1. O le ā le filifiliga e tatau ona faia e se talavou, ae aiseā e lē tatau ai ona soona popole? (Tagaʻi i le ata i luga aʻe o le matua.)

TALAVOU, atonu e tou te ioe mai a o leʻi amataina se faigāmalaga, o se mea atamai le fuafua muamua po o fea o le a e malaga i ai. O le olaga ua pei o se faigāmalaga, ma o le taimi e fuafua ai po o fea e te agaʻi i ai o le taimi lea a o e laʻitiiti. E moni e lē faigofie le faia o ni fuafuaga. Ua faapea mai se teineitiiti e igoa iā Heather: “O se mea e popole ai. E tatau ona e filifili po o le ā se mea o le a e faia i lou olaga atoa.” Peitaʻi, ia e lototele auā ua folafola mai e Ieova i ona tagata: “Aua e te vaai solo, auā o aʻu o lou Atua. Ou te faamalosi iā te oe. Ou te matuā fesoasoani iā te oe.”​—Isa. 41:10.

2. E faapefea ona e iloa e finagalo Ieova ia e faia ni fuafuaga mo se lumanaʻi fiafia?

² Ua faalaeiau mai Ieova ia fuafua ma le atamai lou lumanaʻi. (Fai. 12:1; Mata. 6:20) E finagalo Ieova ia e fiafia. E faamaonia lenā i vaaiga ma leo matagofie, faapea tofo mananaia i mea na ia foafoaina. Ia mafaufau foʻi i le manatu mamafa mai o Ieova ma aʻoaʻo i tatou i le auala sili e ola ai. Ua fetalai mai Ieova e faatatau i ē e teena ana fautuaga: “Na outou filifilia le mea ou te lē fiafia i ai. . . . Faauta! . . . E fiafia aʻu auauna, a o outou e tou te māsiasi.  Faauta! o le a alalaga aʻu auauna i le fiafia ona o le lelei o o latou loto.” (Isa. 65:12-14) E faamamaluina Ieova pe a faia e ona tagata ni filifiliga atamai i le olaga.​—Faata. 27:11.

3. O ā fuafuaga e finagalo Ieova e te faia?

³ O ā fuafuaga e finagalo Ieova e te faia? Na ia faia tagata ina ia maua le fiafia e ala i le iloaina o ia ma auauna atu ma le faamaoni iā te ia. (Sala. 128:1; Mata. 5:3) E matuā eseese lava tagata mai i manu na ia faia, auā o manu e na o le aai lava, feinu, ma fanafanau. E finagalo le Atua e te maua le fiafia e ala i le fuafua mo mea e sili atu ona tāua nai lo o mea o loo fiafia i ai manu. O Lē na faia oe “o le Atua o le alofa,” o le “Atua fiafia” na faia le tagata “i lona faatusa.” (2 Kori. 13:11; 1 Timo. 1:11; Kene. 1:27) O le a e maua le fiafia pe a e faaaʻoaʻo i lo tatou Atua alofa. Po ua e tofo i le moni o upu o loo i le Galuega 20:35: “E sili le fiafia e maua i le foaʻi atu i lo o le talia mai”? O se upu moni faavae lenei e faatatau i le olaga o le tagata. O lea, e finagalo Ieova ia faavae au fuafuaga mo le lumanaʻi i le alofa i isi ma le alofa mo ia.​—Faitau le Mataio 22:36-39.

4, 5. Aiseā na fiafia ai Iesu?

⁴ Sa faataatia e Iesu Keriso le faaaʻoaʻoga sili mo outou le fanau iti. A o laʻitiiti o ia, e mautinoa na taalo ma fiafia solo. Ua faapea mai le Afioga a le Atua e iai le “taimi e ʻataʻata ai; . . . ma le taimi e osooso ai ma le fiafia.” (Fai. 3:4) Sa mafuta vavalalata atu foʻi Iesu iā Ieova e ala i le suʻesuʻe i Tusitusiga Paia. I le 12 o ona tausaga, sa matuā ofo aʻoaʻo i le malumalu “i lona malamalama ma ana tali” e faatatau i mataupu faaleagaga.​—Luka 2:42, 46, 47.

