1. O ā mea na tatou aʻoaʻoina mai i le fono faaletausaga na faia i le 2023?

 I LE fono faaletausaga na faia i le 2023, a na tatou maua ai ni fetuunaʻiga mataʻina i nisi o o tatou talitonuga ma ni tala fiafia e faatatau i la tatou faiva. O se faataʻitaʻiga, na tatou aʻoaʻoina pe a māeʻa le faaumatiaga o Papelonia le Aai Tele, atonu o le a maua e nisi le avanoa e aufaatasi ai ma tagata o Ieova. Na tatou aʻoaʻoina ai foʻi, e amata atu iā Novema 2023, o le a lē toe manaʻomia ona lipotiina e tagata talaʻi o latou sao e faia i le faiva. Po o lona uiga la ua faaitiitia ai le tāua ma le faanatinati o le galuega talaʻi? E mautinoa e leai!

2. A o faagasolo taimi, aiseā ua sili atu ai ona faanatinati la tatou galuega talaʻi? (Mareko 13:10)

² A o faagasolo taimi, ua atili ona faanatinati la tatou galuega talaʻi. Aiseā? Talu ai ua matua utiuti lava le taimi. Seʻi mātau le mea na valoia e Iesu e faatatau i le galuega talaʻi i aso e gata ai. (Faitau le Mareko 13:10.) E pei ona taʻua i le tusi o Mataio, na fetalai Iesu o le a talaʻiina atu le tala lelei i le lalolagi atoa a o leʻi oo mai “le iʻuga.” (Mata. 24:14) E faasino atu lenā faaupuga i le iʻuga o le faiga leaga o mea a Satani, lea o le a faaumatia aʻiaʻi. Ua faatulaga e Ieova le ʻaso ma le itula’ e tutupu ai na mea. (Mata. 24:36; 25:13; Galu. 1:7) Ua tatou matuā latalata atu lava i lenā taimi. (Roma 13:11) O lea, e tatau ona tatou talaʻi pea seʻia oo mai le iʻuga.

3. O le ā e uunaʻia ai i tatou e talaʻi?

 ³ A o tatou manatunatu i la tatou galuega talaʻi, e iai se fesili e ao ona tatou iloiloina: Aiseā e tatou te talaʻia ai le tala lelei? O le alofa e uunaʻia ai i tatou e talaʻi. O le galuega talaʻi e faaalia atu ai e tatou te naunau i le tala lelei, e tatou te alolofa i tagata, ae e sili i lenā, e tatou te alolofa iā Ieova ma faatāua lona suafa. Seʻi o tatou iloiloina nei manatu taʻitasi.

E TATOU TE NAUNAU I LE TALA LELEI

4. O ā o tatou faalogona pe a tatou faalogo i se tala fiafia?

⁴ O ā ni ou faalogona pe a e faalogo i se tala fiafia, e pei o le fanau mai o se pepe fou i le aiga, pe ofo atu foʻi e se tasi se galuega o loo e matuā manaʻomia? E mautinoa e te matuā naunau e faailoa atu lenā tala fiafia i ou aiga ma au uō. Pe na faapena ou faalogona ina ua e faalogo i se tala e sili ona fiafia, o le tala lelei o le Malo o le Atua?

5. O ā ni ou faalogona ina ua e faatoʻā aʻoaʻoina le upu moni? (Tagaʻi foʻi i ata.)

⁵ Seʻi toe mafaufau i ou faalogona na iai ina ua e faatoʻā aʻoaʻoina le upu moni. Na e aʻoaʻoina ai e alofa lou Tamā i le lagi iā te oe, e finagalo o ia e avea oe o se vaega o lona ʻauaiga e tapuaʻi atu iā te ia, lana folafolaga o le a ia faaiʻuina tigā ma mafatiaga, ma le faamoemoe e toe feiloaʻi ma ē e pele ua maliliu i le lalolagi fou, faapea le tele o isi aʻoaʻoga. (Mare. 10:​29, 30; Ioa. 5:​28, 29; Roma 8:​38, 39; Faaa. 21:​3, 4) E mautinoa na matuā pāʻia lou loto i na aʻoaʻoga. (Luka 24:32) O lou naunau i mea na e aʻoaʻoina, na e manaʻo ai e faailoa atu i isi na upu moni tāua.—Faatusatusa i le Ieremia 20:9.

