Yihowa Farciꞌraasine Mundee Adhitannokkihu Mayiraati?

FANI

Duuchu manni hedannota soꞌrote hedo

Soꞌrote hedo: Yihowa Farciꞌraasine dhiwanturo dixagisidhanno.

Halaale: Uminkerano mininke mannirano roore woyyitino xagga afiꞌra hasiꞌneemmo. Dhiwammummoro dancha gede xagisanna mundee adhinummokki darte gowa dandiitanno akimootiwa haꞌneemmo. Xaginsanni ogimma albinni roore woyyitanni hadhino gari hagiirsiisannonke. Isinni akimootu Yihowa Farciꞌraasine kaaꞌlate yite hanaffinoti mundee uyinikki xagisate ogimma, xaa yannara dagooma woꞌmanka kaaꞌlitanni no. Yannankera, duucha gobbara mannu mundee adhikkinni xagisiꞌra doodha dandaanno; konni garinni mundeetenni saꞌꞌanno dhibbinni, wolu manchi mundee bisinke ledo sumuu yaa hooggeenna kalaqamanno qarrinninna akimootu sodheenna kalaqamanno qarrinni gata dandaanno.

Soꞌrote hedo: Yihowa Farciꞌraasine, mittu manchi ammanatenni calla hura dandaanno yitanno.

Halaale: Maalaletenni hurreemmo yine diagadhineemmo.

Soꞌrote hedo: Mundee nookkiha uyinanni xagga waaga lowote.

Halaale: Mundee nookkiha uyinanni xagga lowo woxi fulannota gatissanno. a

Soꞌrote hedo: Diru dirunku lowoti Yihowa Farciꞌraasine, qaaqquullu nafa gatikki mundee adha gibbe reyitanno.

Halaale: Tini taje nookki yaattooti. Darte gobbanno akimooti duucha higge mundee nookkiha darte gobbino; lawishshaho, wodananna miqicho nafa darte gowa dandiitino; qoleno gawajjamino biso murte hoolte wole wora dandiitino. b Roore woyite, mundee adhikkinni xaginsoonni manni, qaaqquulluno gatikki, mundee adhitinori ledo taalo woy insanni roore dhaabbatanno. c Ikkihano ikkiro, mittu manchi mundee adha hoogino daafira reyannota woy mundee adhino daafira calla gatannota afinohu dino.

Yihowa Farciꞌraasine mundee adhitannokkihu mayiraati?

Tini xagisiꞌrate hajo ikkitukkinni ammaꞌnonke ledo xaadooshshe afidhinote. Akkalu Gondoorino ikko Haaru Gondoori giddo, mundeetewiinni xeertiꞌra hasiissannonketa xawinse kulloonni. (Kalaqama 9:4; Leewaawoota 17:10; Marro 12:23; Soqqamaasinete Looso 15:28, 29) Qoleno Maganu albaanni mundee heeshshote yaate. (Leewaawoota 17:14) Konni daafira, mundee adhineemmokkihu Maganoho hajajammeemmo daafira calla ikkikkinni heeshshote Buicho ikkinoha Iso ayirrinseemmo daafiraati.

Hedonsa soorrantino

Lowo geeshsha qarrisanno bayicho nafa mundee nookkiha darre gowa dandiinanni

Bashsho ikkiro akimootu mundee adha giwa woy mundee nookkiha xagisiꞌra meessi lubbo anfanni heeꞌnenni shaate gedeeti yite heddanno; xa kayinni hatto yite heda agurtino. Lawishshaho 2004nni, mitte akimootu borro “Yihowa Farciꞌraasine xagisate horoonsiꞌnanniti batinye ogimma muli dirrara rosantino ogimma ikkitanno” yitino. d Qoleno Wodana, Shombonna Mundeete Doyicho Amanyoote (Ingilizete Afoo) yinanni borro 2010nni togo yitino: “‘Mundee nookkiha dare gowate ogimma’ akimootu Yihowa Farciꞌraasinera calla ikkikkinni woꞌmanka woyite horoonsiꞌrate woꞌnaala hasiissannonsa.”

Xaa yannara alamete deerrinni lowo kume ikkitanno dokterooti, biso dare gowate lowo mundee duꞌnantannota hooltanno ogimma horoonsidhanno. Mundee nookkiha xaginsannita tenne ogimma akimootu angate anje noo gobbuwara nafa horoonsidhanni no; qoleno Yihowa Farciꞌraasine ikkinokkihu batinyu manni konni garinni xaginsansara maahoyye yiino.

a Tenne borro lai: Transfusion and Apheresis Science, Volume 33, No. 3, p. 349.

b Aante noo borro lai: The Journal of Thoracic and Cardiovascular Surgery, Volume 134, No. 2, pp. 287-288; Texas Heart Institute Journal, Volume 38, No. 5, p. 563; Basics of Blood Management, p. 2; and Continuing Education in Anaesthesia, Critical Care & Pain, Volume 4, No. 2, p. 39.

c Aante noo borro lai: The Journal of Thoracic and Cardiovascular Surgery, Volume 89, No. 6, p. 918; and Heart, Lung and Circulation, Volume 19, p. 658.

d Continuing Education in Anaesthesia, Critical Care & Pain, Volume 4, No. 2, page 39.