Amosa 5:1-27
5 “Le aiga o Isaraelu e, inā faalogo mai ia i lenei upu ua ou saunia mo outou, o se pese faanoanoa:*
2 ʻUa paʻū le taupou o Isaraelu;E lē mafai ona toe tū i luga.
Ua tuulafoaʻiina o ia i lona lava laueleele;E leai se isi e faatulaʻi iā te ia.’
3 “O le fetalaiga lenei a le Alii Pule Silisili Ese o Ieova:
‘O le aai e ō atu ma le toʻaafe i le taua, e na o le toʻaselau e totoe;A o le aai e ō atu ma le toʻaselau, e na o le toʻasefulu e totoe i le aiga o Isaraelu.’+
4 “Auā o le fetalaiga lenei a Ieova i le aiga o Isaraelu:
‘Ia saʻili mai iā te aʻu ma ola ai pea.+
5 Aua le saʻili i Peteli,+Aua tou te ō atu i Kilikala+ pe sopo atu i Peresepa,+Auā o le a ave faapagota lava Kilikala,+Ma o le a lē toe iai se mea e totoe i Peteli.*
6 Inā saʻili ia iā Ieova ma ola ai pea,+Ina neʻi oo atu o ia e pei o se afi i le aiga o Iosefa,Ma faaumatia ai Peteli ae e leai se tasi e tineia.
7 Ua outou liliu le faamasinotonu i le laau oona,*Ma ua outou lafo i lalo le amiotonu i le eleele.+
8 O Lē na faia le faaputuga fetu o Kima ma le faaputuga fetu o Kisila,*+O Lē o loo liua le pogisa tele i le malamalama o le taeao,O Lē foʻi ua faapogisaina le ao e pei o le pō,+O Lē o loo valaau i vai o le samiIna ia liligi ifo i luga o le fogāeleele,+O Ieova o lona suafa lea.
9 E na te faaoo faafuaseʻi atu le faatafunaga i lē ua malosi,Ma le faatafunaga i nofoaga malupuipuia.
10 Ua latou feita i ē ua avatuina aʻoaʻiga i le faitotoʻa o le aai,Ma ua latou ʻinoʻino i ē e tautatala faamaoni.+
11 Talu ai ua outou tāpā mai i le tagata mativa le totogi o lona faaaogāina o le laueleele,*Ma ua outou aumai pea le lafoga o fatu mai iā te ia,+O le a outou lē nonofo ai pea i fale na outou faia i maa na tipiina,+Pe feinu i uaina mai i togāvine mananaia na outou totōina.+
12 Auā ua ou iloaina le tele o a outou fouvalega*Ma le mataʻutia o a outou agasala,Ua outou faasoesa i lē ua amiotonu,Ua outou talia foaʻi faaalatua,*Ma ua outou teena aiā tatau a tagata matitiva i le faitotoʻa o le aai.+
13 O lea, o i latou e iai le tofā mamao o le a fifilemu pea,Auā o le taimi lea o puapuaga.+
14 Ia saʻili i le lelei ae e lē o le leaga,+Ina ia outou ola ai pea.+
Atonu o le a faatasi ai Ieova le Atua o ʻau ma outou,E pei ona outou fai mai ai.+
15 Ia ʻinoʻino i le leaga ae naunau i le lelei,+Ia outou faatumau le faamasinotonu i le faitotoʻa o le aai.+
Atonu o le a alofa mai ai Ieova le Atua o ʻauI ē o totoe o Iosefa.’+
16 “O lea, o le fetalaiga lenei a Ieova le Atua o ʻau, o Ieova lava:
‘O le a iai le tagiauē i nofoaga faitele umaMa o le a faapea mai tagata i auala uma: “Oi auē! Oi auē!”
E latou te valaau i le faifaatoʻaga ia faavauvau,Ma ē e atamamai i le faia o auega ina ia tagiauē.’
17 ‘O le a iai le tagiauē i togāvine uma;+Auā ou te ui atu iā te outou,’ ua fetalai mai ai Ieova.
18 ‘Oi talofa i ē ua mananaʻo tele i le aso o Ieova!+
O le ā le mea tou te faatalitalia e tupu i le aso o Ieova?+
O le a pogisa lea aso, ma e leai se malamalama.+
19 O le a pei o se tagata e sola mai i se leona ae e fetaiaʻi ma se pea,Ma pe a ulu atu o ia i lona fale ma faalagolago lona lima i le puipui, ae ū e se gata.
20 Pe e lē o le aso ea o Ieova o le pōuliuli ae e lē o le malamalama;Pe e lē o iai ea le pogisa tele, ae e lē o le pupula?
21 Ou te ʻinoʻino, ou te teena a outou tausamiga,+Ma ou te lē fiafia foʻi i le manogi o a outou fonotaga paia.
22 E tusa pe tou te fai taulaga iā te aʻu i taulaga mū ma meaalofa,Ou te lē fiafia lava i na taulaga;+Ou te lē vaai ifo foʻi i a outou taulaga faifaatasi o manu pepeti.+
23 Aua neʻi e toe usuina mai au pese leoleoā;Ma ia aua neʻi oʻu faalogo i le leo o au meafaifaaili e iai uaua.+
24 Ae ia tafe ifo le faamasinotonu e pei o vai,+Ma le amiotonu e pei o vai e tafe tetele pea lava.
25 Le aiga o Isaraelu e, pe na outou aumaia ea iā te aʻu taulagaMa meaalofa mo tausaga e 40 i le toafa?+
26 O le a outou ave Satuka lo outou tupu ma Kiuna,*O a outou faatusa ia, o le fetu o lo outou atua, lea na outou faia mo outou lava,
27 Ou te tuuina atu foʻi outou ia ave faapagota i tala atu o Tamaseko,’+ ua fetalai mai ai lē e ou le suafa o Ieova, o le Atua o ʻau.”+
Faamatalaga Pito i Lalo
^ Po o le “pese o auega.”
^ Pe atonu “O Peteli foʻi o le a avea ma mea e iai le mana faataulāitu.”
^ Po o le “i se mea oona.”
^ O igoa nei o faaputuga fetu e foliga e pei o ni manu po o isi mea pe a tilotilo mamao atu mai i le lalolagi.
^ Po o “le lafoga o le fanua.”
^ Po o le “tupe ina ia natia ai se mea sesē.”
^ Po o “solitulafono.”
^ O nei atua atonu e faasino atu i le paneta o Saturn, lea na avea o se atua e tapuaʻi ai.