6. O le ā e te aʻoaʻoina mai i le mea na tupu iā Ernest ma Rose?

⁶ Seʻi mātau le mea na tupu i se uso e igoa iā Ernest. b Pe tusa o le sefulu o ona tausaga na  maliu ai lona tamā. Na ia faapea mai: “Sa ou taumānatu: ʻPo o alu o ia i le lagi? Pe e toe ola mai o ia?’ Sa ou fuā i isi tamaiti sa iai o latou tamā.” E toetoe o aso uma na ia alu ai i le fanuatanu, ma tootuli i le tuugamau o lona tamā ma tatalo: “Le Atua e, faamolemole ou te fia iloa po o fea o iai loʻu tamā.” I le pe ā ma le 17 tausaga talu ona maliu lona tamā, na amata ai loa le suʻesuʻega faale-Tusi Paia a Ernest. Na matuā fiafia o ia ina ua aʻoaʻoina, o ē ua maliliu e lē o toe iloa se mea, e pei o se tagata o loo moegase, ma ua folafola mai foʻi i le Tusi Paia le faamoemoe o le toetū. (Fai. 9:​5, 10; Galu. 24:15) Na matuā faamalieina Ernest ina ua maua tali o ana fesili ua leva ona faapopoleina ai. Na matuā fiafia o ia i upu moni o le Tusi Paia na ia aʻoaʻoina. Na auai lana avā o Rose i le suʻesuʻega, ma na fiafia foʻi i mea na ia aʻoaʻoina. Na papatisoina i laʻua i le 1978, ma na la matuā naunau e faailoa atu mea fou na la aʻoaʻoina i aiga, uō, ma so o se tasi na faaalia le fiafia. O le iʻuga, e silia ma le 70 tagata na fesoasoani i ai Ernest ma Rose, ina ia agaʻigaʻi i luma ma papatiso.

7. O le ā e tupu pe a tatou naunau i upu moni o le Tusi Paia? (Luka 6:45)

⁷ Pe a tatou naunau i upu moni o le Tusi Paia, o le a tatou naunau foʻi e faailoa atu i isi. (Faitau le Luka 6:45.) E pei o tatou faalogona o nisi o soo o Iesu i le uluaʻi senituri, o ē na faapea mai: “E lē mafai ona ma lē taʻu atu mea ua ma vāai ma faalogo i ai.” (Galu. 4:20) Talu ai e tatou te matuā naunau i upu moni, e tatou te naunau foʻi e faailoa atu i le toʻatele e mafai ai.

E TATOU TE ALOLOFA I TAGATA

8. O le ā e uunaʻia ai i tatou e faaoo atu le tala lelei i isi? (Tagaʻi i le pusa “ Alofa i Tagata—Faia Isi ma Soo.”) (Tagaʻi foʻi i le ata.)

⁸ I le pei o Ieova ma lona Alo, e tatou te alolofa foʻi i tagata. (Faata. 8:31; Ioa. 3:16) E tatou te lagona le tigā alofa iā i latou e ʻleai se faamoemoe ma ua aunoa ma le Atua.’ (Efe. 2:12) O le tele o faafitauli o le olaga, e latou te ono lagona ai e pei o loo latou iai i se lua maulalo. Peitaʻi, ua iā i tatou se maea faafaatusa e faasaoina mai ai i latou, o le tala lelei lea o le Malo o le Atua. O lo tatou naunau ma le tigā alofa iā i latou na, ua uunaʻia ai i tatou e faia taumafaiga uma e faaoo atu ai le tala lelei iā i latou. O lenā feʻau tāua, ua mafai ai ona latou maua se faamoemoe mautinoa, fesoasoani iā i latou ina ia maua se olaga e sili ona fiafia i le taimi lenei, ma latou maua ai le avanoa i le “ola moni,” po o le ola e faavavau i le lalolagi fou a le Atua.—1 Timo. 6:19.

