“Hashshihunni 7:00 saate geeshsha keeshshine mini looso loosa baasa daafursitanno. Hatte saatera leellannoehu goxicho callaho.”—Deevidi.

 “Mito woyite xiinxallanni hashshihunni 10:30 geeshsha keeshsheemma; hakkiinni, rosu minira haꞌrate 12:00 saatenni kaeemma. Horo goxichu nookki heeshshooti!”—Tereesa.

 Aterano mini loosi kokke iillinoheha lawannohe? Hatto ikkiro, kuni birxichi kaaꞌlahera dandaanno.

•  Rosiisaano mini looso uyitannohu mayiraati?

•  Xiinxallote kaaꞌlitanno amaale

•  Darawokki yitinore

 Mini loosi kaaꞌlannohe doogga giddo gama:

•   Egennokki lexxitanno gede assanno

•   Ammaꞌninanniha ikkatto gara rosatto

•   Yannakki danchu garinni horoonsiꞌratto gara rosatto

•   Kifilete rosoottore hawattokki gede kaaꞌlannohe a

 “Rosiisaano mini looso uyitannohu rosaano rossinore mitte maccanni macciishshite mittetenni duna agurte rossinore loosu aana hosiissanno gede kaaꞌlateeti.”—Maari.

 Roorenkanni shallagotenna sayinsete rosi qarra tirate dandookki lexxitanno gede assanno. Egennaammu yitanno garinni, surrekki konni garinni qajeelsiꞌrakki surrekki giddo haaro doogga kalaqantanno gede assitanno. Hakko daafira mini loosi surrekkira ispoortete gedeeti.

 Mini loosi kaaꞌlannoheti leeltuherono leella hoogguherono gataakkireeti. Danchummasi kayinni, uyinanniheha mini loosi geeshsha ajisha dandaattokkiha ikkirono, loosse gudatto yanna haransa dandaatto. Hanni tenne assa dandaatto gara laꞌno.

 Mini looso loose guda qarra ikkitannoheha ikkiro, hayyotenni loosa kaaꞌlitahera dandiitanno. Aane noore assate woꞌnaali.

•   Kaaꞌlitanno Amaale 1: Balaxxe qixxaawi. Qullaawu Maxaafi, “Jawaatu manchi hedo jirotenni xaadissanno” yaanno. (Lawishsha 21:5) Mini looso loosattora albaanni, hasiisannohe uduunne baala qixxeessidhe mulekki wodhi; tini ofolloottowiinni kaittokkinni mini loosokki loosiꞌratto gede kaaꞌlitannohe.

   Qoleno, hedokki billaallitanno gede assannori nookki bayicho doodhi. Mitootu cancu nookkitenna caabbichu dancha gede xawanno kifilera loosa baxxanno. Wolootu kayinni wole bayicho lawishshaho maxaaffate minira hadhe loosa baxxanno.

   “Maa loosattoro daftaraho woy kalaanderete borreessite amaxxakki, yannakki hayyotenni horoonsiꞌrate kaaꞌlitannohe. Noohehu mini loosi hiikkoyetironna loosse gudattohu mamooteetiro afittoro yaaddokki ajisha dandaatto.”—Richaardi.

•   Kaaꞌlitanno Amaale 2: Qinaawoottoha ikki. Qullaawu Maxaafi, “Baalunku coyi garunninna amanyootunni ikko” yaanno. (1 Qorontoosi 14:40) Hakko daafira, mini looso loosatto woyite balaxxe hiikkoye loosattoronna hakkiinni aanchite hiikkoye loosittoro woyyannoro doodhi.

   Mitootu balaxxe kaajjannoha loossanno. Wolootu kayinni aante loossannohura jawaante afidhanno gede shotannonsaha balaxxe loossanno. Lamente giddo atera hiitti woyyitannoro doodha dandaatto.

   “Loosattore borreessite amaxxakki maa loosattoronna hiikkonne balaxxe loosattoro afate kaaꞌlitannohe. Hatto assittoro mini loosokki hedootto garinni loosatto daafira loosu batiꞌrinoe yite diyaadatto.”—Hayidi.