⁵ Sa tuputupu aʻe Iesu ma avea o se tagata matua e fiafia. Aiseā? Sa ia iloa na finagalo le Atua iā te ia e “folafola le tala lelei i ē e matitiva, . . . ma ia pupula mata o ē e tauaso.” (Luka 4:18) Sa fiafia Iesu ona na ia faia le mea na finagalo le Atua e na te faia. O loo faamatala i le Salamo 40:8 faalogona o Iesu e faapea: “Loʻu Atua e, ou te fiafia e fai lou finagalo.” Sa fiafia Iesu e aʻoaʻo isi e faatatau i lona Tamā i le lagi. (Faitau le Luka 10:21.) Ina ua uma ona aʻoaʻo e Iesu se fafine e faatatau i le tapuaʻiga moni, sa ia fetalai atu i ona soo: “O laʻu meaʻai, o le faia lea o le finagalo o lē na auina mai aʻu, ma faaiʻu lana galuega.” (Ioa. 4:31-34) Sa fiafia Iesu ona na alofa i le Atua ma isi. O le a e fiafia foʻi pe a e faia faapea.

6. Aiseā e tāua ai le talanoa atu i Kerisiano taʻumatuaina e faatatau i au fuafuaga mo le lumanaʻi?

⁶ E toʻatele Kerisiano na maua le fiafia a o talavou ona na auauna o ni paeonia. Aiseā e te lē talanoa atu ai i nisi o i latou e faatatau i au fuafuaga? “E faalēaogāina fuafuaga pe a lē iai ni talanoaga i mataupu faalilolilo, a o le toʻatele o le ʻaufaufautua e taunuu ai mea.” (Faata. 15:22) Atonu o le a faamatala atu e na uso ma tuafāfine, o le faiva faataimi atoa o se toleniga o le a aogā iā te oe i lou olaga atoa. Sa aʻoaʻoina e Iesu le tele o mea mai i lona Tamā a o iai i le lagi. A o faagasolo foʻi lana faiva i le lalolagi sa faaauau pea ona ia aʻoaʻoina mea. Sa olioli o ia i le aʻoaʻoina o tagata i le tala lelei, ma le tumau faamaoni e ui i tofotofoga. (Faitau le Isaia 50:4; Epe. 5:8; 12:2) Seʻi o tatou tilofaʻia nisi o vala o le auaunaga faataimi atoa e mafai ona e maua ai le tele o le fiafia.

7. Aiseā e fiafia ai le toʻatele o talavou e auai i le galuega o le faia o isi ma soo?

⁷ Na fetalai Iesu: ʻIa outou ō atu e fai tagata ma soo, ma ia aʻoaʻoina i latou.’ (Mata. 28:19, 20) Pe afai o e fuafua e auai i le galuega o le faia o isi ma soo, o le a e filifilia la se olaga e sili ona faamalieina ma faamamaluina ai le Atua. Ae e pei lava ona manaʻomia i so o se  galuega, e manaʻomia se taimi e toleni ai oe ina ia e maua le tomai. Talu ai nei lava, na faapea mai ai se uso e igoa iā Timothy o lē na amata ona paeonia ina ua 19 ona tausaga: “Ou te fiafia e auauna faataimi atoa iā Ieova ona o le auala lea e faailoa atu ai loʻu alofa iā te ia. I le taimi muamua, e leʻi mafai ona ou amataina se suʻesuʻega faale-Tusi Paia. Ae ina ua ou siitia atu i se isi oganuu, e leʻi atoa se masina ae ua ou amataina ni suʻesuʻega faale-Tusi Paia. O se tasi o na suʻesuʻega na amata ona auai i sauniga. Ina ua uma ona ou auai i le Aʻoga Faale-Tusi Paia mo Uso Nofofua * mo le lua masina, na ou maua se tofiga fou ma na ou amataina ai ni suʻesuʻega faale-Tusi Paia se fā. Ou te fiafia e aʻoaʻo tagata a o vaai atu o loo suia i latou e le agaga paia.”​—1 Tesa. 2:19.

