1. Faarso 18:46 kultanno garinni Daawiti Yihowa mayi ledo heewisiisino?

 HEEꞌNOOMMO alamera hedeweelchu qarri iillankera dandaanno; isinni mitu qarri heeshshonke woꞌmunni woꞌma soorrara dandaanno. Kayinni Yihowa kaaꞌlannonketa addaxxa dandiineemmo; tini hagiirsiissannote! Sai birxichira Yihowa heeshshote Magano ikkinotanna woꞌmanka woyite ninke kaaꞌlate qixxaawinoha ikkinota ronsoommo. Yihowa kaaꞌlannonke woyite tini isi ‘heeshshonniha’ ikkinota buunxeemmo gede assitannonke. (Faarso 18:46 (NW) nabbawi. a) Ikkirono Daawiti Yihowa heeshshonniho yiihu gedensaanni, “Isi jawu kinchi gedee Goloꞌyaati” yiino. Isi heeshshote Magano Yihowa heeshsho afiꞌrinokki kinchi ledo heewisiisinohu mayiraati?

2. Konni birxichira maa xiinxallineemmo?

² Konni birxichira Yihowa gaaꞌlinanni kinchinni lawinsoonnihu mayiraatironna konni lawishshinni isi daafira maa ronseemmoro laꞌneemmo. Qoleno iso goꞌlineemmo kinchonke assiꞌra dandiineemmo gara ronseemmo. Jeefote, Yihowate gedee akatta heedhannonke gede assiꞌra dandiineemmo doogga laꞌneemmo.

YIHOWA GAAꞌLINANNI KINCHINNI LAWINSOONNIHU MAYIRAATI?

3. Qullaawu Maxaafi giddo Yihowa ‘kinchunni’ lawinsoonnihu hiittoonniiti? ( noo misile lai.)

³ Qullaawu Maxaafi, Yihowa akatta huwanteemmo gede kaaꞌlate iso ‘jawa kinchooti’ yaanno. Yihowa soqqamaano isi taalle nookki Magano ikkinota kulte galattu woyite iso goꞌlinanni kinchi gede assite xawissino. Umo Yihowa ‘goꞌlinanni kinchi’ gede assine kulloonnihu Marro 32:4. Haanna huuccidhanni “Maganinke gedeehu golu [“jawu gaaꞌlinanni kinchi,” NW] dino” yitino. (1 Sam. 2:2) Imbaaqoomi Yihowa ‘golonke woy gaaꞌlinanni  kinchonke ikkoottohu’ yee coyiꞌrino. (Imb. 1:12) Faarso 73 borreessaanchi, ‘Maganiꞌya kayinni wodaniꞌyara jawaantete woy gaaꞌleemmo kinchooti’ yiino. (Far. 73:26) Wole agurina Yihowa umisi isonooto gaaꞌlinanni kinchi gede asse xawisino. (Isa. 44:8) Hanni Yihowa gaaꞌlinanni kincho ikkasi leellishshannota sase akattasinna iso gaaꞌlineemmo kincho assiꞌra dandiineemmohu hiittoonniitiro laꞌno.—Mar. 32:31.

4. Yihowa golo ikkinohu hiittoonniiti? (Faarso 94:22)

⁴ Yihowa goloho. Mittu manchi lowo xeeninna bubbe dagganno woyite jawu kinchi godi giddo goꞌle gatannonte gede, Yihowano gawajjanno coyi iillannonke woyite golo ikkannonke. (Faarso 94:22 nabbawi.) Isi gatisannonke hattono isi ledo noonke jaalooma hunanno coyinni agarannonke. Yihowa dadillineemmonna shenteemmo gede assanno coye baala hunannota nafa kule qaale einonke.—Hiz. 34:25, 26.

5. Yihowa golonke assiꞌra dandiineemmohu hiittoonniiti?

⁵ Yihowa gaaꞌlineemmo kinchonke assiꞌra dandiineemmoti mitte doogo iso huucciꞌrate. Huuccatto assiꞌneemmo woyite Yihowa wodanankenna hedonke agarannoha ‘keeresi’ aannonke. (Fil. 4:6, 7) Hanni ammanasinni kainohunni usurroonnisihu Artemi yinanni rodii woꞌnaalsha laꞌno. Iso usuru mine polise duucha higge qortinosi, beebba assidhinosi hattono waajjishiishshinosi. Isi togo yiino: “Polise qortannoe kiiro lowo geeshsha yaadeemmo; . . . woꞌmanka woyite Yihowa huucciꞌreemmo. Yihowa giddoyidi keerenna hayyo aannoe gede xaꞌmiꞌreemmo. Togoo qarri iillierono wodaꞌnaamma dandoommo; Yihowa agarooshshi kinchu huxxi gede ikkinoe.”

