O le Tusi Lona Lua o Samuelu 12:1-31
12 Ona auina atu lea e Ieova o Natano+ iā Tavita. Ua alu atu Natano iā te ia,+ ma faapea atu: “Sa iai ni tagata se toʻalua i le tasi aai, e mauʻoa le tasi, ae e mativa le isi.
2 Sa matuā tele mamoe ma povi a le tagata mauʻoa;+
3 ae e leai se mea a le tagata mativa, e na o le tasi lava le tamaʻi mamoe fafine na ia faatauina mai.+ Sa tausia e le tamāloa le tamaʻi mamoe, ma na ola aʻe faatasi ma ia ma ona atalii. Sa ʻai foʻi le tamaʻi mamoe i fasi meaʻai a le tamāloa, sa inu foʻi mai i lana ipu, ma moe i lona fatafata. Sa pei lava o se afafine o le tamāloa.
4 Mulimuli ane, ua alu ane se tagata e asiasi i le tamāloa mauʻoa, ae e na te leʻi avea sana mamoe po o sana povi, e sauni ai se meaʻai a le tagata malaga ua alu atu iā te ia. Ae ua ia ave le tamaʻi mamoe a le tagata mativa, ma sauni ai se meaʻai a le tagata na alu atu iā te ia.”+
5 Ona matuā ita ai lea o Tavita i lea tagata, ma ua faapea mai iā Natano: “Ou te tautō iā Ieova le Atua soifua,+ e tatau ona oti le tagata na faia lenei mea!
6 E tatau foʻi ona ia totogiina le tamaʻi mamoe i ni mamoe se fā,+ ona o lenei mea na ia faia, auā e leʻi alofa mutimutivale o ia.”
7 Ona fai atu lea o Natano iā Tavita: “O oe lava le tagata! O le mea lenei ua fetalai mai ai Ieova le Atua o Isaraelu: ‘O aʻu lava na faauuina oe e fai ma tupu iā Isaraelu,+ o aʻu foʻi na laveaʻia oe mai i le lima o Saulo.+
8 Na ou nofosauni e avatu iā te oe le fale o lou matai,+ ma avā a lou matai+ i lou fatafata, ma avatu foʻi iā te oe le aiga o Isaraelu ma Iuta.+ Afai foʻi e lē lava na mea, na ou nofosauni e faia le tele o isi mea mo oe.+
9 Aiseā ua e ʻinoʻino ai i le afioga a Ieova i lou faia o lenei mea leaga i lana silafaga? Ua e fasia i le pelu+ Uria le tagata Hetī, ma ua e ave lana avā e fai ma au avā,+ ina ua uma ona e fasiotia o ia i le pelu a le fanauga a Amoni.+
10 O lenei, o le a lē mavae le pelu mai i lou aiga,+ ona ua e ʻinoʻino iā te aʻu ina ua e ave le avā a Uria le tagata Hetī e fai ma au avā.’
11 O le mea lenei ua fetalai mai ai Ieova, ‘Ou te faatupuina mai i lou lava aiga o puapuaga e oo iā te oe;+ ou te ave foʻi au avā mai i ou lava luma ma avatu i se tasi tagata,*+ e momoe foʻi o ia ma au avā a o vāai i ai tagata uma.+
12 E ui na e faia faalilolilo lenā mea,+ ae o le a ou faia lenei mea i luma o Isaraelu uma, ma a o vāai i ai tagata uma.’”
13 Ua fai mai Tavita iā Natano: “Ua ou agasala iā Ieova.”+ Ona fai atu lea o Natano iā Tavita: “Ua faamagaloina e Ieova lau agasala,+ ma e te lē oti.+
14 Ae ona ua e matuā lē faaaloalo iā Ieova i lenei mea, o le mea lea e oti ai lava le tama ua fanau mai iā te oe.”
15 Ona alu ai lea o Natano i lona fale.
Ae ua taia e Ieova le tama na fanau mai e le avā a Uria iā Tavita, ma ua maʻi ai.
16 Ona talosaga lea o Tavita i le Atua moni e faatatau i le tama. Ua anapogi Tavita, ma ua alu o ia i pō uma ma taoto i le eleele i le pō atoa.+
17 Ua tutū atu toeaina o lona aiga e taumafai e faatula‘i iā te ia mai i le eleele, ae ua musu o ia ma e leʻi ʻai foʻi faatasi ma i latou.