8. Ua faapefea ona faia se sao atoatoa o nisi talavou Kerisiano i le galuega o le faia o isi ma soo?

⁸ O nisi talavou Kerisiano ua latou aʻoaʻoina se isi gagana. O se faaaʻoaʻoga, ua tusi mai Jacob mai i le Iunaite Setete e faapea: “Ina ua fitu oʻu tausaga, o le toʻatele o tamaiti i laʻu vasega o tamaiti Vietiname. Na ou manaʻo e talanoa atu iā i latou e faatatau iā Ieova, o lea e leʻi umi ae ou fuafua loa e aʻoaʻoina la latou gagana. O le tele o taimi na ou aʻoaʻoina le gagana e ala i le faatusatusa o Le Olomatamata faa-Peretania ma le faa-Vietiname. Na iai foʻi aʻu uō i le faapotopotoga Vietiname na latalata ane. Ina ua 18 oʻu tausaga sa amata loa laʻu paeonia. Mulimuli ane, na ou auai i le Aʻoga Faale-Tusi Paia mo Uso Nofofua. Na fesoasoani lea i loʻu faaeaga o se paeonia i le taimi nei, lea e na o aʻu o loo avea ai ma toeaina i se vaega e tautatala i le gagana Vietiname. E ofo le toʻatele o tagata Vietiname ona o loʻu iloa o la latou gagana. E latou te talia fiafia aʻu ma e masani ona ou faia ni suʻesuʻega faale-Tusi Paia ma i latou. O nisi ua agaʻigaʻi i luma ma ua papatiso.”​—Faatusatusa i le Galuega 2:7, 8.

9. E faapefea ona avea le galuega o le faia o isi ma soo o se toleniga lelei?

⁹ O le faia o isi ma soo o se toleniga lelei lea e te aʻoaʻoina ai auala e faia ai galuega, auala e fesootaʻi ai ma isi, ma atiaʻe ai lou mautinoa ma le faautauta. (Faata. 21:5; 2 Timo. 2:24) Peitaʻi, e sili atu ona olioli le galuega o le faia o isi ma soo, ona e fesoasoani e te iloa lelei ai faavae faale-Tusi Paia o ou talitonuga. E te aʻoaʻoina ai foʻi auala e galulue soosootauʻau ai ma Ieova.​—1 Kori. 3:9.

10. E faapefea ona e olioli i le faia o isi ma soo e tusa lava pe e lē talilelei mai tagata o lau oganuu?

¹⁰ E mafai ona e olioli i le faia o isi ma soo e tusa lava pe toʻaitiiti tagata i lau oganuu e talilelei mai i le tala lelei. O le faia o isi ma soo o se galuega e fai faatasi. O loo saʻili e le faapotopotoga atoa tagata lotofaamaoni. E ui lava atonu e na o le toʻatasi se uso po o se tuafafine e na te mauaina se tagata e mulimuli ane avea ma soo, ae e tatou te olioli uma ona sa faia uma so tatou sao i le saʻilia o tagata. O se faaaʻoaʻoga, e iva tausaga o paeonia Brandon i se oganuu e lē talilelei mai tagata. Ua faapea mai o ia: “Ou te fiafia e talaʻi atu le tala lelei ona o le mea lea e finagalo Ieova ou te faia. Na amata ona ou paeonia ina ua faatoʻā uma aʻu aʻoga. Ou te fiafia e faalaeiau uso talavou i le matou faapotopotoga ma vaai atu o loo latou agaʻigaʻi i luma faaleagaga. Ina ua uma ona ou auai i le Aʻoga Faale-Tusi Paia mo Uso Nofofua, sa tofia aʻu e paeonia i se oganuu fou. Ou te leʻi maua lava se isi i le oganuu na agaʻigaʻi i luma ma papatiso, ae ua maua e isi. Ou te fiafia ona sa ou fuafua e faia se sao atoatoa i le galuega o le faia o isi ma soo.”​—Fai. 11:6.