6. Woꞌmanka woyite Yihowa addaxxa dandiineemmo yineemmohu mayiraati? (Isayaasi 26:3, 4)

⁶ Yihowa ammaꞌninanniho. Bayichinni milli yaannokkihu jawu kinchi gede Yihowano disoorramanno; isi woꞌmanka woyite kaaꞌlannonketa anfoommo. Yihowa ‘hegere golonke’ ikkino daafira iso addaxxa dandiineemmo. (Isayaasi 26:3, 4 nabbawi.) Isi heeshshonniha ikkino daafira uyino hexxo wonshanno, huuccattonke macciishshanno hattono hasiisannonkere asse kaaꞌlannonke. Qoleno Yihowa soqqamaanosira ammanaminoha ikkino daafira woꞌmunni woꞌma iso addaxxa dandiineemmo. (2 Sam. 22:26) Isi assineemmore horonta dihawanno hattono baꞌraasannonke.—Ibi. 6:10; 11:6.

7. Yihowa addaxxinummoro afiꞌneemmo horo maati? (Misileno lai.)

⁷ Yihowa woꞌmunni woꞌma addaxxineemmo woyite iso gaaꞌlineemmo kinchonke assiꞌnanni heeꞌnoommo. Qarru yannara nafa Yihowara hajajamme iso addaxxinummoro horo afiꞌneemmo. (Isa. 48:17, 18) Yihowa kaaꞌlannanke laꞌneemmo woyite iso albinni roore addaxxineemmo. Hatto assinummoro iillannonke fonqoli ikkihano ikkiro qeelle saꞌneemmohu Yihowa kaaꞌlonni calla ikkinota ammanneemmo. Qarru iilleennanke kaaꞌlannonkehu wolu nookki yannara Yihowa woꞌmanka woyite addaxxinanniha ikkinota wodanchineemmo. Vilaadimiiri yinanni rodii togo yiino: “Usuru mine noommo yannara Yihowa ledo nooe jaaloomi albinni roore kaajjino; hatte yannara iillinoe  qarra dandee saeemmo gede kaaꞌlannoehu Yihowa calla ikkino daafira iso albinni roore addaxxa rosoommo.”

8. (a) Yihowa disoorramannoho yineemmohu mayiraati? (b) Magano gaaꞌlineemmo kinchonke assiꞌnummoro afiꞌneemmo horo maati? (Faarso 62:6, 7)

⁸ Yihowa disoorramannoho. Jawu kinchi gede Yihowa kaajje heeꞌrannoho hattono disoorramanno. Yihowa akattanna isi assara hedinori horo disoorramanno. (Mil. 3:6) Addaaminna Heewani Yihowara finqilirono Yihowa mannu oosora hedinore disoorrino. Soqqamaasinchu Phaawuloosi borreessinonte gede Yihowa ‘isiniira badhe diwodhanno.’ (2 Xim. 2:13) Hatto yaa ikkirino ikkiro woy wolootu assitannori ayereno ikkiro isi akattasi, assara hedinore woy biddishshasi horo disoorranno yaate. Yihowa soorramannokki Magano ikkino daafira qarru yannara kaaꞌlannonketanna albillittete yanna daafira uyinonke hexxo wonshannota anfoommo.—Faarso 62:6, 7 nabbawi.

9. Tatiyaana woꞌnaalshinni maa rosootto?

⁹ Yihowa akatta hattono isi mannu oosoranna uullate hedinore hiincineemmo woyite tini iso Gaaꞌlinanni kinchonke assineemmo gede kaaꞌlitannonke. Togo assa qarru yannara wodanaaꞌmineemmonna Yihowara ammanamme heeꞌneemmo gede kaaꞌlitannonke. (Far. 16:8) Ammanasenni kainohunni mininni fultannokki gede agamboonniseta Tatiyaana yinanni rodoo hatto assase kaaꞌlitinose; ise togo yitino: “Lowo geeshsha callatoomma; umi qara tini qarra ikkitinoe. Duucha woyite hexxo mudhoomma.” Ikkirono ise iillinose fonqoli Yihowanna isi hedinori ledo xaadooshshe afiꞌrinoha ikkinota wodanchituti, wodanaaꞌmitino hattono fonqolo dandiite saꞌꞌate jawaante afidhino. Ise ledde togo yitino: “Kuni coyi ikkinohu mayiraatiro wodanchaꞌya qarru iillinoehu Yihowara yeenna ikkinota qaageemma gede assitinoe; tini qolte umiꞌya daafira calla heda agureemma gede kaaꞌlitinoe.”

