Anniꞌyanna amaꞌya Layinkihu Alamete Oli yannara, Istooniyunni Jarmane hadhino; ani ilamoommohu hakkiichooti. Hakkunni gedensaanni insa Kanaada haꞌrate qixxaawa hanafi. Kanaadaho umo heeꞌra hananfoommohu Otaawa yinanni qooxeessira lukkuwu heeꞌrannohu shiimu mini giddooti. Hakkawaro ninke lowo geeshsha buxanete; ikkirono soodo shooꞌmate quuphe dihoongeemmo.

Mitto barra Yihowa Farciꞌraasine amaꞌyara Yohaannisi Ajuuja 21:3, 4 nabbabbuse. Ise kuni qummeeshshi kulannori hagiirsiisinose daafira wiꞌla hanaffu. Halaalu wixi lopheenna mulenni anniꞌyanna amaꞌya ayyaanaamittetenni lophe cuuamino.

Amaꞌyanna anniꞌya Ingilizete afoo hakkeeshsha dandaannokkiha ikkirono halaale seekke cuꞌmiꞌrino. Anniꞌya Ontariyo Sadibaari yinanniwa siwiila daaqinsanni faabirikira hashsha woꞌma loosannoha ikkirono, Qidaamete barra anenna rodooꞌya Silviya woꞌmanka woyite soqqansho haaꞌre fulannonke. Qoleno lamalate kiiro maatete deerrinni Agarooshshu Shae xiinxallineemmo. Anniꞌyanna Amaꞌya Magano baxeemmo gede assite lossitinoe. Tini 1956 tonnu dirihu heeꞌre heeshshoꞌya Yihowara sayise oye cuuameemmo gede kakkayissinoe. Insa Yihowa lowo geeshsha baxxannore ikkansa heeshshoꞌya diro woꞌma Yihowara soqqamanni heeꞌreemmo gede kaaꞌlitinoe.

Layinki dirimi roso gudummohu gedensaanni albi geeshsha Yihowara soqqama agurummo. Woꞌma yanna suwisaancho ikkummoro horophillunni alame doye laꞌꞌate halchoꞌya wonshiꞌrate ikkanno geeshshi woxe horo afiꞌra didandeemmo yee hedoommo. Mittu raadoonete xaawira muuziiqa fanate looso loosa hanafummo; konne looso lowo geeshsha baxoommo. Konne looso looseemmohu hawarro hawarrooti; hakko daafira duucha woyite gambooshshe hosa hanafummo; hattono Magano baxxannokkiri ledo jaalooꞌmummo. Jeefote, Qullaawu Maxaafinni qajeelino tiiꞌꞌiꞌya heeshshoꞌya biddi assiꞌreemmo gede kakkayisinoe.

Hakkiinni Ontaariyo Oshaawa yinanniwa haꞌrummo. Hakkiicho Rayi Normaani, rodoosi Leesilinna wole suwisaano ledo egennamummo. Insa anga fante haadhinoe. Insa hagiirraamma ikkitino gara laummoti mixoꞌya biddi assiꞌrate kaummo. Kuri roduuwi suwisaancho ikkeemmo gede jawaachishshinoe. Hakkiinni Wocawaaro 1966nni suwisaancho ikkummo. Hatte yannara hagiirraamoho qoleno dancha heeshsho heeꞌreemmo. Kayinni albillittete heeshshoꞌya soorrannohu hedoommokki coyi ikkino.

Layinki dirimi roso rosanni noommo yannara Kanaadaho Toronto noo Beeteele eate forme wonshummo.  Gedensoonni suwisaancho ikke soqqamanni heeꞌreenna Beeteelete shoole diro soqqameemmo gede koyinsie. Kayinni Leesili lowo geeshsha baxoommo daafira konni koyishshira maahoyye yuummoro galagale isenni xaadalla hoogummo yee waajjoommo. Kayinni seeda yanna seekke huuccatto assiꞌrummohu gedensaanni konne koyishsha maahoyye yee adhummo; hakkiinni dadilloommohu mitu Leesili keerunni yee haꞌrummo.

