•  Yanna danchu garinni horoonsiꞌra hasiissannohehu mayiraati?

•  Maa assa dandaatto?

•  Darawokki yitinore

•   Yanna woxu gedeeti. Horoonsiꞌrittokki mulla saꞌuro, hasiꞌratto woyite afiꞌra didandaatto. Yanna danchu garinni horoonsiꞌrittoro kayinni, hagiirsiisannohe coye assatto yanna afiꞌratto!

   Qullaawu Maxaafi biddishsha: “Ceeꞌmaleessu mitto coye afiꞌrate lowo geeshsha halchanno; ikkollana mittoreno [diafiꞌranno]; jaate loosiꞌrannohu halchinore baala afiꞌranno.”—Lawishsha 13:4.

   Qara hedo: Yanna garunni horoonsiꞌra kuttubbannota ikkitukkinni hasiꞌroottore assateno yanna afiꞌratto gede assitannohete.

•   Yanna garunni horoonsiꞌra jawa ikkatto woyite kaaꞌlitannohe dandooti. Isinni yannakki horoonsiꞌratto gari loosokki hoogatto gede woy loossanni heeꞌratto gede assahera dandaanno. Lawishshaho atera umikki dirijjite heedhuhero, duucha woyite barrisiꞌre daanno loosaasinchi heeꞌrahera hasiꞌratto?

   Qullaawu Maxaafi biddishsha: “Shiimu coyira ammanamino manchi lowo coyira ammanamanno.”—Luqaasi 16:10.

   Qara hedo: Yannakki horoonsiꞌratto gari ayimmakki daafira kulannori no.

 Hige yanna garunni horoonsiꞌra shota diꞌꞌikkitino. Hanni tennera ataawe ikkannoha mito coye laꞌno.

 Ataawe ikkannore #1: Jaalla

 “Jaallaꞌya haꞌne boohaarro yitannoe woyite, yanna nooekkiha ikkiro nafa sammi yee ledonsa haꞌreemma. ‘Dayummaro rahe rahe loose guxxeemmana’ yee hedeemma. Mito woyite kayinni hedoommari diꞌꞌikkanno; hakko daafira qarrameemma woyiti no.”—Sintiya.

 Ataawe ikkannore #2: Hedo billaallitanno gede assannore

 “Televizhiine lowo geeshsha dogganno. Mite televizhiinete pirogiraamenna filmuwa laꞌꞌa agura qarra ikkitanno.”—Ayivii.

 “Taabileeteꞌya horoonsiꞌranni lowo yanna gudeemma. Horoonsiꞌra agureemmahu kinchu goofiro callaati; tini aneneeto bushiisheemma gede assitannoe.”—Maari.

 Ataawe ikkannore #3: Teyo gaꞌa yaa

 “Rosu mine uyinoonnieha mini loosonna loosa hasiissannoeha wole looso teyo gaꞌa yaanni keeshshiishate rosichi nooe. Looso loose guda hasiissannoe yanna iillita geeshsha kaaꞌlaari nookkire assanni yannaꞌya guxxeemma; yanna konni garinni horoonsiꞌra bushate.”—Beeti.

1.   Loosa hasiissannohe looso baalanka borreessi. Borreessattori giddo mitu mini giddo loosatto loosonna rosu mine uyinoonnihe looso ikkara dandaanno. Mitto mittonka looso mitte lamalara mageeshshi yanna giddo loosse gudattoro borreessiꞌri.

    Qullaawu Maxaafi biddishsha: “Woyyanno coye baddine [affe].”—Filiphisiyusi Sokka 1:10.

2.   Gattinohe yanna giddo assa hasiꞌrattore borreessi. Lawishshaho dagoomittete webisayite horoonsiꞌratto yanna woy televizhiine laꞌꞌatto yanna borreessiꞌra dandaatto. Hakkiinni borreessoottoha mitto mittonka coye assitanni mitte lamala giddo mageeshshi yanna sayisattoro borreessi.

    Qullaawu Maxaafi biddishsha: “Afidhini yanna baalatenni . . . hayyotenni heedhe.”—Qolasiyaasi Sokka 4:5.

3.   Soma fushshiꞌri. Borreessiꞌroottoha lamenka coye wirro lai. Roore hasiisanno coyira gari yanna gaaꞌmootto? Boohaarattonna woleno hattoore assatto yanna ajisha hasiissannohe ikka?

    Kaaꞌlitanno amaale: Barru barrunku loosattore borreessite amaxxi; hakkiinni mitto mittonka coye loosse guditto kiiro malaatisiꞌri.

    Qullaawu Maxaafi biddishsha: “Jawaatu manchi hedo jirotenni xaadissanno.”—Lawishsha 21:5.

4.   Fushshiꞌrootto mixo woy somi garinni loosi. Lowo geeshsha hasiisanno looso loosate yite mito koyishsha adha giwa hasiissannoheti egennantinote. Ikkirono mixokki garinni loosittoro, roore anga yanna gattannohe daafira hagiirsiisannohe coye assa dandaatto.

    Qullaawu Maxaafi biddishsha: “Jawaattine loosse ikkinnina, ceeꞌmaleeyye ikkitinoonte.”—Roomu Sokka 12:11.

5.   Loosse kaittoro umikkira afansha woy baꞌraaꞌra uyi; kayinni hatto assate muddantooti. Taara yinanni wedellitte togo yitino: “Mito woyite borreessiꞌroommari giddo lamere loose kaummaro, ‘15 daqiiqa televizhiine lae kae wirro loosiꞌyara higeemma’ yee hedeemma. Hakkiinni kayi 15 daqiiqa, 30 daqiiqa, mitte saate ikkanna afummakki televizhiine laꞌꞌanni lame saate woꞌma ofolleemma!”

    Malu maatiyya? Boohaarsha barru dilgokki gede assite laꞌꞌantenni, loosokki guxxittohu gedensaanni umikkira aatto baꞌraaꞌri gede assite hedi.

    Qullaawu Maxaafi biddishsha: ‘Mannaho daafure loosiꞌrinohunni hagiidhate . . . kaꞌaanni woliri kaaꞌlannosiri dino.’—Rosiisaancho 2:24.