Ua Fesili Mai le ʻAufaitau . . .

Po o le a Faaumatia le Lalolagi?

▪ Na talitonu nisi e faaumatia le lalolagi iā Oketopa 21, 2011. Ae e leʻi taunuu. E leʻi taunuu le valoaga a se tagata faasalalau o le leitiō i Amerika e suafa iā Harold Camping. Na ia valoia o le a oo mai le Aso Faamasino iā Me 21, 2011, lea o le a lūlū ai se mafuiʻe tele i le lalolagi atoa, ma mulimuli ane, pe a mavae le lima masina, o le a faaumatia loa le lalolagi iā Oketopa 21.

Peitaʻi, o le a lē taitai ona faaumatiaina le lalolagi. O le a lē faatagaina e Lē na foafoaina le lalolagi lenā mea e tupu. Ua faapea mai lana Afioga: “Ua e matuā faatumauina foʻi le lalolagi, ina ia tumau ai pea.”—Salamo 119:90.

Peitaʻi, e ono tetee mai nisi o tagata e faitau i le Tusi Paia ma faapea mai o le a faaumatia le lalolagi i se afi. E latou te faaaogā le 2 Peteru 3:7, 10 e lagolago ai lo latou manatu: “O le afioga foʻi lea ua tuu ai le lagi ma le lalolagi o loo iai i le taimi nei mo le afi, ma ua taofia seʻia oo i le aso faamasino ma le faaumatiaga o tagata faalēmataʻu . . . Ae e oo mai le aso o Ieova e pei o se gaoi, e vave mou atu ai le lagi ma le gogolo tele, e mavae atu foʻi mea o fai aʻe ai ona o le aasa tele, e faaalia foʻi le lalolagi ma ana galuega.” Pe e ao ona manatu i upu a le aposetolo o Peteru, o se mea moni lava o le a tupu?

E leai. Aiseā? Ona e tatau ona ōgatusa le faauigaina o nei fuaiupu ma le tusi atoa a Peteru, ma manatu o loo i le Tusi Paia atoa. Pe afai e manatu i nei fuaiupu o se mea moni o le a tupu, o lona uiga la o le a faaumatia le lalolagi po o le vateatea, lea e aofia ai le piliona ma le piliona o fetu ma isi mea o iai, ona o se paneta e tasi o loo iai tagata leaga. Pe e te faatamaʻia se matafaga telē ona e te lē o fiafia i se oneone se tasi? E lē talafeagai lenā mea! E faapena foʻi ona lē faaumatia e Ieova le vateatea aoao na ia foafoaina, ona o le fouvale o se tasi o ana foafoaga.

E lē gata i lea, e matuā feteenaʻi lenā manatu ma upu a Iesu Keriso o lē na faapea mai: “E fiafia o ē e agamalu, auā e fai mo latou tofi le lalolagi.” (Mataio 5:5; Salamo 37:29) Po o le a fausia e se tamā alofa se fale matagofie mo lona aiga, ona ia toe susunuina lea? (Salamo 115:16) E matuā valea lenā mea! E lē gata o Ieova o Lē na foafoaina mea uma, ae o ia foʻi o se Tamā alofa.—Salamo 103:13; 1 Ioane 4:8.

Na faaaogā e Peteru le upu “lalolagi” i se auala faafaatusa, e faasino atu ai i se sosaiete o tagata—o se sosaiete o tagata amioleaga. Ia mātau, na faatusatusa e Peteru lenei mea i le Lolo i aso o Noa. (2 Peteru 3:5, 6) I lenā lolo, e na o tagata amioleaga na faaumatia ai, ae na faasaoina le tagata amiotonu o Noa ma lona aiga, ma e leʻi faaleagaina le lalolagi. I se tulaga taitutusa, na faaaogā foʻi e Peteru le upu “lagi,” i se auala faafaatusa. Ina ua ia taʻua le “lagi,” sa faasino atu o ia i pulega faaletagata. O lea la, o le a lē toe iai le amioleaga ma e faapena foʻi i faigāmalo leaga, lea o le a faaumatia ma suia i le pulega faalelagi a le Atua, po o le Malo.—Tanielu 2:44.

O lea la, po o le a faaumatia le lalolagi paneta? E leai. O le a faaumatia le lalolagi faafaatusa, po o le sosaiete o tagata amioleaga. A o le lalolagi ma le sosaiete o tagata e amioatua, o le a tumau ia e faavavau.—Faataoto 2:21, 22.