Beeteelete uduunne hayishshinanni kifilera loosommo; hattono gedensoonni borreessaancho ikke soqqamoommo. Hattenne yannara Leesili Kiwubeeki Gatinii yinanniwa baxxitino suwisaancho ikkite soqqantanni no. Duucha woyite ise daafira hedeemmo; hattono doodhoommo doorshi garahokka yeemmo. Hakkiinni hedeweelcho hedoommokkiri ikkeenna lowo geeshsha hagiidhummo. Leesili rodii Rayi Beeteelete soqqamanno gede koyinsi. Hakkiinni isi Beeteele dayita ane ledo galanno gede kullisi! Tini Leesili ledo jaaloomaꞌya galagale hanafeemmo gede kaaꞌlitinoe. Beeteelete shoole diro soqqame gudummo barra yaano Ammajje  27, 1971nni ise ledo adhammummo.

Leesilinna ani Kiwubeeki noote Faransayete afiinni massanganni songora soqqammeemmo gede gaamminke. Shiimu diri gedensaanni 28 diriꞌyanni woradu aliidi laꞌꞌaancho ikke soqqameemmo gede koyinsieta dhagge assiꞌroommo. Ani shiimaho, qoleno konne looso loosate ikkado diꞌꞌikkoommo yee hedoommo; kayinni Ermiyaasi 1:7, 8 noo hedo jawaachishshinoe. Ikkirono hatte yannara Leesilira makeenu danu iillitinose; hattono ise goxicho hoogge qarrantanno. Hakko daafira, “Woradu looso hiitto ikkine loosa dandiineemmo?” yine hendoommo. Ikkirono ise, “Yihowa mitto looso loonseemmo gede koyisinkero woꞌnaalle laꞌꞌa dihasiissannonke?” yitino. Hakkiinni konne looso loosate maahoyye yinoommo; 17 diro hagiirrunni woradu looso loonsoommo.

Woradu looso looseemmo yannara loosu batiꞌrannoe daafira duucha woyite Leesili ledo sayiseemmota gari yanna diafiꞌreemmo. Wolu rosa hasiissinoe coyi no. Mitto barra Sanyote soodo waalcho ganganni. Waalcho fanneemmo woyite noohu dino; kayinni qiriccaatete giddo kursete dimbanni hocci, akaakilte, chiize, daabbo, mitte xarmuuse woyinenna birciqquwa hattono ayi borreessinoro kulloonnikkiti “Minaamakki wallo haadhe haꞌri” yine borreessinoonni borro no. Hakku barri baxisannoho; arrishshono fulte no. Ikkirono Leesilira lallawo qixxaaweemmo daafira haꞌra dandeemmokkita kulummose. Ise sumuu yitinoha ikkirono kayinni shiima geya dadillitino. Kayinni ofolloommowa tiiꞌꞌiꞌya bushiisha hanafie. Hakkiinni Efesooni Sokka 5:25, 28 yitannore hedummo. Kuni qummeeshshi Yihowa minaamaꞌya towaateemmose gede qaagiissanni nooeta hedeemmo gede assinoe. Huuccatto assiꞌrummohu gedensaanni Leesili “Haꞌnona kai” yuummose; tini ise hagiirsiissinose. Hakkiinni lagu mule nooha mitto lowo geeshsha baxisanno bayicho haꞌne kursete hocco diriirsine kadhine mitteenni lowo geeshsha baxissanno yanna sayinsoommo. Ikkirono lallawoꞌyano qixxaawoommo.

