Ua Fesili Mai le ʻAufaitau

Pe e Faataga e le Atua le Tele o Avā?

E leai, o le faatulagaga na faataatia e le Atua i Etena i le uluaʻi faaipoipoga, ia tasi le avā. Sa mulimuli ane toe faamausalī e Iesu lenā faatulagaga mo ona soo.—Kenese 2:18-24; Mataio 19:4-6.

Ae i tane na ola i le vaitaimi a o lumanaʻi le faa-Kerisiano, e pei o Aperaamo, Iakopo, Tavita, ma Solomona, sa tele a latou avā. Peitaʻi, ua faapefea ona faamatala e le Tusi Paia lenā faatulagaga? O loo faaalia mai i le Tusi Paia le tele o faafitauli ma faigatā na aliaʻe, i aiga o Aperaamo ma Iakopo ona o lea faiga. (Kenese 16:1-4; 29:18–30:24) Mulimuli ane, na aofia ai i le Tulafono a le Atua le faatonuga lenei i tupu taʻitasi: “Aua . . . neʻi faatoʻateleina e ia o avā māna, neʻi liliueseina ai lona loto.” (Teuteronome 17:15, 17) E leʻi utagia e Solomona lenā tulafono, ona na sili atu i le 700 ana avā! O le itu e faanoanoa ai, ona o taaʻiga leaga a avā e toʻatele a Solomona, na faaliliueseina ai lona loto mai iā Ieova. (1 Tupu 11:1-4) E manino mai, e leai se faamatalaga lelei o taʻua i le Tusi Paia e faatatau i le tele o avā.

Peitaʻi, atonu e taumānatu nisi pe aiseā na finagalo ai le Atua e onosai i le tele o avā a ona tagata. O se faataʻitaʻiga: Pe na iai se taimi na e onosai ai mo sina taimi ina ia tuu pea se meafale ae ua manaʻomia ona aveese, ona o lou manatu e faapea o le a tele ai le mau galuega e fai? O le mea moni, e sili ona maualuga ala ma manatu o le Atua nai lo o i tatou. (Isaia 55:8, 9) Peitaʻi, atonu o le a tatou malamalama i nisi o māfuaaga aogā, na onosai ai le Atua mo sina taimi i le tele o avā a ona tagata.

Ia manatua, i Etena, na folafola mai ai e Ieova se “fanau” o le a faaumatiaina Satani. Mulimuli ane, na taʻu atu iā Aperaamo o le a fai o ia ma tamā o se nuu tele, ma o le a tupuga mai i lona gafa le Fanau folafolaina. (Kenese 3:15; 22:18) Sa taumafai malosi Satani e taofia le fanau mai o lenā Fanau. O lea na ia matuā manaʻo ai e faaumatia le nuu anamua o Isaraelu. Sa masani ona ia faaosoosoina le nuu e faia le agasala, ina ia latou lē toe maua ai le finagalo malie o le Atua ma lana puipuiga.

Ina ia fesagaʻia faaosoosoga, sa auina atu pea e Ieova ana perofeta e lapataʻia ona tagata pe a latou see ese mai i tapulaa amiotonu. Peitaʻi, sa ia muaʻi silafia o le a iai taimi e lē usiusitaʻi ai ona tagata, e oo lava i se tulafono faigofie e pei o le tulafono i le ifo i tupua. (Esoto 32:9) Afai e faigatā ona latou usitaʻi i se tulafono faigofie, o le a faapefea la ona latou usitaʻia se tulafono e faasā ai le tele o avā? Na silafia lelei e Ieova uiga o tagata, ma sa ia silafia foʻi e leʻi oo i le taimi e faasā ai lea faiga, o se faiga ua leva ona iai i na aso. Pe ana fai e faasā e Ieova, semanū e faigofie lava ona maua e Satani se auala e faaosooso ai Isaraelu e faia le agasala.

E iai foʻi isi itu na aogā ai le onosai o le Atua mo sina taimi, i le tele o avā a tagata Isaraelu. Na vave ai ona faatoʻateleina le nuu. Ona o lea, na faamautinoa ai o le a faaauau pea ona iai le nuu seʻia afio mai le Mesia. Ona o ia taimi faigatā, atonu foʻi na puipuia ai nisi fafine ma maua ai o latou aiga ma mea e nonofo ai.

Peitaʻi, ia manatua foʻi, e lē o Ieova na amataina lea faiga. Ae sa na o sina taimi na ia onosaia ai, ma sa ia aumaia faatonuga ina ia aua ai neʻi faileagaina avā. (Esoto 21:10, 11; Teuteronome 21:15-17) Ina ua oo i le taimi a Ieova e faamuta ai lea faiga i ona tagata, e ala i lona Alo, na ia toe faamausalī ai le faatulagaga o le faaipoipoga lea na ia faavaeina i Etena. O lea, na faasā ai e Iesu le tele o avā a ona soo. (Mareko 10:8) Na oo ina matuā manino mai le mea moni lenei e faapea: Na aogā le Tulafono a Mose mo lenā taimi, ae ua sili atu ai ona aogā “le tulafono a le Keriso.”—Kalatia 6:2.