11. O le ā se isi vala o le auaunaga paia o loo olioli ai le toʻatele o talavou?

¹¹ E tele avanoa e mafai ona e maua e auauna ai iā Ieova. O se faataʻitaʻiga, e toʻatele talavou o loo tauofo i galuega o faugāfale. E  faitau selau maota fou mo sauniga o loo manaʻomia. O le fausiaina o na maota o se auaunaga paia e faamamaluina ai le Atua ma maua ai le fiafia. E pei lava foʻi o isi vala o le auaunaga paia, e te olioli i faatasiga ma uso ma tuafāfine e tou te galulue faatasi. O galuega faugāfale o le Malo o se toleniga lelei foʻi ona e aʻoaʻoina ai oe ia galue ma le faaeteete mo le saogalemu, ia avea o se tagata toʻaga, ma ia galulue soosootauʻau ma ē o loo taʻimua.

12. O ā avanoa e mafai ona maua e se talavou pe a paeonia?

¹² Ua faapea mai se uso e igoa iā Kevin: “Talu mai lava a o oʻu laʻitiiti, sa iai loʻu sini ia auauna faataimi atoa iā Ieova. O lea, na amata laʻu paeonia ina ua 19 oʻu tausaga. Na ou faigaluega faavaitaimi i se uso kamuta ina ia lagolago ai laʻu paeonia. Na ou aʻoaʻoina ai le auala e ato ai taualuga o fale, ma faapipii faamalama ma faitotoʻa. Mulimuli ane, e lua tausaga na ou galue ai i se vaega e saunia fesoasoani laveaʻi mo taimi o afā, i le toe fausia o Maota mo Sauniga ma fale o uso. Ina ua ou faalogo o loo iai se manaʻoga mo faugāfale i Aferika i Saute, sa ou talosaga loa ma na valaaulia ai aʻu. I inei i Aferika, pe a uma ona ou galue mo ni nai vaiaso i se Maota mo Sauniga, ona ou siitia lea e galue i se isi foʻi Maota. Ua pei la matou vaega o faugāfale o se aiga. E matou te nonofo ma galulue faatasi, ma suʻesuʻe faatasi le Tusi Paia. O loo oʻu olioli foʻi e talaʻi faatasi ma uso Aferika i vaiaso taʻitasi. O fuafuaga na ou faia a o oʻu laʻitiiti, ua ou tofo ai i le fiafia i ni auala ou te leʻi mafaufau muamua i ai.”

13. E faapefea i le auaunaga i le Peteli ona maua ai e talavou le fiafia?

¹³ O nisi o ē na faataunuu a latou fuafuaga ia auauna faataimi atoa iā Ieova, ua galulue nei i le Peteli. O le auaunaga i le Peteli e maua ai se olaga fiafia, ona o mea uma e te faia i inā e mo Ieova. O loo fesoasoani le aiga Peteli i le saunia o meaʻai faaleagaga. Ua faapea mai Dustin,  o sē e galue i le Peteli: “Sa avea le auauna faataimi atoa ma oʻu sini ina ua iva oʻu tausaga, ma na amata ona ou paeonia ina ua uma aʻu aʻoga. Ina ua mavae le tasi ma le ʻafa tausaga, sa valaaulia loa aʻu e auauna i le Peteli. O i inā na aʻoaʻoina ai aʻu i le auala e faaaogā ai masini lomitusi, ma mulimuli ane galue i le vaega e faapolokalameina komepiuta. I le Peteli, ou te fiafia e faalogologo tuusaʻo i lipoti o le agaʻigaʻi i luma o le galuega o le faia o isi ma soo i le lalolagi aoao. O se fiafiaga tele le galue i inei ona o galuega o loo matou faia, e fesoasoani i tagata ina ia mafuta vavalalata atu ai iā Ieova.”

