WEDELLOOTU XAˈMITANNO XAˈMO
Anniˈyanna Amaˈya Boohaareemmota Hoolannoehu Mayiraati?
Jaallakki lamalate jeefora minensa marte boohaarattora koyissinohe. Haˈroni yite annakkinna amakki xaˈmittota, insa “Dihaˈratto” yee kaajjishe qolihe. Insa hatto yiita hakkeya dhagge diassiˈrootto. Mayira yiniro, albano xaˈmiteenna hatto yee qolinohe.
Konni birxichira
Anniˈyanna amaˈya yuummore baala deeˈnilla yitannohu mayiraati?
Anniˈyanna amaˈya yuummorira maahoyye yaannoe gede maa asso?
Anniˈyanna amaˈya yuummore baala deeˈnilla yitannohu mayiraati?
Annikkinna amakki duucha woyite deeˈni yitannoheha ikkiro, insa boohaarattora horo hasidhannokkiha lawahera dandaanno.
Meeri yinanni wedellitte mobayile hirrise yannara hatto yite heddino. Ise togo yitino: “Anniˈya hiittoo appilikeeshiine dirrisiˈreemmaro, hiittoo manni ledo hasaaweemmaronna insa ledo meˈˈe saate geeshsha hasaaweemmaro kulannoha lowo seera fushshino. Hatte yannara, jaallaˈya kayinni baxxu gede ikka dandiitanno!”
Hanni hedi: Meeri anni ise boohaartannota hoolate woˈnaalanni nooha lawaahe? Iso yaachishinori maa ikkara dandaanno?
Oonfanni ranke kultanno wodho baxitto gede oofattota hooltahera dandiitanno; ikkirono danotenni agartannohe; maatete seerino hattooti
Togo assate woˈnaali: Hanni ati oosote annaati yine hendo. Wedellichu beettikkira mulella mobayile hirte kaootto. Mayi mayi huluullahera dandaanno? Huluullinohe coyi kalaqamannota hoolate, hiittoo seera fushshatto? Wedellichu beettikki, ‘Ani boohaareemmota dibaxxinanni’ yiihero mayite qolatto?
“Anniˈya duucha woyite, ‘Hanni ati ane ikkoottaro maa assattaro hedi’ yaannoe. Isi yii garinni hedaˈya, fushshino seeri kaaˈlannoe garanna hakkoye seera mayira fushshinoro huwateemma gede kaaˈlitinoe. Ooso heedhoommeˈˈero, anino anniˈya ane assi yaannoere asse yeemmansaha lawaae.”—Taaniya.
Anniˈyanna amaˈya yuummorira maahoyye yaannoe gede maa asso?
“Cance coyiˈrama, ateno annakkinna amakkino daafursitannolla ikkiina tirtannori dino. Nyerri yaattoha ikkiro, annikkinna amakki ate qaaqqimma digudinona yite wolapho ledde aa gibbahera dandiitanno.”—Richaardi.
“Anniˈyanna amaˈya mitto seera fushshitannohu danchare heddeetilla. Insa hatto assitannohu boohaareemmata hoolate ikkikkinni, roore woyyino garinni boohaareemma gede yaano qarru giddora eummakki boohaarammara yiteetilla.”—Ayiv.
Qullaawu Maxaafi biddishsha: “Gowwu manchi hanqosi gudise leellishanno; egennaamu kayinni aarasi cincatenni sayisanno.”—Lawishsha 29:11.
“Silke horoonsiˈreemma gara kulannoha anniˈya fushshino seera isi afikkinni diigate woˈnaaloomma. Hashshiishiˈre jaallaˈyara sokka borreessate woy anniˈya fajjinoekki appilikeeshiine dirrisiˈrate woˈnaaleemma. Jeefote kayinni isi ani maaxame asseemmare afi; hakkiinni xaate ane ammanannokki daafira roore furro fuuqqo hoˈlannoe seera fushshi. Hoolloonni coye maaxamme assate woˈnaala gawajjitannolla.”—Maari.
“Cinci. Annikkinna amakki, fushshino seera bayichonko soorra hoogara dandaanno; kayi insa fushshino seera ayirrissanni noottota laˈˈanno woyite, hasiˈroottore assatto gede albinni roore fajjahera dandaanno.”—Melinda.
Qullaawu Maxaafi biddishsha: “Kiˈne ooso! . . . baalunku coyinni iltinoˈnerira hajajammensa.”—Qolasiyaasi Sokka 3:20.
“Mitto coye afiˈrate gaagaale gaˈna tirtannori dino; hasiˈroottore afiˈrateno dikaaˈlitanno.”—Nataale.
“Annunna ama, oosonsa coye heeshshi gotti assite heddannore ikkitara hasidhanno. Hakko daafira, annaˈyanna amaˈya hasaawiseemmo woyite, giddoˈya giira fushshiˈrantenni wodanaaˈme ammansiisanno garinni coyiˈrate woˈnaaleemmo. Hatto asseemmo woyite, insa yeemmore roore macciishshannoe.”—Jooseefi.
Qullaawu Maxaafi biddishsha: “Annakkinna amakki ayirrisi!”—Efesooni Sokka 6:2.