yihowa Beettisi gashshanno Mangiste widoonni suꞌmasi qullaawa assannotanna uullate keeraanchimmanna salaame qolannota kultannote yaa dandiinanni. Qullaawu Maxaafi kulannori, Yihowa suꞌmasi qullaawa assannohu hiittoonniitiro afate kaaꞌlannonke.—Hiziqeeli 36:23 nabbawi.

14. Yihowa Edeni Gannatete kaꞌino finqillenni baino suꞌmasi qullaawa assate maa assino?

¹⁴ Sheexaanu Yihowa hedinore wonshannota hoolate ganinokki gano dino. Isi hatto assate duucha hige woꞌnaalinoha ikkirono diqiniinosi. Qullaawu Maxaafi Yihowa hedinore wonshate maa assinoronna isi ledo taalamannohu nookkita buuxisannonke. Sheexaanunna garosi finqilansa, Yihowa lowo geeshsha xissiissino. (Far. 78:40) Ikkollana Yihowa kalaqamino qarra hayyotenni, cincatenninna halaalunni tiranni no. Qoleno bayira wolqasi kiirre gundannikki doogganni leellishino. Isi baalanka coye assannohu baxillunniiti. (1 Yoh. 4:8) Yihowa suꞌmasi keereensannore assa agurino woyiti dino.

15. Sheexaanu xaa yannara Maganu suꞌma hunanni noohu hiittoonniiti? Tini maa abbitino?

¹⁵ Yannankerano Sheexaanu Maganu suꞌma hunannilla no. Isi mannu Maganu wolqaataamo, taashshannoha, hayyichanna baxillaancho ikkinota huluullamanno gede asse doganno. Sheexaanu Yihowa Kalaqaancho diꞌꞌikkino yee manna ammansiisate woꞌnaalanno. Maganu no yee ammananno manna kayinni, Yihowanna seerisi furro fuuqqo hoꞌlannohonna gara diꞌꞌikkinoho yee hedanno gede assate  woꞌnaalanno. Wole agurina isi Yihowa mararro noosikkihonna manna sioolete giirannoho yee rosiisanno. Mannu konne kapho ammaniro, Yihowahu keeraanchu seerira hajajama giwara dandaanno. Sheexaanu woꞌmunni woꞌma baꞌꞌa geeshsha, Maganu suꞌma huna diaguranno; manna isi wido qoꞌlate giidhe galanno. Ate isi wido assiꞌre afa ikka?

16. Addaaminna Heewani assa gibbinore ati maa assa dandaatto?

¹⁶ Yihowa mannu ooso guuntete xeꞌne noonsare ikkiturono, suꞌmisi qullaawa ikkanno gede assitara fajjinonsa. Addaaminna Heewani assa gibbinore ati assa dandaatto. Heeꞌnoommohu Yihowa suꞌma hunannonna mishanno manni batiꞌrino alamera ikkirono, Yihowa suꞌmira halamanna isi qullaawa, keeraancho, shaqqadonna baxillaancho Magano ikkinota kula dandiineemmo. (Isa. 29:23) Yihowa gashshaanchokki ikkara hasiꞌrattota leellisha dandaatto. Qoleno woꞌmunni woꞌma keeraanchunna baalunku kalaqamira salaamenna hagiirre abbannohu Maganu gashshoote calla ikkinota wolootaho kula dandaatto.—Far. 37:9, 37; 146:5, 6, 10.

17. Yesuusi mannu Annisi suꞌma afanno gede assinohu hiisseeti?

¹⁷ Yihowa suꞌmira halammeemmoha ikkiro, Yesuusi Kiristoosi lawishsha harunsinanni heeꞌnoommo. (Yoh. 17:26) Yesuusi mannu annisi suꞌma afanno gede assinohu, konne suꞌma gane calla ikkikkinni Yihowa ayimmare mannaho rosiiseeti. Coyi gedera, Farisootu mannu Yihowa kaajjadoho, wolqankera aleenni ikkinore asse yaannoho, ninkewiinni xeertiꞌrinohonna kakkachaho yee hedanno gede assituta, Yesuusi kayinni insa yitannori gara ikkinokkita coyiꞌrino. Yesuusi mannu Yihowa shaqqado, cinca, baxillaanchonna gatona yaannoha ikkinota huwatanno gede kaaꞌlino. Qoleno isi woꞌmunni woꞌma Annisi faale haꞌre, mannu Yihowa afanno gede assino.—Yoh. 14:9.

18. Beebbate bainoha Maganu suꞌma keereensineemmohu maa assinummorooti?

¹⁸ Ninkeno Yesuusi gede, Yihowa baxillaanchonna shaqqado Magano ikkinota mannaho rosiisa dandiineemmo. Hatto assinummoro, beebbate bainoha Yihowa suꞌma keereensa  dandiineemmo. Yihowa suꞌmi qullaawanno gedeno assineemmo, yaano mannu suꞌmisi qullaawa ikkinota huwatanno gede kaaꞌlineemmo. Qoleno guuntete xeꞌne noonkere ikkinummorono, Yihowa faale haꞌra dandiineemmo. (Efe. 5:1, 2) Assineemmorinna coyiꞌneemmori mannu Yihowa afanno gede kaaꞌlannoha ikkiro, suꞌmisi qullaawanno gede assinanni heeꞌnoommo. Mannu Maganu daafira garimale huwatinore garunni huwatanno gede kaaꞌlineemmoha ikkiro, suꞌmisi qullaawanno gede assinanni heeꞌnoommo. Qoleno shama maala uddiꞌrino manni Maganoho ammaname heeꞌra dandaannota leellinsheemmo.—Iyo. 27:5.

19. Isayaasi 63:7 kultanno garinni, manna rosiinseemmo woyite qara mixonke maati?

¹⁹ Yihowa suꞌmi qullaawanno gede assa dandiineemmori wolurino no. Mannaho Qullaawu Maxaafi halaale rosiinseemmo yannara, duucha woyite Yihowa aliidimmare yaano isira kalqete alame gashshate qoosso noosita luphi assine kulleemmo; hatto assanke garankolla. Maganu seera rosiisa hasiissannota ikkiturono, qara mixonke mannu Annanke Yihowa baxannonna isira ammanamanno gede kaaꞌlate. Konnira Yihowata baxissanno akattanna suꞌmisi afiꞌrino tiro seekkine rosiisa hasiissannonke. (Isayaasi 63:7 nabbawi.) Hatto assineemmoha ikkiro, mannu Yihowa baxanno gede kaaꞌlineemmo, hattono baxillunni hajajamannosi gede assineemmo.

20. Aananno birxichira maa ronseemmo?

²⁰ Ikkina amanyootinkenninna rosiinseemmo rosinni, mannu Yihowa suꞌma ayirrisannonna isiwa shiqanno gede kaaꞌla dandiineemmohu hiittoonniiti? Aane noo birxichira tenne xaꞌmora dawaro afiꞌneemmo.