Jaallakki gudisante dagoomittete miidiya horoonsidhannoha, hattono duucha woyite tenne calla hasaabbannoha ikkara dandaanno. Insa atera togoo akkawunte noohekki daafira arrassitannoheha nafa ikkara dandaanno. Tenne hajo daafira afa hasiissannoheri maati? Qoleno maa assa dandaatto?

 Horoonsiꞌrattokkihu diate callaati. Batinyu annuwinna amuuwi oosonsa dagoomittete miidiya horoonsidhannota hooltanno. Insa hooltannohu miidiya horoonsiꞌra konni woroonni noo qarra afidhinota affino daafira ikkara dandaanno:

•   quwa saꞌino yaaddonna wole surrete qarra

•   teeda baꞌino misilla, maaeela sokkanna misilla, hattono interneetete widoo siꞌannore

•   jaallate mereero coyi kawa kaꞌaa higa

 Batinyu wedellooti dagoomittete miidiya horoonsiꞌra uminsa agurtino. Kuri wedellooti miidiyu kaaꞌlantenni roore gawajjanni noonsata uminsa huwattino. Hanni mitu wedellooti lawishsha laꞌno:

•   Pirisilla yinanni wedellitte, dagoomittete miidiyi roore hasiisanno coyira horoonsidhanno yanna gudanni nooseta wodanchitino.

•   Jeremiy yinanni beetti, dagoomittete miidiya faꞌnanno woyite teeda baꞌino misilla fatalakki yite dagganni waaddannosi; tenne hooꞌlano gooddo ikkitinosi.

•   Betaaniy yinanni beetto dagoomittete miidiyi wolootu assitannore quwa saꞌe heddanno gede assinose.

 “Dagoomittete miidiya faꞌneemma appilikeeshiine hunoomma; hawalleno hunumma. Hunaꞌyanni digaabbeemma. Xa roore hasiisannoe coyira albinni roore yanna afiꞌroomma daafira tashshi yiinoe.”—Siyera.

 “Dagoomittete miidiyi araado ikkanno garanna wolootu miidiyu aana fushsheemmare lae coyiꞌrannorira yaadeemma gara dibaxoomma. Akkawunteꞌya huna shota diꞌꞌikkitinoe; kayi hunummati bayichonko harshammo afiꞌroomma. Xa dagoomittete miidiya horoonsiꞌreemmakki daafira, roore salaame afiꞌroomma.”—Kaati.

 Annikkinna amakki wodho ayirrisi. Hanqo woy gunguma giwatenni, annikkinna amakki fushshino wodho ayirrisattohanna gikki yoottoha ikkakki affanno gede assi.

 Qullaawu Maxaafi biddishsha: “Gowwu manchi hanqosi gudise leellishanno; egennaamu kayinni aarasi cincatenni sayisanno.”—Lawishsha 29:11.

 Mitootu dagoomittete miidiya annakkinna amakki maaxante horoonsiꞌratto gede woy ewelummakki bande anfannikkita baxxitino akkaawunte kalaqiꞌratto gede amaaltahera dandiitanno. Hatto assa kayi soꞌrote! Mooraanchu gede maaxantanni heeꞌrattoha ikkiro, roore yaadatto woy tiiꞌꞌikki bushiishannohe. Qoleno tenne annikkinna amakki iille afino barra, qarru giddo uwatto; insara layinkimeeshsho ate ammana qarra ikkitannonsa.

 Qullaawu Maxaafi biddishsha: “Baalunku coyira ammanammoommore ikkine heeꞌra hasiꞌneemmo.”—Ibiraawoota 13:18, Haaro Alame Tiro.

 Umikki murcidhe qaafo adhi. Aleenni qummi assini wedelli gede, atino dagoomittete miidiya horoonsiꞌra aguratto gede assannoheha batinye korkaata hedattoha ikkara dandaanno. Dagoomittete miidiya horoonsiꞌrakki gawajjitanni nooheti xabbe leeltuhero, annikkinna amakki yitinohe daafira calla ikkikkinni ati umikki murcidhe horoonsiꞌra facci assite aguri. Hatto ikkiro, darawokki mayira aguritto yitannohe woyite komo komo diyaatto; insano hakkeya diarrassitannohe.

 Qara hedo: Annikkinna amakki wodho ayirrisi; qoleno insa yiinohehura calla ikkikkinni ati umikkinni baxxe qaafo adha dandaatto gede, insa hedo ledo sumuu yaatto gede assannohere hedate woꞌnaali. Dagoomittete miidiya albillitte horoonsiꞌrattoha ikkara dandaanno; xaara kayinni isiweelo heeꞌra dandaatto.