Ninke soqqammeemmo woradi lowo geeshsha halaꞌladoho, hattono hagiirsiisannoho; kuni woradi Biriitishi Kolombiyunni kayise Niwufawundilaandi geeshsha iillanno. Anje heeꞌre haaqeete halchooti  yoommo halchoꞌya xa woꞌmitanni noota huwatoommo. Giiliyaadi rosi mine eꞌꞌe rosate hedoommoha ikkirono, wole gobba haꞌre misiyoone ikke soqqamate kayinni hasatto dinoe. Hakkawaro misiyoone ikkite soqqantannore baxxitino manni gede assine laꞌnanni; ani qole tennera ikkado diꞌꞌikkoommo yee hedoommo. Qoleno olunna dhibbu gawajjinota Afiriku gobba sonkaninke yine waajjinoommo. Noommowa Kanaadaho hagiirrunni soqqamanni noommo.

Alba Sooviyeti Yuneene gashshitino gobbuwara 1992nni loosonke hananfita, Istooniya haꞌne misiyoone ikkine soqqama hasiꞌneemmoronna teꞌee xaꞌmininke. Kuni hendoommokki coye ikkirono, tenne hajo daafira huuccatto assiꞌnoommo. ‘Yihowa mitto coye assineemmo gede kulinkero konne coye woꞌnaalle laꞌꞌa dihasiissannonke?’ yine galagalle hendummo. Tennera maahoyye yinoommo; hattono ‘Afirikalla haꞌra hoongummo woyite qaru dino’ yee hedoommo.

Bayichonkonni Istooniyu afoo rosa hananfummo. Hatte gobbara boode agana soqqammummohu gedensaanni woradu looso loonseemmo gede kullinke. Sase Baaltiku gobbuwara noota hattono Ruusiyaho Kalingiraadira noota 46 meddi yitanno songuwanna gaamo towaanteemmo. Hatto yaa Laativiyu, Liituweeniyunna Ruusiyu afoo rosate woꞌnaalleemmo yaate. Kuni qaali rosate qarrisannoho. Ikkirono jaallanke woꞌnaalleemmo gara laꞌe dhagge assidhino; hattono kaaꞌlitinonke. Hakkiinni 1999nni Istooniyaho sinu biiro minnoonni; hakkiicho ani, Toomaasi Eduuri, Lembiiti Reyilenna Tomii Kawuuko sinu biiro komite miilla ikkinummo.

Alba Sayibeeriyunnite usuru kaampewa abbinoonniri lowo roduuwi ledo egennammoommo. Usuru mine beebba assiꞌnoonninsahanna maatensawiinni bandoonninsaha ikkirono insa horo dicaaccaabbino. Insa hagiirrinsa baikkinni diinaggaabbe soqqantanni heedhino. Tini ninkeno qarru iillinkerono cincine hagiirrinke baikkinni heeꞌra dandiineemmota huwanteemmo gede kaaꞌlitinonke.

Lowo diro diinaggaambe soqqammoommohuranna gari geeshsha fooliishshiꞌnoommokki daafira Leesili quwa saino daafuri amadinose. Ise fayibiromayalijiya yinannihu daafurranni gede assanno dhibbi amadinoseta bayichonkonni diwodanchinoommo. Hakkiinni Kanaada higate murciꞌnummo. Niwu Yorkete Paaterseni, sinu biiro komite rosi minira koyinsinketa haꞌra dandiineemmoronna teꞌee huluullamoommo. Ikkirono seekkine huuccatto assiꞌnummohu gedensaanni haꞌrate maahoyye yinummo. Yihowano doodhinoommo coye maassiꞌrinonke. Leesilino hasiissannoseta hikkiminnu kaaꞌlo afidhinohu konni rosiwa heeꞌnoommo yannaraati. Hakko daafira agurre bashshonke loosiwa hingummo.

Mitte hawarro 2008nni Istooniyaho heeꞌnoommowa qara biironni silke dowwolle Kongote haꞌne soqqama hasiꞌneemmoronna teꞌee xaꞌmininke. Hakkiinni mase jalli yee gatummo; roorenkanni masoommohu tenne xaꞌmora dawaro qola hasiissannoehu layinki barra ikkino daafiraati. Umi qara, hashsha goxxukki galtannota afoommo daafira tenne hajo Leesilira dikuloommo. Hatteentenni Afirika haꞌrate daafira lowo geeshsha yaade huucciꞌranni hakko hashsha goxummokki galoommohu aneeti.

