Konni birxichira

•  Mannu ledo xaande hasaawa

•  Hasaawa hanafa dandiinanni gara

•  Darawokki yitinore

 Mitu manni, borrote sokka soyate ledo heewisiinsiro mannu ledo xaande hasaawa yaachishshanno yee hedanno.

 “Coyiꞌroottore biddi assa woy badhera qola dandaattokki daafira, mannu ledo xaande hasaawa qarrissanno.”—Ana.

 “Borrote sokka soya balanxe qaddaꞌnoonni pirogiraame gedeeti; mannu ledo xaande hasaawa kayi mannu albaanni uurrine shiqinshanni pirogiraame gedeeti. Mannu ledo hasaaweemmo woyite, soꞌreemmokki gede lowo geeshsha buxuqqameemmo!”—Jiini.

 Noore coyiꞌniro, mannu ledo xaade hasaawate dandoo hasiissannohe yanna daase digattanno. Lawishshaho, jaalla kalaqiꞌrate, looso afiꞌratenna loosu giddo keeshshate, woy dirikki iillanno woyite baxillu jaalooma kalaqiꞌrate mannu ledo xaade hasaawate dandoo hasiissannohe.

 Ikkollana mannu ledo xaadde hasaawate waajja dihasiissannohe. Manna ille qasse laꞌꞌa waajjattoha ikkittoro nafa, tenne dandoo lossiꞌra dandaatto.

 “Mito woyite gara ikkinokkire coyidhe saalakki digattanno. Hakko daafira, horo soꞌra dihasiissannoe yee heda digaraho.”—Neeli.

•   Xaꞌmo xaꞌmi. Mannu hasaawa baxara dandaanno hajo hedi; hakkii hattee hajo kaxxite hasaawa kayisi. Lawishshaho:

   “Xaa geya haꞌrootto bayichi giddo roore baxoottohu hiikkoyeti?”

   “Tini dancha webisayiteeti. Laꞌe egennootto?”

   “. . . yinayire macciishshite egennootto?”

   Hasaawissanni nootto manchi ledo mitto assannoꞌnere hedittoro isinni, mitto coye badde xaꞌma dandaatto. Lawishshaho, isino atino rossinanni rosi mini woy looso loossinanni bayichi mitto ikkara dandaanno. Hatto ikkiro, lamunku affinoonnire kayisse xaꞌmo xaꞌmite hasaawa hanafa dandaatto.

   “Ati afate quqquxamattotanna mannu mayyee qolannoro afa hasiꞌratto xaꞌmuwa hedi.”—Maaritsa.

   Qorowishsha: Qortanni noottoha lawattokki gede xaꞌmo hoode hoodete xaꞌmitooti. Qoleno manchu saalfatanno gede assitanno xaꞌmo xaꞌmitooti. Lawishshaho, “Lowo geya waajjishannoheri maati?” woy “Woꞌmanka woyite haanja uddano uddiꞌrattohu mayiraati?” yitanno gedee xaꞌmo xaꞌminiro mannu hagiidha hoogara dandaanno. Layinki xaꞌmo isenni hattoo uddano uddiꞌrinohura bushiishshanni noottosiha lawissanno.

   Qoleno hasaawu qorto lawannota hoolate, manchu dawaro qolara albaanni woy qolihu gedensaanni, xaꞌmootto coyi daafira noohe lao coyiꞌra dandaatto. Wole yaattonni, qaalu xaꞌmo ikkikkinni lamunku hedoꞌne coyidhinanni hasaawa ikkanno gede assi.

   Qullaawu Maxaafi biddishsha: “Mannu wodanira noo hedo diimete wayi gedeete; wodancha afiꞌrino manchi kayinni hakkiinni hinkiiꞌlanno.”—Lawishsha 20:5.

•   Seekkite macciishshi. Coyiꞌrate dandoonni roore macciishshate dandookki, hasaawu sufanno gede assate kaaꞌlitannohe.

   “Ledoꞌya hasaawanni noo manchi daafira mitto haaro coye afate woꞌnaaleemma. Hakkuyi gedensaanni, wole yannara hasaambeemmo woyite dancha xaꞌmo xaꞌma dandeemma gede, hakku manchi umo kulinoere qaagate woꞌnaaleemma.”—Tamara.

   Qorowishsha: ‘Aantete mayyookka?’ yite yaaddooti. Seekkite macciishshattoha ikkiro, manchu qolino dawaro kaxxite mitore yaa dandaatto.

   Qullaawu Maxaafi biddishsha: “Mannu baalu macciishshate rahinoha, coyiꞌrate . . . muddamannokkiha ikko.”—Yaiqoobi 1:19.

•   Manchu daafira hedattota leellishi. Hasaawissanni nootto manchi daafira godowinta hedattoha ikkiro, hasaawiꞌne roore baxisannoha ikkanno.

   “Hasaawissanni nootto manchi coyiꞌrannore addinta naadattota afanno gede assittoro, hasaawu sae sae qiidara dandaannoha ikkirono, roore anga baxisannoha ikkanno.”—Maari.

   Qorowishsha: Manchoho quwa saꞌe giddora eꞌooti. Lawishshaho, “Dancha jakkeettaati. Meu birrinni hidhitto?” yaa quwa saꞌꞌate!

   Qullaawu Maxaafi biddishsha: “Mittu mittunku woleho woyyannore hedo ikkinnina, umisira woyyannore calla laoonke.”—Filiphisiyusi Sokka 2:4.

 Hasaawa jeefisate mayyaa dandaatto? Joordaan yinanni beetti togo yiino: “Hasaawa danchare coyidhe gumulate woꞌnaali. Lawishshaho, ‘Dancha hasaawa hasaambummowe’ woy ‘Keeru barra ikkohe’ yee jeefisa, hakkuyi manchinni wirro xaadatto woyite wole dancha hasaawa hasaawate doogo fantanno.”