“Qullaawa Maxaafa nabbawate woꞌnaaloomma; kayi jawa maxaafa ikkino daafira gude diafeemma yee hedoomma!”—Biriyaana

 Atino hatto yite hedde egennootto? Hatto ikkiro, kuni birxichi kaaꞌlannohe!

•  Qullaawa Maxaafa nabbawa kaaꞌlitannohehu hiittoonniiti?

•  Qullaawa Maxaafa ma garinni nabbawa dandaatto?

•  Darawokki yitinore

 Qullaawa Maxaafa nabbawa ceeꞌmishshannota labbannohe? Hatto ikkiro, kuni dhagge ikkannore diꞌꞌikkino. Qullaawu Maxaafi ciiggaadda fidallanni borreessinoonniha, kumunni kiirranni qoola afiꞌrinohanna mitte misileno nookkiha ikkino daafira, televizhiinenna viidiyo laꞌꞌate geeshsha baxisannokkiha lawahera dandaanno.

 Kayi hanni konni garinni hedate woꞌnaali: Muxxe jiro worroonnita biꞌree saaxine afiꞌrittoro giddo mayi nooro laꞌꞌate diquqquxamatto?

 Qullaawu Maxaafi hattee muxxe jiro amaddino saaxine gedeeti. Qullaawu Maxaafi giddo konni woroonni noore assate kaaꞌlitannohe hayyo no:

•   Danchare doodhate

•   Annikkinna amakki ledo sumuu yee heeꞌrate

•   Dancha jaalla kalaqiꞌrate

•   Yaachishannore dandee heeꞌrate

 Kuni biꞌree maxaafi yannankera togo kaaꞌlankera dandaannohu hiittoonniiti? “Qullaawa Borro baala Maganunnihu Qullaawu Ayyaani kulanna [borreessinoonnita]” ikkitino daafiraati. (2 Ximootewoosi 3:16) Hatto yaa Qullaawu Maxaafi giddo noo amaale borreessinanni gede assinohu Woꞌmunkura Aliidi Kalaqaanchooti yaate.

 Tenne assa dandaattoti mitte doogo, Qullaawa Maxaafa qaccetenni qaccete geeshsha nabbawate. Hatto assakki, Qullaawu Maxaafi xaphoomunni mayi daafira kulannoro afate kaaꞌlitannohe. Qullaawa Maxaafa nabbawa dandaattoti addi addi doogga no. Hanni lame lawishsha laꞌno:

•    Qullaawu Maxaafita 66nta maxaaffa aantensa garinni, yaano Kalaqamu maxaafinni kayisse Ajuujate maxaafi geeshsha nabbawa dandaatto.

•    Qullaawa Maxaafa diru aante garinni yaano xaggete giddo kulloonni ikkito woꞌmitino aante garinni nabbawa dandaatto.

 Kaaꞌlitanno amaale: Maganu Qaale Xiinxalli yitanno borrora “Yesuusi Uulla Noo Waro Ikkitinota Qara Qara Coyibba” yaannohu aante aantete fulino birxichi hunda, Yesuusi uullate aana heeꞌrino waro assinoha qara qara coye aantensa garinni kulloonni.

 Layinki doogo, qarra ikkinohe coyi ledo xaadooshshe afidhinota Qullaawu Maxaafi xagge doorte nabbawi. Lawishshaho:

•   Addaxxatto jaalla kalaqiꞌra hasiꞌratto? Hatto ikkiro, Yoonaataaninna Daawiti xagge nabbawi. (1 Saamueeli fooliishsho 18-20) Tenne xagge giddo, Yoonaataani Daawiti baxanno gede assitinota Daawitita dancha akatta wodanchate woꞌnaali.

•   Albinni roore busha coye giwattoha ikka hasiꞌratto? Yooseefi fonqolo qeele saino gara kultanno xagge nabbawi. (Kalaqama fooliishsho 39) Tenne xagge nabbawatto woyite, Yooseefi bushare giwate jawaante afiꞌrinohu ayewiinniitiro wodanchate woꞌnaali.

•   Huuccatto assiꞌra kaaꞌlitannohe gara afa hasiꞌratto? Nehimiya xagge nabbawi. (Nehimiya fooliishsho 1 nna 2) Tenne xagge giddo, Nehimiya assiꞌrino huuccatto mageeshshi wolqa afidhinoro leellishshanno taje huwatate woꞌnaali.

 Kaaꞌlitanno amaale: Qullaawa Maxaafa nabbawatto woyite, nabbawattore illachisha dandaatto gede cancu nookkiwa nabbawi.

 Sayikkihunni, mitte Qullaawu Maxaafi xagge woy faarso doorte nabbawi; hakkiinni nabbawoottori heeshshokkira kaaꞌlannohe gara hedi. Nabbawittohu gedensaanni ateneeto aante noo xaꞌmuwa xaꞌmi:

•    Yihowa tenne hedo Qullaawu Maxaafi giddo borreessinanni gede assinohu mayiraati?

•    Tenne hedonni Yihowanna doogosi daafira maa roseemmo?

•    Tenne hedo heeshshoꞌya giddo loosu aana hosiisa dandeemmohu hiittoonniiti?

 Kaaꞌlitanno amaale: Mixo fushshiꞌri! Webisayitenke aana noota Qullaawu Maxaafi Niwaawe Pirogiraame horoonsidhe Qullaawa Maxaafa nabbawa hanafatto barra borreessiꞌri.