9. O le ā le lapataʻiga o loo tatou taʻu atu i tagata, ma aiseā? (Esekielu 33:​7, 8)

⁹ O lo tatou alofa i tagata, ua uunaʻia ai foʻi  i tatou e lapataʻia i latou e faatatau i le iʻuga o lenei lalolagi amioleaga ua toeitiiti oo mai. (Faitau le Esekielu 33:​7, 8.) E tatou te alolofa i o tatou tuaoi ma aiga lē talitonu, ona e latou te lē o malamalama i le mea o le a tupu, o “le puapuaga tele, e leai sona tusa talu le amataga o le lalolagi, e oo mai lava i aso nei, ma o le a lē toe tupu foʻi se mea faapea.” (Mata. 24:21) E tatou te mananaʻo ia latou iloa le mea o le a tupu a o faagasolo le taimi o le faamasinoga, o le aveesea o lotu sesē ma le faaumatiaga o le faiga leaga o mea a Satani i se taimi mulimuli ane iā Amaketo. (Faaa. 16:​14, 16; 17:​16, 17; 19:​11, 19, 20) E tatou te tatalo ina ia tali mai le toʻatele e mafai ai i lenā lapataʻiga, ma aufaatasi ma i tatou i le tapuaʻiga mamā i le taimi lenei. Ae e faapefea i latou e lē utagia lenā lapataʻiga i aso nei, e aofia ai ma o tatou aiga pele?

10. Aiseā ua faanatinati ai le lapataʻia pea o tagata i le mea ua toeitiiti tupu?

¹⁰ E pei ona taʻua i le mataupu ua mavae, atonu o le a faasaoina e Ieova i latou e suia o latou loto pe a latou vaaia le faaumatiaga o Papelonia le Aai Tele. Pe afai o lea, ua sili atu la ona faanatinati le lapataʻia pea o tagata e faatatau i lenā mea. Seʻi mātau le manatu lenei: O mea e tatou te faailoaina atu iā i latou i le taimi lenei, atonu o le a latou toe manatua i lenā taimi. (Faatusatusa i le Esekielu 33:33.) Atonu o le a latou toe mafaufau i le lapataʻiga na tatou taʻuina atu iā i latou, ma uunaʻia ai i latou e aufaatasi ma i tatou i le tapuaʻiga mamā manū o maua le taimi. E pei o le leoleo o le falepuipui i Filipi lea na suia lona loto ina ua uma ona “lūlū se mafuiʻe malosi,” atonu e iai foʻi nisi e lē o tali mai i le taimi lenei, ae e faatoʻā suia o latou loto pe a mavae le faaumatiaga o Papelonia le Aai Tele, o se vaaiga e mataʻutia.—Galu. 16:​25-34.

E TATOU TE ALOLOFA IĀ IEOVA MA FAATĀUA LONA SUAFA

11. E faapefea ona tatou avatu iā Ieova le viiga, le mamalu, ma le mana po o le malosi? (Faaaliga 4:11) (Tagaʻi foʻi i ata.)

¹¹ O le māfuaaga sili e tatou te talaʻia ai le tala lelei, ona e tatou te alolofa iā Ieova le Atua ma faatāua lona suafa paia. Talu ai e tatou te alolofa i le Atua, e tatou te vaai la i le galuega talaʻi o se tasi lea o auala e vivii atu ai iā te ia. (Faitau le Faaaliga 4:11.) E tatou te ioe faatasi i le manatu lenei: Ua alagatatau ona maua e Ieova le viiga, le mamalu, ma le mana po o le malosi mai i ana auauna faamaoni. E tatou te avatu iā Ieova le viiga ma le mamalu, pe a tatou faailoa atu i isi faamaoniga manino, o ia na “foafoaina mea uma lava” ma o ia ua tatou maua ai le ola. E tatou  te avatu iā Ieova le malosi o loo iā i tatou, e ala i le faaaogā o lo tatou taimi, o tatou ola, ma meafaitino, e faia ai se sao atoatoa i le galuega talaʻi e tusa ma o tatou tulaga. (Mata. 6:33; Luka 13:24; Kolo. 3:23) Talu ai e tatou te alolofa iā Ieova, e tatou te fiafia e talanoa i isi e faatatau iā te ia, o lona suafa, ma le uiga o lona suafa. Aiseā?