•   Kaaꞌlitanno Amaale 3: Looso rakke hanafi. Qullaawu Maxaafi, “Jawaattine loosse ikkinnina, ceeꞌmaleeyye ikkitinoonte” yaanno. (Roomu Sokka 12:11) Mini looso loosatto yanna woluri gudahera wodhitooti.

   Teyo gaꞌa yaanno manni duucha woyite loosonsa yannatenni guda didandaanno; qoleno kabbaaname loosanno daafira loosinsa isilancho diꞌꞌikkanno. Uyinoonniheha mini looso dandaamihe deerrinni bayichonko loosittoro yaaddotenni gatatto.

   “Mini looso rosu mininni daanni heeꞌrenni loosummaro woy wole looso bayichonko loosummaro gedensoonni diyaadeemma; wolere asseemma yannano dihoogeemma.”—Seriina.

   KAAꞌLITANNO HEDO: Barru baala mini looso loosatto yanna mitte ikkito. Tini ateneeto qeeꞌlatto gedenna pirogiraamekki mittu garita ikkitanno gede kaaꞌlitannohe.

•   Kaaꞌlitanno Amaale 4: Hedokki bebbeehannore hooꞌli. Qullaawu Maxaafi, “Illekki dhaabbe laꞌo” yaanno. (Lawishsha 4:25) Konne biddishsha harunsatto gede, hedokki billaallitanno gede assanno coye hakko iso elektiroonikisete uduunne hooꞌla hasiissannohe.

   Mini looso loossanni heedhe webisayite horoonsiꞌrattoha woy silketenni sokka soyattoha ikkiro, mini looso loosse gudatto yanna ero lexxitara dandiitanno. Hedokki bebbeehannore hooꞌlittoro kayinni, yaaddokki ajjanno, wolere assateno yanna afiꞌratto.

   “Mobayile, kompiyutere, televizhiinenna viidiyote godoꞌle hedo billaallitanno gede assitanno. Mobayileꞌya hattono hedoꞌya bebbeehannoha wole elektiroonikisete uduunne cufaꞌya kaaꞌlitinoe.”—Joeeli.

•   Kaaꞌlitanno Amaale 5: Quwa saꞌooti. Qullaawu Maxaafi, “Quwa saꞌinannikkire ikkitinoonniti manna baalaho leeltona” yaanno. (Filiphisiyusi Sokka 4:5, Haaro Alame Tiro) Hasiisanno woyite mereeroho fooliishshiꞌrakki, mini loosi duha ikkannohekki gede kaaꞌlitannohe. Lawishshaho gobbaagge fulte milli yaa, biskilliite kada woy doda dandaatto.

   Tenne amaale harunsitanni heedheennanni mini loosi lowo geeshsha batiꞌrinoheha lawihero rosiisaanokkira kuli. Insa mini looso loosate dandiittore baala assitanni noottota affuro, mitore biddi assitara dandiitanno.

   “Mini looso loosate yaaddanni hagiirrikki baꞌꞌara wodhitooti. Dandiittore baala assi. Mini loosi woy woluri togoori heeshshokki xaxxawe amadara wodhitooti.”—Juuliya.

 Ateneeto togo yite xaꞌmi:

•   Mini looso loosate hasiisannoe uduunni maa maati?

•   Mini looso loosate roore injiitannoe yanna hiittenneeti?

•   Hedoꞌya billaallitukki xiinxalla dandeemmohu hiikkooti?

•   Teyo gaꞌa yaate rosicho agura dandeemmohu hiittoonniiti?

•   Mini looso rahe gudeemmokki gede hedoꞌya billaallisannori maati?

•   Hedoꞌya bebbeehantanno gede assannoha elektiroonikisete uduunne woy wolere hooꞌla dandeemmohu hiittoonniiti?

•   Mini looso looseemmo woyite quwa saeemmokki gede maa assa dandeemmo?

 QAAGIISHSHA: Uyinoonniheha mini looso loosatto gari leellihekki sammi yite saꞌooti. Xaꞌmo heedhuhero, kifiletenni fulattora albaanni rosiisaanchokki xaꞌmi.