10. Xaanni Yihowa gaaꞌlineemmo kinchonke assiꞌra dandiineemmohu hiittoonniiti?

¹⁰ Muli yanna giddo Yihowa albinni roore addaxxineemmo gede assanno qarri iillannonke. Yihowa isira ammanamme heeꞌneemmo gede hasiisannonkere baalare asse kaaꞌlannonketa albinni roore addaxxineemmo yanna xaati. Tenne assa dandiineemmohu hiittoonniiti? Qullaawu Maxaafi xaggenna yannankera nooha Yihowa Farciꞌraasine woꞌnaalsha nabbawi. Yihowa soqqamaanosi kaaꞌlino gara wodanchi. Togoo xagge seekkite hedi. Tenne assakki Yihowa gaaꞌlatto kincho assiꞌratto gede kaaꞌlitannohe.

YIHOWATE GEDEE AKATTA HEEDHANNOꞌNE GEDE ASSIDHE

11. Yihowate gedee akatta heedhannonke gede assiꞌra hasiꞌneemmohu mayiraati? (“ Labballu Wedellu Roduuwi Fushshiꞌra Dandiitanno Mixo” yitanno saaxine lai.)

¹¹ Yihowa gaaꞌlinanni kincho ikkasi leellishinohu hiittoonniitiro ronsoommo. Hanni xa isite gedee akatta heedhannonke gede assiꞌra dandiineemmo gara laꞌno. Tenne assinummo kiiro songo albinni roore dhaawate roore qixxaamboommore ikkineemmo. Lawishshaho Yesuusi Simoonira Keefa (“Pheexiroosi”) yee suꞌma fushshinosi; hatto yaa ‘Jawa Kincho’  yaate. (Yoh. 1:42) Tini Pheexiroosi songo jawaachishannohanna sheshifachishannoha ikkannota leellishshannote. Songote cimeeyye “lowo kinchi gede caale” ikkitannota kulloonni. Tini insa songote giddo noore agartanno gara leellishshannote. (Isa. 32:2) Ikkollana Yihowate gedee akatta heedhannonke gede assiꞌnummoro baalunku mimmito jawaachisha dandiineemmo.—Efe. 5:1.

12. Wolootaho golo ikka dandiineemmo doogga xawisi.

¹² Golo ikke. Kalaqamu dano kalaqantanno yannaranna dagate gaance woy olu kaꞌꞌanno woyite ammanate roduuwinkera golo ikka dandiineemmo. ‘Goofimarchu barri’ ikkito roore bushshanni hadhanno woyite, albinni roore ammanate roduuwanke kaaꞌlineemmo faro afiꞌneemmoti dihuluullissannote. (2 Xim. 3:1) Qoleno insa sheshifachishanna banxeemmonsata leellisha dandiineemmo. Tenne assa dandiineemmoti mitte doogo gambooshshe dagganno woyite hasaawisatenna sheshifachishate; konni garinni gambooshshu bayichi baxisannohanna jawaachishannoha ikkanno gede assineemmo. Xaa yannara batinyu manni mimmito miicanno. Tini ammanate roduuwinke lowo geeshsha yaaddanno gedenna dibanxanninke yite heddanno gede nafa assitara dandiitanno. Hakko daafira ammanate roduuwinke gambooshshe dagganno woyite, insa jawaachishatenna banxeemmonsata leellishate dandiinummore baala assa hasiꞌneemmo.

13. Songote cimeeyye qarru yannara wolootaho golo ikka dandiitannohu hiittoonniiti? (Misileno lai.)

¹³ Songote cimeeyye, ammanate roduuwinsara addi addi qarri iillannonsa woyite golo ikka dandiitanno. Kalaqamu dano iillitanno woyite woy hedeweelchu dhibbi amadannonsa woyite songote cimeeyye ammanate roduuwansa kaaꞌlate coye bayichonko qineessitanno. Ayyaanaamittetennino kaaꞌlitannonsa. Mittu songote cimeessi shaqqillunni coyiꞌrannoha, mararannohanna hasaaphinanni woyite  macciishshannoha ikkiro roduuwu isiwa shiqqe kaaꞌlo xaꞌmiꞌra qarra diꞌꞌikkitannonsa. Togoo akatta roduuwu banxanninsata affanno gede assitanno; tini qolte uyinanninsata Qullaawu Maxaafi aana xintantino amaale harunsa shota ikkitannonsa gede kaaꞌlitanno.—1 Tes. 2:7, 8, 11.