12. E faapefea ona tatou faapaiaina le suafa o Ieova pe a auai i le galuega talaʻi?

¹² O le alofa iā Ieova, e uunaʻia ai i tatou e faapaia lona suafa. (Mata. 6:9) E tatou te mananaʻo e faia so tatou sao i le taʻumamāina o lona suafa mai i pepelo taufaaleaga a Satani. (Kene. 3:​1-5; Iopu 2:4; Ioa. 8:44) Pe a tatou auai i le talaʻiga, e tatou te lototetele e taʻu atu le upu moni e faatatau iā Ieova iā i latou uma e fia faalogo. E tatou te mananaʻo ia iloa e tagata uma lona uiga autū o le alofa, e tonu ma amiotonu le auala e pule ai, ma ua toeitiiti ona faaiʻuina lea e lona Malo o mafatiaga uma, ae aumai le filemu ma le fiafia i tagata. (Sala. 37:​10, 11, 29; 1 Ioa. 4:8) E tatou te faapaiaina le suafa o Ieova, e ala i le puipuia o lona talaaga a o tatou auai i le talaʻiga. E faamalieina foʻi i tatou i le iloaina, o loo tatou ola e tusa ma lo tatou igoa. I le ā le itu?

13. Aiseā e tatou te mitamita ai e taʻua i tatou o Molimau a Ieova? (Isaia 43:​10-12)

¹³ Ua taʻua e Ieova i tatou o ana “molimau.” (Faitau le Isaia 43:​10-12.) I ni nai tausaga ua mavae, na taʻua ai i se tusi mai i le Vaega Pule: “E leai se isi faaeaga e sili atu, nai lo o le taʻua o se tasi o se Molimau a Ieova.” Aiseā? Seʻi mātau le faataʻitaʻiga lenei: Pe a e manaʻo e avea se tasi ma au molimau i se faamasinoga, e te filifilia se tasi e te iloa lelei ma maufaatuatuaina. O se tasi e lelei lona talaaga ma e talitonuina e isi. O le filifilia e Ieova o i tatou e avea ma ana Molimau, e faaalia  ai e na te silafia lelei i tatou, ma e na te maufaatuatuaina i tatou e faailoa atu e na o ia le Atua moni e toʻatasi. O se faaeaga le avea o i tatou ma ana Molimau. O lea, e tatou te faaaogā ai so o se avanoa e faailoa atu ai lona suafa, ma tali atu i le tele o pepelo ua faia e faatatau iā te ia. O le faia faapea, ua tatou mitamita ai e ola e tusa ai ma lo tatou igoa, o Molimau a Ieova.—Sala. 83:18; Roma 10:​13-15.

E TATOU TE TALAʻI PEA SEʻIA OO MAI LE IʻUGA

14. O ā mea mataʻina e tatou te tulimataʻia o le a tutupu i le lumanaʻi?

¹⁴ E tatou te tulimataʻia mea mataʻina o le a tutupu i le lumanaʻi. O le faamanuia a Ieova, e tatou te faamoemoe ai o le a toʻatele nisi e talia le upu moni a o leʻi amata le puapuaga tele. E ui e avea le puapuaga tele o se vaitaimi e sili ona faigatā i le talafaasolopito o tagata, ae e tatou te tulimataʻia ma le fiafia lenā taimi, ona e ono iai pea nisi e liliuese mai i le lalolagi a Satani ma aufaatasi ma i tatou e vivii iā Ieova.—Galu. 13:48.

15-16. O ā galuega e manaʻomia ona tatou faia pea, ma o afea e faamuta ai?

¹⁵ Peitaʻi, o loo tele pea galuega e manaʻomia ona tatou faia. Ua iā i tatou le faaeaga e faia ai se sao i se galuega o le a lē toe faia lava, o le talaʻia lea o le tala lelei o le Malo o le Atua i le lalolagi atoa. I le taimi e tasi, e tatau ona tatou faailoa atu pea se lapataʻiga. E tatau ona iloa e tagata, ua toeitiiti lava oo mai le iʻuga o le faiga leaga o mea a Satani. O lea, pe a oo mai le taimi o le faamasinoga, o le a latou iloa ai, o le feʻau na tatou talaʻia e mai iā Ieova le Atua.—Eseki. 38:23.

¹⁶ O le ā la ua tatou maumauaʻi e fai? O le alofa e tatou te naunau ai i le tala lelei, alolofa i tagata, ae e sili i lenā, e tatou te alolofa iā Ieova le Atua ma faatāua lona suafa. O lea, tau ina ia tatou finafinau pea e talaʻi ma le faanatinati ma le maelega, seʻia oo ina fetalai mai Ieova, “Ua māeʻa!”