14. E faapefea ona e sauniuni ina ia auai i le faiva faataimi atoa?

¹⁴ E faapefea ona e sauniuni ina ia auai i le faiva faataimi atoa? O le vala e sili ona tāua, o le atiaʻe o uiga faaleagaga ia e fesoasoani iā te oe ina ia taulau ai e auauna faataimi atoa iā Ieova. O lea, ia toʻaga e suʻesuʻe le Tusi Paia, manatunatu loloto i mea na e suʻesuʻeina, ma ia taumafai e faailoa atu lou faatuatua i taimi o sauniga a le faapotopotoga. A o e aʻoga, e mafai ona faaleleia lou tomai e talanoa atu ai i isi e faatatau i le tala lelei. Ia aʻoaʻo le auala e te faaalia ai le naunau i tagata e ala i le fesili atu i ai ma le faautauta mo ni o latou manatu, ma faalogologo lelei i a latou tali. E mafai foʻi ona e tauofo e faia isi galuega i le faapotopotoga e pei o le fesoasoani i le faamamāina ma le tausia lelei o le Maota mo Sauniga. E fiafia Ieova e faaaogā ē e lotomaulalo ma lotomalilie e fai so o se galuega. (Faitau le Salamo 110:3; Galu. 6:1-3) Na valaaulia e le aposetolo o Paulo Timoteo e galue o se misionare ona sa “taʻuleleia o ia e uso.”​—Galu. 16:1-5.

15. E faapefea ona e fuafua e maua se galuega e tausia ai oe?

¹⁵ E masani lava e manaʻomia e tagata talaʻi faataimi atoa ni galuega e tausia ai i latou. (Galu. 18:2, 3) Atonu e mafai ona e aʻoaʻoina se matātā e lē umi se taimi e alu ai, ina ia maua ai sou tomai mo se galuega faavaitaimi o loo maua i lou vaipanoa. A o fai au fuafuaga, ia talanoa atu i le ovasia o le matagaluega ma paeonia i lau matagaluega. Fesili i ai po o ā galuega e fetaui mo paeonia. Pe a uma, ua taʻua i le Tusi Paia “ia tuuina atu iā Ieova au galuega, ona matuā faatumauina ai lea o au fuafuaga.”​—Faata. 16:3; 20:18.

16. E faapefea i le auauna faataimi atoa iā Ieova a o talavou, ona saunia ai oe mo isi tiute tauave i le lumanaʻi?

¹⁶ E mafai ona e mautinoa e finagalo Ieova ia e “taofimau” i se lumanaʻi fiafia. (Faitau le 1 Timoteo 6:18, 19.) O le auaunaga faataimi atoa e maua ai le avanoa e galulue faatasi ai ma isi auauna faataimi atoa, ma fesoasoani e avea ai oe ma Kerisiano taʻumatuaina. Ua iloa e le toʻatele o le auauna faataimi atoa iā Ieova a o talavou, na fesoasoani iā i latou ina ia maua ai ni faaipoipoga taulau manuia. E masani lava o i latou na paeonia a o leʻi faaipoipo, ua faaauau ona paeonia faatasi o ni ulugalii.​—Roma 16:3, 4.

17, 18. E faapefea i le faia o fuafuaga ona aofia ai lou loto?

¹⁷ O le faia o fuafuaga e aofia ai lou loto. Ua taʻua i le Salamo 20:4 e faatatau iā Ieova: “Tau ina ia foaʻi mai e ia iā te oe e tusa ma mea o naunau i ai lou loto, ma tau ina ia faataunuuina e ia au fuafuaga uma.” O lea, ia mafaufau po o le ā e te manaʻo e fai i lou olaga. Ia mafaufau i mea o loo faia e Ieova i le taimi lenei, ma auala e faia ai sou sao i le auaunaga iā te ia, ona fuafua loa lea e fai le mea e faafiafiaina ai o ia.

¹⁸ E matuā faafiafiaina oe i le auauna faataimi atoa iā Ieova, ona o se olaga e faamamaluina ai o ia. O lea, “ia e matuā fiafia iā Ieova, ona foaʻi mai lea e ia o mea e manaʻo i ai lou loto.”​—Sala. 37:4.