Layinki barra tenne Leesilira kulummota, lamunku  togo yinoommo: “Yihowa Afirika haꞌneemmo gede koyisanni noonke. Woꞌnaalle laꞌnummokkinni dandiineemmokkitanna hagiirre afiꞌneemmokkita hiitto ikkine anfeemmo?” Hakko daafira 16 diro soqqammoommo gobba Istooniya agurre Kongo Kinshaasa haꞌnummo. Hakkiicho nooti sinu biiro biifado haqqe nootenna lowo geeshsha baxissannote. Hakkiicho Leesili galleemmo kifilera wortino coyi giddo mittu Kanaadunni haꞌnummo yannanni kayisse maaxxe keeshshitino kaardeeti. Hatte kaarde aana “Kaansoonnihewa lati” yine borreessinoonni. Roduuwu ledo egennammummohu, manna Qullaawa Maxaafa xiinxallisa hananfummohunna misiyoone ikkine soqqama hananfummohu gedensaanni Yihowara soqqamme afiꞌneemmo hagiirri lexxanni haꞌrino. Hatte yannara Afiriku gobbuwata wole 13 sinu biiro towaatate qoosso afiꞌnoommo. Tini addi addihunna baxisanno manni daafira lowore anfeemmo gede kaaꞌlitinonke. Afirika haꞌrate daafira umo masoommo masilli xa baino; Yihowa soqqammeemmo gede Afirika soyinonke daafira galanteemmosi.

Kongote addi addi sagale ita ronsoommo; lawishshaho horonta diꞌꞌiteemmo yoommota shiimmaadda lubbuwa intoommo. Roduuwu tenne sagale baxxanno gara laꞌnummoti ninkeno woꞌnaalle laꞌnoommo; hattono tenne sagale banxoommo.

Hatte gobbara soojjaati widoonni noo roduuwa jawaachishatenna hasiisannonsare assine kaaꞌlate haꞌnoommo; guriilla yinanniti olantote gaamo hakko qachira noo meentonna qaaqquulle gawajjitino. Hakkiicho noori batinyu roduuwira garihu maalaamittete coyi dinonsa. Ikkirono kaote daafira noonsati kaajjado hexxo, Yihowara noonsa baxillinna dirijjitesira noonsa ammana lowo geeshsha jawaachishshinonke. Insa lawishshi Yihowara soqqammeemmohunna ammananke kaajjishiꞌra hasiissannonkehu mayiraatiro wirro layiꞌneemmo gede assinonke. Mitu roduuwi minensanna jajjansa hooggino. Tini, noonkehu maalaamittete coyi mulenni baꞌꞌara dandaannotanna Yihowa ledo noonke jaaloomi roore hasiisannoha ikkinota qaageemmo gede assitinoe. Roduuwaho lowo qarri iillinonsaha ikkirono insa digunguntanno. Insa lawishshi iillannonkeha addi addi qarra dandiine saꞌneemmo gede jawaachishinonke.

Hakkiinni wolu hendoommokki coyi ikki. Hongi Kongi noote sinu biirora haꞌne soqqammeemmo gede  kullinke. Iisiyu gobbara heeꞌneemmo yine horonta hende diegenninoommo! Kayinni Yihowa wole gobbuwa haꞌne soqqammummo yannara baxillunni towaatinonke gara laꞌnummoti maahoyye yinummo. Hakkiinni 2013nni haꞌneemmowi hiittoowaatiro afano hoongummoro hindiiddo qalxitinonkeri muxxe jaallankenna biifado Afiriku gobba agurre haꞌnummo.

