SAUĀGA I AIGA MA LE FAILEAGAINA: Na lipotia e le Faalapotopotoga o Malo Aufaatasi: “E toʻatasi mai le toʻatolu o fafine e sauāina a lē o le fasi pe faileagaina tau feusuaʻiga, i se taimi o lona olaga e se tasi e māfana i ai.” E faanoanoa ona “i se fua faatatau i le lalolagi atoa, e toʻatasi mai le toʻalima o fafine o le a aafia i ni faiga faamalosi tau feusuaʻiga, pe toetoe lava foʻi faamalosia.”

SOLIGĀTULAFONO I NOFOAGA FAITELE: Na lipotia mai e silia i le 30,000 kegi sauā o loo iai i le Iunaite Setete. I Amerika Latina na lipotia mai ai e toetoe e toʻatasi mai le toʻatolu o tagata na afāina i faiga sauā.

FASIOTI TAGATA: I se fuafaatatau e toetoe 500,000 tagata na fasiotia i le 2012, e sili atu i ē na fasiotia i taua. O Aferika i Saute ma Amerika Tutotonu o atunuu ia na maualuga ai le aofaʻi o tagata na fasiotia. E silia i le 100,000 tagata na fasiotia i Amerika Latina i le tausaga e tasi, ae e pe ā ma le 50,000 ē na fasiotia i Pasili lava ia. Pe e iai se vaifofō tumau i faiga sauā?

Aiseā ua faatupulaʻia ai faiga sauā? E tele māfuaaga e aofia ai māfuaaga nei: le eseese o tulaga o tagata ma le tamaoaiga, o le lē faaaloalo i ola o isi, o le lē pulea o le ʻava malosi ma fualaau faasāina, e mātau e tamaiti le sauā o tagata matutua, ma le leai o ni faasalaga o ē e faia soligatulafono sauā.

O le mea moni ua iai isi vaega o le lalolagi ua aogā i ai taumafaiga ia faaitiitia faiga sauā. I le aai o São Paulo i Pasili, ua lipotia mai ai le faaitiitia o le fasioti tagata i le pe ā e 80 pasene i le sefulu tausaga talu ai. Peitaʻi o loo iai pea faiga sauā i so o se vaega i lenei aai, ma o loo tumau pea le fuafaatatau o tagata e fasiotia lea e pe ā e 10 mai i le 100,000 o tagata. O le a faapefea la ona faamutaina nei faiga sauā uma?

O le fofō tumau mo faiga sauā, o le suia lea o uiga ma amioga a tagata. E tatau i tagata sauā ona liaʻiese o uiga e pei o le faamaualuga, manaʻo tele, ma le manatu faapito, ae suia i uiga e pei o le alofa, faaaloalo, ma le manatu mamafa mo isi.

O le ā e uunaʻia ai se tagata ina ia faia nei suiga mataʻina? Seʻi manatu i le aʻoaʻoga a le Tusi Paia:

• “Auā o le alofa lenei i le Atua, ia tatou tausi i ana poloaʻiga.”—1 Ioane 5:3.

• “O le mataʻu iā Ieova o le ʻinoʻino lea i le leaga.” *—Faataoto 8:13.

O le alofa i le Atua ma le mataʻu ina neʻi lē fiafia lona finagalo, o ni uunaʻiga malolosi ia e mafai ona fesoasoani e oo lava i tagata sauā, ia suia o latou olaga atoa ae lē i se tulaga faatagāfai. Pe e mafai ona tupu moni lenei mea?

 Seʻi manatu iā Alex, * o lē na falepuipui mo le 19 tausaga i Pasili ona o ni gaoioiga fasi tagata. Na avea o ia ma Molimau a Ieova i le 2000 ina ua uma ona suʻesuʻeina le Tusi Paia ma Molimau a Ieova. Pe na suia moni lava ona uiga sauā? Ioe, ma ua lagona e Alex lona matuā faanoanoa i mea leaga uma sa ia faia. Ua ia faapea mai: “Ua ou lagona le alofa i le Atua ona o lona faatagaina o aʻu e maua se faalogona ua faamagaloina. O le talisapaia loloto ma le alofa mo Ieova ua fesoasoani iā te aʻu e suia ai oʻu ala.”

