SA MASANI Pesaleli ma Oliavu i galuega faufale. A o pologa i Aikupito, atonu e lē galo iā i laʻua le galulue mamafa e faia le tele o piliki. Ua mavae na aso, ma ua tofia nei i laʻua e avea ma tufuga sili e taʻimua i le fausiaina o le faleʻie paia. (Eso. 31:1-11) E ui i lea, e lē toʻatele nisi sa vāai i galuega mataʻina sa laʻua faia. Pe na avea lenā ma itu sa laʻua lē fiafia ai? Pe e iai se tāua o le iloaina e isi o a la galuega? Ae faapefea au galuega?

E ese le mataʻina o meafale sa iai i le faleʻie paia. O se faaaʻoaʻoga, sa iai kerupi auro i luga o le atolaau o le feagaiga, ma na faamatalaina e Paulo o ni mea “mamalu.” (Epe. 9:5) Seʻi mafaufau i le matagofie o nei kerupi na faia i le auro!—Eso. 37:7-9.

Pe a faapea e maua i aso nei meafale na faia e Pesaleli ma Oliavu, atonu o le a teuina i se fale mataaga taʻutaʻua, ma o le a matamata i ai le toʻatele. Ae i le taimi na faia ai, pe e toʻatele nisi na vāai i ai? Sa tuuina kerupi i le Mea e Sili Ona Paia, ma e na o le ositaulaga sili e faatasi ona ulu atu i ai i le tausaga, i le Aso o le Togisala. (Epe. 9:6, 7) O lea, e lē toʻatele nisi na vāai i ai.

Pe afai o oe o Pesaleli po o Oliavu ma na e galue mamafa e faia na galuega mataʻina, o ā ni ou faalogona pe afai e lē toʻatele nisi e vāai i au galuega? I aso nei, e faatoʻā lagona e tagata ua atoa mea uma, pe a viiviia i latou e isi tagata. O le mea lenā e fua i ai le tāua o a latou galuega. Peitaʻi, e ese mai ai auauna a Ieova. E pei o Pesaleli ma Oliavu, e faamalieina i tatou i le faia o le finagalo o Ieova, faapea le faafiafiaina o ia.

I aso o Iesu, sa masani ona faia e taʻitaʻi lotu tatalo e faaofo ai tagata. Peitaʻi, na fautua mai Iesu ina ia tatalo i se auala faamaoni, e aunoa ma le faia ma se faanaunauga ina ia viia i tatou e isi tagata. Pe a faia faapea, “ona tauia ai lea o  oe e lou Tamā, o lē o loo silasila mai iā te oe mai le mea lilo.” (Mata. 6:5, 6) E manino mai e lē tāua manatu o isi e faatatau i a tatou tatalo, peitaʻi, e sili ona tāua le silafaga a Ieova. O lona finagalo e fua i ai le tāua o a tatou tatalo. O le tulaga foʻi lenā e faatatau i la tatou auaunaga paia. E lē fuaina le tāua o a tatou galuega i viiga mai i tagata, peitaʻi e tatau ona faafiafiaina ai Ieova ʻo lē o loo silasila mai i le mea lilo.’

I le taimi na māeʻa ai ona fausia le faleʻie paia, sa “ufitia le faleʻie o le feiloaʻiga i le ao ma ua tumu le faleʻie paia i le pupula o Ieova.” (Eso. 40:34) Maʻeu se faailoaga o le finagalo malie o Ieova! O le ā sou manatu, o ā ni faalogona o Pesaleli ma Oliavu i lenā taimi? E ui e leʻi tusia o laʻua igoa i luga o a laʻua galuega, ae sa faamalieina i laʻua i le iloaina o loo faamanuia Ieova i a laʻua taumafaiga. (Faata. 10:22) I tausaga mulimuli ane, e mautinoa lo laʻua fiafia i le vaai atu o loo faaaogā pea a laʻua galuega i le auaunaga iā Ieova. Pe a toe faatutūina mai i laʻua i le lalolagi fou, e mautinoa o le a faafiafiaina i laʻua i le iloaina sa faaaogā le faleʻie paia i le tapuaʻiga moni mo le pe ā ma le 500 tausaga.

I aso nei i le faalapotopotoga a Ieova, e lē o faailoaina mai suafa o le ʻaufaiata, ʻautusiata, o ē fai musika, o ē puʻeata, le ʻaufaaliliu ma ē tusia lomiga. O lea, e lē iloa atu e nisi a latou galuega. O le tulaga foʻi lenā o galuega o loo faia i le silia i le 110,000 faapotopotoga i le lalolagi aoao. Po o iloa atu e nisi galuega a le auauna o tupe e faia i faaiʻuga o masina taʻitasi? Po o iloa atu e nisi le sauniaina e le failautusi o le lipoti o le faiva i le fanua a le faapotopotoga? Po o mātauina e nisi galuega a uso ma tuafāfine o loo faaleleia Maota mo Sauniga?

I le taimi na maliliu ai Pesaleli ma Oliavu, e la te leʻi mauaina ni faailoga, pine po o ni maa faamanatu e faailoa ai a laʻua galuega mataʻina sa fai. Peitaʻi, sa la maua se mea e sili atu ona tāua, o le finagalo malie o Ieova. E tatou te mautinoa sa mātauina e Ieova a laʻua galuega. O lea, seʻi o tatou faaaʻoaʻo i la laʻua faaaʻoaʻoga o le faia ma le lotomaulalo ma le lotomalie o le auaunaga.