Hongi Kongi mannu batiꞌrannohonna alame woꞌmatenni dayinohu addi addi manni heeꞌranno katamaati. Hakko coyiꞌnannihu Chayinu qaalino rosate qarrisannoho. Ikkirono roduuwu anga fante haadhinonke; hattono hatte gobba sagale lowo geeshsha banxoommo. Loosu halaꞌlanni haꞌrino daafira sinu biiro halashsha hasiissino; ikkirono baattonna hintsa hirranni waagi giira kaxxino. Hakko daafira Aliidi Bisi hakkiicho nooha roore jajja hirranni gede assi. Shiima yanna gedensaanni 2015nni Wodiidi Kooriya haꞌne loosonke loosa hananfummo. Hakkiichono wole afoo rosa qarra ikkitinonke; Kooriyu afoo gari geeshsha coyiꞌra dandiineemmokkiha ikkirono roduuwu kayinni woyyeessiꞌnanni heeꞌnoommota kulte jawaachishshinonke.

Haaro jaalla kalaqiꞌra duucha woyite shota diꞌꞌikkitino; kayinni manna wosinimma adha lowo manni ledo mulenni egennammeemmo gede assitinonke. Roduuwinke addi addire ikkiturono mitto assannonsa coyi roorannota huwantoommo; qoleno Yihowa lowo roduuwinkera wodananke halashshine fana dandiineemmo gede assenna insa baxa dandiineemmo gede asse dhagge ikkanno garinni kalaqinonketa wodanchinoommo.—2 Qor. 6:11.

Manna Yihowa laꞌꞌanno garinni laꞌꞌa, hattono isi baxannonketanna biddishsha aanni noonketa leellishshanno taje wodancha hasiissannonketa ronsoommo. Hexxo mudhineemmo woyite woy wolootu baxxannonketa huluullammeemmo woyite jawaachishshannota roduuwu sokkinonke kaarde woy borrote sokka wirro nabbambeemmo. Yihowa huuccattonkera dawaro qolinonke, baxannonketa buuxisinonke hattono jawaachishinonke.

Lowo diro, Leesilinna ani loosu aye geeshsha batiꞌrinkerono mitteenni sayinseemmo yanna gaaꞌma hasiissannota ikkitinota ronsoommo. Qoleno soꞌro loonseemmo woyite roorenkanni haaro qaale rosate woꞌnaalleemmo woyite soꞌnummoro osoꞌline saꞌꞌa hasiissannonketa ronsoommo. Hattono hashshu kiiro Yihowa galaxxineemmo gede assannonkeha hagiirsiisinonkeha mito coye hedate woꞌnaalleemmo.

Noore coyiꞌniro misiyoone ikke soqqama woy wole gobbara heeꞌra horo didandeemmo yee hedoommo. Kayinni Yihowa kaaꞌlonni baalunku coyi dandaamannota rosaꞌyanni hagiirre afiꞌroommo. Ermiyaasi, Yihowa “dogittoe” yee coyiꞌrino qaali qulli yaannoe. (Erm. 20:7) Addanko, Yihowa hendoommokkiha lowo hagiirrenna kiirre tunqannikki atoote uyinonke; isi horophillunni haꞌrate halchoꞌya nafa wonshinoe. Onte gobbuwara noota sinu biiro towaatate anje heeꞌre horo halche nafa egennoommokkita lowo gobbuwa haꞌroommo. Uyinoonnieha addi addi looso loosate Leesili kaaꞌlitinoe daafira lowo geeshsha galaxxeemmose.

Baalanka looso loonsoommohu Yihowa banxeemmo daafira ikkinota woꞌmanka woyite qaagate woꞌnaalleemmo. Xaa yannara afiꞌnoommo atooti Yihowa mannaho ‘ikkannonsa geeshshire oye woꞌmunku halcho wonshannote’ hegerera heeꞌneemmo yannara afiꞌneemmo atoote qamase laꞌꞌate geeshshaati.—Far. 145:16.