14. Ammannannire ikkinoommota leellisha dandiineemmohu hiittoonniiti?

¹⁴ Ammaꞌninannire ikke. Roorenkanni qarru yannara wolootu ammaꞌnitannonkere ikka hasiꞌneemmo. (Law. 17:17) Wolootu albinni roore ammaꞌnitannonkere ikka dandiineemmohu hiittoonniiti? Lawishshaho eꞌnoommo qaale agadhinenna saate ayirrinseemmore ikkate dandiinummore baala assine woꞌmanka woyite Yihowa baxanno akatta heedhannonke gede assiꞌrate sharrama dandiineemmo. (Mat. 5:37) Qoleno kaaꞌlo hasiissannonsare mitore assine kaaꞌla dandiineemmo. Hattono songote giddo uyinoonninke looso uyinoonninke biddishshi garinni loonse guda hasiꞌneemmo.

15. Songote cimeeyye ammaꞌninannire ikkansa songo kaaꞌlitannohu hiittoonniiti?

¹⁵ Songote cimeeyye ammaꞌninannire ikkansa songo kaaꞌlitannohu hiittoonniiti? Halashshaano kaaꞌlo hasiissannonsa yannara aye woyiteno songote cimeeyye hasaawisa dandiitannota affuro wodanaaꞌmitanno. Qoleno halashshaano songote cimeeyye insa kaaꞌlate qixxaabbinore ikkitinota afansa, dancha gede towaattannonsata huwattanno gede assitannonsa. Songote cimeeyye amaale uyitanno woyite uminsa  hedo ikkikkinni Qullaawa Maxaafanna ammanaminohunna wodanaamu borojjichi qixxeessino borro horoonsidhannoha ikkiro roduuwu ammantannonsa. Mittu cimeessi mittu rodii fojo wolootaho hasaawannokkiha ikkironna coyiꞌrino qaale agadhannoha ikkiro tinino roduuwu ammantannosi gede assitanno.

16. Mitte giddore ikkanke ninkeno wolootano kaaꞌlitannohu hiittoonniiti?

¹⁶ Mitte giddore ikke. Gara ikkinore assate mitte giddore ikkineemmohanna mitto coye doodhineemmo woyite Qullaawu Maxaafiha xintu seera harunsineemmoha ikkiro, wolootaho dancha lawishsha ikkineemmo. Qullaawa Maxaafa xiinxallineemmohanna ammananke kaajjishiꞌneemmoha ikkiro, Yihowaranna biddishshisira ammanammoommore ikkineemmo. Kaphu rosonna Yihowate ledo sumuu yitannokki hedo bande anfeemmo; hattono togoo coyinni didogammeemmo. (Efe. 4:14; Yai. 1:6-8) Yihowaranna isi uyino hexxora noonke ammana busha duduwo macciishshineemmo woyite beꞌe yineemmokki gede assitannonke. (Far. 112:7, 8) Qoleno qarru iillanni noonsare kaaꞌla dandiineemmo.—Far. 112:7, 8.

17. Songote cimeeyye wolootu ammana kaajjitanno gede kaaꞌla dandiitannohu hiittoonniiti?

¹⁷ Songote cimeeyye jilba saꞌannokkire, umonsa qeeꞌlitannorenna amanyoote agadhitannore ikka hasiissannonsa. Kuri labballi wolootu wodanaaꞌmitanno gedenna Yihowara noonsa ammana ‘kaajjitanno gede’ kaaꞌlitanno. (Tit. 1:9; 1 Xim. 3:1-3) Songote cimeeyye halashshaanote dancha lawishsha ikkitenna insa towaatte, ganyite gambooshshe dagganno gede, soqqansho fultanno gedenna hojju xiinxallo assidhanno gede kaaꞌlitannonsa. Ammanate roduuwinsara qarru iillanno woyite songote cimeeyye, woꞌmanka woyite Yihowanna isi uyino hexxo illachishshanno gede jawaachishshe insa kaaꞌla dandiitanno.

18. Yihowa guwisanna albinni roore isiwa shiqa hasiꞌneemmohu mayiraati? (“ Albinni Roore Yihowawa Shiqa Dandiineemmo Doogga” yitanno saaxineno lai.)

¹⁸ Yihowata dhagge ikkitanno akatta xiinxallinummohu gedensaanni ninkeno Moote Daawiti gede “Gaaꞌleemmo Kinchiꞌya Yihowara guweenyu ikkosi” yineemmo. (Far. 144:1, NW) Woꞌmanka woyite Yihowa addaxxa dandiineemmo. Yihowa heeshshonke diro woꞌma geedhineemmo woyite nafa ayyaanaamittetenni lanteemmo gede kaaꞌlannonketa addaxxine iso “goloꞌyaati” yaa dandiineemmo.—Far. 92:14, 15.