18 Ona oti ai lea o le tama i le aso lona fitu, ae ua fefefe auauna a Tavita e taʻu atu iā te ia ua oti le tama. Ua latou faapea ane: “Na tatou talanoa atu iā te ia a o ola le tamaitiiti, ae e leʻi faalogo mai iā i tatou; e faapefea la ona tatou ta‘u atu iā te ia ua oti le tama? Atonu o le a ia faia ai se mea leaga.”
19 Ua vaai atu Tavita o femusua‘i ana auauna, ona iloa lea e Tavita ua oti le tama. Ona fesili atu lea o Tavita i ana auauna: “Po ua oti le tama?” Ua latou tali mai: “Ua oti o ia.”
20 Ua tulaʻi Tavita mai i le eleele, ua tāʻele ma uu lona tino i le suāuu+ ma sui ona ofu; ua alu atu i le fale+ o Ieova ma ifo ai. Mulimuli ane, ua sau i lona fale ma fai atu e laulau mai lana meaʻai, ma ua ʻai o ia.
21 Ona fesili mai lea o ana auauna iā te ia: “Aiseā ua e gaoioi ai faapea? Auā a o ola le tama, sa e anapogi ma tagi pea; a o lenei ua oti le tama, ae ua e tū i luga ma ua e taumafa.”
22 Ua fai atu o ia: “Na ou anapogi+ ma tagi pea a o ola le tama, auā na ou faapea ifo, ‘O ai na iloa po o le a manatu mai ai Ieova iā te aʻu, ma ola ai pea le tama?’+
23 A o lenei ua oti o ia, aiseā la ou te saga anapogi ai? Pe e mafai ea ona ou toe faafoʻi mai o ia?+ E iai se aso ou te oti ai foʻi aʻu,+ ae e lē toe foʻi mai o ia iā te aʻu.”+
24 Ona faamāfanafana lea e Tavita o Patesepa+ lana avā. Ua alu atu foʻi o ia ma momoe ma Patesepa. Mulimuli ane, ua fanaua e Patesepa se tama tama, ma ua faaigoa o ia iā Solomona.*+ Ua alofa foʻi Ieova iā te ia,+
25 ma ua ia auina atu le perofeta o Natano+ e faaigoa iā te ia o Ietitaia,* ona o le alofa o Ieova iā te ia.
26 Ua tau pea Ioapo faasaga iā Rapa+ le aai o le fanauga a Amoni,+ ma ua ia faoa se vaega o le aai.*+
27 Ona aauina atu lea e Ioapo o avefeʻau iā Tavita, ua faapea atu: “Na ou siitaua iā Rapa,+ ma ua ou faoa mea e maua ai vai o le aai.*
28 O lenei, ia faapotopoto le ‘autau o totoe, ma ia siitaua ma faoa le aai atoa; ina ne‘i o‘u faoa le aai ma viia ai a‘u.”*
29 Ona faapotopoto lea e Tavita o le ‘autau uma, ma ō atu e tau ma Rapa ma faoa ai le aai.
30 Ona ia aveese lea o le pale mai i le ulu o Malekama.* O le mamafa o le pale, e tasi le taleni* o auro, ma na teuteuina i maa tāua; ua faaee foʻi i le ulu o Tavita. Na ia ave foʻi le tele o le vete+ mai i le aai.+
31 Ua ia aumaia foʻi tagata sa iai i le aai, ma tuuina atu i latou e galulue e ʻili maa, ma fai galuega i meafaigaluega maamaʻai e faia i le uʻamea ma to‘i uʻamea, ma le faia o piliki. O le mea lenā na ia faia i aai uma o le fanauga a Amoni. Mulimuli ane, ona toe foʻi atu lea o Tavita ma le ‘autau uma i Ierusalema.
Faamatalaga Pito i Lalo
^ Po o “i lou uso a tagata.”
^ E mai i se upu Eperu o lona uiga o le “Filemu.”
^ Lona uiga “Lē ua Alofagia e Ioa.”
^ Po o “le aai o le malo.”
^ Epe., “le aai o vai.”
^ Epe., “ma taʻua ai loʻu igoa.”
^ Atonu o se faatusa o le atua o tagata Amonī, ma e taʻua foʻi o Moloka po o Melekoma.