Na aafia foʻi César mai i Pasili i le talepe fale ma le gaoi. O le olaga lenā na ola ai mo le 15 tausaga. Na faapefea ona suia lona olaga? A o iai i le falepuipui sa talanoa ma se Molimau a Ieova ma suʻesuʻe ai le Tusi Paia. Na faapea mai César, “O le taimi muamua lea ua ou maua ai se fuafuaga i le olaga. Na ou aʻoaʻoina ai le alofa i le Atua, ma o le mataʻu iā te ia, o le mataʻu tatau lea e lē toe faia se mea leaga e faatigā ai iā Ieova. Ou te leʻi manaʻo e talituālimaina lona agalelei. O lenā alofa ma le mataʻu na uunaʻia ai aʻu e faia ni suiga.”

O le ā e tatou te aʻoaʻoina mai i nei mea na tutupu? E faailoa mai ai e iai le mana i le Tusi Paia e suia ai olaga o tagata e ala i le suia o le auala e mafaufau ai. (Efeso 4:23) Ua faapea atili mai Alex lea na taʻua muamua: “O mea na ou aʻoaʻoina mai i le Tusi Paia ua pei o se vai mamā o loo sasaa mai iā te aʻu, ma o loo faasolosolo ona faamamāina ai aʻu e ala i le aveesea o mafaufauga leaga. O mea ia sa ou manatu e lē mafai ona ou aveesea.” Ioe, pe a faatumu o tatou mafaufau i le feʻau mamā o le Tusi Paia, e mafai ona aveese pe faamamā ese ai le leaga. O loo i le Afioga a le Atua le mana e faamamā ai. (Efeso 5:26) O le iʻuga e mafai e tagata sauā ma manatu faapito ona suia o latou ala ma avea o ni ē e agalelei ma tausia le filemu. (Roma 12:18) E latou te tofo i le filemu i o latou olaga e ala i le faatatau o mataupu silisili o le Tusi Paia.—Isaia 48:18.

E silia i le valu milliona Molimau a Ieova i atunuu e 240 ua latou mauaina le auala autū e aveesea ai le sauā. Ua aʻoaʻoina tagata mai i ituaiga uma, o ē eseese o latou tulaga tau tamaoaiga ma talaaga, ia alolofa ma matataʻu i le Atua, ia alofa le tasi i le isi ma nonofo ma le filemu o se aiga i le lalolagi aoao. (1 Peteru 4:8) O i latou o se faamaoniga manino e iloa ai e mafai ona iai se lalolagi e aunoa ma le sauā.

Ua folafola mai i le Tusi Paia ua lē o toe umi ae aveesea le sauā i le lalolagi. Ua toeitiiti ona fesagaʻia lea e lenei lalolagi sauā le ʻaso faamasino o le Atua ma le faaumatiaga o tagata faalēmataʻu.’ (2 Peteru 3:5-7) O le a lē toe mafatia nisi ona o tagata sauā. E faapefea ona tatou mautinoa e finagalo Ieova e faalaa mai ma tafiesea faiga sauā?

Ua taʻua i le Salamo 11:5 ʻe inosia lava e le Atua le tagata e fiafia i le faasauā.’ E fiafia Lē na foafoaina mea i le filemu ma le amiotonu. (Salamo 33:5; 37:28) O le pogai lea e lē faavavau ai ona ia faatagaina tagata sauā.

Ioe, ua i faitotoʻa se lalolagi fou filemu. (Salamo 37:11; 72:14) Aiseā e te lē suʻesuʻe atili ai pe faapefea ona e agavaa e ola i lenā lalolagi o le a aunoa ma ni faiga sauā?